Melélíe 14
14
Na Póle na Balnábas Ikoniyúm
1Bémeéméneg Ikoniyúm, ubuá bíal nɔ́ bilɔŋ bímomi hana Antiós, na Póle na Balnábas abɛ́d uguá gigúl giá bayúdɛn, abágálgal hɔ́ beseé na beseé gueneg hana giod giá bandɔ, na bayúdɛn na baglɛ́k bámaáyɛ beédébi bá Klístus. 2Gɔgaá, bayúdɛn ebémen guádáab ebédídígen bindiádába gá sogisogie beliméen abámadáab. 3Ta anagányɛ na Póle na Balnábas abágígɛ́ɛd giandá giá ginɛŋ hɔ́. Bágálgal kanda bugádɔ na bídímbígen uguá Ɔgúná úmedíyényé áneé, nugálɔ nuá magɔg unuɔ́ bómodógónye númabá hómohómue na guéŋen bɔ́ giásɛ giá guala biseyi na díyenye bilɛns. 4Bandɔ bá tísɔna abábíába: Ɔbɔ uguélém guá bayúdɛn, ebéné uguélém guá medenyi. 5Na bayúdɛn na bindiádába na ifuŋ siɔ́b, abágɔ́d áneé bésésenye na Póle na Balnábas uguá bugaga bónd bɔ́n bɔ́ na adányɛ. 6Na Póle na Balnábas bámaámálɛns buɔ́, obólígie Ikoniyúm, abámbɛd gá bínamb agá bɔtísɔna bá gibéyi giá guísi giá Likaoní: Lístlɛ na Dɛ́lb naá uguá bɔtísɔna bódodi. 7Ebésesenye súsɔ́n Ginɔ́g giá Nsɔ́m.
Gióndúgie giá gióŋi Lístlɛ
8Mɔndɔ omodi umabá Lístlɛ, umasábá wadigan, umabá gióŋi gubul agá bíbíén umasúguandɛd ta buɔ́sɛ. 9Buɔ́sɛ búmodi ubuɔ́ úmɔbídɔ́lígɔ́nɔ́n dugálɔ duá Póle, Póle uwosólímin yɔ́, uwaán áneé umabianán guágɔdɛ́m gá guɔ́ndɔ́ɔg. 10Póle uwɔyidɛn yɔ́ ugelu ugumɔn áneé: «Adígɛ́n, edélímin!» Mɔndɔ uwadigɛn gunsáns, uwɛɛ́d gá guanda. 11Bandɔ bámáamán ubuɔ́ Póle úmal, ebédiginye igelu na bugélígelíe buá Likaoní áneé: «Buhaluá bɔ́gɔ́l nuɔ́l nuá bandɔ abásɔs gibéyi giásɔ.» 12Abálɔg Balnábas áneé «Sés» Póle áneé «Hɛlmɛ́s» gá giagiá úmaábá ugálgal binɛŋ gidigid. 13Edúmbinusámb umeégímbé idúl hiá Sɛ́s ihímabá agá nibíŋínín niá tísɔna, uwoól na binɔ́mɛ biá mélúke laŋáláŋá na duɔl duá bisɛl, uguá mbíŋínín siá tísɔna gá guéŋin na Balnábas na Póle nusámb, gá giagiá bámabá bámámánáhám ugelu na giíŋ áneé bál nɔ́. 14Na Póle na Balnábas bɔ́mɔɔ́mɔ́b anagányɛ, abábílahuna bihuya biɔ́b, abɛ́d gunsáns ɔmbɔ́g huá giíŋ béhéhenye ugelu ugumɔn áneé: 15«Bágásɔ, giagɛ igiɛ́ núálanɔ́ igigányɛ? Basuá súsɔ́n dinyɛ bandɔ hana banuá! Diónúdógínyé Ginɔ́g giá Nsɔ́m gá gueleé nuen muand muá buegu, nubíségélidie ɔmbɔ́g huá Uhaluá unyaá ɔgɔ́sɛ, umaáŋan gumɔn, guísi, máŋ na muand gidigid umúnya guɔ́. 16Uguá mɔɔ́sɛ má nsuá, Uhaluá umanihɛ́n mɔnɔŋ gidigid áneé mébinen ŋŋil siɔ́b mbánan. 17Henyé, umabá ubídíyenye uguá beseé uyɔɔ́ wálanɔ́: waánúhuán dubɔ́l na binɛŋ biá guoge guonoólín ugumɔn, unúsugunenin gunyá giod wond unúágan ibal agá ɔdɛ́m.» 18Búmabá meyú gá gueleé ta uguá dugálɔ udugányɛ bóhigie bandɔ áneé bédiéŋin bɔ́ nusámb.
19Bayúdɛn bómodi obónoólín Antiós, Ikoniyúm, ebédídígen giíŋ gá guɔ́n Póle na adányɛ. Abádúdan yɔ́ adányɛ, ebédúdúle yɔ́ ebéhemie yɔ́ agá tísɔna, bégedenye áneé usemenegué. 20Gɔgaá, bebinene bá Klístus bémeémégéŋélidie yɔ́, uwadigɛn uwond agá tísɔna. Méembélényi, uwɛɛ́d ɔlɔŋ ná Balnábas Dɛ́lb.
