Sáŋa 5
5
Gióndúgie giá giŋándúnyá Yelusalɛ́m
1Egélém agányɛ, bayúdɛn bámabianán budɔ́mb buɔ́b búmodi, Yésuse uwɛɛ́d Yelusalɛ́m. 2Agá tísɔna agányɛ mɔdɔg na nibíŋínín niá bidúmbúa, itamba hiá bídumbe hímabá hɔ́ ihigéŋélídíenu na imbambal siá bilál ítánɔ na mugɔn muá adányɛ, bɔ́dɔ́ŋɔn hiɛ́ na nubelé áneé Bɛtsayída. 3Uguá bilál ibigányɛ giod giá banúmanuma gímabá guɔ́ lúdígilúdíg: behéguhégu, bióŋ, biŋándúnyá [bágígan áneé mimbi mébíbuŋid: 4Gá giagiá uguá ginɛŋ gímodi gilúna gímodi giá Ɔgúná gímabá gísusan uguá itamba gíbuŋe mimbi, anúmanuma usébue gusɔs uguá mimbi egélém gá mimbi gubíbuŋid wɔɔ́guɔ́ndúgɔn ta umabianán kasɛ́ bumanúma#5.4 Mubu múmodi muá nsuá múdigódi ɔlɔŋ huá géníhi..] 5Uguá ɔlɔŋ huá bandɔ abagányɛ, mɔndɔ umabá guɔ́ umásɛɛ́d na manúma duɔŋ nitín na bunyo na dúdádɔ. 6Yésuse umaámán yɔ́ bidimina uwɔɔ́b áneé ugányɛ agányɛ giandá giá ginɛŋ, uwoóhún yɔ́ áneé: «Aáguamba guɔ́ndɔ́ɔg a?» 7Anúmanuma uwondinye áneé: «Ɔgúná, ndigódi mɔndɔ wa gueleé unyuminye uguá itamba uguá ginɛŋ igiɛ́ mimbi mésébíbuŋid, ŋŋányɛ áneé mbíŋín sɔ́gá ubue guyumɛn gámɛ.» 8Yésuse uwɔyidɛn yɔ́ áneé: «Adígɛ́n, gɔ́l úkana huáhɔ andá!» 9Hɔ́nɔhɔ́ mɔndɔ uwɔɔ́ndɔ́g, uwɔgɔ́l úkana huég uwɛɛ́d gá guanda henyé, búmabá buɔ́sɛ buá giíndía giá bayúdɛn.
10Súsɔ́n ifuŋ siá bayúdɛn ɔsíɔ́yidɛn mɔndɔ uyɔɔ́ bómóndúgie áneé: «Hínen búnyɛ buɔ́sɛ buá giíndía, búdiánigimanan áneé asamb úkana huáhɔ.» 11Gɔgaá, uwondinye bɔ́ áneé: «Mɔndɔ usóŋóndúgie usɔŋɔyidɛn áneé “gɔ́l úkana huáhɔ andá!” » 12Obóhún yɔ́ áneé: «Kasɛ́ bumɔndɔ ubúsɔ́guɔyidɛn áneé gɔ́l úkana huáhɔ andá?» 13Gɔgaá, mɔndɔ uyɔɔ́ bómóndúgie umasálinsan mɔndɔ umoóndúgie yɔ́ gá giagiá, Yésuse umabá uménímín bɔ́ uguá eŋís uguadá guá giíŋ igímabá hɔ́. 14Egélém agányɛ Yésuse uwaádán neéneg uguá idúl uwɔyidɛn yɔ́ áneé: «Aŋuá ugányɛ ɔmɔ́ndɔ́ɔg, adiandúgual gilɔga gá gueleé adibia ubúdúmbanaá ubugányɛ.» 15Mɔndɔ ugányɛ uwɛɛ́d uwɔyidɛn ifuŋ siá bayúdɛn áneé: «Búnyɛ Yésuse úmóŋódúgie.» 16Bayúdɛn ebédúmbie gɔg guliŋin Yésuse gá giagiá, umal buɔ́ uguá buɔ́sɛ buá giíndía giá bayúdɛn. 17Gɔgaá, Yésuse uwondinye bɔ́ áneé: «Síe wamɛ guesiegén na behínen uyɔ umanyɛ gá guala buóli, yaŋuá súsɔ́n nnyɛ gá buóli.» 18Uguá dugálɔ udugányɛ bayúdɛn abánduguɛ́d gá guamba guɔ́n yɔ́ gá giagiá, bɔ́mɔyá áneé umésésúgúdinye gá yal gigodi giá giíndía giá bayúdɛn wond wɔya áneé nnyɛ mbanda ya muɔ́n ya Uhaluá, ubígɔ́lɔn gɔg hana unyɛ udényi húmomi neéneg.
