Oyohana 15
15
Oyesu we Efu ki Inebi Kokwokwoshi
1<<Ami we efu ki inebi ko kwokwoshi, Ada hin pi wino kyanutu la. 2Ayabo wonyonya ni yikpiye hin kweyi ya gwa lo oya yi go tonu, kweyi ayabo ni ya gwa, oya kyanutu shini ona gwa she mani. 3Akwobonu yala wase sere wa bwebe kela ni nka dala ni. 4Ala bipu hin, ami ya yipu kala mamani. Ayabo ke efu oyoye ya gege ya gwa fufunu lo, owotiri shini ona yipu ke efu ki inebi. Ala ba gege ba gwa lo owoni ala bipu hin lo.
5<<Ami wefu ki inebi, ala wa ayabo. Owoni ala bipu hin kweyi ami yipu kala, ala ba gwa nwashika, owami lalo, ala ba gege ko yojije lo. 6Owoni ala bipu hin lo, ala lema bya ayabo ni ayi go tonu kweyi efu ongmongmo, edo kayabo kefu oni aba yi kpo tukpa kweyi yola kwo. 7Owoni ala bipu hin kweyi ela hin yipu kala, ala ba doka kojoji nala ba yimu, kweyi aba ya dala. 8Omani ya wigyashi ka Ada hin, owoni ala gwa nwashika, oni ya shiyase mala wa awogbosun.
9<<Byoni Ada yimu hin ni, mamani ami yimu kala. Nabani ala bagye ipu kimu hin. 10Owoni ala geyagye do ono hin, ala ba bagye ipu ki imu hin, byoni ami geyagye do ono ka Ada hin ni kweyi nyyagye ipu kimu nu. 11Nkoza mani dala shini otushosha hin na yipu kala kweyi otushosha kala na gya. 12Ono hin yoma: Ala yimu kiyikala byoni nyyimu kala ni. 13Imu yoya oyoye shomani kelo, ni ase zo olayi nu ikweyi kawoya nu. 14Ala wawo oya hin owoni ala yoza ni nka ni. 15Nyya yala ogwu mayole kelo, ikweyi koni oyole ya gyoko ka adole lo. Abishi koni nyyala ogwu mawo oya hin, ikweyi koni nyyala gyojoji ni nfu bwebe ka Ada hin ni. 16Ala pi shun lalo, ami pi shala la kweyi ndala oko ko ya, ala ga gwa nwashika bye efu, ogwogwa ni ya rese ni. Owoni ala ya mani, Ada ya daloza kpiri ni ala doka ipu kiye hin. 17Ono hin yoma: ala yimu kiyi kala.
Ese Tela ka Awogboso Oyesu
18<<Owoni ese tela kala, ala gye ipu kotu kala mo otela hin kwobonu dala. 19Ala bi wa kese, obi ya yimu kala koni ala wakaka nu ni. Byoni owe ni, ala wa kese lalo, npa shala bwipu kese. Oza ni yese ya tela kala ni oma. 20Ala rela koza ni nka dala ni mo, <<Oyole oyoye sha adole nu lo.>> #15.20 Oyohana 13.16 Owoni adami egye, aki ba dala egye mamani. Owoni ageyagye do ozafofu hin, aki ba geyagye do ozafofu kala mamani. 21Aba yala mani ikweyi koni ala wakaka hin, ikweyi koni agyase ni tumoleho ni lo. 22Owoni nbi wa kela dawa lalo, abi ba kwuwepwo kozalabi lo. Nabani, agbawashu oyoye kota ikweyi kozalabi wa lo. 23Kpiri kase ni tela hin, otela ka Ada hin mamani. 24Owoni nbi yawoza ni ashishe ya ebibye lo ni ebe wa lalo, abi ba kwuwepwo ko ozalabi lo. Nabani ake ma kwikyikyeni atela hin, kami ka Ada hin. 25Omani ke gbodagye shini oza ni ayitota ipu ko Ono wa ni na gya mo: <<Atela hin kin, gbikweyi lo gbotu lo.#15.25 Okpa ki Igye 35.19; Okpa ki Igye 69.4
26<<Ishini ino talabo oni wa, anu ni nyya toleho bwebe ka Ada ni, Omaku kokwokwoshi ni bwebe ka Ada ni, oya yolobene ikweyi hin. 27Kweyi owotiri dala shini ala yolobene mamani, koni ala bagye kpami bwikyikyo ni.
ទើបបានជ្រើសរើសហើយ៖
Oyohana 15: ALA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
THE WORD FOR THE WORLD INTERNATIONAL, THE WORD FOR THE WORLD NIGERIA
