Sáŋa 18
18
Gigimbine giá Yésuse
(Mat 26.47-56; Mál 14.43-50; Lúk 22.47-53)
1Yésuse umaámáman gugálgal, uwadigɛn gá dɔ́mb na bebinene bég, uwayɔg ɔsɔ́g huá Sedlɔ́ŋ, mɔdɔg na ɔsɔ́g uhugányɛ, mesíge mámabá hɔ́. Uwebíŋín guɔ́ na bebinene bég. 2Henyé Yúdas, umoógió yɔ́ umabá ulinsan hɔɔ́m ahagányɛ gá giagiá, Yésuse umabá wiídan hɔ́ ɔlɔŋ na bebinene bég. 3Yúdas uwɔgɔ́gɛ́ɛd ɔlɔŋ huá nsénsi na begíg bá idúl ɔbɔɔ́ bɔgúnɔ́gɔ́n bá bedúmbinusámb na bafalisiɛ́ŋ bómodóŋínye uguá mesíge, bámabianán malaŋ má bidí na biménsenye na mulámba. 4Haná Yésuse úmalinsan buand ubúmabá áneé búgeéguegin yɔ́, uwakilɛn bɔ́ uwoóhún bɔ́ áneé: «Ányá nuámbanɔ́?» 5Obóndinye yɔ́ áneé: «Yésuse wa Nasalɛ́d.» Yésuse uwɔyidɛn bɔ́ áneé: «Yaŋuá waáguɔ́ uyɔ.» Henyé Yúdas umoógió yɔ́ umábá nɔɔ́nɔb. 6Yésuse umɔɔ́mɔ́yidɛn bɔ́ áneé: «Yaŋuá waáguɔ́ uyɔ, obóndon na gélém na gélém abáguan.» 7Yésuse uwonduguóhún bɔ́ gá uŋand huá gáandɛ áneé: «Ányá uyɔɔ́ núámbanɔ́?» Obóndinye yɔ́ áneé: «Yésuse wa Nasalɛ́d.» 8Yésuse uwondinye bɔ́ áneé: «Mmɔ́núɔyídɛ́n áneé yaŋuá waáguɔ́ uyɔ, mmába yaŋuá yɔ́ nuámbanɔ́ níhínánánɔ ɔbɔ bádɔ́mb.» 9Anagányɛ nugálɔ unúmabá áneé: «Mmesénímie ta omoómi uguá bandɔ ɔbɔɔ́ ámampuá,» númabá áneé núgobíhónye. 10Símune Piéle umabianán nnyémél, uwɔsɔ́gɔ́n yɛ́, uwasáŋídɛn edúmébi wa ɔgúnɔ́gɔ́n wa edúmbinusámb áneé wɔɔ́n yɔ́ gɔgaá, uwafílɛ́ɛd odú huég uhunɛ́m. Edúmébi ugányɛ umabá ɔhɛ́n áneé Málkus. 11Gɔgaá, Yésuse uwɔyidɛn Piéle áneé: «Ondíe nnyémél yahɔ uguá gibágál. Eégedenye áneé ndigaábíhuá gibólé giá meyú igiɛ́ Baba úgampuánɔ́ a?»
12Ndíd ya nsénsi na ɔgúnɔ́gɔ́n wɔb, begíg bá idúl ɔbɔɔ́ ihiligine hiá bayúdɛn hímadɔ́m, abádágɔ́n Yésuse abágúda yɔ́.
Bámɛɛ́d na Yésuse agá Án
(Mat 26.69-70; Mál 14.66-68; Lúk 22.55-57)
13Abágaguɛ́d neéneg agá Án, Án ugányɛ umabá ogúl wa mbuínyi#18.13 Án umabá Síe wa ugányɛ Kayifás. wa Kayíf, Kayíf úmaábá ɔgúnɔ́gɔ́n wa bedúmbinusámb uguá nnyɔ́m igányɛ. 14Búnyɛ Kayíf waáguɔ́ úmeédíbíd bandɔ bá ihiligine hiá bayúdɛn áneé: «Búnyɛ beseé áneé mɔndɔ omoómi ugué gá busió buá buán gidigid.»
(Mat 26.69-70; Mál 14.66-68; Lúk 22.55-57)
15Símune Piéle na ebinene omodi bémebinídín Yésuse. Hana ɔgúnɔ́gɔ́n wa bedúmbinusámb úmalinsan ebinene wa omoómi ugányɛ, úmuanyɛ súsɔ́n uwebíŋín uguá ndáŋia ya ɔgúnɔ́gɔ́n wa bedúmbinusámb. 16Piéle uwɔlɔbɛn gindényé agá nígadá mɔdɔg na nibíŋínín, ebinene wa omoómi uyɔɔ́ ɔgúnɔ́gɔ́n wa bedúmbinusámb úmalinsan, uwanahám uwɔyɛd mayɔ na ugándɔ umaábá ugíga nibíŋínín, uwebíŋínye Piéle. 17Edúmébi wa ugándɔ úmaágíga nibíŋínín uwɔyidɛn Piéle áneé: «Mbuén aŋuá súsɔ́n anyɛ ebinene omodi wa mɔndɔ unó?» Piéle uwondinye áneé: «Ɛ́ɛɛ́, ndibá ebinene wég.» 18Bedúmébi na begíg bɔ́mɔ́gɔm yoógi gá giagiá, gisínyi gímabá abɛ́d gá bíésébe, Piéle ɔlɔŋ nɔɔ́nɔb ubíésébe súsɔ́n.
(Mat 26.59-66; Mál 14.55-64; Lúk 22.66-71)
19Ɔgúnɔ́nɔ́gɔ́n wa bedúmbinusámb uwɛɛ́d gá guóhón Yésuse ŋŋóhúnín gá busió buá bebinene bég na bubuand ubuɔ́ úhuínyihuinyeé. 20Yésuse uwondinye yɔ́ áneé: «Yaábá ŋŋálgal gá bandɔ gidigid agá budányɛ, mpuínyihuinye uguá bigúl naá uguá idúl uguɔ́ bayúdɛn gidigid bábígusanɔ́, mmɔsúguɔyɛd buand uguá ninamba. 21Gá giagɛ óŋóhoneé ŋŋóhúnín? Ubuɔ́ yɔɔ́ya óhón bandɔ abábá bɔ́mbídɔ́lígɔnɔn: Bálinsan beseé na beseé buand ubuɔ́ yábá yɔya.» 22Uguá dugálɔ udugányɛ, egígidúl omodi úmaábá hɔ́ uwagɔ́b Yésuse ɔmbɛ́l, uwɔyidɛn yɔ́ áneé: «Kásɛ anagányɛ óndónyinyeé ɔgúnɔ́nɔ́gɔ́n wa bedúmbinusámb a?» 23Yésuse uwondinye yɔ́ áneé: «Mmába mmágálɛ́ɛd gilɔg ŋŋɔyídɛ́n buá gilɔg ubuɔ́ mmɔyɛd, mmába mmagálɛ́ɛd beseé gá giagɛ éŋidenú?» 24Án uwadɔ́m gɔg Yésuse agá ɔgúnɔ́nɔ́gɔ́n wa bedúmbinusámb Kayíf na magúda ɔmɔɔ́ bámagúdá yɔ́.
(Mat 26.71-75; Mál 14.69-72; Lúk 22.58-62)
25Uguá ginɛŋ igigányɛ, Símune Piéle umabá agányɛ udúmbenye na bíésébe, obóhún yɔ́ áneé: «Kásɛ aŋuá uyɔ adibá ebinene omodi wa mɔndɔ unó a?» Piéle uwabísásɛ́ɛg uwɔyɛd áneé: «Ɛ́ɛɛ́, ndibá ebinene weg.» 26Edúmébi omodi, ɔgúnɔ́nɔ́gɔ́n wa bedúmbinusámb, úmaábá nuɔnd nuá mɔndɔ uyɔɔ́ Piéle úmasɔ́mb odú uwɔyidɛn yɔ́ áneé: «Nsasúguguán neéneg uguá mesíge a?» 27Piéle uwandabísásɛ́ɛg, hɔ́nɔhɔ́ gidédi igíádádɛ́ɛd.
Yésuse agá Pilát
(Mat 27.1-2, 11-14; Mál 15.1-5; Lúk 23.1-5)
28Egélém, obónólígie na Yésuse agá Kayíf gá guɛ́d neéneg agá ndáŋia ya ŋŋɔ́mɔna, maná balomɛ́ŋ ɔhɛ́n áneé Pilát, búmabá túlúb na giamádá. Gɔgaá, ifuŋ siá bayúdɛn isímɛɛ́d neéneg símesébíŋín uguá ndáŋia gá gueleé sídibíág biíle agá eŋís ya Uhaluá, síbádanyá budɔ́mb buá Páska. 29Pilát uwanahám gɔg uwoóhún bɔ́ áneé: «Gá giagɛ núólesifudenye mɔndɔ uyɔ?» 30Obóndinye yɔ́ áneé: «Wámádibá ufal wa mɔndɔ dídiól neéneg agáhɔ.» 31Pilát uwondinye bɔ́ áneé: «Gɔ́lɔ́nɔ́n yɔ́ nugélenye yɔ́ banuá mbánan hana gigodi giánɔ gíɔ́yɔnɔ́.» Bandɔ bá ihiligine hiá bayúdɛn ɔbɔ́yɛd áneé: «Didigódi bugaga buá sɔ́mb gisan giá mɔndɔ áneé bɔ́n yɔ́.» 32Nɔ́ nugálɔ unuɔ́ Yésuse úmodídóginye gá bunigué ubuɔ́ wénéguénú númabá núóbíhónye.
33Pilát uwebíŋín gɔg uguá ndáŋia. Uwodóŋínye bugaga áneé bébíŋínye Yésuse, uwoóhún yɔ́ áneé: «Aŋuá anyaá ofuŋ huá bayúdɛn a?» 34Yésuse uwondinye yɔ́ áneé: «Ɔɔ́bíɔ́yɔn buɔ́ aŋuá mbánan ugúnya ana bɔ́síguɔyɔn buɔ́ gámɛ gá busió?» 35Pilát uwondinye yɔ́ áneé: «Yaŋuá uyɔ, nnyɛ maná bayúdɛn a? Buán buáhɔ mbánan na bɔgúnɔ́gɔ́n bá bedúmbinusámb bɔ́ bésífúdie agámɛ. Giagɛ igiɛ́ ál gɔg?» 36Yésuse uwondinye yɔ́ áneé: «Gugilebe guámɛ gúdibá eguísi aga, gúámábá eguísi aga késíe bandɔ bámɛ báfa gá gidul gá gueleé bédiesindué agá ihiligine hiá bayúdɛn. Gɔgaá, gugilebe guámɛ gúdibá eguísi aga.» 37Pilát uwoóhún yɔ́ gɔg áneé: «Anyɛ gɔg ofuŋ a?» Yésuse uwondinye yɔ́ áneé: «Aŋuá ɔyɔnɔ́ áneé nnyɛ ofuŋ. Mmebíbíén, iyoól eguísi aga pɛ́ŋ gá guɔya buónyi ubuɔ́ yeényénú gá busió buá hómohómue. Mɔndɔ gidigid uwɔɔ́bɔninaá na hómohómue wɔɔ́guɔ́bɔn ugelu huámɛ.» 38Pilát uwoóhún yɔ́ áneé: «Giagɛ igínya áneé hómohómue?»
(Mat 27.15-31; Mál 15.6-20; Lúk 23.13-25)
Uguá dugálɔ udugányɛ, Pilát uwandahám gá guɛ́d anaán bandɔ bá ihiligine hiá bayúdɛn, uwɔyidɛn bɔ́ áneé: «Ndigódi buand ubuɔ́ nnya wa bídímbíginin guɔ́ gá sɔ́mb gisan giá mɔndɔ uyɔ. 39Gɔgaá, hana búnya uguánɔ guá melélíe áneé yal nnúnihinɛn gimbɔg gá sig budɔ́mb buá Páska, gúu núámbanɔ́ áneé nnúnihinɛn ofuŋ huá bayúdɛn a?» 40Abɛ́d gá guánsan, bɔ́ya áneé: «Ɛ́ɛɛ́, búdibá ugányɛ, Balábas.» Henyé, Balábas ugányɛ, umabá ginsiliŋaŋ.