Buŋaŋa buá Muɔ́n
19Yésuse uwɔndɔgɔ́l nugálɔ uwɔyidɛn bɔ́ áneé: «Uguá hómohómue, uguá hómohómue yɔɔ́núɔyɔn buɔ́, Muɔ́n wa Uhaluá udibá wa bíalɛn buand gɔgaá, waáguala pɛ́ŋ ubuɔ́ wánanaá Síe guala gá giagiá, ubuɔ́ Síe wálanɔ́ buɔ́ Muɔ́n wálanɔ́ súsɔ́n. 20Búnyɛ áneé Síe wɔɔ́guɔya Muɔ́n, weédíyenye yɔ́ buand gidigid ubuɔ́ wálanɔ́. Wenéndedíye yɔ́ biandá biá melélíe guandadɔ́mb, ibíenénúbuŋidienú meéne. 21Buand búmomi haná Síe úhúnyanɔ́ bandɔ uguá nigué wond weéŋen bɔ́ nusɔ́da, nɔ́ súsɔ́n Muɔ́n wéŋeneé mɔndɔ uyɔɔ́ úsɔ́guɔyɛd nusɔ́da. 22Síe udiásúmba gisan giá mɔndɔ gɔgaá, umeéŋín Muɔ́n gusúmba guá bisan gidigid. 23Gá gueleé mɔndɔ gidigid ubúlúgénye Muɔ́n hana bébúlúgenyeé Síe. Mɔndɔ udiébúlúgénye Muɔ́n tábɔ́ áneé udiébúlúgenye Síe umaádɔ́m yɔ́. 24Ɛɛ́ɛ, uguá hómohómue, uguá hómohómue, yɔɔ́núɔyɔn buɔ́, mɔndɔ ubídɔ́lígɔ́nɔnaá dugálɔ duámɛ wond waág nubídágídɛ́n nuég uguá umaándɔ́m, ugányɛ waámánabia nusɔ́da nuá ságásagá, bádianándasɔ́mb gisan giég gɔgaá, udibánd uguá nigué ugányɛ uguá nusɔ́da. 25Ɛɛ́ɛ, uguá hómohómue, uguá hómohómue, yɔɔ́núɔyɔn buɔ́, gisigɛl gíóguólon gíganyɛ muɛ́d hɔ́, bilɔ́ŋ bíɔnɔ́bɔn ugelu huá Muɔ́n wa Uhaluá, ɔbɔ́nɔ́bɔ́naá huɔ́ bɔ́nɔ́sɔ́dɔn. 26Gá giagiá, hana Síe únya gibilígis giá nusɔ́da, nɔ́ úmaádáabɛ́n súsɔ́n Muɔ́n gubá gibilígis giá nusɔ́da, 27Umeéŋín yɔ́ buŋaŋa buá súmba bisan gá giagiá, unyɛ Muɔ́n wa mɔndɔ. 28Ánaá muand umugányɛ gidigid múdiéndenúnímie meéne, gisigɛl gíóguólon igiɛ́ bilɔ́ŋ gidigid ibínya uguá bibɛ́l bíɔnɔ́bɔnaá ugelu huég, 29ibímalá binɔ́g biá melélíe, bíanáháman uguá bibɛ́l gá dáŋáab nusɔ́da, ibímalá bilɔg biá muand bíánáháman gá gueleé bánasúmba bisan biɔ́b. 30Ndiábíalan buand yaŋuá mbánan, yaásúmba bisan hana Síe wámɛ úŋɔyɔnaá, gusúmba guámɛ guá bisan gúnyɛ gindényé gá giagiá, ndiáguamba gual guɔyɛd guámɛ gɔgaá, guɔyɛd guá mɔndɔ úmaándɔ́m.»
Bamaáná gá busió buá Yésuse
31«Mmába nnyɛ amaáná gámɛ gá busió mbánan, tábɔ́ áneé ŋŋɔyida yamɛ inyɛ agá gudɔɔ́. 32Gɔgaá, sɔ́gá omodi úwɔyɔnɔ́ buónyi buámɛ gámɛ gá beseé gúu yeényénú áneé buónyi ubuɔ́ wɔ́yɔnɔ́ gámɛ gá busió búnyɛ hómohómue. 33Numadúmɛ́n Sáŋa bandɔ, Sáŋa uwɔya buónyi ubuɔ́ wényénú gá busió buá hómohómue. 34Yaŋuá ndiágígan áneé mɔndɔ wɔya buónyi ubuɔ́ wényénú gámɛ gá busió gɔgaá, yɔɔ́núɔyɔn buɔ́ gá gueleé nubia gisódie. 35Sáŋa umabá ilámba ihiɛ́ bémedímbíg gá bunya, unuádáab gubalaga na gise giá hiɛ́ gá maná ginɛŋ. 36Henyé, ŋŋódi guɔyɛd guá buónyi ubuɔ́ yényénú buá giandá ubúdúmbanaá buá Sáŋa, búnyɛ melélíe ɔmɔɔ́ Síe úmampúa gá hóŋídinye, yoóhóŋonye mɔ́, mɔ́mɔ́yɔnɔ́ buónyi ubuɔ́ ményénú gámɛ gá busió áneé Síe úmaándɔ́m. 37Síe umaándɔ́m, wɔɔ́guɔya buónyi ubuɔ́ wényénú gámɛ gá busió mbánan gɔgaá, ta buɔ́sɛ numanyɛ nudiɔ́b ugelu huég, numanyɛ nudián yɔ́. 38Guond nudiábídígan nugálɔ nuég gá giagiá, nudiáguádáaban uyɔɔ́ úmadɔ́m. 39Nuáguanuna Ŋŋɔ́ŋɛ gá giagiá, nuégedenye áneé uguá siɛ́ núnya nuá bia nusɔ́da nuá ságásagá, símuanyɛ gɔg sísíɔ́yɔnɔ buónyi ubuɔ́ Síényénú gámɛ gá busió. 40Ta anagányɛ gɔg, núdiɔ́guɔya guŋkilɛn gá gueleé nubia nusɔ́da nuá ságásagá. 41Nigúmi niámɛ nídióguólonin uguá bandɔ. 42Gɔgaá, nnuényi uguánɔ guá idɛ́m, nudigódi ginɔ́nɛ́n na Uhaluá. 43Nsoól uguá ɔhɛ́n huá Síe wamɛ, numén guŋíndígɛn gɔgaá, omodi úmónobíólin uguég guá ɔhɛ́n nugíndígɛn yɔ́. 44Nudiáguamba nigúmi iníóloníneé pɛ́ŋ agá Uhaluá, núáguamba guhínenyinye banuá na banuá, naánanyá núnya nuá ŋŋádáab? 45Nudigedényé áneé yaŋuá yenénúfudenye agá eŋís ya Baba gɔgaá, Mɔ́sɛsa uyɔɔ́ númaág nubídágídɛ́n nuánɔ uguég úwenénúfudenyeé. 46Gá giagiá, núámádáaban dugálɔ duá Mɔ́sɛsa, késíe núáguádáaban súsɔ́n duámɛ gá giagiá, úmɔɔ́ŋá duɔ́ gámɛ gá busió. 47Mmába nudiáguádáaban gɔg Ŋŋɔ́ŋɛ siá Mɔ́sɛsa, naánanyá núnyaá nuá guádáab ubuɔ́ yɔ́yɔnɔ́?»
ទើបបានជ្រើសរើសហើយ៖
Sáŋa 5: EKM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
