Melélíe 11
11
Nugálɔ nuá Piéle Yelusalɛ́m
1Na medenyi na beliméen abámabá uguá gibéyi giá guísi giá Yudé, ɔbɔ́b áneé bindiádába bímádáŋáab súsɔ́n nugálɔ nuá Uhaluá. 2Piéle umoómósiond Yelusalɛ́m, beédébi bá Klístus abánya bayúdɛn ebéségenye neéneg. 3Ɔbɔ́yidɛn yɔ́ áneé: «Eébíŋín uguá giansɛ giá abádiabíansa ogond aganyánan nɔɔ́nɔb!» 4Piéle gɔg uwebul guɔyɔn bɔ́ buónyi haná búmagɔns guéneg agá nsúgie. 5Úmuanyɛ gɔ́b áneé: «Mmabá gá mbísógóli agá tísɔna wa Yopé, iyabia nuénígie, buand ubúónoólónín ugumɔn hana giandá giá ndífɔn, bégimbe buɔ́, uguá egéndu éníhi ubúásusan, ubúésiŋegín. 6Iyosólíminin buɔ́, iyaán uguadá guá buɔ́: Manyam má maláŋ méníhi, manyam má mpɔ́m naá emébídúdúlenú uguísi na munonyi umúhulugeneé. 7Egélém iyɔɔ́b ugelu guonoólín guɔ́, húŋɔyɔn áneé: Piéle, adígɛ́n, ɔ́ná anyánan!» 8Iyondinye áneé: «Ɛ́ɛɛ́! Ɔgúná, gá giagiá mmanyɛ ndinyá ginánamb, ta buand búmodi buá ŋŋenyi.» 9Ugelu uhúɔ́ndúguɔyɛd áneé: «Buand ubuɔ́ Uhaluá usémeneguélígie, aŋuá adián buɔ́ áneé búnyɛ ŋŋenyi.» 10Ubúóndin gual anagányɛ iŋand ídádɔ, egélém agányɛ muand gidigid umúónd ugumɔn. 11Uguá ginɛŋ giáguɔ́, bandɔ bádádɔ ebésieg agá nihiá iniɛ́ dímabá. Bámanándúmɛ́n bɔ́ Sesalé. 12Gileénde igíɔ́ŋɔyidɛn áneé yond nɔɔ́nɔb kendebídúdúlid. Beliméen bámɛ ɔbɔ bátíndádɔ ebéŋelie, idiond idiebíŋín gɔg uguá giansɛ giá mɔndɔ ugányɛ. 13Uwɔdíɔyɔn hana úmaán gilúna uguég giá giansɛ, igíɔ́yidɛn yɔ́ áneé: «Dɔ́m mɔndɔ Yopé, gá guɛ́d guɔnɔdɔ́ŋɛ́ɛn Símune uyɔɔ́ bɔ́ndɔdɔ́ŋɔnaá áneé Piéle. 14Ugɔ́guɔyɔn dugálɔ udúgahuánɔ́ gisódie na giansɛ giáhɔ giá bandɔ gidigid.» 15Mmɔɔ́nɔgɔ́l nugálɔ, Gileénde giá Budányɛ igíásusɛn bɔ́ haná gímal gásɔ gá busió agá magunsa. 16Agányɛ mmebídúmdényé gɔg nugálɔ nuá Ɔgúná unuɔ́ úmɔyɛ́d áneé: «Sáŋa, umeyuményé bandɔ na mimbi, bégenúyumenye banuá uguá Gileénde giá Budányɛ.» 17Haná Uhaluá umaádáabɛ́n bɔ́ mpuán yaáguɔ́ imoómi, iyɛɛ́ úmadiádáabɛn basuá dimaág ɔdɛ́m uguá Ɔgúná Yésuse Klístus. Yaŋuá, mmabá gɔg ányá gá guenye Uhaluá gual ubuɔ́ úmɔyá gual? 18Bɔ́mɔɔ́mɔ́b dugálɔ udugányɛ udúódombie bɔ́ idɛ́m, ebégúmenye Uhaluá bɔ́ya áneé: «Ndénu gɔg, Uhaluá weéŋín súsɔ́n bindiádába giásɛ gá núgie bilɔŋ gá dáŋáab nusɔ́da.»
Gudágɛ́ɛg guá Gimbi giá beédébi bá Klístus giá Antiós
19Bandɔ abámasálámánd uguá gínɛŋ giá meyú egélém gá giɔ́na giá Etiɛ́nɛ, bámiídán hádɛ Fenisí, síplɛ, Antiós. Gɔgaá, bámasábá bɔ́yɔn bandɔ bódodi Ginɔ́g giá Nsɔ́m, pɛ́ŋ bayúdɛn. 20Ta nɔ́, beédébi bómodi abámabá bá Síplɛ na Silɛ́n bémeéméneg Antiós, abágɔns gudógonye súsɔ́n baglɛ́k Ginɔ́g giá Nsɔ́m giá Ɔgúná Yésuse. 21Buŋaŋa buá Ɔgúná búmabá nɔɔ́nɔb, giod giá bandɔ gímenúgie bilɔŋ, igíádáab Ɔgúná igíodin yɔ́ uguá mɔyɔ. 22Nsɔ́m igányɛ imenégín Gimbi giá beédébi bá Klístus Yelusalɛ́m uguá idú, abádɔ́m Balnábas Antiós. 23Umeéméneg, uwaán haná magɔg má Uhaluá mámabá mála buóli, uwabia ibal usilen beliméen áneé bábígɔ́d na Ɔgúná. 24Balnábas umabá mɔndɔ wa ɔdɛ́m beseé, ohónón na Gileénde giá Budányɛ na guágɔdɛ́m. Giandá giá giíŋ igíádáab gubinen Ɔgúná. 25Balnábas uwɛɛ́d gɔg Táls gá guamba Sól. 26Umaámán yɔ́, uwond neéneg Antiós. Abágígɛ́ɛd nnyɔ́m imoómi, bála buóli uguá Gimbi giá beédébi bá Klístus, béhuínyihuinye giandá giá giíŋ. Búnyɛ Antiós bémebué guéŋin bebinene bá Klístus ɔhɛ́n huá «beédébi bá Klístus. »
Ŋŋíge
27Uguá mɔɔ́sɛ amagányɛ, bebunebúné obónoólín Yelusalɛ́m gá guɛ́d Antiós. 28Omodi uguɔ́b guá ɔlɔŋ ɔhɛ́n áneé Agabús, uyɔɔ́ Gileénde giá Budányɛ gímendényé uwɛɛ́d gá guɔya áneé giandá giá ɔndɔm gígagua uguísi gidigid, búmabíalá gɔg uguá ginɛŋ giá ihiligine hiá ofuŋ uhugɔ́n Klód. 29Bebinene abáhám ugelu áneé, sig mɔndɔ udɔ́m gidám giá buand igiɛ́ ugódionu gá gígin beliméen bɔ́b, abámabá gibéyi giá guísi giá Yudé ɔmbɔ́g. 30Nɔ́ bámal, abádúmɛ́n bogógi bá gibéyi giá guísi giá Yudé ŋŋíge gá Balnábas na Sól.
ទើបបានជ្រើសរើសហើយ៖
Melélíe 11: EKM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
