Markus 13
13
Hesus e Tapa Tawadiri Templo
(Mateus 24.1-2; Lukas 21.5-6)
1Ifiri süyeri Hesus ma räni Templo nga demarü marahara lei tabwer eda dölü, “Habauha-mo, Tanaho! Hamatahütöhüri mahori hasefadu ma iimwehar!”
2Hesus eda haüye bwa, “Hau käkäne nanapari iimwehar? E tawol defödü faadü har na ebwe miretiwo räni räniyar; urutar nga ebwe maharatiwo.”
Hamatahütöhü ma Faiini
(Mateus 24.3-14; Lukas 21.7-19)
3Hesus e maato uwawori duhuri Olibet layera e taraengari Templo nga Petrus ma James ma Yohanes ma Andres lada raho iyolor. 4La haüye bwa, “Haühamami hale wangayet mena ebwe faülüyehi marahar, nga meta mena ebwe wol bwa ebwe hannaha bwa e mori yatori na ebwe faülüyehi marahar.”
5Hesus eda haüül bwa, “Haubwe hakalihihemi söhü bwa yalemat late hatafatihemi. 6La pipiya yalematahara labwe bwitoho lada dölü bwa la hädi ramai nga larau dölü bwa, ‘Ngaangu na iiye!’ nga larau hatafatil pipiyael yalemat. 7Nga haü tawai fangiyengi na haubwe longolongo habulohosori mauri nihalepami ma titiini mauri ni taawa. Marahara ra hataingehiri na ebwe faülüyehi, nga dari na e tai nifaari na e mori bwito habwangibwengiri farüyeri yalemat. 8Farüye ra larau mauri fängääni nga farüyael king nga la buho fängääni. Ebwe üsühehi farüye wori pipiyeri farüye, nga ebwe wol rangitaari farüye. Marahar ra e weya hapurotaheri hamatahiri hafadafad.
9“Hami-mo nga haubwe hakalihihemi. Hami ra labwe dubulihemi lada hädihemi raho ifiri haddiye. Nga larau wautuhemi räni iimweri uwolongolong; ngaangu sapiri mena hau röü ddü imowael tamorü ma king hauda haüül mena e dölü Titiro Maho. 10Matamowa nga kauri Titiro Maho ebwe mori raho wori uruteri farüye. 11Nga ifiri mena labwe dubulihemi lada hädihemi raho ifiri haddiye, nga hau tawai fangiyengi hale meta na haubwe dölü; bwa niyatora nga hami ra ebwe wola ramahara haubwe dölü. Ramahara haubwe dölü ra tai ramami, bwa e bwitoho ma ifiri Ngörü Liya. 12Nga yalemat larau hataleyasiri bwidil bwa ebwe raho ifiri made, nga tamatam larau hataleyasil wonoul. Riweisi nga larau tammaü ngeriil tamael ma dirael eda sapiye madeil. 13Urutael yalemat nga larau dongahirihemi bwanasahü ngaangu. Nga dari na yalematara e hasingisingi eda ra habwangibwengir ra ebwe rru.
Hamatahütöhüri Tammaü
(Mateus 24.15-28; Lukas 21.20-24)
14“Hami ra haubwe käkäne ‘Hamatahütöhüri Tammaü’ ra ebwe ddü burukara e tai hapaüpöüri me ebwe ddü irang.” (Haubwe habaühü mere hauda nifaari!) “Ifiri mena nga marahara la mire Yudea ra labwe hilimwatahe wawoduhu. 15Yalematara e mire uwawori ungeri iimwe e tawai para bwitiwo räni iimwe bwa ebwe hädini hapitehir. 16Yalematara e mire räni maatar e tawai wehitafaari matariimwar bwa ebwe hada üffar. 17Tarapari halofalof dewa na faifire hara la niyator diyar ma faifire hara rauul e süyeri ngungu tütü labwe taraengari. 18Haü tingalowa Dios bwa e tawai faülüyehi marahara niyatori haliföüri farüye! 19Bwa hamatahütöhüri halofalof ra ebwe faülüyehi ra e tawol me dibwe hawengari ifiri-mo hapurotaher we Dios e faülü farüyeri yalemat eda tohoto meihira. Nga e tawai para faülüyehi tafaari mere. 20Nga dari na Tamorü eda mori hamosatoho lani marahara; e weya me ebwe tai faaülü mena nga e tawol yalemat re ebwe rru. Nga Tamorü e hamosatoho lani marahara ni hataingehiil yalematahara iiye e tiwereil.
21“Ke uni me yalemat ebwe hauhemi bwa, ‘Habaühü, notoho iiye Mesias!’ hale ebwe dölü bwa, ‘Habaühü, bwa neraho iiye!’, nga haü tawai hatödüye. 22Bwa marahara tai hatödüri mesias ma profeta ra larau bwitoho. Iile ra larau faülü kamarari yarüdü nga la faülüüni titiro halülüdü bwa ebwe süya bwa labwe hosowael yalemat, nga la hosowael marahara Dios e tiwereil ifiri na ebwe süya ngariil. 23Nga ira hami haubwe hakalihihemi bwa ida mori tabongari hemi uruteri faülümire ra ebwe faülüyehi imowari na ebwe faülüyehi.
Bwitohori Raüri Yalemat
(Mateus 24.29-31; Lukas 21.25-28)
24“Lanekahara, werimwiliri hamatahütöhüra e faülüyehi, nga yaaro erau losoraho ma malam nga erau tawol tirer, 25nga fidi larau mol ma retipenengi, nga ppouri retipenengi nga larau itiwou ma ürühüri yaar. 26Ifiri mena nga Raüri Yalemat erau nnahatoho ma räni manirengi nga e hada tarapari ppou ma fisiraho. 27Erau hatalilawaü lei yaar anghel lada raho räni marahara faauwa sapinengi bwa labwe hatoiyeri marahara la tiwereyahi ma ifiri Dios ma retiperi farüyeri yalemat ma urutar.
Kaü ma Ifiri Sirihetira Fig
(Mateus 24.32-35; Lukas 21.29-33)
28“Haubwe kaü na faülüri sirihetira fig. Ifiri na ebwe halawalawaraho nga e mahobuhobu laar nga e fahor saür, haü röü hüra bwa e mori halep riwarangiri bwesi farüye. 29E weya sahü mere, mena haubwe käkäneni maraha bwa e faülüyehi, haü röü hüra bwa eda mori halep yator nga e rau hapurotahe. 30Ibwe hau dewahami bwa imowari mena labwe made marahara la fada meihira nga uruteri titiro har ebwe da mori faülüyehi. 31Rangi ma masalo ra ebwe tawolaraho, nga ramai ra e tawau süya bwa ebwe tawolaraho.
E Tawol re e Hüra Laan ma Yator
(Mateus 24.36-44)
32“E tawol yalemat re e hüra hale lane meta ma yato meta na ebwe faülüyehi merer, tai anghelari weirengi, hale Raüröü; hara demarü Papa na e hüra. 33Hakalihihemi nga hau tarülüma söhü bwa hau tahüra lanera ebwe faülüyehi. 34Mere e weya faülüri mena demarü mwaare ebwe rihiti iimwar eda hatabotabo ngariil lei yaar haküröü bwa labwe uduweri uruteri mena iimwar. Eda hariye demarü ma demarü marahara yaar lei haküröü yael fitehi nga e haüye lei matarahiri hatam bwa ebwe mireri matarahi söhü. 35Haubwe mireri tarülüma sahü, bwa haü tahüra wangayet mena tamoni iimwara ebwe wehitafaari. E süye bwa ebwe nifahafi hale nuhorapari bwongi hale tabori bwongi hale nimatariyeri. 36Nga sahü nga eda bwelito sahü wehitafarir haü hakalihiye bwa e tawai welihemi ifiri yami madülü. 37Ke mena i haühemi ibwe haü dewahami ma urutemi: Haubwe hakalihihemi!”
ទើបបានជ្រើសរើសហើយ៖
Markus 13: SOV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
(Active) © Wycliffe Bible Translators, Inc. All rights reserved.