Oyohana 14
14
Oyesu Wowe ko Gebe ka Ada
1Oyesu ka dawa mo, <<Otu kala naka bya lo. Ala kyogwu kpo Owuso, ala ki kyogwu kpa ami mamani. 2Ole ka Ada hin gboda nwashika, owoni olemani lo, nbi ya kadala. Nyya ga kyebetu dala. 3Kweyi ishini ngga kyebe tu dala, nyya kwikye wa kpala gebe ni, shini ala ga bagye kpami ebe ni nyyanu ni. 4Ala gyowe kebe ni nyya ga ni.>>
5Otoma kadanu mo, <<Adole, aha gyebe ni oya ga ni lo, aba yamoji ome agyowe?>>
6Oyesu kyogwu mo, <<Ami wowe, nwwokwokwoshi, nwwo olayi. Ashishe ya gebe ka Ada lo, owotiri ko bwebe hin. 7Ala bi gyun kwokwoshi, ala bi ya gya Ada hin mamani. Bwanani gohobu, ala gyo kweyi ala ki mo iyi kala.>>
8Ofilibus kamo, <<Adole, shiyaha Ada, aki ba doka kojije kelo.>>
9Oyesu kamo, <<Ogyun lo Ofilibus, koni nyyagye kpala gbeji mani? Kpiri kase ni mun, oma Ada hin. Oyamoji ya mo, <<Shiyaha Ada>>? 10Ala kyogwu mami yipu ka Ada, kweyi Ada yipu hin lo? Ela ni nyya kadala nyya ka kposhu kiyun lalo. Abishi koni, Ada hin, ni yipun ni, anu pini ya yoko nu la. 11Ala totu sun ishini nka dala mun nyyipu ka Ada, kweyi Ada yipun, kwe ala totu sun ikweyi koko kigbashi ni nyya ni. 12Nyya ka dala okwokwoshi, kpiri kase ni totu sun oya yoza ni nyya ya ni. Oya ya shoza ni nyya ni, ikweyi koni nyya gebe ka Ada ni. 13Kweyi nyya yojoji ni ala doka ipu kiye hin, shini ana da Ada abokpa bwebe ko Oyi. 14Owoni ala doka kojoji ipu kiye hin, nyya ya dala.
Okoyi ko Omaku ko Owuso
15<<Owoni ala ba yimu hin, ala ba geyagye do ono hin. 16Kweyi nyya ba Ada hin, kweyi oya dala ino talabo, kowa yagye kpala ko gbogbo-gbogbo. 17Ino talabo oni wo Omaku ko okwokwoshi. Ese ya zo lo, ikweyi koni oya gege ya mo lo, oke ya gyo lo. Ala ke gyo, ikweyi koni oyo kpala ki yipu kala ni. 18Nyya shala bita byayokwu lo, nyya kwikye ya webe kala. 19Ipu kishi gbayayi gohobu, ese ba mun kelo, ala ke ba mun. Ikweyi koni nyyiyi, ala ki biyi mamani. 20Eno ni ala ba gye mo nyyipu ka Ada, kweyi ala bipu hin byoni ami yipu kala ni. 21Kpiri kase ni gyo ono hin kweyi yoko kpanu, anu pini wase ni yimu hin la. Ase ni yimu hin, Ada hin ya yimu nu kweyi ami ki ya yimu nu mamani kweyi nyya yiyun shiyanu.>>
22Ebeni Oyahuda (Iskariyoti lalo) kamo, <<Adole, ojiya ni oya yimu ko yiyo shiyaha kweyi ya yimu ko shiye ese lo?>>
23Oyesu kyogwu mo, <<Kpiri kase ni yimu hin, oya geyagye doza fofun. Ada hin ya yimu nu, kweyi aba webe nu ba wa bagye kpanu. 24Kpiri kase ni yimu hin lo, oya geyagye dozafofu hin lo. Ela ni ala pwomani wakaka hin lalo, ela ka Ada hin ni tumoleho ni la.
25<<Nka awoza mani ishini ntayayo yo kpala ni. 26Ino talabo, Omaku ko Owuso ni Ada ya toleho ipu kiye hin ni, ya wa faloza kpiri kweyi ki ya rala ojoji ni nka dala ni. 27Nshala bita kpo omene, omene hin pini ndala la. Ndala byoni ese ba dase ni lalo. Ala ka yotu kala na bya lo, ala ka yoshi lo.
28Ala pwo ni nkamo, <<Nyya shalabita, kweyi nkyi ya kwikye webe kala.>> Owoni ala bi ba yimu hin, ala bi ba shotunehe koni nyya gebe ka Ada ni, koni Ada shun. 29Nka dala nabani ome onawa gbodagye, shini ishini owa gbodagye ala ba totu sun. 30Nyya kela kpala nwa kelo, ikweyi koni ose kese mani yawa. Ogboshu ikweyi hin lo, 31oke yawa shini ese na gye mo nyya yimu ka Ada kweyi nyya yoza ni Ada zoko dami mona ya ni gyogye.
<<Ala nyiso shan ga shebe ni.
ទើបបានជ្រើសរើសហើយ៖
Oyohana 14: ALA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
THE WORD FOR THE WORLD INTERNATIONAL, THE WORD FOR THE WORLD NIGERIA