Guosiond gá busɔ́m
21Na Pole na Balnábas obódógónye Ginɔ́g giá Nsɔ́m agá tísɔna wa Dɛ́lb. Giod giá bandɔ igíáyɛ bebinene, abándadúmbɛ́n Lístlɛ, Ikoniyúm na Antiós. 22Hɔɔ́m gidigid ɔhɔɔ́ bámabá bádúmbanɛn, bégúnínenye idɛ́m siá beédébi, bégínyiginye bɔ́, bɔ́yɔn bɔ́ áneé bódisonsólídíe imbɔ́g uguá guágɔdɛ́m, bɔ́yɔn bɔ́ áneé: «Digódi áneé didúmbɛ́n uguá giod giá meyú, dibédebíŋín uguá Niguili niá Uhaluá.» 23Na Póle na Balnábas bémedélíményé bogógi uguá sig Gimbi giá beédébi bá Klístus. Egélém gá ŋŋenyi na mbísógóli, abásúgídɛn bɔ́ uguá imbɔ́g siá Ɔgúná uyɔɔ́ bámág ɔdɛ́m uguég. 24Egélém, abádúmbɛ́n uguá gibéyi giá guísi giá Pisidí, ebéneg gá giá Paŋfilí. 25Obódógónye Nugálɔ nuá Uhaluá agá tísɔna wa Pɛlye, ebédúnúg agá niyugɛ́n niá Atalí. 26Gugɔ́lɛ́n agányɛ, ebébíŋín uguá sitíme gá guɛ́d Antiós, uyɔɔ́ bómonoólín, agaá bámasúgídɛ́n bɔ́ uguá magɔg má Uhaluá umeéndényé bɔ́ gá buóli ubuɔ́ bámalá. 27Bémeéméneg, abágúsígan Gimbi giá beédébi bá Klístus, gá guɔyɔn bɔ́ muand gidigid umuɔ́ Uhaluá úmalá nɔɔ́nɔb naá haná Uhaluá úmebunín bindiádába ŋŋil ya guágɔdɛ́m. 28Na Póle na Balnábas abágíga giandá giá ginɛŋ na bebinene bá Klístus bá Antiós.
ទើបបានជ្រើសរើសហើយ៖
Melélíe 14: EKM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Melélíe 14
14
Na Póle na Balnábas Ikoniyúm
1Bémeéméneg Ikoniyúm, ubuá bíal nɔ́ bilɔŋ bímomi hana Antiós, na Póle na Balnábas abɛ́d uguá gigúl giá bayúdɛn, abágálgal hɔ́ beseé na beseé gueneg hana giod giá bandɔ, na bayúdɛn na baglɛ́k bámaáyɛ beédébi bá Klístus. 2Gɔgaá, bayúdɛn ebémen guádáab ebédídígen bindiádába gá sogisogie beliméen abámadáab. 3Ta anagányɛ na Póle na Balnábas abágígɛ́ɛd giandá giá ginɛŋ hɔ́. Bágálgal kanda bugádɔ na bídímbígen uguá Ɔgúná úmedíyényé áneé, nugálɔ nuá magɔg unuɔ́ bómodógónye númabá hómohómue na guéŋen bɔ́ giásɛ giá guala biseyi na díyenye bilɛns. 4Bandɔ bá tísɔna abábíába: Ɔbɔ uguélém guá bayúdɛn, ebéné uguélém guá medenyi. 5Na bayúdɛn na bindiádába na ifuŋ siɔ́b, abágɔ́d áneé bésésenye na Póle na Balnábas uguá bugaga bónd bɔ́n bɔ́ na adányɛ. 6Na Póle na Balnábas bámaámálɛns buɔ́, obólígie Ikoniyúm, abámbɛd gá bínamb agá bɔtísɔna bá gibéyi giá guísi giá Likaoní: Lístlɛ na Dɛ́lb naá uguá bɔtísɔna bódodi. 7Ebésesenye súsɔ́n Ginɔ́g giá Nsɔ́m.
Gióndúgie giá gióŋi Lístlɛ
8Mɔndɔ omodi umabá Lístlɛ, umasábá wadigan, umabá gióŋi gubul agá bíbíén umasúguandɛd ta buɔ́sɛ. 9Buɔ́sɛ búmodi ubuɔ́ úmɔbídɔ́lígɔ́nɔ́n dugálɔ duá Póle, Póle uwosólímin yɔ́, uwaán áneé umabianán guágɔdɛ́m gá guɔ́ndɔ́ɔg. 10Póle uwɔyidɛn yɔ́ ugelu ugumɔn áneé: «Adígɛ́n, edélímin!» Mɔndɔ uwadigɛn gunsáns, uwɛɛ́d gá guanda. 11Bandɔ bámáamán ubuɔ́ Póle úmal, ebédiginye igelu na bugélígelíe buá Likaoní áneé: «Buhaluá bɔ́gɔ́l nuɔ́l nuá bandɔ abásɔs gibéyi giásɔ.» 12Abálɔg Balnábas áneé «Sés» Póle áneé «Hɛlmɛ́s» gá giagiá úmaábá ugálgal binɛŋ gidigid. 13Edúmbinusámb umeégímbé idúl hiá Sɛ́s ihímabá agá nibíŋínín niá tísɔna, uwoól na binɔ́mɛ biá mélúke laŋáláŋá na duɔl duá bisɛl, uguá mbíŋínín siá tísɔna gá guéŋin na Balnábas na Póle nusámb, gá giagiá bámabá bámámánáhám ugelu na giíŋ áneé bál nɔ́. 14Na Póle na Balnábas bɔ́mɔɔ́mɔ́b anagányɛ, abábílahuna bihuya biɔ́b, abɛ́d gunsáns ɔmbɔ́g huá giíŋ béhéhenye ugelu ugumɔn áneé: 15«Bágásɔ, giagɛ igiɛ́ núálanɔ́ igigányɛ? Basuá súsɔ́n dinyɛ bandɔ hana banuá! Diónúdógínyé Ginɔ́g giá Nsɔ́m gá gueleé nuen muand muá buegu, nubíségélidie ɔmbɔ́g huá Uhaluá unyaá ɔgɔ́sɛ, umaáŋan gumɔn, guísi, máŋ na muand gidigid umúnya guɔ́. 16Uguá mɔɔ́sɛ má nsuá, Uhaluá umanihɛ́n mɔnɔŋ gidigid áneé mébinen ŋŋil siɔ́b mbánan. 17Henyé, umabá ubídíyenye uguá beseé uyɔɔ́ wálanɔ́: waánúhuán dubɔ́l na binɛŋ biá guoge guonoólín ugumɔn, unúsugunenin gunyá giod wond unúágan ibal agá ɔdɛ́m.» 18Búmabá meyú gá gueleé ta uguá dugálɔ udugányɛ bóhigie bandɔ áneé bédiéŋin bɔ́ nusámb.
19Bayúdɛn bómodi obónoólín Antiós, Ikoniyúm, ebédídígen giíŋ gá guɔ́n Póle na adányɛ. Abádúdan yɔ́ adányɛ, ebédúdúle yɔ́ ebéhemie yɔ́ agá tísɔna, bégedenye áneé usemenegué. 20Gɔgaá, bebinene bá Klístus bémeémégéŋélidie yɔ́, uwadigɛn uwond agá tísɔna. Méembélényi, uwɛɛ́d ɔlɔŋ ná Balnábas Dɛ́lb.
Guosiond gá busɔ́m
21Na Pole na Balnábas obódógónye Ginɔ́g giá Nsɔ́m agá tísɔna wa Dɛ́lb. Giod giá bandɔ igíáyɛ bebinene, abándadúmbɛ́n Lístlɛ, Ikoniyúm na Antiós. 22Hɔɔ́m gidigid ɔhɔɔ́ bámabá bádúmbanɛn, bégúnínenye idɛ́m siá beédébi, bégínyiginye bɔ́, bɔ́yɔn bɔ́ áneé bódisonsólídíe imbɔ́g uguá guágɔdɛ́m, bɔ́yɔn bɔ́ áneé: «Digódi áneé didúmbɛ́n uguá giod giá meyú, dibédebíŋín uguá Niguili niá Uhaluá.» 23Na Póle na Balnábas bémedélíményé bogógi uguá sig Gimbi giá beédébi bá Klístus. Egélém gá ŋŋenyi na mbísógóli, abásúgídɛn bɔ́ uguá imbɔ́g siá Ɔgúná uyɔɔ́ bámág ɔdɛ́m uguég. 24Egélém, abádúmbɛ́n uguá gibéyi giá guísi giá Pisidí, ebéneg gá giá Paŋfilí. 25Obódógónye Nugálɔ nuá Uhaluá agá tísɔna wa Pɛlye, ebédúnúg agá niyugɛ́n niá Atalí. 26Gugɔ́lɛ́n agányɛ, ebébíŋín uguá sitíme gá guɛ́d Antiós, uyɔɔ́ bómonoólín, agaá bámasúgídɛ́n bɔ́ uguá magɔg má Uhaluá umeéndényé bɔ́ gá buóli ubuɔ́ bámalá. 27Bémeéméneg, abágúsígan Gimbi giá beédébi bá Klístus, gá guɔyɔn bɔ́ muand gidigid umuɔ́ Uhaluá úmalá nɔɔ́nɔb naá haná Uhaluá úmebunín bindiádába ŋŋil ya guágɔdɛ́m. 28Na Póle na Balnábas abágíga giandá giá ginɛŋ na bebinene bá Klístus bá Antiós.
ទើបបានជ្រើសរើសហើយ៖
:
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល