Sáŋa 4
4
Yésuse wɔɔ́guɔya mayɔ na ugándɔ wa basamalitɛ́ŋ
1Yésuse umaámálɛns áneé bafalisiɛ́ŋ bɔ́guɔya áneé wɔɔ́gɔ́lɔn giod giá bebinene uguég guá ɔlɔŋ wond uyuménye giod gudɔ́mb Sáŋa, 2uguá hómohómue, Yésuse mbánan umeséyumenyinye gɔgaá, búmabá bebinene bég. 3Uwoólígie uguá gibéyi giá guísi giá Yudé gá guɛ́d uguá gibéyi giá guísi giá Galilé. 4Búmanigímánán áneé udúmbɛ́n uguá gibéyi giá guísi giá Samalí. 5Yésuse uweneg gɔg uguá gibéyi giá guísi giá Samalí, uguá tísɔna omodi uyɔɔ́ bɔ́dɔ́ŋɔnaá áneé Sikál, umaábá mɔdɔg na mesíge ɔmɔɔ́ Yɔ́kɔba úmeéŋín muɔ́n weg Yɔ́sɛba. 6Agányɛ hɔ́ ɔmbɛ́l huá mimbi huá Yɔ́kɔba húmabá, na gidɔga giá uŋand, Yésuse uwedugumin uguá buáyɛ buá huɔ́. Búmabá búganyɛ búábá ɔdɛ́m huá buɔ́sɛ. 7Ugándɔ wa basamalitɛ́ŋ omodi uwoól gá dág, Yésuse uganyɛ gég áneé: «Mpuá mimbi má bíhuá.» 8Gá giagiá bebinene bég bámɛɛ́d agá tísɔna gá guɔ́nd gunyá. 9Gɔgaá, ugándɔ wa basamalitɛ́ŋ uwɔyidɛn Yésuse áneé: «Naánanyá? Aŋuá maná bayúdɛn, ɔŋɔŋɔn mimbi má bíhuá, yaŋuá, ugándɔ, wa basamalitɛ́ŋ?» Henyé na bayúdɛn na basamalitɛ́ŋ bódióhógonin yoógi. 10Yésuse uwondinye yɔ́ áneé: «Ámálinsan mpuán ya Uhaluá na bumɔndɔ “ubúguɔŋɔnaá mimbi,” késíe aŋuá anyaá wa guɔŋɛn yɔ́ wa bá wa huá mimbi má nusɔ́da.» 11Ugándɔ uwondinye yɔ́ áneé: «Ɔgúná odigódi ta buand buá dág naá buɔ́, ɔmbɛ́l húnyɛ súluúm. Naánanyá ányá wa bia mimbi máguɔ́ má nusɔ́da? 12Síe wasɔ Yɔ́kɔba úmeédídímín ɔmbɛ́l uhuɔ, úmuanyɛ mbánan uwabíhuán mimbi má huɔ́, baán bég na bidúg biég abábíhuán mɔ́ súsɔ́n. Eégedenye áneé anyɛ giandá gudɔ́mb Yɔ́kɔba a?» 13Yésuse uwondinye yɔ́ áneé: «Mɔndɔ ubíhuánaá mimbi ɔmɔ, niída níándanúma yɔ́ 14gɔgaá, uwanábíhuánɔ́ ɔmɔɔ́ yénééŋineé yɔ́, niída nídianándanúmɛ́d yɔ́ ta buɔ́sɛ. Gɔgaá, mimbi ɔmɔɔ́ yénééŋineé yɔ́ mánáyɛn yɔ́ gibilígis igiɛ́ nusɔ́da nuá ságásagá núánáhámaninaá.» 15Ugándɔ uwɔyidɛn yɔ́ áneé: «Ɔgúná, mpuá bumimbi buáguɔ́ gá gueleé niída nídiandánúmɛ́d ndióndúguól gá dág aga.» 16Yésuse gég áneé: «Idá, gɔnɔgɔ́l ɔnɛ́m wahɔ nuól aga.» 17Ugándɔ ugányɛ gég áneé: «Ndigódi ɔnɛ́m.» Yésuse gég áneé: «Amál beseé gá guɔyɛd áneé “Ndigódi ɔnɛ́m,” 18gá giagiá aámánábia banɛ́m bátánɔ, súsɔ́n mɔndɔ uyɔɔ́ ányá neéneg udibá ɔnɛ́m wahɔ. Ɔmɔ́yɛd hómohómue.» 19Ugándɔ uwɔyidɛn yɔ́ áneé: «Ɔgúná, yaáguánan áneé anyɛ ebunebúné. 20Ndíndíl siásɔ, basamalitɛ́ŋ bámabá bébúlúgenye Uhaluá agá ɔŋuɛnyɛ uhuɔ gɔgaá, banuá bayúdɛn nuɔya áneé pɛ́ŋ Yelusalɛ́m únyaá hɔɔ́m ɔhɔɔ́ bógódionu áneé bébúlúgenye Uhaluá.» 21Yésuse uwɔyidɛn yɔ́ áneé: «Ugándɔ, ádáab ubuɔ́ ŋŋuɔyɔnaá, ginɛŋ gíóguólon igiɛ́ búdigandabánɔ́ ta agá ɔŋuɛnyɛ uhuɔ, ta Yelusalɛ́m núgébúlúgenyeé Síe. 22Banuá basamalitɛ́ŋ nuébúlúgenye ubuɔ́ núdiálinsan, basuá bayúdɛn diébúlúgenye ubuɔ́ diényénú gá giagiá, gisódie gíóguólonin uguá bayúdɛn. 23Gɔgaá, ginɛŋ gíóguólon, gíganyɛ hɔ́ igiɛ́ ebébúlúgenyeé Uhaluá hómohómue, bénébúlúgenye Síe naá uguá Gileénde naá uguá hómohómue, búnyɛ ninamɛ iníbúlúgenyeé Síe anagányɛ niɛ́ wámbanɔ́. 24Uhaluá unyɛ Gileénde, buand buáguɔ́ ebébúlúgenyeé yɔ́ bógódionu áneé bébúlúgenye yɔ́ naá uguá Gileénde naá uguá hómohómue.» 25Ugándɔ uwɔyidɛn yɔ́ áneé: «Yeényi áneé Bémeyíde, uyɔɔ́ bɔ́dɔ́ŋɔnaá áneé Klístus wonoól. Wonógól wonódídógonyinye buand gidigid.» 26Yésuse uwɔyidɛn yɔ́ áneé: «Búnyɛ yaŋuá, yaŋuá ŋŋugálgalinaá.» 27Uguá ginɛŋ igigányɛ, bebinene bég ebésieg, abáyíka áneé waágálgal na ugándɔ gɔgaá, ta mɔndɔ umɔsúguɔyidɛn yɔ́ áneé: «Giagɛ igiɛ́ ámbanɔ́?» Ugúnya ana «Gá giagɛ igiɛ́ agálgalaá neéneg?» 28Ugándɔ gɔg uwanihɛn mbɛ́ŋ yég ya mimbi, uwond agá tísɔna uwɔnɔyɔ́n bandɔ áneé: 29«Kásianánánɔ mɔndɔ umɔ́ndɔ́ŋɔyɔn buand gidigid ubuɔ́ yamánáguala. Búdibá Bémeyíde yɔ́ egéné a?» 30Bandɔ abáháman uguá tísɔna gá guɛ́d guánádán neéneg. 31Uguá ginɛŋ giáguɔ́, bebinene báfála Yésuse áneé: «Lábi, nyá gɔg buand.» 32Gɔgaá uwɔyidɛn bɔ́ áneé: «Ŋŋódi gunyá guá nyá uguɔ́ núdiálinsan.» 33Uguá nugálɔ unugányɛ bebinene ɔbóbíóhún áneé: «Mɔndɔ usabá wa guafɛn yɔ́ lí?» 34Yésuse uwɔyidɛn bɔ́ áneé: «Gunyá guámɛ gúnyɛ guala guɔyɛd guá úmaándɔ́m na yib buóli ubuɔ́ úmampuá. 35Nudiɔ́guɔya banuá mbánan áneé: “Búmésien ihóli íníhi digɔns guoge a?” Gɔgaá yaŋuá yɔɔ́núɔyɔn: Bíbúlímánán nubíyɛg, mesíge másamanagúnɛ́n, máganyɛ má guoge. 36Mɔndɔ uwogonú uganyɛ gá dáŋábá bisuɛ́n biég guond weédide bibɔg gá nusɔ́da nuá ságásagá, anagányɛ gɔg naá ugúnanɔ́ naá uwogonú béfunde ɔlɔŋ. 37Gá giagiá, nsab yɔɔ́guɔya hómohómue áneé: “Mɔndɔ omodi waágúna, odoódi woge.” 38Yaánúdɔ́m gá guoge uguá mesíge ɔmɔɔ́ númaánúdiala buóli, bódodi bɔ́ bámalá buóli banuá nuádáŋáaba buóli buɔ́b.» 39Giod giá basamalitɛ́ŋ bá tísɔna ugányɛ, igíádáab Yésuse gá giagiá, ugándɔ ugányɛ umɔyidɛ́n bɔ́ áneé: «Umɔ́ŋɔyídɛ́n buá gidigid ubuɔ́ nsámanuguala.» 40Buand buáguɔ́, basamalitɛ́ŋ bémeéméneg mɔdɔg na Yésuse, obóbísógólonye yɔ́ áneé ugíga nɔɔ́nɔb, uwagígɛ́ɛd nɔɔ́nɔb mɔɔ́sɛ máandɛ. 41Bandɔ abámadáab gá busió buá nugálɔ unuɔ́ úmɔyá úmuanyɛ mbánan bámabá giod gudɔ́mb bá busió, 42guond ɔbɔ́yidɛn ugándɔ áneé: «Dabdab didiánduguádáaban pɛ́ŋ gá busió buá dugálɔ uduɔ́ ɔ́mɔ́nduguɔya gɔgaá, búnyɛ gá giagiá basuá mbánan dimɔ́bíɔ́bɛ́n uguég guá niíd, diálinsan áneé unyɛ hómohómue Osódie wa bandɔ bá guísi.»
Gilɛns giá gáandɛ Kána
(Mat 8.5-13; Lúk 7.1-10)
43Egélém gá mɔɔ́sɛ máandɛ, Yésuse uwoólígie agányɛ, uwond uguá gibéyi giá guísi giá Galilé. 44Umɔyɛd úmuanyɛ mbánan áneé: «Ebunebúné udiégúme uguég guá gidɔŋ.» 45Ta nɔ́ gɔg umeéméneg Galilé, bandɔ bá gibéyi giá guísi igigányɛ abágíndígɛn yɔ́ beseé gá giagiá, bámuanyɛ súsɔ́n bámabá gá budɔ́mb buá páska wa bayúdɛn Yelusalɛ́m, abán buá gidigid ubuɔ́ Yésuse úmalá. 46Yésuse uwosiond gɔg uguá gibéyi giá guísi giá Galilé, uguá gidɔŋ giá Kána agaá úméye mimbi magɛ́b, mɔndɔ umabá hɔ́, umabá ɔgúnɔ́gɔ́n wa nsénsi wa ofuŋ, muɔ́n weg umabá unúma Kafalnawúm. 47Úmɔɔ́mɔ́b áneé Yésuse umónoólín Yudé uguá gibéyi giá guísi giá Galilé, uwoól gá guán yɔ́. Uwobísógólonye yɔ́ áneé wɛɛ́d Kafalnawúm gá guóndúgie muɔ́n weg gá giagiá, umasɛɛ́d mɔdɔg na nigué. 48Yésuse uwondinye yɔ́ áneé: «Numánúdián biseyi na bilɛns ta buɔ́sɛ núdianádáab gɔg.» 49Ɔgúnɔ́gɔ́n wa nsénsi uwɔyɛd áneé: «Ɔgúná, dúnúg agámɛ gá nihiá uguá ginɛŋ igiɛ́ muɔ́n wamɛ úmanyaá udigué.» 50Yésuse uwɔyidɛn yɔ́ áneé: «Idá muɔ́n wahɔ umɔ́ndɔ́ɔg.» Mɔndɔ ugányɛ uwaádáab nugálɔ unuɔ́ Yésuse úmɔyidɛ́n yɔ́ uwɛɛ́d. 51Umeégédúnúgén, bedúmébi bég obósigólie yɔ́ ɔbɔ́yidɛn yɔ́ áneé: «Muɔ́n wahɔ umɔ́ndɔ́ɔg.» 52Uwoóhún bɔ́ gisigɛl igiɛ́ nuɔ́l nuég númalágúmɛ́d. Obóndinye yɔ́ áneé: «Búábá buyó uguá gisigɛl gímomi gisínyi gíáníhɛ́n yɔ́.» 53Síe wa muɔ́n uwebídúmdenye áneé búábá uguá gisigɛl igigányɛ Yésuse wɔ́yidɛ́n yɔ́ áneé: «Muɔ́n wahɔ umɔ́ndɔ́ɔg.» Gubul agányɛ uwaádáab gɔg na giansɛ giég giá bandɔ gidigid. 54Búbúmabá gilɛns giá gáandɛ giá Yésuse, giá gual uguá gibéyi giá guísi giá Galilé agaá úmonoólígie Yudé gá guond uguá Galilé.
ទើបបានជ្រើសរើសហើយ៖
Sáŋa 4: EKM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
