TAKADA 9
9
Juyi ni Shawulu
Anki 22.6-16; 26.12-18
1Shawulu sigeba ni ba yayagizi ni Obagizi takaasi soseyi. E te anya totolo pirisi 2Shawulu minya tolense ni Yawudawa de e beyi takada de e te a kolonwa ni Dimasiku, nkaa de e samu nsubiya turiki Obagizi, menza ko mata, de e ka su domuna zo nsu a Wurishelima. 3De Shawulu ma kiya tepiya kusa ni Dimasiku, dandani totolo asikye dege bisi gyowe yi. 4Shawulu puari a kisi se e zi murinya daa nkye, <<Shawulu, Shawulu, mina sa de ki ma ba ni takaasi?>>
5Shawulu minya nkye, <<Waa ma e ke, Obagizi?>> Yesu keleba nkye
<<E ni na ni ma Yesu, de ki ma ba ni takaasi. 6Yesu gye Shawulu nkye, <<Kuzukam dege de ki te a a siki totolo geri, anya ni sua gye ke mbode ka yi.>>
7Ntani de su ma yi tepiya nja Shawulu su sakisi su yi yaa beta ba; su zi moshi sede su geni nseda ba. 8Shawulu dege a kisi, sede e bure ndani e geni anya kuma gagaba. Se su keyi nani su keyi ta Dimasiku. 9Shawulu yi kwana wuku e ma geni ba, e si mbosi ko sha riki ba.
10Yayagizi ni Obagizi daa ma a siki Dimasiku seni yi ma Ananiya. Obagizi yi beta a siki naasi nkye, <<Ananiya!>>
E keleba nkye, <<E ni naka, Obagizi.>>
11Obagizi gye yi nkye, <<Dege de ki biya turiki tiriri, ki ta a gizi ni Yawuda de ki minya beta ni nseminji de zo dege Tasu seni yi ma Shawulu. E shi naka e ma yi lepa. 12A siki anasi e geni nseminji de seni yi ma Ananiya zo ja yi nani de e sakye geni anya.>>
13Ananiya keleba nkye,<<Obagizi, ni zi nabari nseminji mu nja guru mumungu mbode e mayi ntani ke nsuseki a Wurishelima. 14E shi naka e keleba dama dege anya totolo pirisi de eke guru worede su ma sukwa seni ake.>>
15Sede Obagizi gye Ananiya nkye, <<Te, sobon nseminji mu ni zabi yi de yi ni ANKI de gye worede su ma Yawudawa ba seni na nja nsu seleki nja ntani Izireyila. 16E ni nkiya na naa nana yi yiri Genbeki de yaa sha sobon seni na.>>
17Se Ananiya yuru a siki gizi ni, E ja Shawulu nani a kiya. Nkye, <<Yayiwa na Shawulu,>> <<Obagizi Yesu, de gom nja ke a kiya turiki de ki ma zo anya mu. Na saka ni de ki kwa geni jaja nja de ki kuma sika ni Aworo Nsuseki.>> 18Dandani, mbo daa puari dege siki ndani Shawulu kankye kuyari, se e kwa geni anya jaja. E dege a bisi se su yi tunkwasa; 19Se a beyi de Shawulu gama si mbosi, e samu sori nki.
Shawulu Beyi Manki a Dimasiku
Shawulu yi kwana bi nja yayagizi ni Obagizi a Dimasiku. 20E dede ba na Shawulu para beyi manki ni beta Obagizi a siki ni kolonwa Yawudawa e ma gye ntani nkye Yesu ma Yaa Mirikisi la. 21Guru worede su zi beta de Shawulu ma pala su yi mamanki su minya nkye, <<Ba nseminji mu na ma kisa ntani e kwa baza guru worede su ma sukwa seni Yesu a Wurishelima bo? E zo anya mu de e keyi su te a geba ni toree ni Pirisi dodomuna na bo?>> 22Sede Shawulu ja sori soseyi e ma te rikishe ankeli Yawudawa de su ma a Dimasiku nja tebeshi nkye Yesu ma Kiristi.
23A beyi worosu su kwanki nyowa de bise, Yawudawa su yi zunwa de su kisa Shawulu, 24sede Shawulu zi mbode su shiriya a kiya yi. Nnana ndederi su ma sa ndani a kopa ni geri de su kisa Shawulu. 25Sede yayagizi yi su leyi sa a siki obubu ndederi su biya nshi a nki bongo totolo geri ni.
Bulusu ma Wurishelima
26De Shawulu ma Wurishelima e bila de e gama kiya nja yayagizi Yesu. Sede guru asu su yi womba yi, su yeda nkye Shawulu juyi ma nsubiya Yesu woba. 27Sede Barnaba leyi te anya yayamanki. E gye su yiride Shawulu geni Obagizi a kiya turiki nja yiride Obagizi yi beta nja shi. e kwa gye su yiride Shawulu beyi manki ba womba a Dimasiku a siki seni Yesu. 28Yomu na Shawulu zunwa nja su e ma yuru e ma butu a Wurishelima, e meyi beta ni dishiya daa a siki seni Obagizi. 29Shawulu yi beta nja Yawudawa de su ma zi Helenanshi, e ma te yi gadama nja su sede su bila turiki de su kisa yi.
30De yayuwa nsubiya Yesu geni yomu, su la yi te a Keseriya se su kiri yi te a Tarsu.
31Se nsubiya Yesu ni kesa Yawudiya, nja Galili nja Samariya su samu zunwa selema. Te anya sua nto Aworo Nsuseki nsubiya Yesu su samu sori nja sori guyam soseyi, de su mayi zunwa asu a siki womba Mirikisi.
Biturusu Nja Dokas
32De Biturusu yi tepiya gyewe kesa ni guru, e te de e geshe nsuseki ni Mirikisi de su ma a Lidda. 33Anya ni e san nseminji daa de su ma sukwa seni Iniyas, e kwana a kalanga shekera takusi ema nsu nki sha ruwa na. 34Biturusu gye yi Iniyas nkye, <<Iniyas Yesu Kiristi worikye ke. Dege de ki lende kalanga ake.>> Dandani Iniyas dege a bisi. 35Guru ntani de su ma a geri Lidda nja Sharo de su geni nsude Biturusu worikye yi se su juyi te anya Obagizi.
36A siki Yopa mase daa nsubiya Yesu ma ayan seni yi ma Tabita, de ma Dokas, mase mu yaa yi mbo kyakyawu a kowon kwanki nja sua nsu potoruwa nto. 37A kwanki ni e yi suwo se e muntu. Su yi wonka su leyi kwakwana a laki bisi. 38Lidda e ma kusa ni Yopa na, de nsubiya Yesu zi nkye Biturusu ma a Lidda, su saka ntani bi te anya yi su ologba yi, de e zo seberi!>>
39Se Biturusu dege te nja su. De Biturusu keyi anya de su la yi kwakwana a laki bisi, guru mata makeyi sakisi gyowe yi, su mayi kuka su ma nana Biturusu riga nja ririgye keikei de Dokas yi su nshi a kwanki de e man leyi.
40Biturusu butu ni ntani guru a woze bila laki ni, e dure ni guyam e yi lepa; se e juyi kone gaan nkye, <<Tabita, dege a bisi!>> Se Tabita bure ndani yi, de e geni Biturusu e dege zunwa. 41Biturusu ka yi nani dege yi a bisi. Se e sukwa nsubiya Yesu nja mata makeyi e la yi munka su nleyi. 42Nabari mbo mu baza a guru Yopa, ntani nyowa su beigaskye ni Obagizi. 43Biturusu zunwa a Yopa kwanki nyowa a gizi ni nsu ANKI pata de seni yi ma Sima.
ទើបបានជ្រើសរើសហើយ៖
TAKADA 9: Gaa
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Word for the World International and The Word for the World Nigeria
