लुका 7
7
कप्तानवइ उबिस्वास
मत्ति ८:५-१३
1येसुइ अर्मिरलाइ आउ स्यो अस्पाँर हैओवादोउ छिंङि कफर्नहुम सहरदि हिंके। 2हो सहरलाउ रोमि कप्तानवइ ओमन्काउ तुबु ओबाँदा ओजोरो राद सिनाउ ले। 3नो कप्तानवइ येसुइ ओबारेल थैकेउ। हैजैद येसुइ ङाबाँदालाइ सगराँद गयाँङाउक हैलेद नोइ मोसाइ ओनियम अस्पैन्यारलाइ येसुइ ओलेउक बिन्ति दान्या यास्परिंकेउ। 4हैजैद नो मोसाइ ओनियम अस्पैन्यार येसुइ ओलेउक राद येसुलाइ अइलेद बिन्ति दोकेर, “कप्तानवइ नकिर्पा अस्दैन्या योग्यलाउ लिज्या, 5नेलाइलेक कप्तानवइ गे यहुदि जातिर्लाइ माया दासिज्या सोनो नोइज गे यहुदिराको लागि अस्दुसिन्या झिम् जैद यानैसिउ।”
6हुकिं येसु नोरास हिंके। तर कप्तानवइ उझिम्क याकलेस्नालेक कप्तानवइ उरिजारलाइ येसुइ ओलेउक अइदाच्यो हैलेद सोर अस्परिंकेउ, “हे प्रभु, ना दुख तास्दैरैको, नेलाइकिंलेक नालाइ ङाझिम्ल रैन्या योग्यलाउ ङा ङामाले। 7नत ङाज नलेउक रान्या योग्यकाउ ङालिज्या। बरु बचन वाज अस्पाँद नयाङादिब ङाबाँदा गराँन्या ले। 8नेलाइलेक ङाब ङा भन्दा घ्यो हाकिमराइ याअधिनल लेन्या अर्मि ज। ङा ङाअधिनल ब सिपाहिर लिज्यार। ङा तुबुलाइ ‘हिंनि’ हैङादोक, हो हिंज्या, सोनो गुँलाइ ‘रैं’ हैङादोक, हो राज्या। ङा ङाबाँदालाइ ‘आउ दोको’ हैङादोक, होइ होज दाज्या।”
9कप्तानवइ अमदिउ ओस्पाँ थैद येसु छक् परिके। हैजैद ओल्सकाउ राज्याउराइ यालेउदि फर्किद हैयादोकेउ, “ङा जेलाइ हैङादाच्योज्या, अमदिउ घ्यो बिस्वास दान्या अर्मि ङा इस्राएलल ब ङामाराँथा।”
10हैजैद खबर रैज्याउ अर्मिर झिम्दि ओल्द हिंकेर, नोराइ कप्तानवइ ओबाँदालाइ गराँद ओलेउ अस्दैनाकेर।
राँदिइ ओजा जिंदो जैसिउ
11हुकिं जामावात येसु नाइन हैयादाज्याउ सहरल हिंके। येसुइ ओचेलार सोनो गुँ भ्या अर्मिर ब येसुस हिंकेर। 12येसु सहरलाउ मुल याम्वइ उनजिक ओकलेस्लेक। होतफ्याँ अर्मिराइ तुबु सिउ अर्मिलाइ गुर्द लाज्याउर लेर। हो सिउ अर्मिचाहिं तुबु राँदिवइ तुबु वाज ओजा छोरा ले। नो राँदिस सहरलाउ लेमाले अर्मिर ब हिंज्याउर लेर। 13प्रभु येसुइ नो राँदिवइ उदुख राँद नो राँदिलाइ उयुउँ नाके हैजैद हैदोकेउ, “ना तागर्नि।” 14हुकिं नजिक हिंद येसुइ नो लास लेउ बाकसलाइ छुकेउ, हैजैद मलामिर ब थप्क् च्याँकेर। येसुइ नो लासलाइ हैदोकेउ, “ए छोरा, नालाइ ङा हैङादिनिज्या, ‘सोनि’।” 15होपन्याज सिउ अर्मि सोद चुँके, सोनो होकाउ लिज्याउरास अस्पाँके। येसुइ नोलाइ ओवामाइ उजिम्मा लैकेउ।
16आउ राँद स्यो अर्मिर छक् परिद छेकेर, हैजैद परमेस्वरवइ ओमहिमा दाद हैलेकेर, “महान परमेस्वरङि अस्पाँन्या तुबु गेखार्ल रैंद ले,” सोनो “परमेस्रवइ उर्मिरलाइ बचैन्या राद ले।”
17येसुवइ हो राँदिवइ ओजा छोरालाइ जिंदो ओजौ अस्पाँ स्यो यहुदिया सोनो आखै-होकैयालाउ स्यो इलाकायाल फैलिके।
येसु सोनो बप्तिस्मा याज्याउ युहन्ना
मत्ति ११:२-१९
18युहन्नावइ ओचेलाराइ ब येसुइ ओदोउ आउ स्यो अस्पाँर युहन्नालाइ हैदोकेर। 19हुकिं युहन्नावइ जोर ओचेलानिलाइ प्रभु येसुइ ओलेउक अइदान्या यानिस्परिंकेउ, “गे आस दाद गेनौ मुक्तियान्या रान्यावाला अर्गे ख्रिस्त नाज रो? सिं गे गुँलाइ गेकलें?”
20हैजैद युहन्नावइ ओवानिस्परिंउ ओचेलानि येसुइ ओलेउक राद हैदोकिनि, “बप्तिस्मा याज्याउ युहन्नावइ, ‘गे आस दाद गेनौ मुक्तियान्या रान्यावाला अर्गे ख्रिस्त नाज रो? सिं गे गुँलाइ गेकलें?’ हैलेद अस्गेंचिं हैदाद गिंलाइ नलेउक अस्परिंनैसिउ।”
21येसुइ भ्या अर्मिरलाइ यारोग बेथाङि सोनो दुस्त आत्माराङि यासगराँकेउ, सोनो भ्या यामिं मारौंरलाइ यामिं सरैंद यायोकेउ होबेलाक ज नुनि होक कलेस्नाउ लेनि। 22येसुवइ युहन्नावइ ओचेलानिलाइ हैयानिदोकेउ, “जिं आउ जिंमिखि ज जिंराँके सोनो जिंथैके, अब हिंचिं हैजैद आउ जिंराँउ सोनो जिंथौ अस्पाँर युहन्नालाइ अइलेद हैदाचिं, यामिं माराँदुन्याराइ राँदुज्यार, कुचार अस्बाज्यार, सोनो कुरिर ब गराँलेर, बैराराइ ब यार्ना थैन्या दालेर, सोनो सिउ अर्मिर ब जिंदो जास्द लेर, हुकिं दुखि-गरिबराइ ब परमेस्वरवइ अप्चाउ ओखबर थैउ अस्दैज्यार#यसैया ३५:५-६; ६१:१। 23होसोनो आउ ब हैदाचिं ङालाइ सङ्का मादान्या अर्मि दसाज आसिस अस्दैसिउ अर्मि!”
24युहन्नावइ ओचेलानि इंओलो छिंङि येसुइ अर्मिरलाइ युहन्नावइ ओबारेल हैयादोकेउ, “सु मालेन्या पोत जे नाति जेराँनाउ? नम्मुर्वइ उहुल्लुँज्याउ चल्लाइ? 25जे नाति राँन्या जिहिउँ? सिनिं अप्चाउ क्वा कुसिउ अर्मिलाइ राँन्या? अप्चाउ-अप्चाउ क्वार कुसिन्या सोनो मोज-मजाल लेन्या अर्मिरते दरबारयाल लेर। 26दसाज हैगलेच्यो द, जे नाति राँन्या जिहिउँ? परमेस्वरङि अस्पाँन्यालाइ राँन्या जिहिउँ? दसाज ङा जेलाइ हैङादाच्यो, जे जेराँउ अर्मि परमेस्वरङि अस्पाँन्या अर्मिराङि स्योर भन्दा घ्योलाइ जेराँके। 27नेलाइलेक युहन्ना हो अर्मि ज जोइ ओबारेल परमेस्वरवइ ओबचनल अइजैद अप्सरसिउ लिज्या, ‘थैको, ङा ङाखबर लाँन्या दुतलाइ नालाइ अस्परिंन्या भन्दा बरिदि ङास्परिं, नोइज नाभन्दा बरिदि हिंद नघ्वा जैद यान्याले#मलाकि ३:१।’ 28ङा जेलाइ हैङादाच्योज्या, ‘आउ मादमिलाउ अर्मिराङि युहन्ना भन्दा घ्यो सुज माले। हुदिब परमेस्वरवइ ओराज्यल जो अर्मि स्योर भन्दा आलुजा जैसि, हो युहन्ना भन्दा ब घ्यो जास्न्या ले’।”
29हैजैद होकाउ लिज्याउ स्यो अर्मिर सोनो स्यार्मा उथैन्याराइ आउ थैद परमेस्वरवइ हैओलेउ अस्पाँ दसाज हैलेद स्विकारिकेर, नेलाइकिं नोराइ युहन्नाङि बप्तिस्मा रैसिउरलेर#मत्ति २१:३२; लुका ३:१२। 30तर फरिसि हैयादाज्याउ यहुदिर सोनो मोसाइ ओनियम अस्पैन्याराइ नोराको लागि परमेस्वरवइ ओदोउ योजनालाइ मास्विकारिद युहन्नाङि बप्तिस्मा मारैकेर।
31येसुइ हैयादोकेउ, “आउ पुस्तालाउ अर्मिरलाइ ङा नातिस ङास्गोंइते? नोर नाति मदिउ लिज्यार? 32नोर ते बजार्ल लिज्याउ आलुजा लुजा मदिउर लिज्यार। तुबुइ-तुबुलाइ, ‘गे जेको लागि बाँसुलि गेतप्के, हैजैद ब जे जेमाप्स्याके। सोनो गे दुखलाउ गित गेगैक ब जे जेमाघर्के’ हैलेद हैलेसिज्यार। 33नेलाइलेक बप्तिस्मा याज्याउ युहन्ना राके। नोइ बरेस ब माज्योकेउ सोनो अंगुरवइ ओरस माओकेउ। हैजैद जे ‘नो अर्मिलाइ भुत लागिद ले’ हैजेदाज्या। 34परमेस्वरवइ उस्परिंङाउ ङा अर्मिइ ओजा ङाराके हैजैद ङाज्योके, ङाओके, जे ङालाइ, ‘गराँच्योदाइ, तुबु खन्चुवा सोनो मात्वा, स्यार्मा उथैज्याउर सोनो पापिराइ यारिजा!’ हैजेदाँङाज्या। 35तर बुद्धि थिकज हैलेन्या अस्पाँ बुद्धि अनुसार अस्बाज्याउराइ ज सैंर।”
येसुइ व्यबिचारनि मिमाइ ओपाप छेमा दाद यासिउ