ទើបបានជ្រើសរើសហើយ៖
Sáŋa 18: EKM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Sáŋa 18
18
Gigimbine giá Yésuse
(Mat 26.47-56; Mál 14.43-50; Lúk 22.47-53)
1Yésuse umaámáman gugálgal, uwadigɛn gá dɔ́mb na bebinene bég, uwayɔg ɔsɔ́g huá Sedlɔ́ŋ, mɔdɔg na ɔsɔ́g uhugányɛ, mesíge mámabá hɔ́. Uwebíŋín guɔ́ na bebinene bég. 2Henyé Yúdas, umoógió yɔ́ umabá ulinsan hɔɔ́m ahagányɛ gá giagiá, Yésuse umabá wiídan hɔ́ ɔlɔŋ na bebinene bég. 3Yúdas uwɔgɔ́gɛ́ɛd ɔlɔŋ huá nsénsi na begíg bá idúl ɔbɔɔ́ bɔgúnɔ́gɔ́n bá bedúmbinusámb na bafalisiɛ́ŋ bómodóŋínye uguá mesíge, bámabianán malaŋ má bidí na biménsenye na mulámba. 4Haná Yésuse úmalinsan buand ubúmabá áneé búgeéguegin yɔ́, uwakilɛn bɔ́ uwoóhún bɔ́ áneé: «Ányá nuámbanɔ́?» 5Obóndinye yɔ́ áneé: «Yésuse wa Nasalɛ́d.» Yésuse uwɔyidɛn bɔ́ áneé: «Yaŋuá waáguɔ́ uyɔ.» Henyé Yúdas umoógió yɔ́ umábá nɔɔ́nɔb. 6Yésuse umɔɔ́mɔ́yidɛn bɔ́ áneé: «Yaŋuá waáguɔ́ uyɔ, obóndon na gélém na gélém abáguan.» 7Yésuse uwonduguóhún bɔ́ gá uŋand huá gáandɛ áneé: «Ányá uyɔɔ́ núámbanɔ́?» Obóndinye yɔ́ áneé: «Yésuse wa Nasalɛ́d.» 8Yésuse uwondinye bɔ́ áneé: «Mmɔ́núɔyídɛ́n áneé yaŋuá waáguɔ́ uyɔ, mmába yaŋuá yɔ́ nuámbanɔ́ níhínánánɔ ɔbɔ bádɔ́mb.» 9Anagányɛ nugálɔ unúmabá áneé: «Mmesénímie ta omoómi uguá bandɔ ɔbɔɔ́ ámampuá,» númabá áneé núgobíhónye. 10Símune Piéle umabianán nnyémél, uwɔsɔ́gɔ́n yɛ́, uwasáŋídɛn edúmébi wa ɔgúnɔ́gɔ́n wa edúmbinusámb áneé wɔɔ́n yɔ́ gɔgaá, uwafílɛ́ɛd odú huég uhunɛ́m. Edúmébi ugányɛ umabá ɔhɛ́n áneé Málkus. 11Gɔgaá, Yésuse uwɔyidɛn Piéle áneé: «Ondíe nnyémél yahɔ uguá gibágál. Eégedenye áneé ndigaábíhuá gibólé giá meyú igiɛ́ Baba úgampuánɔ́ a?»
12Ndíd ya nsénsi na ɔgúnɔ́gɔ́n wɔb, begíg bá idúl ɔbɔɔ́ ihiligine hiá bayúdɛn hímadɔ́m, abádágɔ́n Yésuse abágúda yɔ́.
Bámɛɛ́d na Yésuse agá Án
(Mat 26.69-70; Mál 14.66-68; Lúk 22.55-57)
13Abágaguɛ́d neéneg agá Án, Án ugányɛ umabá ogúl wa mbuínyi#18.13 Án umabá Síe wa ugányɛ Kayifás. wa Kayíf, Kayíf úmaábá ɔgúnɔ́gɔ́n wa bedúmbinusámb uguá nnyɔ́m igányɛ. 14Búnyɛ Kayíf waáguɔ́ úmeédíbíd bandɔ bá ihiligine hiá bayúdɛn áneé: «Búnyɛ beseé áneé mɔndɔ omoómi ugué gá busió buá buán gidigid.»
(Mat 26.69-70; Mál 14.66-68; Lúk 22.55-57)
15Símune Piéle na ebinene omodi bémebinídín Yésuse. Hana ɔgúnɔ́gɔ́n wa bedúmbinusámb úmalinsan ebinene wa omoómi ugányɛ, úmuanyɛ súsɔ́n uwebíŋín uguá ndáŋia ya ɔgúnɔ́gɔ́n wa bedúmbinusámb. 16Piéle uwɔlɔbɛn gindényé agá nígadá mɔdɔg na nibíŋínín, ebinene wa omoómi uyɔɔ́ ɔgúnɔ́gɔ́n wa bedúmbinusámb úmalinsan, uwanahám uwɔyɛd mayɔ na ugándɔ umaábá ugíga nibíŋínín, uwebíŋínye Piéle. 17Edúmébi wa ugándɔ úmaágíga nibíŋínín uwɔyidɛn Piéle áneé: «Mbuén aŋuá súsɔ́n anyɛ ebinene omodi wa mɔndɔ unó?» Piéle uwondinye áneé: «Ɛ́ɛɛ́, ndibá ebinene wég.» 18Bedúmébi na begíg bɔ́mɔ́gɔm yoógi gá giagiá, gisínyi gímabá abɛ́d gá bíésébe, Piéle ɔlɔŋ nɔɔ́nɔb ubíésébe súsɔ́n.
(Mat 26.59-66; Mál 14.55-64; Lúk 22.66-71)
19Ɔgúnɔ́nɔ́gɔ́n wa bedúmbinusámb uwɛɛ́d gá guóhón Yésuse ŋŋóhúnín gá busió buá bebinene bég na bubuand ubuɔ́ úhuínyihuinyeé. 20Yésuse uwondinye yɔ́ áneé: «Yaábá ŋŋálgal gá bandɔ gidigid agá budányɛ, mpuínyihuinye uguá bigúl naá uguá idúl uguɔ́ bayúdɛn gidigid bábígusanɔ́, mmɔsúguɔyɛd buand uguá ninamba. 21Gá giagɛ óŋóhoneé ŋŋóhúnín? Ubuɔ́ yɔɔ́ya óhón bandɔ abábá bɔ́mbídɔ́lígɔnɔn: Bálinsan beseé na beseé buand ubuɔ́ yábá yɔya.» 22Uguá dugálɔ udugányɛ, egígidúl omodi úmaábá hɔ́ uwagɔ́b Yésuse ɔmbɛ́l, uwɔyidɛn yɔ́ áneé: «Kásɛ anagányɛ óndónyinyeé ɔgúnɔ́nɔ́gɔ́n wa bedúmbinusámb a?» 23Yésuse uwondinye yɔ́ áneé: «Mmába mmágálɛ́ɛd gilɔg ŋŋɔyídɛ́n buá gilɔg ubuɔ́ mmɔyɛd, mmába mmagálɛ́ɛd beseé gá giagɛ éŋidenú?» 24Án uwadɔ́m gɔg Yésuse agá ɔgúnɔ́nɔ́gɔ́n wa bedúmbinusámb Kayíf na magúda ɔmɔɔ́ bámagúdá yɔ́.
(Mat 26.71-75; Mál 14.69-72; Lúk 22.58-62)
25Uguá ginɛŋ igigányɛ, Símune Piéle umabá agányɛ udúmbenye na bíésébe, obóhún yɔ́ áneé: «Kásɛ aŋuá uyɔ adibá ebinene omodi wa mɔndɔ unó a?» Piéle uwabísásɛ́ɛg uwɔyɛd áneé: «Ɛ́ɛɛ́, ndibá ebinene weg.» 26Edúmébi omodi, ɔgúnɔ́nɔ́gɔ́n wa bedúmbinusámb, úmaábá nuɔnd nuá mɔndɔ uyɔɔ́ Piéle úmasɔ́mb odú uwɔyidɛn yɔ́ áneé: «Nsasúguguán neéneg uguá mesíge a?» 27Piéle uwandabísásɛ́ɛg, hɔ́nɔhɔ́ gidédi igíádádɛ́ɛd.
Yésuse agá Pilát
(Mat 27.1-2, 11-14; Mál 15.1-5; Lúk 23.1-5)
28Egélém, obónólígie na Yésuse agá Kayíf gá guɛ́d neéneg agá ndáŋia ya ŋŋɔ́mɔna, maná balomɛ́ŋ ɔhɛ́n áneé Pilát, búmabá túlúb na giamádá. Gɔgaá, ifuŋ siá bayúdɛn isímɛɛ́d neéneg símesébíŋín uguá ndáŋia gá gueleé sídibíág biíle agá eŋís ya Uhaluá, síbádanyá budɔ́mb buá Páska. 29Pilát uwanahám gɔg uwoóhún bɔ́ áneé: «Gá giagɛ núólesifudenye mɔndɔ uyɔ?» 30Obóndinye yɔ́ áneé: «Wámádibá ufal wa mɔndɔ dídiól neéneg agáhɔ.» 31Pilát uwondinye bɔ́ áneé: «Gɔ́lɔ́nɔ́n yɔ́ nugélenye yɔ́ banuá mbánan hana gigodi giánɔ gíɔ́yɔnɔ́.» Bandɔ bá ihiligine hiá bayúdɛn ɔbɔ́yɛd áneé: «Didigódi bugaga buá sɔ́mb gisan giá mɔndɔ áneé bɔ́n yɔ́.» 32Nɔ́ nugálɔ unuɔ́ Yésuse úmodídóginye gá bunigué ubuɔ́ wénéguénú númabá núóbíhónye.
33Pilát uwebíŋín gɔg uguá ndáŋia. Uwodóŋínye bugaga áneé bébíŋínye Yésuse, uwoóhún yɔ́ áneé: «Aŋuá anyaá ofuŋ huá bayúdɛn a?» 34Yésuse uwondinye yɔ́ áneé: «Ɔɔ́bíɔ́yɔn buɔ́ aŋuá mbánan ugúnya ana bɔ́síguɔyɔn buɔ́ gámɛ gá busió?» 35Pilát uwondinye yɔ́ áneé: «Yaŋuá uyɔ, nnyɛ maná bayúdɛn a? Buán buáhɔ mbánan na bɔgúnɔ́gɔ́n bá bedúmbinusámb bɔ́ bésífúdie agámɛ. Giagɛ igiɛ́ ál gɔg?» 36Yésuse uwondinye yɔ́ áneé: «Gugilebe guámɛ gúdibá eguísi aga, gúámábá eguísi aga késíe bandɔ bámɛ báfa gá gidul gá gueleé bédiesindué agá ihiligine hiá bayúdɛn. Gɔgaá, gugilebe guámɛ gúdibá eguísi aga.» 37Pilát uwoóhún yɔ́ gɔg áneé: «Anyɛ gɔg ofuŋ a?» Yésuse uwondinye yɔ́ áneé: «Aŋuá ɔyɔnɔ́ áneé nnyɛ ofuŋ. Mmebíbíén, iyoól eguísi aga pɛ́ŋ gá guɔya buónyi ubuɔ́ yeényénú gá busió buá hómohómue. Mɔndɔ gidigid uwɔɔ́bɔninaá na hómohómue wɔɔ́guɔ́bɔn ugelu huámɛ.» 38Pilát uwoóhún yɔ́ áneé: «Giagɛ igínya áneé hómohómue?»
(Mat 27.15-31; Mál 15.6-20; Lúk 23.13-25)
Uguá dugálɔ udugányɛ, Pilát uwandahám gá guɛ́d anaán bandɔ bá ihiligine hiá bayúdɛn, uwɔyidɛn bɔ́ áneé: «Ndigódi buand ubuɔ́ nnya wa bídímbíginin guɔ́ gá sɔ́mb gisan giá mɔndɔ uyɔ. 39Gɔgaá, hana búnya uguánɔ guá melélíe áneé yal nnúnihinɛn gimbɔg gá sig budɔ́mb buá Páska, gúu núámbanɔ́ áneé nnúnihinɛn ofuŋ huá bayúdɛn a?» 40Abɛ́d gá guánsan, bɔ́ya áneé: «Ɛ́ɛɛ́, búdibá ugányɛ, Balábas.» Henyé, Balábas ugányɛ, umabá ginsiliŋaŋ.
ទើបបានជ្រើសរើសហើយ៖
:
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល