Melélíe 10
10
Nuénígie nuá Kɔlnɛ́yɛ
1Mɔndɔ omodi umabá uguá tísɔna wa Sesalé, ɔhɛ́n áneé Kɔlnɛ́yɛ. Umabá ɔgúnɔ́gɔ́n wa gimbi giá nsénsi edín átánɔ siá Lóm, igiɛ́ bɔ́dɔ́ŋɔnaá áneé: «Italí.» 2Mɔndɔ waáguɔ́ umabá wɔɔ́bɔn bugádɔ na Uhaluá ubúlúgenye yɔ́ giod na giansɛ giég giá bandɔ gidigid. Umabá weéŋen basúgasuga bá buán bá bayúdɛn muand giod, ubísógólonye Uhaluá binɛŋ gidigid. 3Buɔ́sɛ búmodi, ala uguá bisigɛl bídádɔ egélém gá tólóbi, uguá nuénígie uwaán gilúna giá Uhaluá geŋulugeŋulu gíbíŋen uguég guá giansɛ, igíɔ́dɔ́ŋɛ́ɛn yɔ́ áneé: «Kɔlnɛ́yɛ!» 4Kɔlnɛ́yɛ uwosólímin giɛ́, na bugádɔ uwondinye áneé: «Ɔgúná, giagɛ?» Gilúna igíóndinye yɔ́ áneé: «Mbísógóli siáhɔ na mpuán yahɔ iyɛɛ́ alanɔ́ gá basúgasuga, múénégín Uhaluá, gúu údiébíélibielie. 5Dɔ́m gɔg bandɔ dabdab Yopé, bɔ́nɔdɔ́ŋɛ́ɛn mɔndɔ ɔhɛ́n áneé Símune, bɔ́ndɔdɔ́ŋɔ́n yɔ́ áneé Piéle. 6Waágíga agá nihiá niá mɔndɔ omodi udananɔ́ biɔmp ɔhɛ́n aneé Símune, uyɔɔ́ giansɛ giég gínya uguá buáyɛ buá máŋ.» 7Gilúna igímagálgál gá kɔlnɛ́yɛ gímaámádɔ́mb, uwɔdɔ́ŋɛ́ɛn bedúmébi bég báandɛ na nsénsi imoómi imaábá uguég guá ihiligine feké, gilád giá Uhaluá. 8Umɔɔ́mɔ́nduguɔyɔn bɔ́ buand gidigid ubúmabídúmbán, uwadɔ́m bɔ́ Yopé.
Nuénígie nuá Piéle Yopé
9Mémbélényi, haná na bedúmébi na nsénsi bámabá báganyɛ uguá ŋŋil gá guɛ́d gueneg Yopé, Piéle umamágád agá nubamba gá bísógólonye. Búmabá búá bá uguá tólóbi. 10Gɔgaá, nsan iyanúmɛ́ɛd yɔ́, uwɛɛ́d gá guamba áneé unyá buand. Bámaágánámban yɔ́ buand buá nyá, uwabia nuénígie. 11Uwaán gumɔn ugubunénu, buand búsusanɛn guɔ́, búmabá hana giandá giá ndífɔn saámbagadagada, bégimbe buɔ́ uguá egéndu éníhi, búɔ́sibídɔ́bígɔ́n uguísi. 12Uguadá, manamanyá má manyam má maláŋ méníhi, naá emébídúdúlenú uguísi na munonyi gidigid múmabá guɔ́. 13Ugelu húɔyɔn yɔ́ áneé: «Piéle, adígɛ́n! Ɔ́ná anyánan.» 14Piéle uwondinye áneé: «Ɛ́ɛɛ́, Ɔgúná, gá giagiá mmanyɛ ndinyá ginánamb ta buand búmodi buá ŋŋenyi.» 15Ugelu uhúɔ́ndúguɔyidɛn yɔ́ áneé: «Buand ubuɔ́ Uhaluá úsémeneguélígie, aŋuá adián buɔ́ áneé búnyɛ ŋŋenyi.» 16Búmondín gual anagányɛ iŋand ídádɔ ebédúmbie guondie buɔ́ ugumɔn. 17Piéle umabá umanyɛ gá guanuna gá lɛns buand ubuɔ́ nuénígie unuɔ́ úmábia núámbanɔ́ guɔyɛd, búmadúmbán yɔ́. Uguá ginɛŋ giáguɔ́, bandɔ ɔbɔɔ́ Kɔlnɛ́yɛ úmadɔ́m bámabá bómómonóguóhon hɔɔ́m gidigid nihiá niá Símune edenyi biɔmp, ebésidélímín egég gá niíd niá giansɛ. 18Ɔbɔ́dɔ́ŋɛ́ɛn obónd obóhún áneé: «Aga mɔndɔ uyɔɔ́ bɔ́dɔ́ŋɔnaá áneé Símune, uyɔɔ́ bɔ́ndɔdɔ́ŋɔ́naá áneé Piéle úgíganɔ́ a? » 19Piéle umabá umanyɛ pɛ́ŋ gá guanuna nuénígie nuég, gɔgaá, Gileénde igíɔ́yidɛn yɔ́ áneé: «Bandɔ bádádɔ bányɛ aga, báguamba. 20Sɔs gɔ́g dabdab ond ɔlɔŋ nɔɔ́nɔb, edibídúdúlíd, gá giagiá yaŋuá nsadɔ́m bɔ́.» 21Piéle úwasɔs, uwenegégie bɔ́ uwɔyidɛn bandɔ abagányɛ áneé: «Yaŋuá waáguɔ́ uyɔɔ́ núámbanɔ́ uyɔ. Numól gá giagɛ? » 22Obóndinye yɔ́ áneé: «Kɔlnɛ́yɛ, ɔgúnɔ́gɔ́n wa nsénsi edín átánɔ, úmadídɔ́m. Unyɛ mɔndɔ wa gindényé ubúlúgenyeé Uhaluá haná búnigimanaá, bayúdɛn gidigid bɔ́guɔ́bɔn beseé neéneg. Gilúna giá Uhaluá gíébíénígínyé yɔ́, igíɔ́yidɛn yɔ́ áneé udɔ́m bandɔ, bɔ́sidɔ́ŋɛ́ɛn ɛɛ́d egég gá nihiá, wɔɔ́b dugálɔ duáhɔ. » 23Piéle uwebíŋínye bɔ́, uwebídíminye bɔ́. Mémbelibéli, uwalád ŋŋil ɔlɔŋ nɔɔ́nɔb na beliméen bómodi bá Yopé. 24Buɔ́sɛ ubúmɔndɔdɔ́bígɛn, uweneg Sesalé, Kɔlnɛ́yɛ ugígan yɔ́ hɔ́ na giansɛ giég giá bandɔ gidigid na begúl bég bá ɔdɛ́m ɔbɔɔ́ úmɔdɔ́ŋɛ́ɛn. 25Uguá ginɛŋ igiɛ́ Piéle úmenég, Kɔlnɛ́yɛ uwɛɛ́d gá gólie yɔ́, uwaguɛn yɔ́ uguá dugɔ́nd gá búlúgenye yɔ́. 26Piéle uwediginye yɔ́ úmuanyɛ gég áneé: «Adígɛ́n, yaŋuá súsɔ́n nnyɛ mɔndɔ hana aŋuá.» 27Bédúmbenye na guɔya mayɔ, uwebíŋín uguá giansɛ. Uwegégie gimbi giá bandɔ gísamanabígúsa. 28Uwɔyidɛn bɔ́ áneé: «Núálinsan áneé búnyɛ ŋŋenyi uguá bayúdɛn áneé béndenyendenye na benyi, ta gubíŋín uguɔ́b guá biansɛ bédibíŋín. Gɔgaá gámɛ, Uhaluá weéndíye áneé ndigíŋíla mɔndɔ omodi ugúnya ana udiánigimanan na gueleé bégúle egég gá nihiá. 29Buand buáguɔ́ mmól gáhɔ gá ɔdɔ́ŋína ta gubídúdúlid. Gɔgaá, yaáguamba gulɛns ubuɔ́ núɔ́ndɔ́ŋɔn gá buɔ́ aga.» 30Kɔlnɛ́yɛ uwondinye áneé: «Búganyɛ mɔɔ́sɛ mádádɔ uyɔɔ́ mmabá gá mbísógóli, uguá buginɛŋ buáguɔ́ ubuɔ, bisigɛl bídádɔ egélém gá tólóbi, mmobísógólónyé agámɛ gá nihiá. Hɔ́nɔhɔ́, iyaán mɔndɔ na bimenyimin biá bisɔn, delimine agámɛ gá busió. 31Uwɔŋɔyidɛn áneé: “Kɔlnɛ́yɛ, Uhaluá umɔ́b mbísógóli yahɔ, udiébíélibielie mpuán yahɔ iyɛɛ́ álanɔ́ gá basúgasuga. 32Dɔ́m gɔg bandɔ Yopé bɔ́nɔdɔ́ŋɛ́ɛn Símune uyɔɔ́ bɔ́ndɔdɔ́ŋɔnaá áneé Piéle gá gueleé woól, waábídíman agá nihiá niá Símune edenyi biɔmp, nihiá niég nínyɛ uguá ŋŋɛnd ya máŋ.” 33Yeédúmbie gudɔ́m bandɔ gá guólɔsidɔ́ŋɛ́ɛn, gúu aádáab súsɔ́n guól uguá ginɔ́nɛ́n. Basuá ɔbɔ dabdab gɔg agáhɔ gá busió gá gueleé diɔ́bɔn buand gidigid ubuɔ́ Ɔgúná waáhuá áneé ɔdíɔ́yidɛn.»
Dugálɔ duá Piéle agá nihiá niá Kɔlnɛ́yɛ
34Piéle uwɔgɔ́l nugálɔ gɔg úmuanyɛ áneé: «Ɛɛ́ɛ, hómohómue mbánan, mmálɛns gɔg dabdab áneé Uhaluá udigódi nsala, 35ta gubá áneé mɔndɔ waáguɔ́ unyɛ uguá buán búlúm. Mɔndɔ uwalanɔ́ buá gindényé wond ubianan bugádɔ neéneg, unyɛ beseé egég gá eŋís. 36Búbúnya nsɔ́m iyɛɛ́ úmadúmɛ́n bandɔ bá Íslayɛ́l gá guɔyɔn bɔ́ Ginɔ́g giá Nsɔ́m giá bumbénu uguá Yésuse Klístus, unyaá Ɔgúná wa bandɔ gidigid.»
37Núálinsan ubúmabídúmbán uguá gibéyi giá guísi gidigid giá Yudé, búmagunsɛ́n uguá gibéyi giá guísi giá Galilé, egélém gá gidóginye giá giyuminye giá Sáŋa. 38Nuálinsan áneé Uhaluá úmesegidinye uguá Yésuse wa Nasalɛ́d Gileénde giá Budányɛ na buŋaŋa. Umɛɛ́d wandá hɔɔ́m gidigid, wala pɛ́ŋ beseé, woóndúgonye bandɔ gidigid abámabá uguá gigimbine giá buŋaŋa buá abɛlɛ́bɛl, gá giagiá Uhaluá umabá neéneg. 39Gúu basuá, dínyá bamaáná gá buóli buég uguá gidɔŋ giá bayúdɛn na Yelusalɛ́m. Úmuanyɛ uyɔɔ́ bɔ́mɔ́n na dɔ́ŋ yɔ́ uguá nuag. 40Uhaluá uwehémie yɔ́ uguá gibɛ́l uguá buɔ́sɛ buá gádádɔ buég buá nigué, uweéŋin yɔ́ giásɛ giá bídíye, 41búdíba gá buán gidigid, gɔgaá búnyɛ gá bamaáná ɔbɔɔ́ Uhaluá úmebué gueyid, basuá dimaányánán idiond idiabíhúán neéneg egélém gég gá hám uguá ebeguén. 42Gá yib, uwadídɔ́m gá dógonyinye buán diond diɔya buónyi ubuɔ́ diényénú gég gá busió, úmuanyɛ únyaá esúmbibisan biá bandɔ ɔbɔgɔ́sɛ naá ebeguén uyɔɔ́ Uhaluá úmedénígínyé. 43Búnyɛ gég bebunebúné gidigid bɔ́yɔnɔ́ buónyi ubuɔ́ bényénú gég gá busió áneé: Mɔndɔ unyaá wa guágɔdɛ́m uguég, uguég guá ɔhɛn bánáyibinɛn yɔ́ bilɔga biég.
Abádiabá bayúdɛn bámádáŋáab Gileénde giá Budányɛ
44Piéle umabá umanyɛ na dugálɔ uguá niíd, Gileénde giá Budányɛ igíásusɛn bandɔ gidigid abámabá bɔ́bídɔ́lígɔnɔn Nugálɔ. 45Beédébi gidigid bá bayúdɛn obómól ɔlɔŋ na Piéle ebéséhén na guán áneé Gileénde giá Budányɛ gímásusɛn súsɔ́n abádiabá bayúdɛn. 46Ɔbɔ́bɔn bɔ́ bágálgal dugálɔ dúdodi, bégúmenye hana Uhaluá únya giandá. Piéle uwɔnduguɔyɛd áneé: 47«Bandɔ ɔbɔ bámábia Gileénde giá Budányɛ hana basuá, mɔndɔ unyɛ andá wa guenye bɔ́ giyuminye giá mimbi a? » 48Uwodóŋínye bugaga buá yumenye bɔ́ uguá ɔhɛ́n huá Yésuse Klístus. Obóbísógólidie gɔg Piéle áneé ugígɛ́ɛd baán bá mɔɔ́sɛ nɔɔ́nɔb.
ទើបបានជ្រើសរើសហើយ៖
Melélíe 10: EKM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