36तला फरिसि हैयादाज्याउ तुबु यहुदिवइ येसुलाइ उझिम्क काँ ज्यान्या खुल्केउ। हैजैद येसु नोइ उझिम्क काँ ज्यान्या हिंके। 37नो सहरल तुबु व्यबिचार दाज्याउ मिमा ले। नो मिमावइ येसु फरिसि हैयादाज्याउ यहुदिवइ उझिम्ल काँ ज्यान्या राद ले हैलेन्या अस्पाँ थैद, नोइ सिङ्गमरमर हैयादाज्याउ लुँङि जैसिउ तुबु बोतल्ल अप्चाउ उसरिफ लेउ मास् रैद होक राके#मत्ति २६:७; मर्कुस १४:३; युहन्ना १२:३। 38हैजैद नो मिमा येसुइ उछिंतलाँ राद येसुइ उखुँतेक च्याँद, गर्के नोइ उर्पिलवइ येसुइ उखुँ सप्च्युकेउ हैजैद ओर्ङैताउ ओचेम्वइ सिद येसुइ उखुँलाइ म्वाइ#7:38 म्वाइ:यहुदिराइ याचलन्ल स्वागत, सोनो आदर, यादोक म्वाइ दान्या याचलन ले। दोकेउ सोनो हो ओरैनौं मास् थिद योकेउ। 39येसुलाइ खुल्ज्याउ फरिसि हैयादाज्याउ यहुदिवइ आउ राँद उयुउँ-उयुउँल हैलेके, “आउ येसु परमेस्वरङि अस्पाँन्या ज किंते ओल्लाइ छुज्याउ मिमा कम्दिउ खाल्लाउ हैलेद सैंक्या नेलाइलेक आउते पापिनि चि।”
40येसुवइ नोइ उयुउँलाउ अस्पाँ सैंद हैदोकेउ, “ए सिमोन, नालाइ ङा तुबु अस्पाँ हैदान्या लिज्या।” नोइ हैदोकेउ, “गुरु ज्यु, हैलेनि।”
41हैजैद येसुइ हैदोकेउ, “तुबु साहुवइ जोर्बलै ओआसामिनि लेनि। तुबुइ पाँन सय चाँदिवइ उसिक्का सोनो तुबुइ पचास चाँदिवइ उसिक्का रिन रैसिउ लेनि। 42तर नुनि जोर्निसज रिन फुन्या निउ ओमालेउ कारन नो साहुवइ जोर्निइ इंरिन्ज माफ दाद यानियोकेउ। अब हैगलेनिद, नो जोर्मध्ये कदिउनिइ भ्या नो साहुलाइ माया दोनिते क्या?”
43सिमोनवइ हैदोकेउ, “ङा ङाबिचारल, जोइ भ्या उरिन ले होइ ज बदि माया दोक्या।” येसुइ नोलाइ हैदोकेउ, “ना थिक ज हैनलेके।” 44हैजैद नो मिमावइ ओलेउदि फर्किद येसुइ सिमोनलाइ हैदोकेउ, “आउ मिमालाइ राँको, ङा नझिम्ल ङाराके, ना ङालाइ ङाखुँ हुर्न्या रि ब नमायाँके, तर आउ मिमाइते ओर्पिलवइ ङाखुँ सुप्च्युद ओचेमवइ सिकेउ। 45ना ङालाइ म्वाइ दाद स्वागत नमादाँङाके, तर आउ मिमाइते, आक ङाराउकिंज, ङाखुँत म्वाइ दान्या मारास्थाउँ। 46ना ङार्ङैत मास् थिद नमायाँङाके, तर आउ मिमाइते ङाखुँत अप्चाउ उसरिफ रान्या मास् थिद याँकेउ। 47हैजैद ङा नालाइ हैङादिंनिज्या, आउ मिमाइ ओपाप भ्या ले। होर स्यो छेमा जास्द ले। होकारनवइ आउ मिमाइ ङालाइ भ्या माया ओदाँङाउ अस्पाँ अस्तैंद नौ। अइजैद ज जो अर्मिइ ओपाप जामा छेमा दासिउ लिज्या होइ जामा ज माया दोउ।” 48हुकिं येसुवइ नो मिमालाइ हैदोकेउ, “नपाप छेमा दाद ले।” 49होक काँ ज्यान्या चुँउ अर्मिराइ या-या हैलेकेर, “पाप छेमा दान्या आउ सु स?” 50येसुइ नो मिमालाइ हैदोकेउ, “नबिस्वासवइ नालाइ बचैद नैनिउ, अब सान्तिस हिंनि।”
ទើបបានជ្រើសរើសហើយ៖
लुका 7: MAIK
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024 (Active), Mother Tongue Translators Society and Wycliffe Bible Translators, Inc. All rights reserved.
लुका 7
7
कप्तानवइ उबिस्वास
मत्ति ८:५-१३
1येसुइ अर्मिरलाइ आउ स्यो अस्पाँर हैओवादोउ छिंङि कफर्नहुम सहरदि हिंके। 2हो सहरलाउ रोमि कप्तानवइ ओमन्काउ तुबु ओबाँदा ओजोरो राद सिनाउ ले। 3नो कप्तानवइ येसुइ ओबारेल थैकेउ। हैजैद येसुइ ङाबाँदालाइ सगराँद गयाँङाउक हैलेद नोइ मोसाइ ओनियम अस्पैन्यारलाइ येसुइ ओलेउक बिन्ति दान्या यास्परिंकेउ। 4हैजैद नो मोसाइ ओनियम अस्पैन्यार येसुइ ओलेउक राद येसुलाइ अइलेद बिन्ति दोकेर, “कप्तानवइ नकिर्पा अस्दैन्या योग्यलाउ लिज्या, 5नेलाइलेक कप्तानवइ गे यहुदि जातिर्लाइ माया दासिज्या सोनो नोइज गे यहुदिराको लागि अस्दुसिन्या झिम् जैद यानैसिउ।”
6हुकिं येसु नोरास हिंके। तर कप्तानवइ उझिम्क याकलेस्नालेक कप्तानवइ उरिजारलाइ येसुइ ओलेउक अइदाच्यो हैलेद सोर अस्परिंकेउ, “हे प्रभु, ना दुख तास्दैरैको, नेलाइकिंलेक नालाइ ङाझिम्ल रैन्या योग्यलाउ ङा ङामाले। 7नत ङाज नलेउक रान्या योग्यकाउ ङालिज्या। बरु बचन वाज अस्पाँद नयाङादिब ङाबाँदा गराँन्या ले। 8नेलाइलेक ङाब ङा भन्दा घ्यो हाकिमराइ याअधिनल लेन्या अर्मि ज। ङा ङाअधिनल ब सिपाहिर लिज्यार। ङा तुबुलाइ ‘हिंनि’ हैङादोक, हो हिंज्या, सोनो गुँलाइ ‘रैं’ हैङादोक, हो राज्या। ङा ङाबाँदालाइ ‘आउ दोको’ हैङादोक, होइ होज दाज्या।”
9कप्तानवइ अमदिउ ओस्पाँ थैद येसु छक् परिके। हैजैद ओल्सकाउ राज्याउराइ यालेउदि फर्किद हैयादोकेउ, “ङा जेलाइ हैङादाच्योज्या, अमदिउ घ्यो बिस्वास दान्या अर्मि ङा इस्राएलल ब ङामाराँथा।”
10हैजैद खबर रैज्याउ अर्मिर झिम्दि ओल्द हिंकेर, नोराइ कप्तानवइ ओबाँदालाइ गराँद ओलेउ अस्दैनाकेर।
राँदिइ ओजा जिंदो जैसिउ
11हुकिं जामावात येसु नाइन हैयादाज्याउ सहरल हिंके। येसुइ ओचेलार सोनो गुँ भ्या अर्मिर ब येसुस हिंकेर। 12येसु सहरलाउ मुल याम्वइ उनजिक ओकलेस्लेक। होतफ्याँ अर्मिराइ तुबु सिउ अर्मिलाइ गुर्द लाज्याउर लेर। हो सिउ अर्मिचाहिं तुबु राँदिवइ तुबु वाज ओजा छोरा ले। नो राँदिस सहरलाउ लेमाले अर्मिर ब हिंज्याउर लेर। 13प्रभु येसुइ नो राँदिवइ उदुख राँद नो राँदिलाइ उयुउँ नाके हैजैद हैदोकेउ, “ना तागर्नि।” 14हुकिं नजिक हिंद येसुइ नो लास लेउ बाकसलाइ छुकेउ, हैजैद मलामिर ब थप्क् च्याँकेर। येसुइ नो लासलाइ हैदोकेउ, “ए छोरा, नालाइ ङा हैङादिनिज्या, ‘सोनि’।” 15होपन्याज सिउ अर्मि सोद चुँके, सोनो होकाउ लिज्याउरास अस्पाँके। येसुइ नोलाइ ओवामाइ उजिम्मा लैकेउ।
16आउ राँद स्यो अर्मिर छक् परिद छेकेर, हैजैद परमेस्वरवइ ओमहिमा दाद हैलेकेर, “महान परमेस्वरङि अस्पाँन्या तुबु गेखार्ल रैंद ले,” सोनो “परमेस्रवइ उर्मिरलाइ बचैन्या राद ले।”
17येसुवइ हो राँदिवइ ओजा छोरालाइ जिंदो ओजौ अस्पाँ स्यो यहुदिया सोनो आखै-होकैयालाउ स्यो इलाकायाल फैलिके।
येसु सोनो बप्तिस्मा याज्याउ युहन्ना
मत्ति ११:२-१९
18युहन्नावइ ओचेलाराइ ब येसुइ ओदोउ आउ स्यो अस्पाँर युहन्नालाइ हैदोकेर। 19हुकिं युहन्नावइ जोर ओचेलानिलाइ प्रभु येसुइ ओलेउक अइदान्या यानिस्परिंकेउ, “गे आस दाद गेनौ मुक्तियान्या रान्यावाला अर्गे ख्रिस्त नाज रो? सिं गे गुँलाइ गेकलें?”
20हैजैद युहन्नावइ ओवानिस्परिंउ ओचेलानि येसुइ ओलेउक राद हैदोकिनि, “बप्तिस्मा याज्याउ युहन्नावइ, ‘गे आस दाद गेनौ मुक्तियान्या रान्यावाला अर्गे ख्रिस्त नाज रो? सिं गे गुँलाइ गेकलें?’ हैलेद अस्गेंचिं हैदाद गिंलाइ नलेउक अस्परिंनैसिउ।”
21येसुइ भ्या अर्मिरलाइ यारोग बेथाङि सोनो दुस्त आत्माराङि यासगराँकेउ, सोनो भ्या यामिं मारौंरलाइ यामिं सरैंद यायोकेउ होबेलाक ज नुनि होक कलेस्नाउ लेनि। 22येसुवइ युहन्नावइ ओचेलानिलाइ हैयानिदोकेउ, “जिं आउ जिंमिखि ज जिंराँके सोनो जिंथैके, अब हिंचिं हैजैद आउ जिंराँउ सोनो जिंथौ अस्पाँर युहन्नालाइ अइलेद हैदाचिं, यामिं माराँदुन्याराइ राँदुज्यार, कुचार अस्बाज्यार, सोनो कुरिर ब गराँलेर, बैराराइ ब यार्ना थैन्या दालेर, सोनो सिउ अर्मिर ब जिंदो जास्द लेर, हुकिं दुखि-गरिबराइ ब परमेस्वरवइ अप्चाउ ओखबर थैउ अस्दैज्यार#यसैया ३५:५-६; ६१:१। 23होसोनो आउ ब हैदाचिं ङालाइ सङ्का मादान्या अर्मि दसाज आसिस अस्दैसिउ अर्मि!”
24युहन्नावइ ओचेलानि इंओलो छिंङि येसुइ अर्मिरलाइ युहन्नावइ ओबारेल हैयादोकेउ, “सु मालेन्या पोत जे नाति जेराँनाउ? नम्मुर्वइ उहुल्लुँज्याउ चल्लाइ? 25जे नाति राँन्या जिहिउँ? सिनिं अप्चाउ क्वा कुसिउ अर्मिलाइ राँन्या? अप्चाउ-अप्चाउ क्वार कुसिन्या सोनो मोज-मजाल लेन्या अर्मिरते दरबारयाल लेर। 26दसाज हैगलेच्यो द, जे नाति राँन्या जिहिउँ? परमेस्वरङि अस्पाँन्यालाइ राँन्या जिहिउँ? दसाज ङा जेलाइ हैङादाच्यो, जे जेराँउ अर्मि परमेस्वरङि अस्पाँन्या अर्मिराङि स्योर भन्दा घ्योलाइ जेराँके। 27नेलाइलेक युहन्ना हो अर्मि ज जोइ ओबारेल परमेस्वरवइ ओबचनल अइजैद अप्सरसिउ लिज्या, ‘थैको, ङा ङाखबर लाँन्या दुतलाइ नालाइ अस्परिंन्या भन्दा बरिदि ङास्परिं, नोइज नाभन्दा बरिदि हिंद नघ्वा जैद यान्याले#मलाकि ३:१।’ 28ङा जेलाइ हैङादाच्योज्या, ‘आउ मादमिलाउ अर्मिराङि युहन्ना भन्दा घ्यो सुज माले। हुदिब परमेस्वरवइ ओराज्यल जो अर्मि स्योर भन्दा आलुजा जैसि, हो युहन्ना भन्दा ब घ्यो जास्न्या ले’।”
29हैजैद होकाउ लिज्याउ स्यो अर्मिर सोनो स्यार्मा उथैन्याराइ आउ थैद परमेस्वरवइ हैओलेउ अस्पाँ दसाज हैलेद स्विकारिकेर, नेलाइकिं नोराइ युहन्नाङि बप्तिस्मा रैसिउरलेर#मत्ति २१:३२; लुका ३:१२। 30तर फरिसि हैयादाज्याउ यहुदिर सोनो मोसाइ ओनियम अस्पैन्याराइ नोराको लागि परमेस्वरवइ ओदोउ योजनालाइ मास्विकारिद युहन्नाङि बप्तिस्मा मारैकेर।
31येसुइ हैयादोकेउ, “आउ पुस्तालाउ अर्मिरलाइ ङा नातिस ङास्गोंइते? नोर नाति मदिउ लिज्यार? 32नोर ते बजार्ल लिज्याउ आलुजा लुजा मदिउर लिज्यार। तुबुइ-तुबुलाइ, ‘गे जेको लागि बाँसुलि गेतप्के, हैजैद ब जे जेमाप्स्याके। सोनो गे दुखलाउ गित गेगैक ब जे जेमाघर्के’ हैलेद हैलेसिज्यार। 33नेलाइलेक बप्तिस्मा याज्याउ युहन्ना राके। नोइ बरेस ब माज्योकेउ सोनो अंगुरवइ ओरस माओकेउ। हैजैद जे ‘नो अर्मिलाइ भुत लागिद ले’ हैजेदाज्या। 34परमेस्वरवइ उस्परिंङाउ ङा अर्मिइ ओजा ङाराके हैजैद ङाज्योके, ङाओके, जे ङालाइ, ‘गराँच्योदाइ, तुबु खन्चुवा सोनो मात्वा, स्यार्मा उथैज्याउर सोनो पापिराइ यारिजा!’ हैजेदाँङाज्या। 35तर बुद्धि थिकज हैलेन्या अस्पाँ बुद्धि अनुसार अस्बाज्याउराइ ज सैंर।”
येसुइ व्यबिचारनि मिमाइ ओपाप छेमा दाद यासिउ
36तला फरिसि हैयादाज्याउ तुबु यहुदिवइ येसुलाइ उझिम्क काँ ज्यान्या खुल्केउ। हैजैद येसु नोइ उझिम्क काँ ज्यान्या हिंके। 37नो सहरल तुबु व्यबिचार दाज्याउ मिमा ले। नो मिमावइ येसु फरिसि हैयादाज्याउ यहुदिवइ उझिम्ल काँ ज्यान्या राद ले हैलेन्या अस्पाँ थैद, नोइ सिङ्गमरमर हैयादाज्याउ लुँङि जैसिउ तुबु बोतल्ल अप्चाउ उसरिफ लेउ मास् रैद होक राके#मत्ति २६:७; मर्कुस १४:३; युहन्ना १२:३। 38हैजैद नो मिमा येसुइ उछिंतलाँ राद येसुइ उखुँतेक च्याँद, गर्के नोइ उर्पिलवइ येसुइ उखुँ सप्च्युकेउ हैजैद ओर्ङैताउ ओचेम्वइ सिद येसुइ उखुँलाइ म्वाइ#7:38 म्वाइ:यहुदिराइ याचलन्ल स्वागत, सोनो आदर, यादोक म्वाइ दान्या याचलन ले। दोकेउ सोनो हो ओरैनौं मास् थिद योकेउ। 39येसुलाइ खुल्ज्याउ फरिसि हैयादाज्याउ यहुदिवइ आउ राँद उयुउँ-उयुउँल हैलेके, “आउ येसु परमेस्वरङि अस्पाँन्या ज किंते ओल्लाइ छुज्याउ मिमा कम्दिउ खाल्लाउ हैलेद सैंक्या नेलाइलेक आउते पापिनि चि।”
40येसुवइ नोइ उयुउँलाउ अस्पाँ सैंद हैदोकेउ, “ए सिमोन, नालाइ ङा तुबु अस्पाँ हैदान्या लिज्या।” नोइ हैदोकेउ, “गुरु ज्यु, हैलेनि।”
41हैजैद येसुइ हैदोकेउ, “तुबु साहुवइ जोर्बलै ओआसामिनि लेनि। तुबुइ पाँन सय चाँदिवइ उसिक्का सोनो तुबुइ पचास चाँदिवइ उसिक्का रिन रैसिउ लेनि। 42तर नुनि जोर्निसज रिन फुन्या निउ ओमालेउ कारन नो साहुवइ जोर्निइ इंरिन्ज माफ दाद यानियोकेउ। अब हैगलेनिद, नो जोर्मध्ये कदिउनिइ भ्या नो साहुलाइ माया दोनिते क्या?”
43सिमोनवइ हैदोकेउ, “ङा ङाबिचारल, जोइ भ्या उरिन ले होइ ज बदि माया दोक्या।” येसुइ नोलाइ हैदोकेउ, “ना थिक ज हैनलेके।” 44हैजैद नो मिमावइ ओलेउदि फर्किद येसुइ सिमोनलाइ हैदोकेउ, “आउ मिमालाइ राँको, ङा नझिम्ल ङाराके, ना ङालाइ ङाखुँ हुर्न्या रि ब नमायाँके, तर आउ मिमाइते ओर्पिलवइ ङाखुँ सुप्च्युद ओचेमवइ सिकेउ। 45ना ङालाइ म्वाइ दाद स्वागत नमादाँङाके, तर आउ मिमाइते, आक ङाराउकिंज, ङाखुँत म्वाइ दान्या मारास्थाउँ। 46ना ङार्ङैत मास् थिद नमायाँङाके, तर आउ मिमाइते ङाखुँत अप्चाउ उसरिफ रान्या मास् थिद याँकेउ। 47हैजैद ङा नालाइ हैङादिंनिज्या, आउ मिमाइ ओपाप भ्या ले। होर स्यो छेमा जास्द ले। होकारनवइ आउ मिमाइ ङालाइ भ्या माया ओदाँङाउ अस्पाँ अस्तैंद नौ। अइजैद ज जो अर्मिइ ओपाप जामा छेमा दासिउ लिज्या होइ जामा ज माया दोउ।” 48हुकिं येसुवइ नो मिमालाइ हैदोकेउ, “नपाप छेमा दाद ले।” 49होक काँ ज्यान्या चुँउ अर्मिराइ या-या हैलेकेर, “पाप छेमा दान्या आउ सु स?” 50येसुइ नो मिमालाइ हैदोकेउ, “नबिस्वासवइ नालाइ बचैद नैनिउ, अब सान्तिस हिंनि।”
ទើបបានជ្រើសរើសហើយ៖
:
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024 (Active), Mother Tongue Translators Society and Wycliffe Bible Translators, Inc. All rights reserved.