2 Kɔlɛŋɛtiɛ́ŋ 1
1
Mbígélíd
1Yaŋuá Póle, nnyɛ medenyi má Yésuse Klístus gá guɔyɛd guá Uhaluá, nnyɛ na ndiméen wasɔ Timoté. Yɔɔ́guɔ́ŋɔ́n Gimbi giá beédébi bá Uhaluá igínya agá tísɔna wa Kolɛ́ŋt, ɔlɔŋ na beédébi gidigid abánya agá gibéyi giá guísi giá Akáyɛ gidigid. 2Dáŋábánánɔ magɔg na búmbenu guonoólín agá Uhaluá Síe wasɔ, naá agá Ɔgúná Yésuse Klístus.
Guaba guá giɔ́bíga na dóndonye
3Ánaá dísaya Uhaluá, Síe wa Ɔgúná wasɔ Yésuse Klístus, Síe uwaánaninaá bulɔ́b, Uhaluá wa gidóndonye gidigid, 4úmuanyɛ údídóndonyeé gásɔ gá meyú gidigid, gá gueleé uguég guá dídóndonye, udíhuá bugaga buá dóndonye súsɔ́n bɔsɔ́gá gidigid abánya uguá meyú, gidóndonye igiɛ́ basuá mbánan dídáŋáabanɔ́ agá Uhaluá. 5Ɛɛ́ɛ! Bilɔŋ bímomi haná meyú má Klístus mánya gudeg gásɔ, nɔ́ díbiananaá giod giá gidóndonye guonoólin agá Klístus. 6Gá giagɛ dínyaá uguá meyú? Búnyɛ gánɔ gá gidóndonye naá gánɔ gá beseé. Gá giagɛ bódídóndonyeé? Búnye gá busió buá gidóndonye giánɔ, gígínúhuánaá bugaga buá samban bumeyú ubuɔ́ dígódionu súsɔ́n. 7Gumina mɔgɔdɛ guásɔ uguɔ́ dígódionu gánɔ gúnyɛ símbsímb, diálinsan súsɔ́n áneé haná núɔ́bígɔnaá ɔlɔŋ húmomi naánasɔ núábiánan gidóndonye gímomi. 8Beliméen, didiáguamba áneé nuanyanyɛ meyú má hómohómue ɔmɔɔ́ dímabia uguá gibéyi giá guísi giá Así, mémedíbúŋúlídié meéne gudɔ́mb bugaga buásɔ, gueneg haná dímabá dimólíe ɔdɛ́m gá nusɔ́da.
9Ɛɛ́ɛ, dimabá dimámánabíán áneé bámasɔ́mb gisan giásɔ áneé diéguén, agányɛ nubídágídɛ́n númánúdiandábá uguásɔ mbánan, idiobídóŋínye gɔg agá Uhaluá uhúnyanɔ́ bilɔ́ŋ. 10Úmuanyɛ úmeédídúgún gá bunigué ubugányɛ, wénéndedídúgúné, dímaág nubídágídɛ́n nuásɔ uguég, wénendedídúgúné súsɔ́n, 11banuá súsɔ́n nuédígigenin ɔmbɔ́g gá buɔ́ na mbísógóli siánɔ, anagányɛ dianádáŋáabanɔ́ mpuán ya magɔg gá busió buá mbísógóli siá giod giá bandɔ. Buand buáguɔ́ giod, giá bandɔ gíánábánɔ́ giá guéŋin Uhaluá mbíyigie gásɔ gá busió.
Póle umésúgié uŋand huég
12Buand ubúdílégúmenyeé ɔduá búbúnya áneé manɔ́ŋ másɔ mádiasɔ́mbɔsɔ́mb, melélíe másɔ eguísi aga, mányɛ lágɔlágɔ, budányɛ haná Uhaluá wɔ́yɔnɔ. Dúmbadúmba naá gánɔ gá busió, búdibá gá nugedie nuá bandɔ gɔgaá gá magɔg má Uhaluá. 13Didiɔ́núɔ́ŋɔ́n buand búdodi gudɔ́mb ubuɔ́ núánunanɔ́ nuond nuɔ́bɔn, gúu gɔg mbídáganɔ́ áneé nuɔnɔ́diɔ́b beseé na beseé. 14Ɛɛ́ɛ, buand búnyɛ hɔ́ ubuɔ́ númɔ́nudiɔ́b gibéyi búnyɛ áneé: Dienénúlégúmidie ɔduá haná numédílégumidie ɔduá agá guól guá Ɔgúnuá Yésuse. 15Haná ŋŋódiónú bibióndinyi ɔdɛ́m áneé búnyɛ anagányɛ, gúu yaábá áneé yagágudúmbɛ́n uguánɔ gá núdáŋáabɛn magɔg má gáandɛ. 16Guond mmoólígíe agánɔ, iyɛɛ́d uguá gibéyi giá guísi giá Maseduán, iyoólígíe uguá gibéyi giá guísi giá Maseduán gá guond uguánɔ gá gueleé nuaŋanan uŋand huámɛ huá guɛ́d uguá gibéyi giá guísi giá Yudé. 17Mmɔɔ́mɔ́gɔ́l udényi huá uŋand uhúganyɛ, mmál buɔ́ kendebidúmenye lí? Ugúnya ana dugedie duámɛ dúnyɛ pɛ́ŋ duá bandɔ a? Udúnya duá gueleé yɔyɛd uguá ginɛŋ giáguɔ́ gímomi áneé: «Ɛɛ́ɛ!» ugúnya ana «Ɛ́ɛɛ́!» 18Uhaluá unyɛ amaáná wamɛ, ubuɔ́ mmɔ́núɔyídɛ́n búmasábá «Ɛɛ́ɛ!» na «Ɛ́ɛɛ́!» 19Gá giagiá Yésuse Klístus Muɔ́n wa mɔndɔ uyɔɔ́, naánamɛ na Silifɛ́ŋ na Timoté dímesésényé uguánɔ, umasábá «Ɛɛ́ɛ!» Na «Ɛ́ɛɛ́!» Gɔgaá unyɛ pɛ́ŋ áneé «Ɛɛ́ɛ!» 20Gúu ndán siá Uhaluá gidigid símabiɛ́n ɛɛ́ɛ wɔb uguég guá bunyɛ mɔndɔ. Búnyɛ gɔg uguá Yésuse Klístus waáguɔ́ díélimenyeé áneé «anagányɛ» gá gúmenye Uhaluá. 21Gúu búnya Uhaluá waáguɔ́ mbánan údíhuánaá bugaga naánanɔ uguá nusɔ́da na Klístus. Búnyɛ Uhaluá mbánan úmeédiéyíd. 22Uwadiág ndiskan yeg, uwesegidinye Gileénde giá Budányɛ uguásɔ guá idɛ́m. Gileénde giáguɔ́ giɛ́ gídídíyenyeé áneé hómohómue dianádáŋáab binɔ́g biá muand ibiɛ́ úmádíbídígánɛ́n. 23Gá guámɛ, yɔɔ́gɔ́lɔn Uhaluá hana amaáná, mmásúŋan ánaá úŋɔɔ́n. Mmosóndosiond uguá gibéyi giá guísi giá Kolɛ́ŋt gá gueleé ndinúág uguá nugényigényi. 24Didiáguamba áneé dinúhiligenin na buand ubuɔ́ núnya nua guádáab, gɔgaá diáguala buóli ɔlɔŋ gánɔ gá ibal gá giagiá nuégimbe guágɔdɛ́m guánɔ símbsímb.
ទើបបានជ្រើសរើសហើយ៖
2 Kɔlɛŋɛtiɛ́ŋ 1: EKM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល