Jenadik 33
33
Yakob natèrbuk ma kelok eh Èsaw
1Nòm kerek nak Yakob ròb kewarge eh umchèb-chib ma apah Èsaw nak. Dak èn nèbchib umnak, Yakob napèdyad bok nanéh nòm jerok kelok eh Èsaw, nalèj-lãj samak 400 bèhbeh. Dak anak Yakob naꞌor ma mèn léh eh nak mujagak kuwòt rik um pimòy-pimòy: Léya samak mèn kuwòt rik eh, Rahèl samak kuwòt rik eh, bok wèh kuli rik hòj nababéy nak samak mèn kuwòt rik wèh. 2Yakob naꞌor ma wèh kuli eh nak ròb mèn kuwòt wèh muchib èn sòy, dak naꞌor ma Léya ròb mèn kuwòt eh muchib èn gagid. Dak naꞌor ma Rahèl ròb kuwòt eh Yusop wèmchib nòm yek. 3Dak rik Yakob nachèb-chib èn sòy umnak kenèmbek, dak nawèk namtèrbuk ma kelok eh Èsaw.
Èn tik nachèb-chib nak, Yakob natèd-tud tujoh kalik untok namhormad ma Èsaw, sampéy hòj tilok ma kelok eh nak. 4Tapik Èsaw nadabal ma Yakob dak nachab bok nachey ma rik nak, dak wèya-yam. 5Bil Èsaw nanéh ma kenèmbek bèꞌbok ròb mèn kuwòt umnak, rik nak natanyak, “Chok umnak rik mok samak hãk doh?”
Yakob nasaꞌod, “Yãng, umnak doh kuwòt yék. Allah hòj méj hup Eh ma yék bok naꞌog kenèmbek kuwòt idoh.”
6Dak wèh kuli bèꞌbok Yakob nak samak kuwòt wèh umlãj tilok dak umtud èn sòy Èsaw. 7Nòm kerek nak Léya ròb mèn kuwòt eh umlãj dak umtud, dak sèj-sòj eh nak Yusop ròb Rahèl wèlãj dak wètud keꞌjèk.
8Èsaw natanyak, “Ilok maksod hãk hatèrꞌèn kenèmbek chok bènleh nak hatòp, rik itèrbuk pay naꞌtèk?”
Yakob nasaꞌod, “Yãng, yék itèrꞌèn hadiah nak untok imsèrnang ma hup hãk.”
9Tapik Èsaw nachal, “Pek yéh, yék hòj ibuk harte yéh. Tok perlu lah hamꞌog milik hãh nak ma yék.”
10Yakob naseꞌëd, “Hõy! Kalòw lah hãk hòj méj hup hãh ma yék, tulong terime lah hadiah inak. Bil yék inéh ma mad hãk bok hãk habelènybãny ma yék wèl, yék igahmak iꞌadés geb — gerèk hòj inéh ma mad Allah! 11Jadik yék iseꞌëd wèl, terime lah hadiah inak. Allah nak méj geb hup Eh ma yék bok naꞌog kenèmbek rik yék iperlu.” Dak Yakob sejèkh-serajèkh nasered sampéy Èsaw naterime hadiah eh nak.
12Dak anak Èsaw nachal, “Jok lah èk èmwèk, yék akal iwèk samak nyob.”
13Tapik Yakob nachal ma rik nak, “Yãng, mèn kuwòt idoh tok baryog um muchib jerok-jerok. Bok mok keꞌjèk mèn chok bènleh yéh rik tik umterènbot ma kuwòt um. Yék haros imjagak ma umnak, kalòw èmgagek néy arik pon, kenèmbek lawok nak akal umkebes. 14Jadik, tulong pachoh lah nèng-nèng, bok yék akal isar pelènhat nòm yek nyob samak mèn chok bènleh ròb mèn kuwòt yéh, sampéy kibeleh ma tempad hãk èn Sèyir.”
15Èsaw nachal, “Nak. Tapik kalòw gerèk nak, or lah yék imperak maròp-maròp sènꞌòy untok muhoh samak hãk.”
Tapik Yakob nasaꞌod, “Halok lah, yãng. Tok payah lah. Yék hòj iꞌadés sebab hãk hòj méj hup hãh ma yék!”
16Jadik bil arik nak keꞌjèk, Èsaw nawèk namèk-mak ma Sèyir. 17Tapik Yakob nachelèk ma tempad mòy rik bekenëh Sukot. Dak èn anak nacheb dékh untok kewarge eh, bok nateꞌèl tempad hedëb untok mèn chok bènleh eh. Unak lah sebab eh umdéh tempad nak Sukot (maksod eh nak “Tempad hedëb”).
18Gerèk nak lah cherite Yakob ròb kewarge eh umjog nòm Padan-Aram ma tèk Kanaꞌan. Hòj umbeleh méj ma tèk Kanaꞌan nak, dak umdèg kémah um bok umgel tilok ma kote Sikèm. 19Dak tèk rik umgel nak Yakob nabelik nòm kewarge Hémor, apak Sikèm, hèrgak eh 100 duid pèrak.#Yos 24:32; Yoh 4:5. 20Dak èn anak Yakob nateꞌèl tempad jenamuk untok namsindol ma Allah, dak natèrjal kenëh eh Èl-Èlohé Israꞌèl, rik bemaksod “Allah nak Allah Israꞌèl.”#33:20 Hatòp nak Tuhan hòj natèrjal kenëh pay Yakob nak Israꞌèl (Jen 32:28). Nèng-nèng tòp Yakob nachal kalòw Allah namtèrmak méj ma rik nak ma tèk Kanaꞌan nak, bok Allah nak najadik Allah rik nak. Jadik puꞌdoh hòj kemën nabelakuk, dak Yakob naꞌakuk Allah nak Allah rik eh.
ទើបបានជ្រើសរើសហើយ៖
Jenadik 33: KKT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.