TAKADA 10
10
Koneliyus Sukwa Biturusu
1A Keseriya nseminji daa nsu seni Koneliyus, e ma totolo shoja Roma na ni kunji shoja de su ma sukwa yi nkye kunji Italiya. 2Koneliyus ma nsu bowuta Mirikisi; nsu womba Mirikisi la. E ma ba ntani sedeka nja e ma yi Mirikisi lepa kowon kwanki. 3Nana daa kyakya keripi wuku ni nyema de ndani Koneliyus bure, e geni meleku Mirikisi, zo anya yi nkye, <<Koneliyus!>>
4Koneliyus nya yi ndani e mayi ni womba, nkye. <<Obagizi, mina na?>>
Meleku keleba nkye, <<Lepa ake nja sedeka ake de ki mayi te anya ni Mirikisi e ma mbo turunwa na. 5Kuzukam saka ntani de su te a Yopa anya Sima de su ma sukwa yi Biturusu. 6E ma bakwe a gizi ni Sima nsu yi ANKI pata, de gizi yi ma keteri totolo riki.>> 7De meleku de yi beta nja shi te meyi, Koneliyus sukwa bunwa yi bi nja shoja daa, de e ma nsubiya Mirikisi a siki worede su ma yi ANKI kowon nana. 8Koneliyus gye su guru mbode paru se e saka su te a Yopa.
Ndani Biturusu Bure
9De geri shekeri, nana zo a sedeka kiya su ma a kiya tepiya de su kusa lesa ni Yopa, Biturusu nyunwa te a laki bisi de e yi lepa. 10Nyunwa keyi ari yaa bila de si mbosi, sede a kwanki ni su ma a kiya ni shiriya mbosi, se ndani yi bure. 11Biturusu geni bisi bure mbodaa ma sonka kankye totolo ni woriki sua sonka nshi a kisi a guru keteri wuru. 12A siki mayapi e ma ni kowoni yiri nama mbombom de sua tepiya kisi mani seni wuru, nja yaya mesi nja alankpa nja nsusuwa bisi. 13Se Biturusu zi murinya Mirikisi gye yi nkye, <<Dege a bisi, Biturusu. Yanka yi de ki suku.>>
14Sede Biturusu nkye. <<Yi, Mirikisi!>> <<Ni taba suku mbode mani dola ba.>>
15Murinya Mirikisi kwa yi beta nja Biturusu ni bi nkye, <<Kede ki sukwa mbode Mirikisi yi ma sere de ki nkye ema dola.>>
16Mbo mu paru son wuku, dandani se su la mayapi mu te a bisi.
17De Biturusu e ma yi mamanki a kiya ni bure ndani e yi de Mirikisi nana yi nshi, ntani de Koneliyus saka su minya anya de gizi Sima ma se su sakisi a baki kolonwa ni gizi ni Sima. 18Se su sukwa, su ma minya ko Sima de su ma sukwa yi Biturusu e sonka anya mu?
19Tunde Biturusu tuku ma a siki tunani a kiya mbode geni, Aworo ni Mirikisi gye yi nkye, <<Sima, ntani wuku sakisi a baki kolonwa sua bila geni ke. 20Dege de ki sonka te a gizi kisi. Kede ki puari geba de ka te nja su, Eni na ni saka su.>>
21Biturusu sonka a kisi te anya ntani mu e minya su nkye, <<Eni na kwa bilaa. Mina keyi ku zo?>>
22Ntani mu keleba, <<Totolo shoja ni Roma na saka mu seni e yi ma Koneliyus. E ma nse gangasi la nsu womba Mirikisi, Yawudawa guru su ma beyi girima. Meleku nsuseki gye yi nkye e beyi manki de su sukwa ke zo a gizi e yi de e zi mbode ka pala gye yi.>> 23Se Biturusu sa su su yuru a siki gizi e ba su anya kwana.
