Luuka 13
13
Fye yeabwi ntolonu m fya kwu fyí
1Azaho ɓə zhi n ɓo dna nsayii, ń ɓa ɓə daɓo n Yeisu tu Agəliliyi əɓo; ń Byilatusu ɓə gbmí əɓa ami aje n əɓa anyakwnukwnui nyi. 2Yeisu wa dnaɓəgbe, “Fye zhninubwo lo nge Agəliliyi ye nu ɓə zhni aleifyizhniyi n du Agəliliyi aje vnyanya, ntuge ɓa ɓə gyeazhnì n wu nlai? 3Aawo! Əmi nu gna fye, akpəge fya yeabwi, əfyehni ce vnyanya, a ɓə kwu fye zhniagbma. 4Kwo aza yi, ngwnu awocei-nyimwanyimwa, n ɓa ɓə fyí, əsa ń Silowam nyakwnu mikpeaje ɓə myiya kpe ɓa nyi; fye zhninubwo lo nge əɓa ɓəgyi nu ɓə du, a fa azaje vnyanya n ɓa ɓə fyi n Urishelima nyi? 5Aawo! Əmi nu gna fye, akpəge fya yeabwi, əfyehni ce vnyanya, a ɓə kwu fye zhniagbma.”
6Nlonu wa si ɓəsisi ye: “Əzaho ɓə n gbaayi shnuwnai dna kwoi mwa ń əwo anamzhni, wa lo woi zna əkwo gyigyiyi shni, ama to wa gye nyaho n gyitu m. 7Ntulonu, wa gna əza ń wo dna woi shi anamzhni awye nyi, ‘Mi kwu aye ɓwa ngwnu-ata nuu, mii ɓe nabai ma ka əgbà gyigyiyi ń gbaayi shnuwna ye, ama mi too gye əkwo gyigyiyi tu m. Znu kwo ya! Knyiyi nu ɓa zhni kwaa gnyi kwoi zhni əknyi agbma a?’
8“Əza yi wa dnaɓəgbe, ‘Haamwasa, ho yé la kwo fa kpa,’ la əye gbmanyi kpma kwo ga, mi ɓa nyì aba n shegwnu kwo jesnu mii fyi kwo ofwanyágbma. 9N kwo ɓə kwu gyi ń tna, kwo ɓə la bmya! Ntolonu m, ho ɓə znu kwo ya.”
Yeisu lá nyikwoza zabmazhi kágna n Sibyiwyii
10N Sibyiwyii, Yeisu ɓə dna woi wunya ń Ayahudiyibwokwnu, 11nyikwoza ɓə dna n ɓo ń ase ɓəə la wo bmazhi aye ngwnu awocei-nyimwanyimwa. Wo ɓə yatu nu jesnu to woi myi woi kpebye m. 12She Yeisu ɓə gye wo, wa yì wo ɓe ncei ń abye wa gna wo, “Nyikwoza, a la ho kágna ń əho nyasna.” 13Nlonu wa kpe wo aɓwa, jesnu nsayisayii wa kpebye gnyi, wa ci Shekwoyi.
14Ayahudiyibwokwnu tukwoda n gnyi n minagyii, ntuge Yeisu wo la əza kágna n Sibyiwyii, wa gna aza, “Anyipyei lo ngwnu-tnanyi nu tnutnuzhni nya. Ntulonu fye ɓe a ká fye gna fyi ń anyipyei yi, ama toge n Sibyiwyii m.”
15Dagayi wa dna wo ɓəgbe, “Əfye akwocednayi! Əzahozahoyi n fye, ta lo əwo nakwo ya kwo zhagawyi ń əkwo agyiba n Sibyiwyi wa lo wa ga kwo nuwna m? 16Nlonu nyikwoza ye, Ibrahim nyigwnu, əza ń Shetam ɓə n woi pashi aye akpamwai ngwnu awocei-nyimwanyimwa, kwo to kwnuce lo a lo wo ya ń ənya ń kwo ɓə n woi pashi, n Sibyiwyii m?”
17Vnyinkwo kwa kwu wo əwo anuwnuyi vnyanya, she wo ɓə da ɓa ɓəye, ama ca kwu da aza ntu aɓo awowoyi ɓo ń wo ɓə gnyi woi zhni nyi.
Ɓəsisi mwusta byegye nya n yistii
18Nlonu Yeisu wa nyaɓo, “Shekwoyi əbemi ń wulo ngye knyiyi nu a? Mi ɓa mwukwodo n knyiyi nu a? 19Kwo wulo ngye musta byegye nu, ń əza ɓə la wa bye kwo dna ń əwo əkna. Kwa mwa kwaa zè shnuwna, alú ɓa ɓe ɓa yakpe ń əkwo aɓwala.”
20Jesnu wa nyaɓo, “Mi ɓa mwi Shekwoyi əbemi do n knyiyi nu a? 21Kwo wulo ngye yisti nu ń nyikwoza ɓə sni wa gbmiaje n wyilukwui n mwa, nya əsa ń kwo ɓə la nyagbmi vnyanya.”
Abwokwnumi pmapmai
22Nlonu shi Yeisu ɓə wna zokwo woi lo Urishelima, wa vyi azhiyaakwo n azhigbai, woi wunya. 23Əzaho wa nya wo əɓo, “Dagayi, aza ɓwasnu lo fyewyi nu ń ɓa ɓə pwo?”
Wa gna ɓa, 24Əmi nu gna fye, “Fye la əfyehni mwákpe fya lofyi ń abwokwnumi pmapmai, ntuge aza mwa bəgyé lo, ń ɓa ɓə ye ɓa lofyi ń kwo, ama ɓa to ɓə myi m. 25Əsa ń pwuwada ɓə laka gnyi wa gwu abwokwnumi, fye ɓə kwu zhi ń əbmyi fyei jeaba, jesnu fyei tnaɓwa, ‘Haamwasa, gwu yi abwokwnumi ya.’
“Ama wo ɓə dnaɓəgbe, ‘Mi ta kpe əfye ye lo, kwo aba ń fya kwnu m.’
26“Nlonu fye ɓə gna, ‘Yì ɓə kwu nyagyi kwnu gyi, ya kwu kwnu sni n hoi, jesnu ha wunya laɓa kpe ń əyi adnadna.’
27“Ama wo ɓə dnaɓəgbe, ‘Mi ta kpe fye ye lo kwo aba ń fye kwnu m. Fye la kwu mi kala, əfye aɓənukwoizhniyi vnyanya!’
28“A ɓə ciɓwi n ɓo, ai gyi anyikna, she fye ɓə gye Ibrahim, Ishakwu n Yakwuɓwui n sheaɓəgwognayii vnyanya n fyi ń Shekwoyi əbemi, ama əfyeeda n kwnuya zhi ń əbmyi. 29Aza ɓə kwnu ɓe ń kpəkwó, n shnikwó, ń snukwó, n snutakwo, jesnu ɓai ɓe ɓa kwu sase kpe ń agbmada nyagyigyi awyefna aba ń Shekwoyi əbemi. 30Ɓəhnihni azaho lo ń ɓa zhni akpmaknayi, ń ɓa ɓə kwu zhni akpmisnuyi, jesnu akpmisnuyi ń ɓa ɓə kwu zhni akpmaknayi.”
Yeisu bwugbawnu ntu Urishelima ɓo
31Dna n əsayii Afarisiyi ho ɓa ɓe da Yeisu jesnu ɓa gna wo, “La abaye fa ha lo abado gbowo. Hiridusu ye lo wa wu ho.”
32Wa dnaɓəgbe, “Fye lo fye gna camcam yi, ‘Mi ɓa gwodu mii kwnu ase ya, mii ká aza gna n naiye n nsui, jesnu n nyipyei tayii mii pwo əmi ɓəmwushi.’ 33Kwo ń wuna a, ɓəshishi nu ma gwodu lo n naiye, ń nsui ɓədo n nyipyeii ń kwo yatu nyi; ntuge ɓəhnihni sheɓəgwognayi to lo ń wo ɓa fyí tu ń Urishelima əbmyi m!
34“Urishelima, Urishelima, əho ń ho wu sheaɓəgwognayi jesnu hoi she aza yi akwuta, ń a tnu ho ncei nyi, aɓwa aknyii nu ń mi yi əmihni, ma ye əho aɓyi zhi n aba gbmanyi, shi pise zhni kwa ye əkwo aɓyi fyi n əkwo aɓwase nyi, ama ho ta ye lo m. 35Shiawye, a la əho pwuwa fa gnyi ho n gbəloii. Əmi nu gna ho, ho taa je əmi wyegye m, akpəge əsa n ho ɓə gna ge, ‘Anabəlikada nu n əzai ń wo ɓe dna ń Dagayi əye.’ ”
ទើបបានជ្រើសរើសហើយ៖
Luuka 13: OGNB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Biblica® Open Gbagyi Nyizeyenya Baibwulu: Shekwoyi Ɓədagbma™, Ɓəgbeshì Woiwoyi
© 1997, 2025 Biblica, Inc.
Biblica® Open Gbagyi Contemporary Bible™, New Testament
Copyright © 1997, 2025 by Biblica, Inc.
“Biblica” ɓədo n Biblica əznù zhazhai, ɓa zhni aɓwaze aznù nu n a cei kafyilo n United States Patent and Trademark Office (Amerika əznù aɓwaze nya ɓədo n nyazhnizhni ofyisii) n Biblica, Inc. ncei yafyi. Apmazhni n gbegai nu.
“Biblica” is a trademark registered in the United States Patent and Trademark Office by Biblica, Inc. Used with permission.
See promoVersionInfo in metadata.xml for Creative Commons license.
