Luuka 12
12
Kwnùkwnù n bwugbakaládnai
1Aɓwazhilo, she deeji adugwu bəgyé ɓəə la yezhi, kwa si ɓai pyi ajeya, Yeisu wa ya ɓəda n əwo amwutuyii nu n kpmisnu, woi gna: “Fye la əwyewna n Afarisiyi yisti, ń əkwo nu zhni kwocedna. 2Nyaho to lo n kwo pwuanya shì lo, n a to ɓə la kwo gbmiwu m. Kwo n ɓwushi lo ń a to ɓə kwu kwo wu pəipəi m. 3Əɓo n fye kwu da fyi ń wyegbma, a ɓə wo kwo n nyipyei pəipəi, jesnu əɓo n fye ɓə da kwo fyi aje n atnubwa fyi n anyakwnumi, a ɓə da kwo kpe ń anyakwnusni.
4“Əmi anugwnudo, əmi nu gna fye, fye to wo aza yi ədna n ɓa wu nayi nu, ama n dəye avnu, ɓa to n ɓəhoi shnasnu lo n ɓa zhni m. 5Ama mi ɓa wu fye əza n fye ɓa wo wodna: Fye wo əza ədna n wo ɓa myi wa wu əfye nayi, jesnu ń əkwo avnu, wo n ikwoi lo wa she kwo ya dna ń anápyi. Əə, mi gna fye, fye wo wodna. 6A ta kwnu agbakwolowyi ngwnu-atnu akəɓwo ngwnu-aba nu m? Dudulonu ədoho to lo n ɓa ń Shekwoyi n kwoi zamwi lo m. 7Ɓəhnihni, əfye tukwoyì vnyanya n babai lo. Fye to wodna m; fye du agbakwolowyi bəgyé lo n apma.
8“Əmi nu gna fye, əza n wa da əmi əye kpe ɓo pəipəi n aza abye, Əza Nugwnu ɓə da əwo əye kpe ɓo ce ń amaləka Shekwoyi nya abye. 9Ama əza n wa ná əmi aɓo ń aza abye, a ɓə ná əwohni aɓo n amaləka Shekwoyi nya abye. 10Nlonu əzahozahoyi ń wa da ɓədagbma nukwoi tu n Əza Nugwnu tukwo, a ɓə kwu aleifyi zo wo, ama zahozahoyi ń wa da atukwopmi ɓəda tu n Zafnu Gyigyiyi tukwo, a to ɓə zo wo aleifyi m.
11“She a ɓə lo n fyei ń Ayahudiyibwokwnu, abegyiyi n a ikwodai, fye to ɓə gná fyehni gnagna, she fye ɓa gnyi əfyehni kwo əɓo n fye ɓa da m, 12ntuge Zafnu Gyigyiyi ɓə wu fye əɓo n fye ɓa da n əsayii.”
Ɓəsisi nyaɓwayi mama nya
13Əzaho dna n deeji wa gna wo, “Nyawuyi, gna əmido nge yi la əgwú gna.”
14Yeisu wa dnaɓəgbe, “Nyiyiza, nyika nu ń la mi dna owadayi kwo əgwú gnáyi n əfye atasni a?” 15Nlonu wa gna ɓa, “Fye la əwyewna! Fye kwu əfyehni wnashi ntu ń aɓo awyeda n aɓəpwawo dəhodəhoi pya ɓo; ntuge anyìgyi ta vyi shi əza n nyaɓwai lo nsnu nu m.”
16Njesnu wa gna ɓa ɓəsisi ye, “Nyaɓwayi ho, əwo ofwa ɓə ga wo afwanyakwu n mwa kwokwo. 17Wa zhni ɓənubwo fyi n əwohni, ‘Knyiyi nu n mi ɓa zhni a? Mi too nabai lo n mi ɓa fyi əmi anyagyigyi m.’
18“Nlonu, wa gna, ‘Əɓo nu nyi n mi ɓa zhni. Mi ɓa adobwi ye ɓaya, jesnu ma mi adnagbmai, nabai ma fyi əmi awyi n mwa kwokwo ye. 19Njesnu mi ɓə gna əmihni, “Ho kwu awyi ɓwa n mwa ncei yefyi ntu aye bəgyé ɓo n abye. La snú; gyi, hoi sni jesnu ha dagbma.” ’
20“Ama Shekwoyi wa gna wo, ‘Əza mama! Dna n sukwo ye mi, a ɓa gwo əho wyewyeyi. To gna mi, anya n ho la yezhi əhohni nyi, ɓa ɓə kwu zhni nyika anya nu a?’
21“Nlai nu n kwo ɓə zhni n əzadəhodəhoyi n wo la nyaɓwa yezhi əwohni, ama ntna nyaɓwa yezhi n Shekwoyi aba.”
Fye to wnubwugba m
22Nlonu Yeisu wa gna əwo amwutuyi: “Ntucenu, mi gna fye, fye to wnubwugba tu n əfye awyewyeyi ɓo m, ənya n fye ɓa gyi m; kwo ntu n əfye anayi ɓo, ənya n fye ɓa kpe m. 23Wyewyeyi kwo du nyagyi lo, jesnu anayi n du aje lo. 24Fye ka akwasakwasa wye: Ɓa ta bye kwo ɓa dò m, ɓa to n anyagyi yezhibai lo, kwo dobwi m; dudulonu Shekwoyi kpá ɓa. Ai fye du alú lo n apma n mwa! 25Nyika nu dnalo n fye n wo ɓa ɓe əwohni wyewyeyi snukna gbmanyi ntu n bwugbawnu ɓo a?” 26Shikwonyi fye taa myi fya zhni əɓo ɓyiyi ye m, knyiyi nu zhni fyei wnubwugba ntu aɓo n ɓa ce nyi a?
27“Fye ka amamawyí əwye n bmana she ɓa mwa n wu. Ɓa ta zhni tnutnu, kwo ɓa she lulu m. Dudulonu əmi nu gna fye, kwo Sulemanu dna n əwohni bmyabmya vnyanya, wo to ɓə kpe aje ngye mamawyi ho gbmanyi n ɓa m.” 28“Ngye Shekwoyi kpe agbegbe bmana nya aje ń lai nu, n ɓa nyi n naiye, əfye kwa gyi a sheɓaya fyi n əná nyi, wo taa gna əfye nu ajekpekpe m; əfye agaiciyaganunui agbagbaida! 29Fye to kwu əfye adu zhi ntu anya ɓo nu ń fye ɓa gyi kwo fya sni nyi m; fye to wnubwugba ntuce m. 30Ntuge aza anyì nya zna anya ye pya nu shni vnyanya, jesnu əfye Dada kpəlo nge fye n əɓa apmai lo. 31Ama fye zna əwo əbemi shni, jesnu anya ye vnyanya a ɓə kwu ɓa ga fye ɓədo cè.
32“Gəluce ɓyiyi, fye to wodna m, ntuge kwo dá əfye Dada lo wa ga fye əbemi. 33Fye kwu əfye nyaɓwa kwnu, fya kwu agyiwye ga awyekwoyi. Fye zna alagyiita shni ga əfyehni n ɓa taa saya m, nyaɓwayezhi n kwo fyi n əshemi n kwo ta shna zo nyi m, aba ń əvyì ta wo vyivyiwyi, jesnu ń anyìmana taa zhni anya agbma m. 34Ntuge aba ń əho nyaɓwayezhi nyi, ń abaayi nu ń əho ədu ɓa shi cè.
Fye kwu zhigwu
35“Fye kwu əfyehni pmá ntu tnutnuzhni ɓo jesnu fya kwu əfye apyitila shi ń anai wna, 36ngye atnutnuyi ń ɓa zhi ɓai pmi əɓa dagayi wa zhi amwula awyefna, nabai əsa ń wo ɓə zhi wa jeaba, ń ɓa ɓə gwu wo kpakwo ya wolowolo. 37Kwo ɓə kwu atnutnuyi yi bmya ń əɓa dagayi ɓə jezezhi wa gye ɓa zhigwu. Ɓəhnihni əmi nu gna fye, wo ɓə pmá əwohni wa zhni tnutnu, wo ɓə zhni ɓa ɓai la kpmima ń tebwul jesnu woi ɓe wa gna ɓa nyagyi. 38Kwo ɓə kwu atnutnuyi yi bmya ń əɓa dagayi ɓə gye ɓa zhi n əɓahnii yeyei, kwo n wo ɓə ɓe dna n sukwo sadu nu kwo n fyegyi ɓwai. 39Ama fye ɓwa awyega ye: Ngye pwuwada ɓəə gna wa kwu kpe əsa n əvyì ɓə ye wa ɓe ncei, wo too ɓə ɓa ye nge a ɓá əwo pwuwa ya a lofyi m. 40Ɓəshishi nu fyaa əfyehni ye, ntuge Əza Nugwnu ɓə ɓe n əsai nu ń fye to n əwo əɓoi dnalo m.”
41Byitusu wa nyaɓo, “Dagayi, ho wu əyi nu ɓəsisi yee, kwo ntu əzahozahoyi ɓo nu a?”
42Dagayi wa dnaɓəgbe, “To, nyikanu zhni anya aknawnayi gbenui n wo cecei, ń əwo dagayi ɓa kwu atnutnuyi fyi ń əwo akwnu, wa ga ɓa nyagyi n əkwo əsai a? 43Kwo ɓə la zhni əɓo manai nu n tnutnuyi aba, ń əwo Dagayi ɓə jezezhi wa gye wo gnyi woi vyi əwo əɓəgbetu.” 44Ɓəhnihni əmi nu gna fye, “Wo ɓə kwu əwo nyaɓwa vnyanya fyi ń əwo akwnu. 45Ama ń kwa zè ge tnutnuyi gna əwohni, ‘Əmi dagayi wo kwu kalala zhni n jezezhii; wa ya woi lu atnutnuyi aje, azanugbai n anyikwozai, jesnu wa gyi, woi sni, kwoi zhni wo woi fyijeya.’ ” 46Tnutnuyi dagayi ɓə jezeɓe n əwyii ń wo to n əwo əɓoi dnalo m, jesnu n əsai ń wo ta dnace lo m. Wo ɓə ce wo ya wyiwowyiwo jesnu woi la wo yadna nkwnusnu n atnavyiyii.
47“Tnutnuyi ń wo kpé əwo dagayi ɓəyé ye, ama to wa pmá əwohni, wa zhni əɓo n wo dagayi yé m, a ɓə fyi wo apmi n aɓwai mwa bəgyé. 48Ama əza n wo ta kpeye lo m, n wo zhni əɓo ń kwo kwnuce wa gwo tata, a ɓə fyi wo apmi fyewyi nu. Əzahozahoyi ń a la ga wo n mwa, a ɓə tuwye ń wo n mwa; jesnu əza ń a la ənya yaakwo ga wo, a ɓə nya wo ənya yaakwo ɓo.
Toge bwugbafu m ama ajegna
49“Mi la ɓe ma dna əná ń anyì, a wo mi lo, ngye kwo yee la lu wnawna nu kwoi gwo! 50Ama mi n batizimai lo n a ɓa zhni mi, jesnu mi dnalo n bwugbawnu nya əsa ń kwo ɓə nu ncei! 51Fye zhninubwo nge ma ɓe nabai ma ga bwugbafu nu ń anyì? Aawo, əmi nu gna fye ma ɓe n ajegnai nu. 52Ənya ń kwo laka nsaiye kwoi lo n abyei, a ɓə gye aza fyi ń pwuwa ngwnu-atnu ń gnajeya, ngwnu-ata ń gwnukpe ngwnu-aba, jesnu ngwnu-aba ń gwnukpe ngwnu-ata. 53Ɓa ɓə la gnaje, əda ń gwnutu nugwnu, jesnu nugwnu ń gwnutu əda, əyà ń gwnutu nyigwnu jesnu nyigwnu ń gwnutu əyà, əvya ń gwnutu tnáyi, jesnu tnáyi ń gwnutu əvya.”
Awyeknayagaga asa nya
54Wa gna deeji: “She fye gye ənyì tu ń shnikwó ɓwa, nsayisayii fya gna, ‘Əgbma ye kwa zhi nu,’ n kwnusnu kwa kwu zhi. 55Njesnu she əse ci kwoi kwnu ń snutakwo əɓwa, fya gna, ‘Wyepye ye kwa fyi nu,’ n kwnusnu kwa kwu fyi. 56Akwocednayi! Fye kpəlo shi fye ɓa ɓwa awyeknaya əknyi nya n anyìbmanai. Kwo zè n wunanu fyenyi ta kpəlo shi fye ɓa ga awyeknaya əsa ye nya ma a?
57“Knyiyi nu zhni to fyei kpe əɓo ɓəfyece znu ga əfyehni ma a? 58Shi ho lo owa bwokwnu n kwnusnu n əho nuwnuyii, la əhohni yi n əwyei bmyibmyii, fya kwu əɓo wnado lo n zokwo, ntolonu m, əho nuwnuyii ɓa myi wa lo n hoi ń owadayi aba, owadayi woi la ho taya ga bwusiɓyiyida, jesnu bwusiɓyiyida woi la ho sheya dna n zhalu. 59Mi gna ho, ho to ɓə gbmiya m, akpe ho kwu sisinkəɓwo agyiwye yi nya zo gba vnyanya.”
ទើបបានជ្រើសរើសហើយ៖
Luuka 12: OGNB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Biblica® Open Gbagyi Nyizeyenya Baibwulu: Shekwoyi Ɓədagbma™, Ɓəgbeshì Woiwoyi
© 1997, 2025 Biblica, Inc.
Biblica® Open Gbagyi Contemporary Bible™, New Testament
Copyright © 1997, 2025 by Biblica, Inc.
“Biblica” ɓədo n Biblica əznù zhazhai, ɓa zhni aɓwaze aznù nu n a cei kafyilo n United States Patent and Trademark Office (Amerika əznù aɓwaze nya ɓədo n nyazhnizhni ofyisii) n Biblica, Inc. ncei yafyi. Apmazhni n gbegai nu.
“Biblica” is a trademark registered in the United States Patent and Trademark Office by Biblica, Inc. Used with permission.
See promoVersionInfo in metadata.xml for Creative Commons license.