Biturusu A siki Gizi Ni Koneliyus
De geri shekeri Biturusu dege e te nja su, nja worosu su nsubiya Yesu yiri siki geri ni Yopa te nja su 24De geri shekeri su keyi Keseriya. Koneliyus e sa leyi yaa geni su a nana ni ari e sukwa guru yayuwa yi nja oboki yi de su ma nja shi. 25De Biturusu yuru a siki gizi ni, Koneliyus gomu nja shi se e puari a geba yi e beyi girima. 26Sede Biturusu sa yi dege a bisi nkye. <<Dege a bisi,>> <<E ni ni ma nsebeki kankye la du.>>
27De Biturusu ma a kiya beta nja shi, se e yuru a siki gizi e sani ntani nyowa su tala. 28E pala gye su nkye: <<Oku nkiya aku ku shina nkye e man kyawu ba de Yawudawa su gomu kiya nja worede su ma yawudawa ba ko e te a gizi nsude ma Yawudawa ba. Sede Mirikisi nana ni nkye kede ni sukwa nseda nkye e ma nsu dola ba 29De su saka manki nkye de e ni zo, ni ki ba. Kuzukam ni bila de de ni shina mina sa de ku saka sukwa ni?>>
30Koneliyus keleba nkye: <<Kwana wuru naka de ni ma yi lepa a siki gizi na a kyakya kwanki mu, keripi wuku ni nyema. Se ni geni nseda sakisi a geba na keyi de sa e ma yi waliwali 31Nse ni nkye, <Koneliyus, Mirikisi keleba lepa ake nja sedeka ake de ki ma ba potoruwa e ma mbo turunwa la a geba Mirikisi. 32Ki yi manki de su sukwa Sima de su ma sukwa yi Biturusu a Yopa. E ma bakwe a gizi Sima nsu ANKI pata, de gizi yi ma a keteri totolo riki.> 33Mbode sa ni saka manki de su sukwa ke naka, e yi kyawu de ki zo. Kuzukam guru amu mu gomu a geba Mirikisi, de mu zi guru mbode Obagizi pala gye ke de ki gye mu.>>
Biturusu yi Beta
34Se Biturusu para yi su beta nkye: <<Kuzukam ni shina gaskye Mirikisi e ma nana bombom ba 35sede e ma keleba guru nsude mayi womba yi nja nsude mayi mbo gangasi a siki kowoni arishiya. 36Ku shina manki de Mirikisi saka te anya ntani Izireyila, su ma gye su nabari kyakyawu ni selema te anya Yesu Kiristi, de ma Obagizi amu guru. 37Ku shina mbode paru a kesa ni Yawudiya mu guru, para dege Galili a beyi manki tunkwasa de Yaaya yi. 38Ku shina nabari Yesu ni Nazere yiride Mirikisi shapa yi ni Aworo Nsuseki nja sori. E gyowe kowoni anya, e mayi ANKI kyakyawu nja worikye guru worede obiri girika su, sobon Mirikisi ma nja shi.
39<<Omu muma sheeda ni guru mbode Yesu yi a kesa ni Yawudawa nja a siki Wurishelima. Su kisa yi te anya lete yi a kiya gidiri. 40Sede Mirikisi dege yi a kumsha a nana ni wuku, e sa yi pelesa anya ntani. 41Ntani guru na su geni yi ba, sede omu de Mirikisi zabi mu de mu ma sheeda yi, omu na mu si mu sha nja shi a beyi de e dege kumsha. 42E kwa ba mu doka nkye mu ba ntani manki nja mu gye ntani nkye e shina Mirikisi sa yi de e yi worede man leyi nja worede muntu shiriya. 43Guru anebi su beyi sheeda a kiya Yesu nkye te anya seni Yesu guru nsude beigaskye nshi sua yape lepi yi.>>
Worede Su ma Yawudawa ba su Keleba Aworo Nsuseki
44De Biturusu ma a kiya beta mu, se Aworo Nsuseki sonka a kiya ni guru worede su zi beta yi. 45nsu beigaskye ni Yesu de su yi yanka zo nja Biturusu su yi mamanki de Mirikisi sonka ni Aworo Nsuseki a kiya ni worede su ma Yawudawa ba. 46Se su zi su su mayi beta ni arishiya mbombom su ma yobo Mirikisi.
Se Biturusu nkye, 47<<Waa yaa nana de su yi ntani mu tunkwasa ni riki? Osu ma su keleba Aworo Nsuseki yiride omu ma mu keleba.>> 48Se Biturusu sa su yi su tunkwasa a siki seni ni Yesu Kiristi. Se su ologba Biturusu de e zunwa nja su ni worosu su kwanki piri.
ទើបបានជ្រើសរើសហើយ៖
TAKADA 10: Gaa
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Word for the World International and The Word for the World Nigeria
