Sáŋa 7
7
Kanda guágɔdɛ́m wa beliméen bá Yésuse
1Egélém agányɛ, Yésuse uwegéndémidie gibéyi giá guísi giá Galilé, umasúguamba áneé ugéndémidie gibéyi giá guísi giá Yudé gá giagiá, bandɔ bá ihiligine hiá bayúdɛn bámasɛɛ́d gá guamba áneé bɔ́n yɔ́. 2Henyé gɔg áneé budɔ́mb buá bayúdɛn buá bilál búmasɛɛ́d mɔdɔg. 3Beliméen bég ɔbɔ́yidɛn yɔ́ áneé: «Ólígíe aga, idá uguá gibéyi giá guísi giá Yudé gá gueleé bebinene báhɔ bán súsɔ́n melélíe máhɔ ɔmɔɔ́ álanɔ́. 4Mɔndɔ udiáguala buand uguá ninamba úmámba áneé bálɛns yɔ́. Haná álanɔ́ melélíe anagányɛ bídíye agá eŋís ya bandɔ. 5Henyé gɔg áneé beliméen mbánan bámasábábádáaban yɔ́.» 6Yésuse uwɔyidɛn bɔ́ áneé: «Ginɛŋ giámɛ gímanyɛ gídiesíeg, gánɔ ginɛŋ gidigid gínyɛ beseé. 7Bandɔ bá guísi bádibá bánúbɛn banuá gɔgaá, yaŋuá bandɔ bá guísi bámbina gá giagiá, yaábala bilɔg biɔ́b biá melélíe. 8Ánaá banuá nuɛ́d gá budɔ́mb, yaŋuá ndiáguídan gá budɔ́mb ubugányɛ gá giagiá, ginɛŋ giámɛ gímanyɛ gídiesíeg.» 9Umaámágálɛ́d anagányɛ, uwɔlɔbɛn uguá gibéyi giá guísi giá Galilé. 10Gɔgaá, beliméen bámaámɛɛ́d gá budɔ́mb, Yésuse uwesíen úbínídín bɔ́ súsɔ́n uguá ninamba, umasúguamba gubídíye hana búmabá uguá ninamba.
Nuhɔ́nhɔ́n uguá ginɛŋ giá budɔ́mb buá bilál
11Agá budɔ́mb, bandɔ bá ihiligine hiá bayúdɛn abɛ́d gá guamba Yésuse bɔ́ya áneé: «Hanyɛ agaá únya gɔg?» 12Giod giá bioŋúl gímabá uguá giíŋ gég gá busió, bómodi bɔ́ya áneé: «Unyɛ mɔndɔ uwalanɔ́ beseé.» Bódodi bɔ́ya áneé: «Ɛ́ɛɛ́, weéfumenye bandɔ.» 13Ta nɔ́ gɔg, ta mɔndɔ umɔsúguɔya buónyi buég agá budányɛ gá giagiá, bámabá bédíne bandɔ bá ihiligine hiá bayúdɛn. 14Budɔ́mb búmasɛɛ́d agá ɔdɛ́m na ɔdɛ́m, uguá ginɛŋ igiɛ́ Yésuse úmeneg uguá idúl, uwɛɛ́d gá huínyihuinye. 15Nuhuínyihuínyi nuég unúénímie bandɔ bá ihiligine hiá bayúdɛn meéne bɔ́ya áneé: «Mɔndɔ uyɔ umasábá gá nuhɔ́nhɔ́n, naánanyá úmúnyanaá muand umuɔ gidigid?» 16Yésuse uwɔyidɛn bɔ́ áneé: «Nuhuínyihuínyi nuámɛ núdióguólonin agámɛ gɔgaá, núóguólonin agaá úmaándɔ́m. 17Mmába mɔndɔ wɔɔ́guɔya guala guɔyɛd guá Uhaluá, ugálɛns mmába nuhuínyihuínyi nuámɛ núóguólonin agá Uhaluá ugúnya ana agámɛ. 18Mɔndɔ uwɔyɔnɔ́ buónyi buég mbánan, ugányɛ waáguamba nigúmi niég, gɔgaá mɔndɔ uwambanɔ́ nigúmi niá úsádɔ́m yɔ́, ugányɛ mɔndɔ unyɛ gindényé, udigódi biíle. 19Mbúen Mɔ́sɛsa úmanúhuá gigodi? Gɔgaá, ta mɔndɔ uguánɔ guá ɔlɔŋ udiáguala hana gigodi igigányɛ gíɔ́yɔnɔ́. Gá giagɛ nuámbanɔ guŋɔ́n?» 20Giíŋ igíóndinye yɔ́ áneé: «Anyɛ uguá gigimbine giá gilɔg giá gileénde, ányá uwambanɔ́ guguɔ́n?» 21Yésuse uwondinye bɔ́ áneé: «Yaál pɛ́ŋ giseyi gímomi igínúbuŋulenyeé banuá gidigid meéne.» 22Mɔ́sɛsa umenúhuínyihuínye nuasana, ta hana númónúdiólónin egég gɔgaá, agá bɔdɔŋdɔ́ŋ banuá gɔg núáguansanɛn ta buɔ́sɛ buá nihoge. 23Mmába nunyɛ nua guans mɔndɔ buɔ́sɛ buánɔ buá nihoge kandabá áneé numáyal gigodi giá Mɔ́sɛsa, gá giagɛ gɔg núnliŋenineé áneé nsoóndúgie nuɔ́l gidigid nuá mɔndɔ buɔ́sɛ buá nihoge? 24Nudigélenye mɔndɔ uguá bilɔŋ gɔgaá, ánaá núsúmba bisan uguá gindényé. 25Bandɔ bá tísɔna wa Yelusalɛ́m bɔ́ya áneé: «Búdibá úmuanyɛ bámbanɔ́ guɔ́n a? 26Uyeényé gɔg ugálgalaá aga eŋís ya bandɔ, ta mɔndɔ omodi wa dɔgɔn, kásɛ ifuŋ siásɔ síádáab áneé únyaá hómohómue Bémeyíde a? 27Henyé, diálinsan hɔɔ́m ɔhɔɔ́ wólonineé gɔgaá, Bémeyíde uguá ginɛŋ igiɛ́ wónólonú mɔndɔ udiánálɛns buhɔɔ́m ubuɔ́ úmólin.» 28Yésuse umabá uhuínyihuinye gɔg uguá idúl, uwɔyɛd ugelu ugumɔn áneé: «Nuŋényi, nuényi hɔɔ́m ɔhɔɔ́ yoólonineé henyé, mmosóbíólin, úmaándɔ́m unyɛ gindényé, nudiényi yɔ́. 29Yaŋuá yeényi yɔ́ gá giagiá, mmónoólin egég gá buáyɛ, úmaándɔ́m. 30Abɛ́d gá guamba gugimbin yɔ́ gɔgaá, ta mɔndɔ umɔsɔ́dɔ́bígɛn yɔ́ ɔmbɔ́g gá giagiá, ginɛŋ giég gímabá gímanyɛ gídiesíeg.» 31Uguá giíŋ, giod igíádáab dugálɔ duá Yésuse gíɔ́ya áneé: «Uguá ginɛŋ igiɛ́ Bémeyíde wónólonú, wanála biandá biá biseyi gudɔ́mb ibiɛ a?» 32Bafalisiɛ́ŋ ɔbɔ́b bioŋúl biá giíŋ gá busió buá Yésuse. Bɔgúnɔ́gɔ́n bá bedúmbinusámb na bafalisiɛ́ŋ abádɔ́m begíg idúl gá guɛ́d gá gimbin yɔ́. 33Yésuse uwɔyɛd áneé: «Mmanyɛ naánanɔ gá maná ginɛŋ, egélém agányɛ ŋŋond agá mɔndɔ umaándɔ́m. 34Nuanáŋamba nudianándaŋán, gá giagiá buhɔɔ́m ubuɔ́ yanábánɔ́ núdibá nua guól.» 35Bandɔ bá ihiligine hiá bayúdɛn ɔbɔ́bíɔyidɛn áneé: «Hanyɛ agaá úgídánɔ́ áneé diamba yɔ́ didián yɔ́?» Ugɛɛ́d uguá bayúdɛn abánya sálámándá uguá baglɛ́k, ugɛɛ́d gá huínyihuinye baglɛ́k a? 36Umɔyɛ́d áneé: «Dianámba yɔ́ didián yɔ́, buhɔɔ́m ubuɔ́ wánábánɔ́ didibá dia guɛ́d. Búbúɔyɔnɔ áneé giagɛ?»
Buɔ́sɛ buá nsúgie buá budɔ́mb
37Buɔ́sɛ buá nsúgie buá budɔ́mb búmabá súsɔ́n giandá giá buɔ́sɛ, Yésuse uwadigɛn uwedélímin uwɛɛ́d gá sesenye ugelu ugumɔn áneé: «Niída nímanúma mɔndɔ, ánaá úŋkilɛn wasibíhuá.» 38Hana Ŋŋɔ́ŋɛ yɔ́yɔnɔ́ áneé: «Mɔndɔ uŋádáabanaá, isaá siá mimbi má nusɔ́da síánáhúha egég gá ɔdɛ́m.» 39Yésuse umabá ugálgal anagányɛ gá busió buá Gileénde igiɛ́ Uhaluá wénéŋineé bandɔ abádáabanaá yɔ́. Uguá ginɛŋ igigányɛ, Gileénde gímabá gímanyɛ gídiól gá giagiá, Yésuse umabá umanyɛ udibíŋín uguá nigúmi.
40Bandɔ bómodi, uguá ɔlɔŋ huá giíŋ, bɔ́mɔɔ́mɔɔ́b dugálɔ udugányɛ, abɛ́d gá guɔya áneé: «Hómohómue, Mɔndɔ uyɔ unyɛ ebunebúné.» 41Bódodi bɔ́ya áneé: «Búnyɛ Bémeyíde.» Gɔgaá, bómodi bɔ́ya áneé «Bémeyíde unyɛ wa guólin Galilé a?» 42Ŋŋɔ́ŋɛ síɔ́guɔya áneé: «Bémeyíde wonólin uguá nugɔg nuá ofuŋ Dáfide uguá tísɔna wa Bɛtlɛhɛ́m, maná tísɔna uyɔɔ́ ofuŋ Dáfide úmoólin.» 43Anagányɛ giíŋ gímasɛ́d gá bian masalasala gég gá busió. 44Bandɔ bómodi uguɔ́b guá ɔlɔŋ, bámamba áneé bégimbin yɔ́ gɔgaá, ta mɔndɔ umasábia nigég gá dɔ́bígɛn yɔ́ ɔmbɔ́g.
45Begíg bá idúl obósiond agá bɔgúnɔ́gɔ́n bá bedúmbinusámb na bafalisiɛ́ŋ obóhún bɔ́ áneé: «Gá giagɛ númésédigimbin yɔ́ gá guól neéneg?» 46Begíg obóndinye bɔ́ áneé: «Ta mɔndɔ udigódi bugéli hana mɔndɔ ugányɛ.» 47Bafalisiɛ́ŋ abábídáyídɛn áneé: «Haáyi, banuá súsɔ́n usɔnúnɔŋ a? 48Kásɛ uguá ɔlɔŋ huá ifuŋ, ugúnya ana huá bafalisiɛ́ŋ, nusamanuguán omódi usamanuguádáab yɔ́ a?» 49Gɔgaá, bandɔ abagányɛ bádiálínsan Gigodi, bányɛ ɔbɔlɔmɔ́n. 50Gɔgaá, mɔndɔ omodi uguɔ́b guá ɔlɔŋ huá bafalisiɛ́ŋ ɔhɛ́n áneé Nikodɛ́m, mɔndɔ umɔɔ́nɔ́ya mayɔ na Yésuse, uwɔyidɛn bɔ́ áneé: 51«Kásɛ Gigodi giásɔ gíɔ́guɔya áneé dinyɛ diásɔ́mb gisan giá mɔndɔ kandabá áneé dimɔ́b gihélum giég gá lɛns bubuand ubuɔ́ wál a?» 52Obóndinye yɔ́ áneé: «Aŋuá súsɔ́n anyɛ maná bagalileyɛ́ŋ a? Hilé Ŋŋɔ́ŋɛ, agaán áneé ta ebunebúné omoómi udióguólonin Galilé.»
Yésuse na ugándɔ umáal gidáŋa
53Abásálámandan sig mɔndɔ uwegúg egég gá nihiá.
ទើបបានជ្រើសរើសហើយ៖
Sáŋa 7: EKM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Sáŋa 7
7
Kanda guágɔdɛ́m wa beliméen bá Yésuse
1Egélém agányɛ, Yésuse uwegéndémidie gibéyi giá guísi giá Galilé, umasúguamba áneé ugéndémidie gibéyi giá guísi giá Yudé gá giagiá, bandɔ bá ihiligine hiá bayúdɛn bámasɛɛ́d gá guamba áneé bɔ́n yɔ́. 2Henyé gɔg áneé budɔ́mb buá bayúdɛn buá bilál búmasɛɛ́d mɔdɔg. 3Beliméen bég ɔbɔ́yidɛn yɔ́ áneé: «Ólígíe aga, idá uguá gibéyi giá guísi giá Yudé gá gueleé bebinene báhɔ bán súsɔ́n melélíe máhɔ ɔmɔɔ́ álanɔ́. 4Mɔndɔ udiáguala buand uguá ninamba úmámba áneé bálɛns yɔ́. Haná álanɔ́ melélíe anagányɛ bídíye agá eŋís ya bandɔ. 5Henyé gɔg áneé beliméen mbánan bámasábábádáaban yɔ́.» 6Yésuse uwɔyidɛn bɔ́ áneé: «Ginɛŋ giámɛ gímanyɛ gídiesíeg, gánɔ ginɛŋ gidigid gínyɛ beseé. 7Bandɔ bá guísi bádibá bánúbɛn banuá gɔgaá, yaŋuá bandɔ bá guísi bámbina gá giagiá, yaábala bilɔg biɔ́b biá melélíe. 8Ánaá banuá nuɛ́d gá budɔ́mb, yaŋuá ndiáguídan gá budɔ́mb ubugányɛ gá giagiá, ginɛŋ giámɛ gímanyɛ gídiesíeg.» 9Umaámágálɛ́d anagányɛ, uwɔlɔbɛn uguá gibéyi giá guísi giá Galilé. 10Gɔgaá, beliméen bámaámɛɛ́d gá budɔ́mb, Yésuse uwesíen úbínídín bɔ́ súsɔ́n uguá ninamba, umasúguamba gubídíye hana búmabá uguá ninamba.
Nuhɔ́nhɔ́n uguá ginɛŋ giá budɔ́mb buá bilál
11Agá budɔ́mb, bandɔ bá ihiligine hiá bayúdɛn abɛ́d gá guamba Yésuse bɔ́ya áneé: «Hanyɛ agaá únya gɔg?» 12Giod giá bioŋúl gímabá uguá giíŋ gég gá busió, bómodi bɔ́ya áneé: «Unyɛ mɔndɔ uwalanɔ́ beseé.» Bódodi bɔ́ya áneé: «Ɛ́ɛɛ́, weéfumenye bandɔ.» 13Ta nɔ́ gɔg, ta mɔndɔ umɔsúguɔya buónyi buég agá budányɛ gá giagiá, bámabá bédíne bandɔ bá ihiligine hiá bayúdɛn. 14Budɔ́mb búmasɛɛ́d agá ɔdɛ́m na ɔdɛ́m, uguá ginɛŋ igiɛ́ Yésuse úmeneg uguá idúl, uwɛɛ́d gá huínyihuinye. 15Nuhuínyihuínyi nuég unúénímie bandɔ bá ihiligine hiá bayúdɛn meéne bɔ́ya áneé: «Mɔndɔ uyɔ umasábá gá nuhɔ́nhɔ́n, naánanyá úmúnyanaá muand umuɔ gidigid?» 16Yésuse uwɔyidɛn bɔ́ áneé: «Nuhuínyihuínyi nuámɛ núdióguólonin agámɛ gɔgaá, núóguólonin agaá úmaándɔ́m. 17Mmába mɔndɔ wɔɔ́guɔya guala guɔyɛd guá Uhaluá, ugálɛns mmába nuhuínyihuínyi nuámɛ núóguólonin agá Uhaluá ugúnya ana agámɛ. 18Mɔndɔ uwɔyɔnɔ́ buónyi buég mbánan, ugányɛ waáguamba nigúmi niég, gɔgaá mɔndɔ uwambanɔ́ nigúmi niá úsádɔ́m yɔ́, ugányɛ mɔndɔ unyɛ gindényé, udigódi biíle. 19Mbúen Mɔ́sɛsa úmanúhuá gigodi? Gɔgaá, ta mɔndɔ uguánɔ guá ɔlɔŋ udiáguala hana gigodi igigányɛ gíɔ́yɔnɔ́. Gá giagɛ nuámbanɔ guŋɔ́n?» 20Giíŋ igíóndinye yɔ́ áneé: «Anyɛ uguá gigimbine giá gilɔg giá gileénde, ányá uwambanɔ́ guguɔ́n?» 21Yésuse uwondinye bɔ́ áneé: «Yaál pɛ́ŋ giseyi gímomi igínúbuŋulenyeé banuá gidigid meéne.» 22Mɔ́sɛsa umenúhuínyihuínye nuasana, ta hana númónúdiólónin egég gɔgaá, agá bɔdɔŋdɔ́ŋ banuá gɔg núáguansanɛn ta buɔ́sɛ buá nihoge. 23Mmába nunyɛ nua guans mɔndɔ buɔ́sɛ buánɔ buá nihoge kandabá áneé numáyal gigodi giá Mɔ́sɛsa, gá giagɛ gɔg núnliŋenineé áneé nsoóndúgie nuɔ́l gidigid nuá mɔndɔ buɔ́sɛ buá nihoge? 24Nudigélenye mɔndɔ uguá bilɔŋ gɔgaá, ánaá núsúmba bisan uguá gindényé. 25Bandɔ bá tísɔna wa Yelusalɛ́m bɔ́ya áneé: «Búdibá úmuanyɛ bámbanɔ́ guɔ́n a? 26Uyeényé gɔg ugálgalaá aga eŋís ya bandɔ, ta mɔndɔ omodi wa dɔgɔn, kásɛ ifuŋ siásɔ síádáab áneé únyaá hómohómue Bémeyíde a? 27Henyé, diálinsan hɔɔ́m ɔhɔɔ́ wólonineé gɔgaá, Bémeyíde uguá ginɛŋ igiɛ́ wónólonú mɔndɔ udiánálɛns buhɔɔ́m ubuɔ́ úmólin.» 28Yésuse umabá uhuínyihuinye gɔg uguá idúl, uwɔyɛd ugelu ugumɔn áneé: «Nuŋényi, nuényi hɔɔ́m ɔhɔɔ́ yoólonineé henyé, mmosóbíólin, úmaándɔ́m unyɛ gindényé, nudiényi yɔ́. 29Yaŋuá yeényi yɔ́ gá giagiá, mmónoólin egég gá buáyɛ, úmaándɔ́m. 30Abɛ́d gá guamba gugimbin yɔ́ gɔgaá, ta mɔndɔ umɔsɔ́dɔ́bígɛn yɔ́ ɔmbɔ́g gá giagiá, ginɛŋ giég gímabá gímanyɛ gídiesíeg.» 31Uguá giíŋ, giod igíádáab dugálɔ duá Yésuse gíɔ́ya áneé: «Uguá ginɛŋ igiɛ́ Bémeyíde wónólonú, wanála biandá biá biseyi gudɔ́mb ibiɛ a?» 32Bafalisiɛ́ŋ ɔbɔ́b bioŋúl biá giíŋ gá busió buá Yésuse. Bɔgúnɔ́gɔ́n bá bedúmbinusámb na bafalisiɛ́ŋ abádɔ́m begíg idúl gá guɛ́d gá gimbin yɔ́. 33Yésuse uwɔyɛd áneé: «Mmanyɛ naánanɔ gá maná ginɛŋ, egélém agányɛ ŋŋond agá mɔndɔ umaándɔ́m. 34Nuanáŋamba nudianándaŋán, gá giagiá buhɔɔ́m ubuɔ́ yanábánɔ́ núdibá nua guól.» 35Bandɔ bá ihiligine hiá bayúdɛn ɔbɔ́bíɔyidɛn áneé: «Hanyɛ agaá úgídánɔ́ áneé diamba yɔ́ didián yɔ́?» Ugɛɛ́d uguá bayúdɛn abánya sálámándá uguá baglɛ́k, ugɛɛ́d gá huínyihuinye baglɛ́k a? 36Umɔyɛ́d áneé: «Dianámba yɔ́ didián yɔ́, buhɔɔ́m ubuɔ́ wánábánɔ́ didibá dia guɛ́d. Búbúɔyɔnɔ áneé giagɛ?»
Buɔ́sɛ buá nsúgie buá budɔ́mb
37Buɔ́sɛ buá nsúgie buá budɔ́mb búmabá súsɔ́n giandá giá buɔ́sɛ, Yésuse uwadigɛn uwedélímin uwɛɛ́d gá sesenye ugelu ugumɔn áneé: «Niída nímanúma mɔndɔ, ánaá úŋkilɛn wasibíhuá.» 38Hana Ŋŋɔ́ŋɛ yɔ́yɔnɔ́ áneé: «Mɔndɔ uŋádáabanaá, isaá siá mimbi má nusɔ́da síánáhúha egég gá ɔdɛ́m.» 39Yésuse umabá ugálgal anagányɛ gá busió buá Gileénde igiɛ́ Uhaluá wénéŋineé bandɔ abádáabanaá yɔ́. Uguá ginɛŋ igigányɛ, Gileénde gímabá gímanyɛ gídiól gá giagiá, Yésuse umabá umanyɛ udibíŋín uguá nigúmi.
40Bandɔ bómodi, uguá ɔlɔŋ huá giíŋ, bɔ́mɔɔ́mɔɔ́b dugálɔ udugányɛ, abɛ́d gá guɔya áneé: «Hómohómue, Mɔndɔ uyɔ unyɛ ebunebúné.» 41Bódodi bɔ́ya áneé: «Búnyɛ Bémeyíde.» Gɔgaá, bómodi bɔ́ya áneé «Bémeyíde unyɛ wa guólin Galilé a?» 42Ŋŋɔ́ŋɛ síɔ́guɔya áneé: «Bémeyíde wonólin uguá nugɔg nuá ofuŋ Dáfide uguá tísɔna wa Bɛtlɛhɛ́m, maná tísɔna uyɔɔ́ ofuŋ Dáfide úmoólin.» 43Anagányɛ giíŋ gímasɛ́d gá bian masalasala gég gá busió. 44Bandɔ bómodi uguɔ́b guá ɔlɔŋ, bámamba áneé bégimbin yɔ́ gɔgaá, ta mɔndɔ umasábia nigég gá dɔ́bígɛn yɔ́ ɔmbɔ́g.
45Begíg bá idúl obósiond agá bɔgúnɔ́gɔ́n bá bedúmbinusámb na bafalisiɛ́ŋ obóhún bɔ́ áneé: «Gá giagɛ númésédigimbin yɔ́ gá guól neéneg?» 46Begíg obóndinye bɔ́ áneé: «Ta mɔndɔ udigódi bugéli hana mɔndɔ ugányɛ.» 47Bafalisiɛ́ŋ abábídáyídɛn áneé: «Haáyi, banuá súsɔ́n usɔnúnɔŋ a? 48Kásɛ uguá ɔlɔŋ huá ifuŋ, ugúnya ana huá bafalisiɛ́ŋ, nusamanuguán omódi usamanuguádáab yɔ́ a?» 49Gɔgaá, bandɔ abagányɛ bádiálínsan Gigodi, bányɛ ɔbɔlɔmɔ́n. 50Gɔgaá, mɔndɔ omodi uguɔ́b guá ɔlɔŋ huá bafalisiɛ́ŋ ɔhɛ́n áneé Nikodɛ́m, mɔndɔ umɔɔ́nɔ́ya mayɔ na Yésuse, uwɔyidɛn bɔ́ áneé: 51«Kásɛ Gigodi giásɔ gíɔ́guɔya áneé dinyɛ diásɔ́mb gisan giá mɔndɔ kandabá áneé dimɔ́b gihélum giég gá lɛns bubuand ubuɔ́ wál a?» 52Obóndinye yɔ́ áneé: «Aŋuá súsɔ́n anyɛ maná bagalileyɛ́ŋ a? Hilé Ŋŋɔ́ŋɛ, agaán áneé ta ebunebúné omoómi udióguólonin Galilé.»
Yésuse na ugándɔ umáal gidáŋa
53Abásálámandan sig mɔndɔ uwegúg egég gá nihiá.
ទើបបានជ្រើសរើសហើយ៖
:
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល