Lúkas 22
22
Idɔg gá busió buá Yésuse
(Mat 26.1-5, 14-16; Mál 14.1-2, 10-11; Sáŋ 11.47-53)
1Gibín igiɛ́ bányananaá gilɛ́d giá kanda buanyɛ buá guóbonye oguŋ, igiɛ́ bɔ́dɔ́ŋɔnaá áneé Páska wa bayúdɛn, gímabá gíganyɛ mɔdɔg. 2Na bedúmbinusámb abagɔ́n na belinsibigodi bámba dudádɛ duá guɔ́n Yésuse, gá giagiá bámabianán bugádɔ na buán. 3Sátan uwond uwébíŋín uguá Yúdas, uyɔɔ́ bɔ́dɔ́ŋɔnaá áneé Iskaliɔ́t, umaábá uguá ɔlɔŋ huá bebinene báad na báandɛ. 4Yúdas uwiídɛ́n bagɔ́n bá bedúmbinusámb na bagɔ́n bá begíg gigúl, gá gála idɔg hiá duín bɔ́ Yésuse. 5Ɔbɔɔ́b ibal na nugálɔ nuá Yúdas unugányɛ obónd abáhám ugelu áneé béŋin yɔ́ ŋŋúme. 6Yúdas uwaádaáb uwond uwɛɛ́d gɔg gá guamba ginɔ́g gá giásɛ gá duín bɔ́ Yésuse kandabá áneé giíŋ gimɔɔ́b.
Gubíaŋanan gá budɔ́mb buá Páska wa bayúdɛn
(Mat 26.17-19; Mál 14.12-16)
7Buɔ́sɛ buá nyánan bilɛ́d biá kanda buanyɛ buá guóbonye oguŋ, ubuɔ́ básúmbanɔ́ baán bá bidúmbúa gá Páska wa bayúdɛn, 8Yésuse uwadɔ́m na Piéle na Sáŋa uwɔyidɛn bɔ́ áneé: «Idánánɔ nuanadiálɛn inámb hiá nyánan gá Páska wa bayúdɛn.» 9Obóhún yɔ́ áneé: «Hanyɛ agaá ámbanɔ́ áneé dianal inámb hiáguɔ́?» 10Uwondinye bɔ́ áneé: «Nugégébíŋén uguá tísɔna, nugaáguádán na mɔndɔ na giláma giá mimbi uguá ɔduá, binídínénu yɔ́ uguá giansɛ igiɛ́ úgeébíŋíne. 11Nuond nuɔyidɛn mɔndɔ wa nihiá áneé: “Ehuínyihuínyi umádídɔ́m áneé diguóhún hɔɔ́m ɔhɔɔ́ gimpána igiɛ́ ugaányánanaá gá busió buá budɔ́mb buá Páska wa bayúdɛn na bebinene gínya?” 12Ugeénúdíye gɔ́g giandá giá gimpána aŋánánáŋánán ugumɔn guá ndáŋia, hɔ́ núgaágualanɔ́ inámb.» 13abɛ́d gɔg, ebégégie buand gidigid hana Yésuse úmɔ́yɔ́n bɔ́, abáal inámb hiá Páska wa bayúdɛn.
Giŋɔ́nsa giá Páska giá bayúdɛn
(Mat 26.26-29; Mál 14.22-25; 1Kɔ 11.23-25)
14Ginɛŋ giá nyánan gímeémeg, Yésuse uwedugumin agá nubáŋ na bebinene bég. 15Uwɔyidɛn bɔ́ áneé: «Yaábianán nsan hómohómue ya gueleé dinyá gunyá guá budɔ́mb buá Páska wa bayúdɛn ubuɔ naánanɔ mbédebíŋín uguá giɔ́bíga. 16Gá giagiá, yɔ́núɔyɔn buɔ́ áneé ndianándanyá gunyá guá Páska wa bayúdɛn gueneg haná búónóbíhónyonú uguá Niguili niá Uhaluá.» 17Uwɔgɔ́l gɔg gibólé giá magɛ́b, uweéŋin Uhaluá mbíyigie, uwɔyɛd áneé: «Gɔ́lɔ́nɔ́n nubíhuá banuá gidigid, 18gá giagiá yɔ́núɔyɔn buɔ́, ta buɔ́sɛ ndienéndesíen mbíhuá magɛ́b má fínyi kandabá áneé gugilebe guá Uhaluá gúmésieg.» 19Uwond uwɔgɔ́l gilɛ́d, uweéŋin Uhaluá mbíyigie, uwabáya giɛ́, uweéŋin bɔ́ giɛ́ úmuanyɛ gɔ́b áneé: «Gɔ́lɔ́nɔ́n, búnyɛ nuɔ́l nuámɛ, unuɔ́ ŋŋasílígánɔ gánɔ gá busió. Alánánɔ buɔ́ gá mbídúmenye.» 20Uwɔgɔ́l gibólé giá magɛ́b, uwal bilɔŋ bímomi hana úmal gá gunyá, uwɔyidɛn bɔ́ áneé: «Gibólé giá magɛ́b igiɛ, gínyɛ gíbólé giá giŋɔ́nsa giá nigál igínya na manɔ́ŋ mámɛ omógodugonú gánɔ gá busió.»
Gidóginye giá gigió
(Mat 26.20-25; Mál 14.17-21)
21Yésuse uwɔnduguɔyɔn bebinene bég áneé: «Ndénu gɔg, mɔndɔ ugóŋiónú waányánan ɔlɔŋ naánamɛ agá nubáŋ aga. 22Gá giagiá, Muɔ́n wa mɔndɔ ugeégué hana búnya ubúɔ́ŋɔ́n. Búnyɛ gɔg bulɔ́b gá busió buá mɔndɔ ugeéduénú yɔ́.» 23Bebinene abɛ́d gá bíóhon bumɔndɔ ubúnya buá gual buɔ́.
Na gidógie na ndán
(Mat 18.1; 20.25-28; Mál 9.34; 10.42-45)
24Bebinene abɛ́d gá sáŋá gá lɛns mɔndɔ unyaá ɔgúnɔ́gɔ́n uguɔ́b guá ɔ́lɔŋ. 25Yésuse uwondinye bɔ́ áneé: «Ifuŋ siá maán síéhiligenin mɔ́, gúu ebéhiligenineé mɔ́ bɔ́dɔ́ŋɔnaá bɔ́ áneé belíbeseé. 26Búdigódi áneé búbá nɔ́ gánɔ gá busió. Gɔgaá, mɔndɔ uwɔyɔnɔ́ áneé unyɛ ɔgúnɔgɔ́n uguánɔ guá ɔlɔŋ, ugódi áneé ugɔ́l ondig huá maná muúŋayɔ. Mɔndɔ ugimbenú bɔsɔ́gá, ugɔ́l súsɔ́n ondig huá mɔndɔ udúmábanɔ́ bɔsɔ́gá. 27Na mɔndɔ unyaá agá nubáŋ na mɔndɔ udúmábanɔ́, ulúm unyaá ɔgúnɔgɔ́n? Mbuen búnyɛ unyaá agá nubáŋ? Henyé, yaŋuá, nnyɛ agánɔ gá ɔdɛ́m na ɔdɛ́m uguá udényi huá mɔndɔ udúmábanɔ́.»
(Mat 19.28)
28«Banuá, núábá gilád giámɛ uguámɛ guá yɔɔ́bídɛ́n. 29Yaŋuá gɔg yaánúhuán Niguili haná Baba wamɛ úmámpuá: 30Nɔ́ núánányánanaá, nubíhuán agámɛ gá nubáŋ uguámɛ guá Niguili. Nuónond nudugumen uguá mugɔ́y gá gélenye eguíli ya Íslayɛ́l yáad na áhandɛ.»
Yésuse umódóginye Piéle
31Ɔgúná uwɔyɛd áneé: «Símune, Símune, Sátan waáguamba guguág uguá yɔɔ́bídɛ́n hana bɔ́bídɔnaá belé. 32Gɔgaá, yaŋuá, yoóbísógólonye gáhɔ gá busió gá gueleé guágɔdɛ́m guáhɔ gúdigua. Aŋuá, onómósiond gínyígínyé beliméen báhɔ.»
(Mat 26.33-34; Mál 14.29-30)
33Piéle uwondinye Yésuse áneé: «Ɔgúná, ɔlɔŋ naánahɔ nnyɛ mɔdɔg gá guɛ́d uguá giansɛ giá mbíne, ta gá gué.» 34Yésuse uwɔyɛd áneé: «Piéle, yɔ́guɔyɔn áneé gidédi gígágásidádɛ́ɛd hínen agaábá amámánámbísásɛ́ɛg iŋand ídádɔ.»
Yɔɔ́bídɛ́n híganyɛ mɔdɔg
35Yésuse uwɔyidɛn bebinene áneé: «Agaá mmánúdɔ́m kanda gibadá giá ŋŋúme, kanda gibadá giá uŋand, kanda bibɔ́gɔ́d numabaŋɛ́d buand búmodi a?» Obóndinye yɔ́ áneé «Ta buand.» 36Uwondinye bɔ́ áneé: «Dabdab gɔg, ugódionu gibadá giá ŋŋúme ánaá ugɔ́l giɛ́, bilɔŋ bímomi ugódionu gibadá giá uŋand ánaá ugɔ́l giɛ́, udiábianán nnyémél, ánaá údué gihuya giég gá guɔ́nd nnyémél. 37Gá giagiá yɔɔ́núɔyɔn buɔ́, buáguamba áneé nugálɔ unúnya unuɔ́ŋɔ́n unuɔ núbíhónye gámɛ gá busió: Bámaág yɔ́ uguá ɔlɔŋ huá bafal, gúu ubúmbíyígánaá búgóbíhónyónu.» 38bebinene obóndinye yɔ́ áneé: «Ɔgúná, nnyémél sísíényé íhandɛ.» Yésuse uwondinye bɔ́ áneé: «símeég.»
Mbísógóli agá ɔŋuɛnyɛ huá madɛ́ má megúd
(Mat 26.36-41; Mál 14.32-38)
39Yésuse uwahám gá guɛ́d agá ɔŋuɛnyɛ huá madɛ́ má megúd haná úmabá woól waála, bebinene bég ebébinen yɔ́. 40Umeéméneg, uwɔyidɛn bɔ́ áneé: «Ánaá núbísógólonye gá gueleé nudiguɛ́n uguá buŋaŋa buá yɔɔ́bídɛ́n.» 41Uwedúmbie gubígɔ́gɛ́ɛd enéné, uwegunsig dunúnú uwɛɛ́d gá bísógólonye wɔya áneé: 42«Baba, mmába anyɛ wa ŋŋólínye gibólé igigányɛ! Ta nɔ́, búdigódi áneé búbá guɔyɛd guámɛ gɔgaá, búbá guɔyɛd guáhɔ.» 43Gilúna igíónoólin ugumɔn gá gínyiginye yɔ́. 44Yésuse na mesígíl amagányɛ, uwobísógólonye kanda nidɔgíná, gibányɛ giég igíósiól hana bikébi biá manɔ́ŋ bídénen eguísi. 45Egélém gá mbísógóli, Yésuse uwadigɛn uwoól ɔmbɔ́g huá bebinene bég uwegégie bɔ́ abayigánɔ na mesígíl. 46Uwoóhún bɔ́ áneé: «Giagɛ! Nuábídíman a? Ánaá nuádigan nubísógólonye gá gueleé nudiguɛ́n uguá yɔɔ́bídɛ́n.»
Gigimbine giá Yésuse
(Mat 26.47-55; Mál 14.43-49)
47Yésuse umabá umanyɛ gá gálgal giíŋ igíáháminɛn. Mɔndɔ ɔhɛ́n áneé Yúdas uguá ɔlɔŋ huá bebinene báad na báandɛ, úmɔɔ́gɔ́gá giíŋ. Uwakilɛn Yésuse gá gɔ́l yɔ́ ŋŋuíndi. 48Yésuse uwɔyidɛn yɔ́ áneé: «Yúdas, uguá ŋŋɔ́l ŋŋuíndi guɔ́ émédué Muɔ́n wa mɔndɔ!» 49Bandɔ abámabá na Yésuse bámaámáan ubúmabá áneé búgaábíal, obóhún yɔ́ áneé: «Ɔgúná disɔ́gúna nnyémél a?» 50Wa guɔ́b omodi uwagɔ́b edúmébi wa ɔgúnɔ́gɔ́n wa bedúmbinusámb nuá Uhaluá uwasɔ́mb yɔ́ odú uhudádɛ. 51Yésuse uwɔgɔ́l gɔg nugálɔ úmuanyɛ áneé: «Níhínánánɔ, búmeég.» Yésuse uwɔbígɔ́dɛn odú huá mɔndɔ ugányɛ, uwoóndúgie yɔ́. 52Yésuse uwɔyidɛn bɔgúnɔ́gɔ́n bá bedúmbinusámb nuá Uhaluá, bɔgúnɔ́gɔ́n bá begíg idúl na bɔgɔ́ga obómoól gá gimbin yɔ́ áneé: «Numánádígɛ́n na nnyémél na imbóŋ hana numoól gá gimbin uŋébi! 53Mɔɔ́sɛ gidigid yaábá naánanɔ uguá idúl nuéséŋimbin, búnyɛ dabdab gisigɛl giánɔ, búnyɛ buŋaŋa buá mbíne.»
Yésuse uguá imbɔ́g siá begíg
(Mat 26.57-58; Mál 14.53-54)
54Ebégimbin Yésuse, abɛ́d neéneg, ebénebíŋínyé yɔ́ uguá giansɛ giá ɔgɔ́n wa bedúmbinusámb nuá Uhaluá, Piéle ubínen bɔ́ mehenyé. 55Hana bɔ́mɔ́gɔm giandá giá yoógi agá ɔdɛ́m huá nígadá, ebédugumin hɔ́ gá bíésébe bámuanyɛ gidigid. Piéle uwedugumin hɔ́ súsɔ́n ɔlɔŋ nɔɔ́nɔb.
(Mat 26.69-75; Mál 14.66-72; Sáŋ 18.17, 25-27)
56Edúmébi omodi wa ugándɔ uwaán Piéle dugumine agá buáyɛ buá yoógi, uwosólímin yɔ́, úmuanyɛ áneé: «Unó súsɔ́n usábá neéneg!» 57Piéle uwabísásɛ́ɛg wɔya áneé: «Ugándɔ, ndiényi mɔndɔ ugányɛ.» 58Maná ginɛŋ umádɔ́mb, mɔndɔ omodi umaámán yɔ́, uwɔyɛd áneé: «Aŋuá súsɔ́n anyɛ wa guɔ́b.» Piéle uwondinye áneé: «Ndibá nɔɔ́nɔb.» 59Gisigɛl gímandadɔ́mb, mɔndɔ omodi uwɔnduguɔyɛd áneé: «Búnyɛ nɔ́ mɔndɔ unó waábá neéneg, guond muɛ́d unyɛ wa bagalileyɛ́ŋ.» 60Piéle uwondinye áneé: «Ndiényi ubuɔ́ ámbanɔ́ guɔyɛd.» Piéle umaágágálgal anagányɛ gidédi igíedúmbie gudádɛ́ɛd. 61Ɔgúná uwabígágálɛd Piéle abádán eŋís. Piéle uwebídúmdenye nugálɔ nuá Ɔgúná unuɔ́ úmɔyídɛ́n yɔ́ áneé: «Gá gueleé gidédi gídádɛ́ɛd hínen agaábá amámbísásɛ́ɛg gá iŋand ídádɔ.» 62Piéle uwahám, uwabahɔn masiana.
(Mat 26.67-68; Mál 14.65)
63Bandɔ abámagíga Yésuse bɔ́hɔna yɔ́, bénube yɔ́. 64Béhúge yɔ́ busió bóhon yɔ́ áneé: «Bɔ́g, ɔdiɔ́yídɛn mɔndɔ úmágɔ́b.» 65Bónd bádúdan yɔ́ giod giá dugálɔ giá nsɛg.
Yésuse agá idɔg ihigɔ́n
(Mat 26.59, 63-65; Mál 14.55, 61-64)
66Guɔ́m gúmaámábál, na bɔgɔ́ga na bagɔ́n bá bedúmbinusámb, ebébídidid, ɔbɔ́gɔ́l Yésuse gá guɛ́d neéneg gá gélenye yɔ́ agá idɔg ihigɔ́n. 67Ɔbɔ́yidɛn yɔ́ áneé: «Díɔ́yídɛ́n mmába anyɛ Bémeyíde.» Yésuse uwondinye bɔ́ áneé: «Mmɔ́núɔyidɛn, nudigaáguádáab, 68mmónúóhún ŋŋóhúnín nudigóŋondinye. 69Gɔgaá gubul dabdab, Muɔ́n wa mɔndɔ ugédugumine ɔmbɔ́g uhunɛ́m huá Uhaluá unya ŋŋaŋa.» 70Ɔbɔ́yɛd bámuanyɛ gidigid áneé: «Anyɛ gɔg Muɔ́n wa mɔndɔ a?» Uwondinye áneé: «Banuá nuɔyɔnɔ́ áneé nnyɛ yɔ́.» 71Ɔbɔ́yɛd áneé: «Diánduguamba bamaáná bá giagɛ, haná dímɔ́bíɔ́bɛ́n buɔ́ uguadá guég guá niíd.»
ទើបបានជ្រើសរើសហើយ៖
Lúkas 22: EKM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Lúkas 22
22
Idɔg gá busió buá Yésuse
(Mat 26.1-5, 14-16; Mál 14.1-2, 10-11; Sáŋ 11.47-53)
1Gibín igiɛ́ bányananaá gilɛ́d giá kanda buanyɛ buá guóbonye oguŋ, igiɛ́ bɔ́dɔ́ŋɔnaá áneé Páska wa bayúdɛn, gímabá gíganyɛ mɔdɔg. 2Na bedúmbinusámb abagɔ́n na belinsibigodi bámba dudádɛ duá guɔ́n Yésuse, gá giagiá bámabianán bugádɔ na buán. 3Sátan uwond uwébíŋín uguá Yúdas, uyɔɔ́ bɔ́dɔ́ŋɔnaá áneé Iskaliɔ́t, umaábá uguá ɔlɔŋ huá bebinene báad na báandɛ. 4Yúdas uwiídɛ́n bagɔ́n bá bedúmbinusámb na bagɔ́n bá begíg gigúl, gá gála idɔg hiá duín bɔ́ Yésuse. 5Ɔbɔɔ́b ibal na nugálɔ nuá Yúdas unugányɛ obónd abáhám ugelu áneé béŋin yɔ́ ŋŋúme. 6Yúdas uwaádaáb uwond uwɛɛ́d gɔg gá guamba ginɔ́g gá giásɛ gá duín bɔ́ Yésuse kandabá áneé giíŋ gimɔɔ́b.
Gubíaŋanan gá budɔ́mb buá Páska wa bayúdɛn
(Mat 26.17-19; Mál 14.12-16)
7Buɔ́sɛ buá nyánan bilɛ́d biá kanda buanyɛ buá guóbonye oguŋ, ubuɔ́ básúmbanɔ́ baán bá bidúmbúa gá Páska wa bayúdɛn, 8Yésuse uwadɔ́m na Piéle na Sáŋa uwɔyidɛn bɔ́ áneé: «Idánánɔ nuanadiálɛn inámb hiá nyánan gá Páska wa bayúdɛn.» 9Obóhún yɔ́ áneé: «Hanyɛ agaá ámbanɔ́ áneé dianal inámb hiáguɔ́?» 10Uwondinye bɔ́ áneé: «Nugégébíŋén uguá tísɔna, nugaáguádán na mɔndɔ na giláma giá mimbi uguá ɔduá, binídínénu yɔ́ uguá giansɛ igiɛ́ úgeébíŋíne. 11Nuond nuɔyidɛn mɔndɔ wa nihiá áneé: “Ehuínyihuínyi umádídɔ́m áneé diguóhún hɔɔ́m ɔhɔɔ́ gimpána igiɛ́ ugaányánanaá gá busió buá budɔ́mb buá Páska wa bayúdɛn na bebinene gínya?” 12Ugeénúdíye gɔ́g giandá giá gimpána aŋánánáŋánán ugumɔn guá ndáŋia, hɔ́ núgaágualanɔ́ inámb.» 13abɛ́d gɔg, ebégégie buand gidigid hana Yésuse úmɔ́yɔ́n bɔ́, abáal inámb hiá Páska wa bayúdɛn.
Giŋɔ́nsa giá Páska giá bayúdɛn
(Mat 26.26-29; Mál 14.22-25; 1Kɔ 11.23-25)
14Ginɛŋ giá nyánan gímeémeg, Yésuse uwedugumin agá nubáŋ na bebinene bég. 15Uwɔyidɛn bɔ́ áneé: «Yaábianán nsan hómohómue ya gueleé dinyá gunyá guá budɔ́mb buá Páska wa bayúdɛn ubuɔ naánanɔ mbédebíŋín uguá giɔ́bíga. 16Gá giagiá, yɔ́núɔyɔn buɔ́ áneé ndianándanyá gunyá guá Páska wa bayúdɛn gueneg haná búónóbíhónyonú uguá Niguili niá Uhaluá.» 17Uwɔgɔ́l gɔg gibólé giá magɛ́b, uweéŋin Uhaluá mbíyigie, uwɔyɛd áneé: «Gɔ́lɔ́nɔ́n nubíhuá banuá gidigid, 18gá giagiá yɔ́núɔyɔn buɔ́, ta buɔ́sɛ ndienéndesíen mbíhuá magɛ́b má fínyi kandabá áneé gugilebe guá Uhaluá gúmésieg.» 19Uwond uwɔgɔ́l gilɛ́d, uweéŋin Uhaluá mbíyigie, uwabáya giɛ́, uweéŋin bɔ́ giɛ́ úmuanyɛ gɔ́b áneé: «Gɔ́lɔ́nɔ́n, búnyɛ nuɔ́l nuámɛ, unuɔ́ ŋŋasílígánɔ gánɔ gá busió. Alánánɔ buɔ́ gá mbídúmenye.» 20Uwɔgɔ́l gibólé giá magɛ́b, uwal bilɔŋ bímomi hana úmal gá gunyá, uwɔyidɛn bɔ́ áneé: «Gibólé giá magɛ́b igiɛ, gínyɛ gíbólé giá giŋɔ́nsa giá nigál igínya na manɔ́ŋ mámɛ omógodugonú gánɔ gá busió.»
Gidóginye giá gigió
(Mat 26.20-25; Mál 14.17-21)
21Yésuse uwɔnduguɔyɔn bebinene bég áneé: «Ndénu gɔg, mɔndɔ ugóŋiónú waányánan ɔlɔŋ naánamɛ agá nubáŋ aga. 22Gá giagiá, Muɔ́n wa mɔndɔ ugeégué hana búnya ubúɔ́ŋɔ́n. Búnyɛ gɔg bulɔ́b gá busió buá mɔndɔ ugeéduénú yɔ́.» 23Bebinene abɛ́d gá bíóhon bumɔndɔ ubúnya buá gual buɔ́.
Na gidógie na ndán
(Mat 18.1; 20.25-28; Mál 9.34; 10.42-45)
24Bebinene abɛ́d gá sáŋá gá lɛns mɔndɔ unyaá ɔgúnɔ́gɔ́n uguɔ́b guá ɔ́lɔŋ. 25Yésuse uwondinye bɔ́ áneé: «Ifuŋ siá maán síéhiligenin mɔ́, gúu ebéhiligenineé mɔ́ bɔ́dɔ́ŋɔnaá bɔ́ áneé belíbeseé. 26Búdigódi áneé búbá nɔ́ gánɔ gá busió. Gɔgaá, mɔndɔ uwɔyɔnɔ́ áneé unyɛ ɔgúnɔgɔ́n uguánɔ guá ɔlɔŋ, ugódi áneé ugɔ́l ondig huá maná muúŋayɔ. Mɔndɔ ugimbenú bɔsɔ́gá, ugɔ́l súsɔ́n ondig huá mɔndɔ udúmábanɔ́ bɔsɔ́gá. 27Na mɔndɔ unyaá agá nubáŋ na mɔndɔ udúmábanɔ́, ulúm unyaá ɔgúnɔgɔ́n? Mbuen búnyɛ unyaá agá nubáŋ? Henyé, yaŋuá, nnyɛ agánɔ gá ɔdɛ́m na ɔdɛ́m uguá udényi huá mɔndɔ udúmábanɔ́.»
(Mat 19.28)
28«Banuá, núábá gilád giámɛ uguámɛ guá yɔɔ́bídɛ́n. 29Yaŋuá gɔg yaánúhuán Niguili haná Baba wamɛ úmámpuá: 30Nɔ́ núánányánanaá, nubíhuán agámɛ gá nubáŋ uguámɛ guá Niguili. Nuónond nudugumen uguá mugɔ́y gá gélenye eguíli ya Íslayɛ́l yáad na áhandɛ.»
Yésuse umódóginye Piéle
31Ɔgúná uwɔyɛd áneé: «Símune, Símune, Sátan waáguamba guguág uguá yɔɔ́bídɛ́n hana bɔ́bídɔnaá belé. 32Gɔgaá, yaŋuá, yoóbísógólonye gáhɔ gá busió gá gueleé guágɔdɛ́m guáhɔ gúdigua. Aŋuá, onómósiond gínyígínyé beliméen báhɔ.»
(Mat 26.33-34; Mál 14.29-30)
33Piéle uwondinye Yésuse áneé: «Ɔgúná, ɔlɔŋ naánahɔ nnyɛ mɔdɔg gá guɛ́d uguá giansɛ giá mbíne, ta gá gué.» 34Yésuse uwɔyɛd áneé: «Piéle, yɔ́guɔyɔn áneé gidédi gígágásidádɛ́ɛd hínen agaábá amámánámbísásɛ́ɛg iŋand ídádɔ.»
Yɔɔ́bídɛ́n híganyɛ mɔdɔg
35Yésuse uwɔyidɛn bebinene áneé: «Agaá mmánúdɔ́m kanda gibadá giá ŋŋúme, kanda gibadá giá uŋand, kanda bibɔ́gɔ́d numabaŋɛ́d buand búmodi a?» Obóndinye yɔ́ áneé «Ta buand.» 36Uwondinye bɔ́ áneé: «Dabdab gɔg, ugódionu gibadá giá ŋŋúme ánaá ugɔ́l giɛ́, bilɔŋ bímomi ugódionu gibadá giá uŋand ánaá ugɔ́l giɛ́, udiábianán nnyémél, ánaá údué gihuya giég gá guɔ́nd nnyémél. 37Gá giagiá yɔɔ́núɔyɔn buɔ́, buáguamba áneé nugálɔ unúnya unuɔ́ŋɔ́n unuɔ núbíhónye gámɛ gá busió: Bámaág yɔ́ uguá ɔlɔŋ huá bafal, gúu ubúmbíyígánaá búgóbíhónyónu.» 38bebinene obóndinye yɔ́ áneé: «Ɔgúná, nnyémél sísíényé íhandɛ.» Yésuse uwondinye bɔ́ áneé: «símeég.»
Mbísógóli agá ɔŋuɛnyɛ huá madɛ́ má megúd
(Mat 26.36-41; Mál 14.32-38)
39Yésuse uwahám gá guɛ́d agá ɔŋuɛnyɛ huá madɛ́ má megúd haná úmabá woól waála, bebinene bég ebébinen yɔ́. 40Umeéméneg, uwɔyidɛn bɔ́ áneé: «Ánaá núbísógólonye gá gueleé nudiguɛ́n uguá buŋaŋa buá yɔɔ́bídɛ́n.» 41Uwedúmbie gubígɔ́gɛ́ɛd enéné, uwegunsig dunúnú uwɛɛ́d gá bísógólonye wɔya áneé: 42«Baba, mmába anyɛ wa ŋŋólínye gibólé igigányɛ! Ta nɔ́, búdigódi áneé búbá guɔyɛd guámɛ gɔgaá, búbá guɔyɛd guáhɔ.» 43Gilúna igíónoólin ugumɔn gá gínyiginye yɔ́. 44Yésuse na mesígíl amagányɛ, uwobísógólonye kanda nidɔgíná, gibányɛ giég igíósiól hana bikébi biá manɔ́ŋ bídénen eguísi. 45Egélém gá mbísógóli, Yésuse uwadigɛn uwoól ɔmbɔ́g huá bebinene bég uwegégie bɔ́ abayigánɔ na mesígíl. 46Uwoóhún bɔ́ áneé: «Giagɛ! Nuábídíman a? Ánaá nuádigan nubísógólonye gá gueleé nudiguɛ́n uguá yɔɔ́bídɛ́n.»
Gigimbine giá Yésuse
(Mat 26.47-55; Mál 14.43-49)
47Yésuse umabá umanyɛ gá gálgal giíŋ igíáháminɛn. Mɔndɔ ɔhɛ́n áneé Yúdas uguá ɔlɔŋ huá bebinene báad na báandɛ, úmɔɔ́gɔ́gá giíŋ. Uwakilɛn Yésuse gá gɔ́l yɔ́ ŋŋuíndi. 48Yésuse uwɔyidɛn yɔ́ áneé: «Yúdas, uguá ŋŋɔ́l ŋŋuíndi guɔ́ émédué Muɔ́n wa mɔndɔ!» 49Bandɔ abámabá na Yésuse bámaámáan ubúmabá áneé búgaábíal, obóhún yɔ́ áneé: «Ɔgúná disɔ́gúna nnyémél a?» 50Wa guɔ́b omodi uwagɔ́b edúmébi wa ɔgúnɔ́gɔ́n wa bedúmbinusámb nuá Uhaluá uwasɔ́mb yɔ́ odú uhudádɛ. 51Yésuse uwɔgɔ́l gɔg nugálɔ úmuanyɛ áneé: «Níhínánánɔ, búmeég.» Yésuse uwɔbígɔ́dɛn odú huá mɔndɔ ugányɛ, uwoóndúgie yɔ́. 52Yésuse uwɔyidɛn bɔgúnɔ́gɔ́n bá bedúmbinusámb nuá Uhaluá, bɔgúnɔ́gɔ́n bá begíg idúl na bɔgɔ́ga obómoól gá gimbin yɔ́ áneé: «Numánádígɛ́n na nnyémél na imbóŋ hana numoól gá gimbin uŋébi! 53Mɔɔ́sɛ gidigid yaábá naánanɔ uguá idúl nuéséŋimbin, búnyɛ dabdab gisigɛl giánɔ, búnyɛ buŋaŋa buá mbíne.»
Yésuse uguá imbɔ́g siá begíg
(Mat 26.57-58; Mál 14.53-54)
54Ebégimbin Yésuse, abɛ́d neéneg, ebénebíŋínyé yɔ́ uguá giansɛ giá ɔgɔ́n wa bedúmbinusámb nuá Uhaluá, Piéle ubínen bɔ́ mehenyé. 55Hana bɔ́mɔ́gɔm giandá giá yoógi agá ɔdɛ́m huá nígadá, ebédugumin hɔ́ gá bíésébe bámuanyɛ gidigid. Piéle uwedugumin hɔ́ súsɔ́n ɔlɔŋ nɔɔ́nɔb.
(Mat 26.69-75; Mál 14.66-72; Sáŋ 18.17, 25-27)
56Edúmébi omodi wa ugándɔ uwaán Piéle dugumine agá buáyɛ buá yoógi, uwosólímin yɔ́, úmuanyɛ áneé: «Unó súsɔ́n usábá neéneg!» 57Piéle uwabísásɛ́ɛg wɔya áneé: «Ugándɔ, ndiényi mɔndɔ ugányɛ.» 58Maná ginɛŋ umádɔ́mb, mɔndɔ omodi umaámán yɔ́, uwɔyɛd áneé: «Aŋuá súsɔ́n anyɛ wa guɔ́b.» Piéle uwondinye áneé: «Ndibá nɔɔ́nɔb.» 59Gisigɛl gímandadɔ́mb, mɔndɔ omodi uwɔnduguɔyɛd áneé: «Búnyɛ nɔ́ mɔndɔ unó waábá neéneg, guond muɛ́d unyɛ wa bagalileyɛ́ŋ.» 60Piéle uwondinye áneé: «Ndiényi ubuɔ́ ámbanɔ́ guɔyɛd.» Piéle umaágágálgal anagányɛ gidédi igíedúmbie gudádɛ́ɛd. 61Ɔgúná uwabígágálɛd Piéle abádán eŋís. Piéle uwebídúmdenye nugálɔ nuá Ɔgúná unuɔ́ úmɔyídɛ́n yɔ́ áneé: «Gá gueleé gidédi gídádɛ́ɛd hínen agaábá amámbísásɛ́ɛg gá iŋand ídádɔ.» 62Piéle uwahám, uwabahɔn masiana.
(Mat 26.67-68; Mál 14.65)
63Bandɔ abámagíga Yésuse bɔ́hɔna yɔ́, bénube yɔ́. 64Béhúge yɔ́ busió bóhon yɔ́ áneé: «Bɔ́g, ɔdiɔ́yídɛn mɔndɔ úmágɔ́b.» 65Bónd bádúdan yɔ́ giod giá dugálɔ giá nsɛg.
Yésuse agá idɔg ihigɔ́n
(Mat 26.59, 63-65; Mál 14.55, 61-64)
66Guɔ́m gúmaámábál, na bɔgɔ́ga na bagɔ́n bá bedúmbinusámb, ebébídidid, ɔbɔ́gɔ́l Yésuse gá guɛ́d neéneg gá gélenye yɔ́ agá idɔg ihigɔ́n. 67Ɔbɔ́yidɛn yɔ́ áneé: «Díɔ́yídɛ́n mmába anyɛ Bémeyíde.» Yésuse uwondinye bɔ́ áneé: «Mmɔ́núɔyidɛn, nudigaáguádáab, 68mmónúóhún ŋŋóhúnín nudigóŋondinye. 69Gɔgaá gubul dabdab, Muɔ́n wa mɔndɔ ugédugumine ɔmbɔ́g uhunɛ́m huá Uhaluá unya ŋŋaŋa.» 70Ɔbɔ́yɛd bámuanyɛ gidigid áneé: «Anyɛ gɔg Muɔ́n wa mɔndɔ a?» Uwondinye áneé: «Banuá nuɔyɔnɔ́ áneé nnyɛ yɔ́.» 71Ɔbɔ́yɛd áneé: «Diánduguamba bamaáná bá giagɛ, haná dímɔ́bíɔ́bɛ́n buɔ́ uguadá guég guá niíd.»
ទើបបានជ្រើសរើសហើយ៖
:
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល