Yohana 3
3
Yesu na Nikodemo
1Hakala na Kilongozi imwe mchitala cha Wayahudi zina dyake Nikodemo, akalile imwe wa Mafalisayo. 2Mnt'hu iyo akamwitila Yesu ichilo na akamulongela, “Mfunza, chikumanya kuwa weye ni Mfunza utumigwe na Mulungu, kwa vila habule mnt'hu akudaha kutenda vilagiso, ikawa Mulungu hahamwenga nae.”
3Yesu akamulongela, “Hukulongela kweli, habule mnt'hu akudaha kuuona Umwene wa Mulungu ikawa hana elekwa lwa kaidi.”
4Nikodemo akamuuza, “Ikudahikaze mnt'hu mulala kwelekigwa lwa kaidi? Akudahaze kuingila mumunda wa mami yake na kwelekigwa kaidi?”
5Yesu akamulongela, “Hukulongela kweli habule Mnt'hu yoyote akudaha kuingila mu Umwene wa Mulungu ikawa haelekigwe kwa Mazi na kwa Muhe wa Mulungu. 6Mnt'hu akuelekigwa kimtufi kwa tatiyake na mamiyake, mbali akuelekigwa Kimuhe kwa Muhe wa Mulungu. 7Ivo elo usekukangawala nikakulongela ukulondigwa kwelekigwa lwa kaidi. 8Mp'heho ikuvuma na ikwita hohote aho ikulonda. Mvumo wake ukuhulikika mbali haukumanyika uko ukulawa wala uko ukwita. Vino nivo ili kwa kila mnt'hu aelekigwe kwa Muhe wa Mulungu.” 9Nikodemo akamuuza, “Mbuli zino zikudahikaze?” 10Yesu akamulongela “Weye ni mfunza mui isi ya Izilaeli, mbali naweye unk'hali hunazikombaganya mbuli zino? 11Hukulongela kweli, cheye chikuwalongela mbuli chizimanyile na chikuwalongela mbuli chizionile, mbali mweye mkuilema nt'hume yetu. 12Ikawa niwalongela mbuli za mui isi na mweye hamnitogolele, namnitogoleleze nikawalongela mbuli za kuulanga? 13Habule mnt'hu yoyote aitile kuulanga kwa Mulungu ukaleka Mwana wa Mnt'hu, atelemkile hasi kulawa kuulanga.”
14Gesa vila Musa ivo amtumbikile nyoka mumti kula kuchiwala, na Mwana wa Mnt'hu na atumbikigwe ivoivo. 15Ili kila Mnt'hu akulonda kumtogola awe na ugima wa siku zose ubule nk'homelezo. 16Kwa vila Mulungu kawabweda want'hu wa isi zose hadi akamulava Mwanake adumwenga, ili kila mnt'hu akumtogola asekwaga mbali awe na ugima wa siku zose. 17Kwa vila Mulungu hamtumile Mwanake mui isi kwiza kuwalamula want'hu kwa uhasanyi wao mbali keza kuwahonya.
18Yoyote akumtogola Mwana seke alamulwe, mbali wala hawamtogolile ao walamulwa kale, kwa vila hawamtogole Mwana adumwenga wa Mulungu. 19Dino ndo lamulo, nao lumuli wiza kwa want'hu wa mui isi, mbali want'hu wakabweda ziza kuhuma lumuli, kwa vila nt'hendwa zawe ziha. 20Kwa vila wose wakutenda ubananzi hawakubweda lumuli na hawakwiza kuna ulumuli kwa vila hawakulonda mbuli zawe zihile zimanyikane. 21Mbali ila akutenda mbuli akuzilonda Mulugu, akwiza kuna ulumuli ili nt'hendwa zake zioneke bila kufisika kuwa zitendeka kwa kumuhulika Mulungu.
Yohana Mbatizi akusimulila mbuli za Yesu
22Ivo yamalile ayo, Yesu na Wanahina wake wakaita mui isi ya Yudea, nae akakala uko kwa chipindi chidodo na kuwabatiza want'hu. 23Yohana nayo kakala akubatiza uko kuki bululu cha Ainoni, haguhi na bululu dya Salemu, kwa vila uko kukala na mazi mengi, Want'hu wakala wakumwitila uko na kubatizwa. 24Yano yalawila, Yohana ivo akalile ank'hali hanafungigwa.
25Upinzani ukalawila hagati ya Wanahina wa Yohana na Muyahudi imwe kwa mbuli ya kuisunt'ha ili kuisasali ili kumfugamalila Mulungu. 26Kamala wanahina ao wakamwitila Yohana wakamulongela “Mfunza ila mnt'hu akalile hamwenga na weye kula mwambo ya mto wa Yolidani, ila uchisimulile mbuli zake, elo akubatiza na kila mnt'hu akumwitila.” 27Yohana akawalongela, “Habule Mnt'hu akudaha kuwa na kint'hu chochote ikawa haink'higwe na Mulungu. 28Mweye wenyewe muhulika kila nikilongile kuwa nie sio Kilisito asaguligwe na Mulungu, mbali nitumigwa ili nimulongolele. 29Msola, ndo akumsola msoligwa. Mbali mbuyake msola mke ila akutimalala haguhi nae na kumtegeleza, akubweda nk'hani kuhulika ivo akulonga. Kwa sababu ya mbuli ino ubwedo wangu ulawila. 30Kilisito msaguligwa na Mulungu akulondigwa kuwa mkulu nk'hani, mbali nie hulondigwa kuhunguka kuwa mdodo.”
Mbuli za ila akwiza kulawa kuulanga kwa Mulungu
31Ila akwiza kulawa kuulanga kwa Mulungu ni mkulu kuhuma vose. Ila akulawa mui isi ni wa mui isi, na akulonga mbuli za mui isi. Mbali ila akwiza kulawa kuulanga kwa Mulungu ni mkulu kuhuma vose. 32Yeye akuwalongela want'hu yala ayaonile na kuyahulika kulawa kuulanga, mbali habule mnt'hu akuzitogola mbuli zake azilongile. 33Mnt'hu yoyote akutogola mbuli zake, iyo naalagise kuwa ayo akuyalonga Mulungu ni wa kweli. 34Ila atumigwe na Mulungu akulonga mbuli za Mulungu, kwa vila Mulungu kammemezela Muhe wake bila kumpimila. 35Tata akumbweda Mwanake na kamwink'ha vint'hu vose viwe hasi ya ukulu wake. 36Yoyote akumtogola Mwana ana ugima wa siku zose bila nk'homelezo. Mbali mnt'hu yoyote hakumtegeleza Mwana iyo sekeawe na ugima wa siku zose, mbali naasigale muna amaya ya Mulungu.
ទើបបានជ្រើសរើសហើយ៖
Yohana 3: DBV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament in Dowe @The Word for The World International and Dowe Language translation. All rights reserved.
