Jenadik 32
32
Mèn melaykat Allah umtèrbuk ma Yakob
1Dak anak Yakob ròb kewarge eh pon umsèrjèkh nèbchib um. Èn nèbchib umnak, mèn melaykat Allah umlãj umtèrbuk ma Yakob. 2Dak bil Yakob nanéh ma umnak, rik nak nachal: “Tempad doh kèm Allah!” Jadik rik nak natèrjal kenëh tempad nak Mahanayim (maksod eh nak “nar kèm”).
Yakob natèrꞌèn hadiah ma kelok eh Èsaw
3Pas nak Yakob natèrꞌèn maròp-maròp sènꞌòy muwèk nèng-nèng untok mutèrbuk ma kelok eh Èsaw. Bil nak Èsaw nagel èn pok-pok Sèyir, èn tèk Èdom. 4Yakob nachal ma umnak, “Chal lah ma kelok yéh Èsaw nak gerèk doh: ‘Yãng, kuli hãh Yakob hòj lamad nagel èn tèk jèꞌrok, samak kony kaꞌan Laban. 5Puꞌdoh rik nak hòj mok lembu, kuda kelday, kambikh biri, ròb kambikh. Bok hòj mok keꞌjèk kuli eh bèhbeh ròb bèꞌbok. Dak rik nak natèrꞌèn gah ma hãk, yãng, bok naꞌès-as hãk akal méj hup hãh ma rik nak.’”
6Jadik umnak pon umwèk, dak bil umnak hòj umlos ma Yakob, umnak umchal, “Yãng, kandék hòj kitèrbuk ma kelok hãh Èsaw. Dak puꞌdoh rik nak nachèb-chib ma doh untok namtèrbuk ma hãk, bok mok 400 bèhbeh umhoh samak rik nak!” 7Dak bil nak Yakob nagahmak natukh geb bok nasuwéh. Sebab nak Yakob napèrmòy kenèmbek sènꞌòy rik mok samak rik nak ròb kenèmbek chok bènleh eh umjadik nar kumpolan. 8Rik nak nabèdlod, “Kalòw Èsaw nalãj bok naserang ma kumpolan rik mulak nak, kumpolan rik naꞌnéy nak tik boléh muda-dok bok mutèrgos rik ma rik um.”
9Dak anak Yakob napèꞌtak, “TUHAN, Allah atak yék Abraham ròb apak yéh Isak! Hãk lah irik èr-or ma yék immak ma tèk rik yéh ròb sakèy yéh, bok hapèrhod hamteꞌèl méj ma yék. 10Yék tok behakak imterime senayèkh ròb setiye rik hòj hapèrnéh ma yék. Nèng-nèng tòp yék ilãj ma lantiw Òng Tibok Yordan doh untok imwèk ma Haran, dak mase nak yék tok iꞌèn-èn ilok-ilok pon, had ad nènchòt yéh. Tapik puꞌdoh yék hòj imèk-mak, dak mèn kewarge ròb milik yék hòj umjadik nar kumpolan rik rayak. 11Yék iseꞌëd geb, tèrgos che yék nòm kelok yéh Èsaw! Sebab yék itukh rik nak nalãj untok namserang ma yék, bok namtèrhõy ma kandék kenèmbek — bèꞌbok ròb sèdyẽd pon akal rik nak nakèrbes keꞌjèk! 12Tapik Hãk irik hòj hapèrhod hamteꞌèl méj ma yék bok hamꞌog ma yék waris rik jajéh geb gerèk pantéy èn laud, sampéy sènꞌòy tok dapad mukirak.”#Jen 22:17.
13Bil layèg eh nak Yakob naselòg èn anak. Dak is jakal eh nak Yakob nakod ènsekh nòm chok bènleh eh untok namhadiah ma Èsaw: 14200 kambikh bok, 20 kambikh beh, 200 kambikh biri bok, 20 kambikh biri beh, 1530 unta bok rik umterènbot samak kuwòt umnak keꞌjèk, 40 lembu bok, 10 lembu beh, 20 kuda kelday bok, ròb 10 kuda kelday beh. 16Dak Yakob napèrmòy mèn chok bènleh eh nak maròp-maròp penol dak naꞌog ma mèn kuli eh mujagak. Yakob naꞌor ma mèn kuli eh nak, “Éd lah mèn chok doh bok chib nèng-nèng. Tapik chib nyob lah pimòy: éd lah penol rik mulak nak muchib gèk nèng-nèng, bok penol rik gèhnih nak umsar nòm yek.” 17Dak rik nak naꞌor ma mèn kuli rik èd-éd penol rik mulak nak, bok nachal, “Bil kelok yéh Èsaw natèrbuk ma nyob, rik nak akal natanyak, ‘Chok ituwan nyob, bok ma lok nyob wèk nak? Chok milik mèn lawok doh?’ 18Dak saꞌod nyob lah, ‘Yãng, kenèmbek doh milik Yakob, kuli hãh nak. Rik nak naꞌor ma kandék kimꞌèn gerèk hadiah ma hãk. Dak Yakob irik akal nasar nòm yek kandék.’” 19-20Yakob naꞌor hal chachod nak ma mèn kuli rik èd-éd penol rik kedua, penol rik ketigak, ròb kenèmbek sènꞌòy gèhnih rik hèh-hoh nòm yek samak chok bènleh nak. Yakob nabèdlod èn kelòj hup eh, “Yék itèrꞌèn hadiah doh nèng-nèng, supaye Èsaw namsejuk hup eh. Dak bil itèrbuk jakal, yék iꞌas rik nak namterime méj ma yék.” 21Jadik Yakob natèrꞌèn hadiah eh nak lebéh nèng-nèng, kemoh layèg nak rik nak tik nagel èn tempad umbekémah nak.
Yakob ròb Allah wècha-chët, dak Allah natèrjal kenëh pay Yakob Israꞌèl
22Layèg nak keꞌjèk, Yakob najut kenèmbek kewarge eh ma lantiw Òng Tibok Yabok: wèh léh eh, wèh kuli bèꞌbok rik hòj nababéy nak, ròb 11 kuwòt eh. 23Hòj najut kewarge eh ma lantiw nak, Yakob nalos dak naꞌor ma mèn kuli eh muwèk keꞌjèk samak kenèmbek milik eh ma lantiw nak. 24Jadik Yakob nagel dèꞌrik eh.
Dak anak mok néy babeh nalãj ma Yakob, dak wècha-chët sampéy hòj nambègyug. 25Bil sènꞌòy nak nabelekh rik nak tok boléh namkèrlah ma Yakob, rik nak naketep ma chandìd Yakob sampéy chènker eh nak naꞌaléj. 26Dak babeh nak nachal, “Tèrsèk lah imwèk, is hòj nambègyug.”
Tapik Yakob nasaꞌod, “Hõy! Had kalòw Hãk hamteꞌèl méj ma yék, bok yék itèrsèk ma hãk.”
27Dak sènꞌòy nak natanyak ma rik nak, “Chok kenëh hãk?”
Rik nak nasaꞌod, “Yakob.”
28Dak sènꞌòy nak nachal, “Kenëh hãk kedak Yakob wèl. Hãk hòj hakerèdwad ma Allah bok ma sènꞌòy, dak hãk hòj hamenang. Sebab nak puꞌdoh kenëh hãk Israꞌèl.”#32:28 Israꞌèl kenëh nak chëh eh samak gerèk nèlchal kuy Ibrani rik bemaksod “kerèdwad ma Allah.” #Jen 35:10.
29Yakob nachal, “Puꞌdoh tulong oglèkh ma yék, ilok kenëh hãh?” #Pem 13:17,18.
Tapik babeh nak nasaꞌod, “Hãk tok perlu hamlèkh ma kenëh yék!” Dak anak rik nak nateꞌèl méj ma Yakob.
30Dak nòm kerek nak Yakob nachal, “Yék hòj itèrbuk ma mad Allah, bok yék tik igos!” Sebab nak rik nak natèrjal kenëh tempad nak Pèniyèl (maksod eh nak “mad Allah”). 31Bil Yakob naperak nòm Pèniyèl nak, mad is hòj nabejuray. Dak Yakob nachib kèlkejil sebab chènker èn chandìd eh hòj naꞌaléj naꞌtèk. 32Dak sebab Allah naketep ma chandìd Yakob gerèk nak, unak lah sebab eh sampéy puꞌdoh sènꞌòy Israꞌèl tok umgèy-géy séj nòm chènker èn chandìd lawok nak.
ទើបបានជ្រើសរើសហើយ៖
Jenadik 32: KKT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.