Jenadik 28
28
Isak naꞌor ma Yakob namwèk ma kewarge Ribkah
1Jadik Isak nakòw ma Yakob. Rik nak nasemany ma Allah namteꞌèl méj ma kuwòt eh nak, dak nachal ma Yakob, “Agok lah babéy ma babok èn tèk Kanaꞌan doh. 2Puꞌdoh sèbyab lah dak wèk ma dékh tak hãh Bètuèl, èn belah Padan-Aram nak. Laban, kelok amèk hãh nak, nagel èn anak. Kèk lah nòm kuwòt bèꞌbok Laban nak untok hambabéy bok namjadik léh hãk. 3Yék ipèꞌtak ma Allah Rik Paléng Bekuwase namteꞌèl méj ma hãk bok namꞌog ibuk waris hãh, sampéy hãk hamjadik apak ma ibuk kaum. 4Dak yék ipèꞌtak ma Allah namteꞌèl méj ma hãk ròb waris hãh, gerèk hòj nateꞌèl méj ma tak hãh Abraham nèng-nèng tòp. Puꞌdoh èk ègel èn anuh gerèk sènꞌòy jèꞌrok, tèk doh kedak milik èk. Tapik ma sòy bilok waris hãh akal umkod tèk doh namjadik milik umnak, tehad gerèk Allah hòj napèrhod ma Abraham.” #Jen 17:4-8. 5Dak anak Isak naꞌor ma Yakob namwèk, dak Yakob pon nawèk ma Padan-Aram, ma Laban kuwòt Bètuèl sènꞌòy Aram nak. Laban nak kelok Ribkah, amèk Yakob ròb Èsaw.
Èsaw nababéy léh pay eh nòm sakèy apak eh
6Nòm kerek nak, Èsaw nakeyòkh gerèk lok apak eh hòj nasemany ma Allah namteꞌèl méj ma Yakob wèl, bok hòj naꞌor namkèk léh eh èn belah Padan-Aram nak. Rik nak keꞌjèk nakeyòkh gerèk lok apak eh hòj nahuwok ma Yakob nambabéy ma babok èn tèk Kanaꞌan nak. 7Dak anak Èsaw nalèkh Yakob hòj nahoh ma nèrꞌor apak ròb amèk eh, bok hòj nawèk ma Padan-Aram. 8Bil nak bok Èsaw nabelekh ma apak eh Isak nak najèk ma bèꞌbok èn tèk Kanaꞌan nak. 9Sebab nak Èsaw nawèk ma akony eh Ismaꞌèl kuwòt Abraham, dak nababéy ma kuwòt babok Ismaꞌèl rik bekenëh Mahalat (babok nak pek Nebayot). Jadik Èsaw nak hòj mok tigak léh eh.
TUHAN nateꞌèl perènhod Eh samak Yakob
10Hòj nòm kerek Yakob naperak nòm Beꞌèr-Séba nak, rik nak nachèb-chib namwèk ma kote Haran. 11Bil mad is hòj najelũd, Yakob natèrgëb untok namselòg èn anak. Rik nak nakod néy batuk, dak nachekel bok naselòg. 12Dak èn nèꞌpòk eh nak rik nak nanéh tangge rik becherèndol èn bumi bok nalòy ma sorga. Dak nanéh mèn melaykat Allah umꞌòj umtaw nòm tangge nak. #Yoh 1:51. 13Dak tok-tok rik nak nanéh ma TUHAN natèd-ted èn chening eh, dak TUHAN nachal, “Yék lah TUHAN, Allah Abraham atak hãh ròb Isak apak hãh. Yék akal iꞌog tèk rik haselòg doh ma hãk ròb waris hãh. #Jen 13:14,15. 14Dak lènbéh waris hãh nak akal ibuk geb gerèk habog èn bumi doh. Umnak akal umgel beralõy ma téh ma rèh, ma kèd is bok ma sòy is. Dak nòm hãk ròb waris hãh Yék akal iteꞌèl méj ma kenèmbek kaum èn bumi. #Jen 12:3; 22:18. 15Belekh lah, Yék mok samak hãk bok ijagak ma hãk, ma lok pon hãk hawèk. Dak Yék akal iꞌéd ma hãk hamlos wèl ma tèk doh. Yék tok ipèꞌrak ma hãk sampéy hòj iteꞌèl ilok rik ipèrhod ma hãk.”
16Dak Yakob nawòg nòm sènlòg eh dak nachal, “Wah, kemën lah TUHAN mok èn tempad doh, kemoh yék tok ilèng-lèkh pon!” 17Rik nak nagahmak natukh dak nachal “Ibèlꞌih che yék ma tempad doh! Pastik Allah nagel èn tempad doh, bok èn anuh lah rèngkak ma sorga!”
18Ma is jakal eh nak, Yakob nawòg èn yèhyah tik chup. Rik nak nakod batuk rik nachekel naꞌtèk dak nabèrted batuk nak namjadik batuk berènleng. Dak rik nak nasèd binyak sayton ma batuk nak, gerèk tande tempad nak suchi, has untok TUHAN. 19Nèng-nèng tòp kenëh tempad nak Lus, tapik puꞌdoh Yakob natèrjal kenëh pay eh nak Bètèl (maksod eh nak “Dékh Allah”). 20Dak anak Yakob napèrhod bok napantakh ma Allah, “TUHAN, tulong lah mok samak yék bok jagak ma yék èn nèbchib idoh. Dak og lah che yék nèygéy untok imgéy bok nèglòg untok imlòg. 21Dak tulong éd lah yék immak méj ma dékh apak yéh. TUHAN, kalòw Hãk hatulong gerèk nak ma yék, Hãk akal hajadik Allah yék. 22Batuk berènleng rik hòj ibèrted doh akal najadik tempad untok sènꞌòy musindol ma Hãk. Dak bil hòj haꞌéd yék ilos ma doh wèl, yék akal selaluk isér kenèmbek harte rik haꞌog ma yék namjadik sepuloh, bok néy bahagian nak itèrlos iꞌog ma Hãk.”
ទើបបានជ្រើសរើសហើយ៖
Jenadik 28: KKT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.