Walumi 4
4
Mulungu akumtogola Ibulahimu
1Elo chilongeki kwa mbuli ya tati yetu Ibulahimu? Yeye kadahaze kuimanya mbuli ino ya kutogoligwa halongozi ha Mulungu? 2Ikawa Ibulahimu katogoligwa halongozi ha Mulungu kwa yala ayatendile, ana chint'hu cha kuigodela halongozi ha Mulungu. 3Kwavila Maandiko ya Mulungu yakulonga, “Ibulahimu kamtogola Mulungu, na Mulungu akamtogola halongozi hake.” 4Mbali mnt'hu akasank'hana maliho yake hayakuwazigwa gesa kitumetume. Ivo akulihwa vila ikulondigwa. 5Kwa mnt'hu hakusegamila nt'hendwa zake mwenyewe, yeye akumtogola Mulungu, ila akuwahalavila wabananzi zambi zawe, Mulungu akuwa kamtogola mnt'hu iyo kuwa kadamana. 6Nae Daudi kalonga mbuli ya ubwedo wa mnt'hu ila atogoligwe halongozi ha Mulungu kuwa kadamana bila kulola mbuli zake atendile, Daudi akulonga vino,
7“Nawabwede wala wasegezelwe zambi zawe, na zambi izo zihalavigwa.
8Naabwede nk'hani mnt'hu ila Mulungu hakuzikumbuka zambi zake.”
9Vino, ubwedo uno aulongile Daudi ni kwa wala wapatile ulungwana muhala? Egu na kwa wala hawanaupata ulungwana? Ena, na kwa wala hawanaupata ulungwana. Kwavila chilonga kale kuwa, “Ibulahimu katogola, na Mulungu akamtogola kuwa kadamana.” 10Vino, Ibulahimu katogoligwa na Mulungu ivoakalile hanaupata ulungwana egu ivo aupatile ulungwana? Katogoligwa na Mulungu ank'hali hanaupata ulungwana na sio ivoapatile ulungwana. 11Ibulahimu kaupata ulungwana ivochifosile chipindi icho, na ulungwana uo ukala ulagiso wa kuwa Mulungu kamtogola kuwa kadamana halongozi hake kwa ula utogozi wake akalile nao ivo akalile hanaingila ulungwana. Ivo elo, Ibulahimu kawa tata wa want'hu wose wakumtogola Mulungu hata ikawa hanaingila ulungwana, kwavila wamtogola Mulungu wakatendigwa wadamana. 12Vilavila, Ibulahimu ni tata wa wala waingilile ulungwana, mbali si kwavila waingila ulungwana bali kwavila wakukola nzila ilaila ya kutogola kwa tati yetu Ibulahimu aikolile chipindi hanaingila ulungwana.
Yalongigwe na Mulungu yakuhokelwa kwa kutogola
13Mulungu kamulongela na Ibulahimu na weleko wake kuwa isi yose naiwe yenu. Kalonga ivo si kwavila Ibulahimu katenda vila yakulonda Malagilizo ya Musa, mbali kwavila katogola na kulagisa kuwa kadamana. 14Kwavila, ikawa wakulondigwa kuhokela yala alongile Mulungu ni wala wakuyakola Malagilizo muhala, ivo kutogola nakuwe kubule mana yoyote na yala alongile Mulungu ni yauhuni. 15Kwavila Malagilizo nio yakutenda maya ya Mulungu ilawile. Mbali hant'hu kukawa kubule Malagilizo nakuwe kubule ubananzi. 16Kwa mbuli ino, yala alongile Mulungu yakulawila kwa nzila ya kutogola, ivo icho akilongile Mulungu chikulawana na ujomwa wake, ili yala ayalongile yawe ya kweli kwa want'hu wose, si kwa wala wakukola Malagilizo Muhala, mbali hamwenga na wala watogole gesa Ibulahimu. Yeye ni tati yetu chose. 17Gesavila Maandiko ya Mulungu ivo yakulonga, “Nikuika uwe tata wa want'hu wa isi nyingi.” Mbuli iyo ni kweli halongozi ha Mulungu ila Ibulahimu amtogole, Mulungu ila akuwabweleza want'hu muugima, kwa lagilizo dyake vint'hu vikalile havihali vikuwa. 18Ibulahimu katogola, ingwa mbuli yenyewe ikala ndala kutogola ili adahe kuwa tata wa isi nyingi gesa Maandiko ya Mulungu ivo yakulonga, “Weleko wako nauwe mwingi gesa nt'hondo za kuulanga.” 19Chipindi icho Ibulahimu kakala mulala wa haguhi na myaka mia, mbali kutogola kwake hakuhungukile ingawa kakala akumanya kuwa mtufi wake ukala gesa udanganika na vilavila mkake Sala kakala mgumba. 20Ibulahimu akagendelela kutogola chila achilongile Mulungu na akapata nguvu muukutogola kwake na akamwink'ha hewala Mulungu. 21Ibulahimu akamanya kuwa, kweli Mulungu akudaha kuyatenda yala alongile naamtendele. 22Ivo, kwa kutogola kwake nio kumtendile Mulungu amuone Ibulahimu kadamana halongozi hake. 23Elo, mbuli zino zikulongigwa kuwa, “Mulungu kamtogola Ibulahimu kuwa kadamana halongozi hake.” Mbuli zino haziandikwe kwaajili ya Ibulahimu muhala, 24bali vilavila mbuli zino ni zetu cheye chose chimtogole Mulungu ila ambwelezile Mndewa wetu Yesu muugima. 25Mulungu kamulava Yesu akomigwe kwaajili ya zambi chitendile na kambweleza muugima ili chidamane kwa Mulungu.
ទើបបានជ្រើសរើសហើយ៖
Walumi 4: DBV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament in Dowe @The Word for The World International and Dowe Language translation. All rights reserved.
