Yohana 15
15
Wnunùi-gnayi ń əkwo aɓwalai
1“Əmi nu zhni anamwnunùi-gnayi hnihnii, jesnu əmi Dada nu zhni əkna fwanuyi. 2Wo znu ɓwala dəhodəhoi ya n kwo kpegyi n mi n kwo ta ga gyigyi lo m, ama ɓwala dəhodəhoi n kwo ga gyigyi wo zhni kwo aba nabai n kwo ɓa gna gyigyiga n dudu. 3Fye pma wu lo n gyigyii ntu n ɓədagbma ɓo n mi kwu da ga əfye nyi. 4Fye kwu kpefyi ń mi, ngye shi əmihni ce mi kpedna lo n əfye nyi. Ɓwala ho to lo n kwo ɓa ga gyigyi n əkwohnii m; ɓəshishi nu kwaa kpegyi n anamwnunùi-gnayi. Kwo əfyehni ce, fye taa ga gyigyi m, akpəge fya kwu kpefyi n mi.
5“Əmi nu zhni anamwnunùi-gnayi; əfye nu zhni aɓwala. N fya kwu kpefyi n mi, əmihni ce dna n fye, fye ɓa ga gyigyi n mwa; ntna mi, fye taa myi fya zhni ɓəhoɓəhoi m. 6N fye to kwu kpefyi n mi m, fye wulo ngye ɓwala nu n a lá kwo sheya kwoi ɓwá; a kwu aɓwala ye pya nu, a sheɓaya fyi n əná, jesnu ɓa gyina. 7N fya kwu kpefyi n mi jesnu əmi aɓədagbma ɓaa kwu kpefyi n fye, fye ɓa nya nyahonyahoi əɓo n fye mwi, jesnu a ɓa zhni kwo ga fye. 8Dəye nu ɓe əmi Dada n latui, nge fye ga gyigyi lo n mwa, fyei wu nge fye zhni əmi amwutuyi nu.
9“Ngye shi Dada wo kwu yeye wu mi nyi, nlonu nu n mi kwu yeye wu fye. Nsaiye fye kwu kpefyi n əmi yeye. 10N fya shi əmi aɓəgbetu əɓwa, fye ɓa kwu kpefyi n əmi yeye, n ɓwasnu shi mi kwu əmi Dada aɓəgbetu shiɓwa jesnu minyi la kpedna n əwo yeye nyi. 11Mi gna fye dəye nabai əmi agbmada ɓa kwu kwnusnu n fyei nu jesnu nabai əfye agbmada ɓa kwu nu. 12Əmi ɓəgbetu nu nyi: Fye wu aje yeye ngye shi mi kwu yeye wu fye nyi. 13Əzaho to n yeye yaakwo ədoi lo n du dəye m: əza waa əwo wyewyeyi yashi ntu əwo anugwnudo ɓo m. 14Fye zhni əmi anugwnudo nu, n fya zhni əɓo n ma tu fye əgbe. 15Mi to ye yi fye lo nge atnutnuyi m, ntuge tnutnuyi ta kpe əɓo əye n əwo Dagayi zhni m. N əkwoɓwi, mi yi fye ge anugwnudo nu, ntuge nyahonyahoi n mi la tumwi n əmi Dada, mi kwu kwo wu fye. 16Əfye nu to ɓə knyí mi m, ama əmi nu ɓə knyí fye jesnu ma kwu fye fyi n tnutnu nabai fya lo fye ga gyigyi; gyigyi n kwo ɓa mwasa; jesnu nabai nge nyahonyahoi n fye ɓa nyaɓo dna n əmi əye, n Dada ɓa ga fye kwo. 17Dəye nu zhni əmi ɓəgbetu: Fye wu aje yeye.
Anyì wnunu n amwutuyi
18“Ngye anyì wnunu lo n fyei, fye kwu kpe ge ɓa ɓə kpmi əmi nu nuwnu. 19Fye ɓəə gna fye zhni anyì nya nu, kwo ɓə ɓa wu fye yeye nge fye zhni əkwo nya nu. Ngye shikwo gnyi nyi, fye to zhni anyì nya nu m, ama əmi nu la fye knyí zhi fyi n anyì. Cenuzhni anyì ɓai wnunu n fyei. 20Fye pá əɓo ɓo n mi ɓə gna fye nyi: ‘Tnutnuyi to lo n wo du əwo Dagayi m.’ Ngye ɓa ɓəi kwu mi shewyena, ɓa ɓə kwu fye shewyena ce. Ngye ɓa ɓəi kwu əmi nyawu shiɓwa, ɓa ɓə kwu əfye nyawu shiɓwa ce. 21Ɓa ɓə zhni fye aɓo ń lai ntu n əmi əye ɓo nu, ntuge ɓa ta kpe əza əye lo n wa tnu n mii m. 22Mì to ɓəə gna mi la ɓe ma daɓo n ɓai m, to ɓa ye n leifyi ɓəgyii lo m; ama nsaiye ɓa to n agbmakwnui lo, ntu n əɓa leifyi əɓo m. 23Əzadəhodəhoyi n wo wnunu n mii, wo wnunu n əmi Dadai nu cè. 24Mi to ɓəə gna mi kwu atnutnu ye zhni fyi n əɓa atasni n əzaho too shni zhni m, ɓa to ɓə ɓa ɓwa leifyi ɓəgyi m. Ngye shikwo gnyi nyi, ɓa kwu gye, dudulonu ɓa kwu mi wnunu ɓədo n əmi Dadai. 25Ama dəye, ye kwa nu əɓo nu n kwo kafyilo n Owa: ‘Ɓa wnunu n mii ntna ɓətukwo.’
Zafnu Gyigyiyi tnutnu
26“She Bmazhniyi ɓə ɓe, əwo n mi ɓə tnu fye n woi nyi, wo gbmi n Dada aba nu; Zafnu gaiciyanunui nya n wo gbmi n Dada aba nu nyi; wo ɓə gbmiɓo tu n əmi tukwo. 27Njesnu ɓəshishi nu əfyehni ce, fyei gbmi mi əɓo, ntuge fye kwu kwnusnu n əmii tunyi ayayaba.
ទើបបានជ្រើសរើសហើយ៖
Yohana 15: OGNB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Biblica® Open Gbagyi Nyizeyenya Baibwulu: Shekwoyi Ɓədagbma™, Ɓəgbeshì Woiwoyi
© 1997, 2025 Biblica, Inc.
Biblica® Open Gbagyi Contemporary Bible™, New Testament
Copyright © 1997, 2025 by Biblica, Inc.
“Biblica” ɓədo n Biblica əznù zhazhai, ɓa zhni aɓwaze aznù nu n a cei kafyilo n United States Patent and Trademark Office (Amerika əznù aɓwaze nya ɓədo n nyazhnizhni ofyisii) n Biblica, Inc. ncei yafyi. Apmazhni n gbegai nu.
“Biblica” is a trademark registered in the United States Patent and Trademark Office by Biblica, Inc. Used with permission.
See promoVersionInfo in metadata.xml for Creative Commons license.
