Melélíe 26
26
Póle umɔ́gɔ́l nugálɔ agá eŋís ya ofuŋ Aglípa
1Ofuŋ Aglípa uwɔyidɛn Póle áneé: «Aganyɛ wa hémie nugálɔ nuáhɔ nuá bíhɔgɔnhɔgɔn.» Póle uwediginye ɔmbɔ́g, uwebul gɔg gubíhɔgɔnhɔgɔn ugálgal áneé: 2«Ofuŋ Aglípa, Yɔɔ́guɔ́bɔn beseé hómohómue gá guéleé mbíhɔgɔnhɔgɔn gá moónyi ɔmɔɔ́ bayúdɛn bémfudenyeé gá mɔ́ agáhɔ gá busió hínen. 3Ɛɛ́ɛ, aŋuá mbánan aálinsan bilɔŋ biɔ́b na nségíe siɔ́b gidigid beseé na beseé. Yoóbísógólonye gɔg áneé ohog ɔdɛ́m, ɔmbídɔ́lígɛn.»
4«Bayúdɛn gidigid bálinsan nusɔ́da nuámɛ gubul agámɛ gá budɛnd, bálinsan haná mmabá nsɔ́dɔn agá magunsa Yelusalɛ́m naá agá ɔdɛ́m huá bunɔŋ buámɛ. 5Gubul feké, bálinsan. Bɔ́mɔya, bányɛ gɔg bá guɔyɛd buónyi ubuɔ́ bényénú gámɛ gá busió, gá giagiá yɔɔ́sɔ́dɔn hana maná bafalisiɛ́ŋ, gimbi igígimbenú gigodi bugaga.
6Gúu dabdab, nnya uguá nugélényi gá giagiá yaábídága ndán iyɛɛ́ Uhaluá úmalɛ́n ndíndíl siásɔ. 7Eguíli gidigid yáad na áhandɛ ya buán buásɔ, yaábídága guán gubíhónye guá ndán igányɛ na dúmába Uhaluá na budúg hana na buɔ́sɛ. Ofuŋ Aglípa, búnyɛ gɔg gá busió buá nubídágídɛ́n unugányɛ bayúdɛn bémfudenyeé. 8Gá giagɛ banuá bayúdɛn nudiádáaban gɔg áneé Uhaluá wenéhémenye bilɔ́ŋ uguá bibɛ́l? 9Yaŋuá mbánan, mmabá ŋŋedenye áneé ŋŋódi áneé nnusenye ɔhɛ́n huá Yésuse wa Nasalɛ́d ta uguá ŋŋil ilúm. 10Buɔ́ mmala Yelusalɛ́m. Mmabiá buŋaŋa guonoólín agá bɔgúnɔ́gɔ́n bá bedúmbinusámb nuá Uhaluá, iyond iyɔnɔhɔn giod giá beédébi uguá giansɛ giá mbíne. Bágásúmbá gisan giɔ́b, yaádában áneé bɔ́na bɔ́. 11Mmabá yanda uguá bigúl gidigid, nsésenye bɔ́ mpiligenin bɔ́ áneé béféninefenin ɔhɛ́n huá Yésuse. Uguámɛ guá buhánd, mmabá ŋŋúŋa bɔ́ gueneg uguá bɔtísɔna bá bidɔŋ ibíólbíóndeé.
12Gúu mmɛɛ́d agá tísɔna wa Damás na mbɔba iyɛɛ́ bɔgúnɔ́gɔ́n bá bedúmbinusámb nuá Uhaluá bámampuá gá gual busɔ́m. 13Ofuŋ, mmaágányɛ uguá ŋŋil na ɔdɛ́m huá buɔ́sɛ, iyaán giandá giá gise gíbunya gídúmban giá ɔhɛ́nyɛ, igíádígágál naánamɛ na biendinyi biámɛ. 14Idiagua basuá gidigid, iyɔɔ́b ugelu húŋɔyɔn na nugálɔ nuá balameyɛ́ŋ áneé: “Sól, Sól, gá giagɛ éŋényigenyeé? Anyɛ hana bunyam ubuɔ́ béndenyeé na niɔŋ, búbíbisenye na gifan.” 15Iyoóhún yɔ́ áneé: “Aŋuá ányá Ɔgúná?” Ɔgúná uwoŋondinye áneé: “Nnyɛ Yésuse uyɔɔ́ égényigenyeé. 16Gɔgaá, adígɛ́n, edélímin. Nsebíéníginye gá gueleé abá edúmébi wamɛ, abá amaáná wamɛ gá dógonye haná ámáŋán hínen ond ɔya ubuɔ́ ŋŋádambuninaá súsɔ́n. 17Ŋŋedédínye gá busió buá buán buá bayúdɛn naá gá buá bidɔŋ gidigid ibiɛ́ ŋŋadúmánɔ́ guɔ́. 18Yádúman guɔ́ gá gueleé ebun bɔ́ eŋís, oólie bɔ́ uguá mbíne ondie bɔ́ uguá gise ond edúgún bɔ́ uguá ihiligine hiá Sátan, bóndin Uhaluá. Bámáŋádáab, bánábia giyibinina gɔ́b gá bifal bónd bádáŋáab ondig uguá ɔlɔŋ huá bandɔ ɔbɔ́bɔninaá na Uhaluá.” »
19«Ofuŋ Aglípa, gugunsen agányɛ gɔg yaáguanda hana nuénígie unúmonólín ugumɔn númendíye. 20Gɔgaá, mmebul guɔyɔn bandɔ abánya Damás na Yelusalɛ́m, iyɔdɔ́bígɛn gá guɔyɔn abánya uguá gibéyi giá guísi giá Yudé gidigid, na bandɔ bá bidɔŋ biá bindiádába. Yɔɔ́yɔ́n bɔ́ áneé bébídun, bóndin Uhaluá uguá mɔyɔ, bédíyenye súsɔ́n uguá melélíe áneé bébídun.
21Buand buáguɔ́ bayúdɛn bémeŋimbín gɔg uguá idúl obónd ebédie guŋɔ́n. 22Gɔgaá, Uhaluá wéŋimbe guesieg uguá buɔ́sɛ buá hínen, gúu mmanyaá hɔ́ gá gueleé mbá amaáná weg agá eŋís ya bandɔ gidigid, na biayɔ hana na bɔgúnɔ́gɔ́n. Ndiɔ́guɔya buónyi búmodi gudɔ́mb ubuɔ́ bebunebúné na Mɔ́sɛsa bómodógínyé áneé búánábíal.» 23Bɔ́mɔyá áneé: «Bémeyíde wɔnɔ́bígɔn, wanábá mɔndɔ wa busió wa hám uguá gibɛ́l wonónd udógie gise giá gisódie uguá buán naá uguá bindiádába.»
24Henyé Póle umabá umanyɛ gá bíhɔgɔnhɔgɔn, Festús uwehéhídinye áneé: «Póle, anyɛ ɔduɔ́duá! Nuhɔ́nhɔ́n nuáhɔ gidigid nuébélie ɔduá!» 25Gɔgaá, Póle uwondinye áneé: «Ŋŋɔ́mɔna Festús, ndibá ɔduɔ́duá. Dugálɔ uduɔ́ mpémenyeé dúnyɛ hómohómue, dúdibá duá ɔduɔ́duá. 26Ofuŋ Aglípa umebidé masɔ́m amagányɛ, weényi mɔ́ wɔ́s, buand buáguɔ́ nnya wa guɔya mɔ́ na nimadɛ gidigid egég gá busió. Yaálinsan beseé na beseé áneé udiáguanyanyɛ ta buand. Gá giagiá, masɔ́m amagányɛ mámasábíala uguá ninamba. 27Ofuŋ Aglípa, aáguádáaban moónyi umɔɔ́ bebunebúné bɔ́mɔyá a? Yaálinsan áneé aáguádáaban mɔ́.» 28Aglípa uwondinye Póle áneé: «Aábídága áneé egeŋéye ebinene wa Klístus gunsáns anagányɛ a?» 29Póle uwondinye yɔ́ áneé: «Ta búbá gá maná ginɛŋ, ta gá giandá giá ginɛŋ, yoóbísógólonye Uhaluá áneé búdibá pɛ́ŋ aŋuá, gɔgaá, búbá gánɔ banuá gidigid numbídɔ́lígɔnɔnaá hínen, nuáyɛ haná yaŋuá nnya, gɔgaá, kanda duoli duá duáyɛ uduɔ!»
30Uguá nugálɔ nuá Póle unugányɛ, na ofuŋ na ŋŋɔ́mɔna na Belenís na bandɔ gidigid abámabá nɔɔ́nɔb, abádigan gɔg. 31Bɔ́mɔɔ́gɔ́bígɔ́gɛ́ɛd, abɛ́d bɔ́ya áneé: «Mɔndɔ uyɔ waásúgual buand buá gilɔg ubuɔ́ únigimanaá na nigué ugúnya ana gá guɛ́d uguá giansɛ giá mbíne.» 32Aglípa uwɔyidɛn Festús áneé: «Bámabá bá nihɛn mɔndɔ uyɔ wémédidúmbíe buónyi buég agá ofuŋ uhugɔ́n.»
ទើបបានជ្រើសរើសហើយ៖
Melélíe 26: EKM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Melélíe 26
26
Póle umɔ́gɔ́l nugálɔ agá eŋís ya ofuŋ Aglípa
1Ofuŋ Aglípa uwɔyidɛn Póle áneé: «Aganyɛ wa hémie nugálɔ nuáhɔ nuá bíhɔgɔnhɔgɔn.» Póle uwediginye ɔmbɔ́g, uwebul gɔg gubíhɔgɔnhɔgɔn ugálgal áneé: 2«Ofuŋ Aglípa, Yɔɔ́guɔ́bɔn beseé hómohómue gá guéleé mbíhɔgɔnhɔgɔn gá moónyi ɔmɔɔ́ bayúdɛn bémfudenyeé gá mɔ́ agáhɔ gá busió hínen. 3Ɛɛ́ɛ, aŋuá mbánan aálinsan bilɔŋ biɔ́b na nségíe siɔ́b gidigid beseé na beseé. Yoóbísógólonye gɔg áneé ohog ɔdɛ́m, ɔmbídɔ́lígɛn.»
4«Bayúdɛn gidigid bálinsan nusɔ́da nuámɛ gubul agámɛ gá budɛnd, bálinsan haná mmabá nsɔ́dɔn agá magunsa Yelusalɛ́m naá agá ɔdɛ́m huá bunɔŋ buámɛ. 5Gubul feké, bálinsan. Bɔ́mɔya, bányɛ gɔg bá guɔyɛd buónyi ubuɔ́ bényénú gámɛ gá busió, gá giagiá yɔɔ́sɔ́dɔn hana maná bafalisiɛ́ŋ, gimbi igígimbenú gigodi bugaga.
6Gúu dabdab, nnya uguá nugélényi gá giagiá yaábídága ndán iyɛɛ́ Uhaluá úmalɛ́n ndíndíl siásɔ. 7Eguíli gidigid yáad na áhandɛ ya buán buásɔ, yaábídága guán gubíhónye guá ndán igányɛ na dúmába Uhaluá na budúg hana na buɔ́sɛ. Ofuŋ Aglípa, búnyɛ gɔg gá busió buá nubídágídɛ́n unugányɛ bayúdɛn bémfudenyeé. 8Gá giagɛ banuá bayúdɛn nudiádáaban gɔg áneé Uhaluá wenéhémenye bilɔ́ŋ uguá bibɛ́l? 9Yaŋuá mbánan, mmabá ŋŋedenye áneé ŋŋódi áneé nnusenye ɔhɛ́n huá Yésuse wa Nasalɛ́d ta uguá ŋŋil ilúm. 10Buɔ́ mmala Yelusalɛ́m. Mmabiá buŋaŋa guonoólín agá bɔgúnɔ́gɔ́n bá bedúmbinusámb nuá Uhaluá, iyond iyɔnɔhɔn giod giá beédébi uguá giansɛ giá mbíne. Bágásúmbá gisan giɔ́b, yaádában áneé bɔ́na bɔ́. 11Mmabá yanda uguá bigúl gidigid, nsésenye bɔ́ mpiligenin bɔ́ áneé béféninefenin ɔhɛ́n huá Yésuse. Uguámɛ guá buhánd, mmabá ŋŋúŋa bɔ́ gueneg uguá bɔtísɔna bá bidɔŋ ibíólbíóndeé.
12Gúu mmɛɛ́d agá tísɔna wa Damás na mbɔba iyɛɛ́ bɔgúnɔ́gɔ́n bá bedúmbinusámb nuá Uhaluá bámampuá gá gual busɔ́m. 13Ofuŋ, mmaágányɛ uguá ŋŋil na ɔdɛ́m huá buɔ́sɛ, iyaán giandá giá gise gíbunya gídúmban giá ɔhɛ́nyɛ, igíádígágál naánamɛ na biendinyi biámɛ. 14Idiagua basuá gidigid, iyɔɔ́b ugelu húŋɔyɔn na nugálɔ nuá balameyɛ́ŋ áneé: “Sól, Sól, gá giagɛ éŋényigenyeé? Anyɛ hana bunyam ubuɔ́ béndenyeé na niɔŋ, búbíbisenye na gifan.” 15Iyoóhún yɔ́ áneé: “Aŋuá ányá Ɔgúná?” Ɔgúná uwoŋondinye áneé: “Nnyɛ Yésuse uyɔɔ́ égényigenyeé. 16Gɔgaá, adígɛ́n, edélímin. Nsebíéníginye gá gueleé abá edúmébi wamɛ, abá amaáná wamɛ gá dógonye haná ámáŋán hínen ond ɔya ubuɔ́ ŋŋádambuninaá súsɔ́n. 17Ŋŋedédínye gá busió buá buán buá bayúdɛn naá gá buá bidɔŋ gidigid ibiɛ́ ŋŋadúmánɔ́ guɔ́. 18Yádúman guɔ́ gá gueleé ebun bɔ́ eŋís, oólie bɔ́ uguá mbíne ondie bɔ́ uguá gise ond edúgún bɔ́ uguá ihiligine hiá Sátan, bóndin Uhaluá. Bámáŋádáab, bánábia giyibinina gɔ́b gá bifal bónd bádáŋáab ondig uguá ɔlɔŋ huá bandɔ ɔbɔ́bɔninaá na Uhaluá.” »
19«Ofuŋ Aglípa, gugunsen agányɛ gɔg yaáguanda hana nuénígie unúmonólín ugumɔn númendíye. 20Gɔgaá, mmebul guɔyɔn bandɔ abánya Damás na Yelusalɛ́m, iyɔdɔ́bígɛn gá guɔyɔn abánya uguá gibéyi giá guísi giá Yudé gidigid, na bandɔ bá bidɔŋ biá bindiádába. Yɔɔ́yɔ́n bɔ́ áneé bébídun, bóndin Uhaluá uguá mɔyɔ, bédíyenye súsɔ́n uguá melélíe áneé bébídun.
21Buand buáguɔ́ bayúdɛn bémeŋimbín gɔg uguá idúl obónd ebédie guŋɔ́n. 22Gɔgaá, Uhaluá wéŋimbe guesieg uguá buɔ́sɛ buá hínen, gúu mmanyaá hɔ́ gá gueleé mbá amaáná weg agá eŋís ya bandɔ gidigid, na biayɔ hana na bɔgúnɔ́gɔ́n. Ndiɔ́guɔya buónyi búmodi gudɔ́mb ubuɔ́ bebunebúné na Mɔ́sɛsa bómodógínyé áneé búánábíal.» 23Bɔ́mɔyá áneé: «Bémeyíde wɔnɔ́bígɔn, wanábá mɔndɔ wa busió wa hám uguá gibɛ́l wonónd udógie gise giá gisódie uguá buán naá uguá bindiádába.»
24Henyé Póle umabá umanyɛ gá bíhɔgɔnhɔgɔn, Festús uwehéhídinye áneé: «Póle, anyɛ ɔduɔ́duá! Nuhɔ́nhɔ́n nuáhɔ gidigid nuébélie ɔduá!» 25Gɔgaá, Póle uwondinye áneé: «Ŋŋɔ́mɔna Festús, ndibá ɔduɔ́duá. Dugálɔ uduɔ́ mpémenyeé dúnyɛ hómohómue, dúdibá duá ɔduɔ́duá. 26Ofuŋ Aglípa umebidé masɔ́m amagányɛ, weényi mɔ́ wɔ́s, buand buáguɔ́ nnya wa guɔya mɔ́ na nimadɛ gidigid egég gá busió. Yaálinsan beseé na beseé áneé udiáguanyanyɛ ta buand. Gá giagiá, masɔ́m amagányɛ mámasábíala uguá ninamba. 27Ofuŋ Aglípa, aáguádáaban moónyi umɔɔ́ bebunebúné bɔ́mɔyá a? Yaálinsan áneé aáguádáaban mɔ́.» 28Aglípa uwondinye Póle áneé: «Aábídága áneé egeŋéye ebinene wa Klístus gunsáns anagányɛ a?» 29Póle uwondinye yɔ́ áneé: «Ta búbá gá maná ginɛŋ, ta gá giandá giá ginɛŋ, yoóbísógólonye Uhaluá áneé búdibá pɛ́ŋ aŋuá, gɔgaá, búbá gánɔ banuá gidigid numbídɔ́lígɔnɔnaá hínen, nuáyɛ haná yaŋuá nnya, gɔgaá, kanda duoli duá duáyɛ uduɔ!»
30Uguá nugálɔ nuá Póle unugányɛ, na ofuŋ na ŋŋɔ́mɔna na Belenís na bandɔ gidigid abámabá nɔɔ́nɔb, abádigan gɔg. 31Bɔ́mɔɔ́gɔ́bígɔ́gɛ́ɛd, abɛ́d bɔ́ya áneé: «Mɔndɔ uyɔ waásúgual buand buá gilɔg ubuɔ́ únigimanaá na nigué ugúnya ana gá guɛ́d uguá giansɛ giá mbíne.» 32Aglípa uwɔyidɛn Festús áneé: «Bámabá bá nihɛn mɔndɔ uyɔ wémédidúmbíe buónyi buég agá ofuŋ uhugɔ́n.»
ទើបបានជ្រើសរើសហើយ៖
:
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល