Mateus 7
7
Hau Tawai Kupeti Tammaüül Palüül
(Lukas 6.37-38, 41-42)
1“Hau tawai kupeti tammaüül palüül, bwa Dios e te kupeti tammaümi. 2Bwa Dios erau kupeti tammaümi eda we hami ra hau kupeti tammaül palüül; nga e harihemi farau hara hau hariil yalemat. 3Meta e faülü hoda habaühü töt pedi ra e mire räni matari ra bwidimu, nga ho tei hamahowa ra hapeipei ra e mire räni yaamu heer tatalof? 4E feita eda süya bwa hobwe haüya bwidimu bwa ‘Bwitoho bwa ibwe tibwetawau pedi ra e mire räni matamu’, ifiri na e mire ra hapeipei räni matamu? 5Heer lei tirobwat! Matamowar hobwe itewau ra hapeipei ma räni matamu, bwa ebwe ffat ma iyolomu yaamu tibwetawau ra töt pedi ma räni matari ra bwidimu.
6“Hau tawai hedi mara liiya hauda hariya piris, bwa iil ra labwe wehitoho lada huduhami. Nga hau tawai peitingeriil peihi sahairi dalu, bwa iil ra labwe dulu pwirini ifari hubwael.
Tingalo, Kupeti, Harese
(Lukas 11.9-13)
7“Tingalo bwa haubwe hädi, kupeti bwa haubwe weli, harese hatam bwa ebwe duhehi hataingehimi. 8Urutael yalemat hara la tingalo ra labwe hädi na yael tingalo, nga urutael marahara la kupeti nga labwe weli na la kupeti, nga yalematahara la harese hatam ra ebwe duhehi hatam hataingehiil. 9E wol ma uworumi marahara hami mwaare ra e wol raumi ra ebwe haneya raur fadu ifiri na raur ebwe tingalo faraawa? 10Hale e haneya rabuto ifiri na ebwe tingalo iih? 11Hami-mo lei tammaü, nga hau hüra na haubwe hariil raumi mara maho. Erau weya meta hohotiri mahora Papami ra e mire weirengi ebwe hariil yalemat hara la tingalowa!
12“Haubwe faülüngeriil yalemat na hau masari bwa yalemat labwe faülüngerihemi: iyer nifaari Farau we yaari Moses ma yael profeta kaü.
Hatamara e Happar
(Lukas 13.24)
13“Hau itirango räni hatamara e sausihi. Bwanasahü na hatamari farüyeriyefi ra e tarapar nga yarar ra e saurap, nga e süyafiye yael pipiyeri yalemat taühü. 14Nga ira hatamari faad ra e happar, nga yararahor nga e hamatahi yael yalemat taühü, nga e tai pipiye yalemat re la weli.
Siriheti Ma Uwaar
(Lukas 6.43-44)
15“Haubwe halihihemi ma ifil marahara dautongiri profeta ra, labwe bwitoho iyolomi nga la weya rühüri siipi nga dari na faringörüngörüül ra e weya wolf hara e masoho. 16E süye bwa ebwe ffatangari hemi hapaühüül ifiri marahara la faülüüni. E tawol kangisir ra ebwe uwa grape nga e tawau süya bwa hamalah ebwe uwa fig. 17Siriheti ra e maho, uwaar nga e maho, nga sirihetira e tammaü uwaar nga e tammaü. 18Sirihetira e maho fadar e tawau süya bwa ebwe tammaü uwaar, nga sirihetira e tammaü fadar e tawau süya bwa ebwe maho uwaar. 19Urute siriheti, nga sahü nga e tasüye ebwe maho uwaar, ebwe dopiyehi eda bwita wori yefi. 20Iyer na hannahahir nga hauda hürael marahara dautongiri profeta ifiri marahara la faülüüni.
I Tahüra Re Heer
(Lukas 13.25-27)
21“E tai urutael marahara la fadöngüngeriyei bwa ‘Tamoru, Tamoru!’ na labwe itirango uwawori Farüyeri Weirengi, har marahara labwe itirango uwawori Farüyeri Weirengi ra mahara la faaülü na Papai ra e mire weirengi e masariya bwa labwe faülü. 22Lanera Lani Haddiye nga e pipiye yalematara larau haüyei bwa ‘Tamoru, Tamoru! Hai hori iitomu haida tapa ramari Dios, nga hai hori iitomu haida harewarewawau yarüdü tammaü nga haida faülü kamarari yarüdü!’ 23Ngaangu irau haüül bwa ‘I tohürahami. Hau süya ma iyoloi, palüül yalemat tammaü!’
Liyemaru Lei Fitehiri Iimw
(Lukas 6.47-49)
24“Yalematara e hadutering ramai nga e tabweya ra e weya sahü yalematara e lepahau ra e haddüya iimwar uwawori polou. 25E uut nga e bulotahe sarü hilidi nga e palad yangi eda bungutu na iimwar, nga e tai moutiwo bwanasahü na e ddü uwawori polou.
26“Nga yalematara e longolongo maraha ramai nga e tai tabweni ra e weya sahü yalematara e buse ra e haddüya iimwar uwawori piya. 27E uut nga e bulotahe sarü hilidi nga e palad yangi eda hamaruyangari na iimwar eda moutiwo. E hamatahütöhü dewa püngütiwor.”
Ppouri Hesus
(Markus 1.22)
28Ifiri na eda bwängi yaari Hesus tapani titiro har, nga urutael marahara la towu ihira la ppari lüdüyehiri dewa ifiri marahara yaar kaü. 29Iyer ra e tai weil lei tanahori Farau, bwa iiye ra e wol ppour ifiri na yaar kaü.
ទើបបានជ្រើសរើសហើយ៖
Mateus 7: SOV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
(Active) © Wycliffe Bible Translators, Inc. All rights reserved.
