Tènꞌèl Mèn Rasul 2
2
Ruway Kudus nalãj ma hèhoh-hèhoh Yèsus
1Bil nalòy arik Pèntakòsta,#2:1 Pèntakòsta bemaksod “arik limak puloh.” Tiyab-tiyab tawon, limak puloh arik nòm kerek arik Paskah, sènꞌòy Yahudi umsambud Raye Nègtòg umnak. Bil mase raye nak, jajéh sènꞌòy Yahudi nòm lok-lok tèk umwèk umbekumpol èn kote Yèrusalèm untok musambud arik Pèntakòsta doh. kenèmbek sènꞌòy rik umbepechaye ma Yèsus umbekumpol èn néy tempad. #Im 23:15-21; Ter 16:9-11. 2Bil umgèl-gel èn anak, tok-tok umkeyòkh mok chëh nòm sorga gerèk natehòr kelibuy. Chëh nak kuwad geb, sampéy néy dékh nak umkeyòkh. 3Pas nak kelit naꞌet bende-bende rik umnéh gerèk nachak beꞌos, dak bende nak umlãj umbekabed èn tiyab sènꞌòy èn anak. 4Dak Ruway Kudus nakuwase ma umnak kenèmbek. Bil nak keꞌjèk, nòm kuwase Ruway Kudus umnak umtekèd umbecharak kuy-kuy mòy.
5Dak bil nak mok èn Yèrusalèm jajéh sènꞌòy Yahudi rik hòj umlãj nòm lok-lok negerik èn kenèmbek bumi. Umnak sènꞌòy rik umhèh-hoh ma nènchèn Allah. 6Bil umkeyòkh chëh gerèk natehòr kelibuy naꞌtèk, sènꞌòy jajéh nak umlãj dak umbekumpol èn anak. Umnak umkèdjed bil umkeyòkh ma mèn hèhoh Yèsus umbecharak jajéh kuy nak. Dak kenèmbek sènꞌòy jajéh nak umlèkh ma nèlchal hèhoh Yèsus nak èn kelòj kuy rik umnak pimòy-pimòy. 7-8Umnak kenèmbek umbèlꞌih dak umchal, “Éh! Kenèmbek sènꞌòy rik umbecharak nak sènꞌòy Galiliya! Dak rèk lok èk èkeyòkh umnak umbecharak èn kuy èk pimòy-pimòy? 9Èk doh sènꞌòy nòm jajéh negerik: nòm Partiya, Mèdiya, Èlam, Mèsopotémiya, Yudéya, Kapadokiya, bok nòm Pòntus ròb Asia. 10Mok keꞌjèk nòm Perigiya, Pampiliya, Mesir, ròb nòm belah Libiya rik tèꞌlok ma kote Kirèné. Mok wèl rik umlèj-lãj nòm kote Roma, 11sènꞌòy Yahudi bok sènꞌòy kaum mòy rik hòj ummòj ma agama Yahudi. Mok sènꞌòy Kréta ròb sènꞌòy Arab. Tapik èk kenèmbek hòj èkeyòkh umnak umbecharak èn kuy èk pimòy-pimòy tentang tènꞌèl bekuwase rik Allah hòj nateꞌèl!” 12Dak umnak kenèmbek umbèlꞌih bok umkachéd, dak umcha-chal kaban rik um, “Ilok lah maksod eh nak?”
13Tapik mok sènꞌòy gèhnih èn anak umcherèk ma hèhoh Yèsus nak, dak umchal, “Umnak had umluwény#2:13 umluwény Tèks asli Kitab: “umnak hòj umꞌòng ibuk òng anggor.” Òng anggor nak néy jenis tudi rik sènꞌòy umteꞌèl nòm òng kebek anggor. hék!”
Pètrus naꞌèg-oglèkh Gah Méj ma sènꞌòy jajéh
14Jadik Pètrus nated samak sebelas rasul gèhnih. Dak Pètrus nachal nòm kuy kènwad eh ma sènꞌòy jajéh nak, “Kéy-kéy yék, sènꞌòy Yahudi! Mok hal yék imꞌoglèkh ma nyob. Bok kenèmbek nyob rik gèl-gel èn Yèrusalèm, keyòkh lah méj-méj! 15Puꞌdoh tik pay pukol sembilan yèhyah, bok pastik kenèmbek sènꞌòy doh kedak lah umluwény, gerèk ilok rik nyob sabok nak! 16Tapik ilok rik nyob néh is doh Allah hòj naꞌoglèkh ma Nabi Yoèl manah tòp:
17Allah nachal, ‘Bil nalòy ma jaman rik sèj-sòj nak, #Yl 2:28-32.
Yék akal iꞌog Ruway Kudus Yék ma kenèmbek sènꞌòy.
Kuwòt bèhbeh ròb kuwòt bèꞌbok nyob
akal umtèrlòy ma nyob gah nòm Yék.
Dak lèwtòw ròb bèhléh èn nyob
akal umnéh perènnéh nòm Yék.
Tèꞌtak ròb jèꞌjak èn nyob
akal umtapòk èn nèꞌpòk rik iꞌog ma umnak.
18Dak bil nak keꞌjèk, Yék pon iꞌog Ruway Yék
ma kenèmbek sènꞌòy rik hèh-hoh ma nènchèn Yék, bèhbeh ròb bèꞌbok.
Dak akal umtèrlòy gah nòm Yék.
19Yék akal ipèrnéh tènꞌèl kuwase èn balikh, èn langid.
Dak Yék iꞌog tande kuwase èn tèk, èn bumi.
Akal mok lènlòt, os, ròb yay gerèk sagub.
20Mad is akal najadik rengah,
dak gechèk akal najadik chelekh gerèk lènlòt.
Nòm kerek kenèmbek tande nak, akal nalòy Arik Tuhan rik méj-méj bok bepenting geb.
21Dak Yék, Tuhan, akal itèrgos ma kenèmbek sènꞌòy
rik hòj umkèw-kòw ma Yék untok imtèrgos ma umnak.’”
22Pètrus nachal wèl, “Kéy-kéy yék sènꞌòy Israꞌèl! Keyòkh lah ilok rik yék imchal ma nyob: Yèsus sènꞌòy Nasarèt nak kemën-kemën nòm Allah. Allah hòj napèrnéh hal nak ma nyob, sebab napakéy Yèsus untok namteꞌèl ibuk tènꞌèl ròb tande rik méj bok bekuwase èn gagid nyob. Kenèmbek nak nyob hòj nyob lèkh. 23Tapik gerèk Allah hòj naꞌampèk bok nalèkh nòm nèng-nèng tòp, nyob kèrbes ma Yèsus bil nyob og Eh ma sènꞌòy rik tok hèh-hoh ma Hukom Tuhan, supaye mupehad pakuk ma Rik Nak èn palok salib. #Mat 27:35; Mrk 15:24; Luk 23:33; Yoh 19:18. 24Tapik Allah hòj nabébas ma Yèsus nòm kuwase kènbes, jadik kènbes nak pastik tok mèk-mok namtèrhan ma Rik Nak! Dak Allah hòj natèrwòg Rik Nak nòm kènbes Eh. #Mat 28:5,6; Mrk 16:6; Luk 24:5. 25Dak nèng-nèng tòp Rajak Daud hòj naramal tentang Yèsus gerèk doh: #En 16:8-11.
‘Yék ibelekh Tuhan Allah selaluk tilok ma yék.
Yék tok iꞌèd-id, sebab Rik Nak mok samak yék.
26Sebab nak hup yék iꞌadés,
dak yék ibeꞌèh-éh nòm enadés!
Dak èn nèsgos yék doh iꞌès-as ma Hãk.
27Sebab Hãk tok hapèꞌrak ma yék
èn kelòj tempad sènꞌòy kèsbes.
Hãk tok hapèꞌrak Sènꞌòy Kudus Hãh
namsasòk èn kelòj kubor.
28Hãk hòj hapèrnéh ma yék
nòng ma nèsgos rik kènmën.
Dak yék ibeꞌadés geb
sebab Hãk mok samak yék.’”
29Pètrus nachal wèl, “Kéy-kéy yék sènꞌòy Israꞌèl, yék imchal ma nyob tèꞌlalah tentang Rajak Daud, yak dòt bej èk nak. Nanak hòj nakebes dak hòj umkep eh, dak kubor eh nak tèk-tik mok èn kote èk doh sampéy puꞌdoh. Jadik, pastik èlèkh lah nèlchal Rajak Daud naꞌtèk kedak tentang rik eh nak. 30Sebab Rajak Daud nak nabi, bok nalèkh ilok Allah hòj napèrhod ma rik eh nak. Dak Allah hòj napèrhod napantakh ma Rajak Daud néy sènꞌòy nòm waris eh nak akal najadik rajak gerèk rik Daud. #En 132:11; 2 Sam 7:12,13. 31Jadik Daud nalèkh ilok rik akal nabelakuk, dak naramal Mèsias akal nawòg nòm kènbes Eh. Daud nachal Allah tok napèꞌrak Mèsias èn tempad sènꞌòy kèsbes; dak mayad Eh akal tok nabesasòk.
32Yèsus lah rik Allah natèrwòg nòm kènbes Eh. Kandék kenèmbek hòj kinéh gah nak. 33Dak Allah hòj natayod Yèsus ma sorga, dak puꞌdoh Rik Nak nagèl-gel èn tempad paléng hormad, ènlẽng tep Allah. Gerèk Allah napèrhod, Allah Apak hòj naꞌog Ruway Kudus ma Yèsus, supaye Yèsus namꞌog Ruway Kudus nak ma kandék. Nak lah rik nyob néh bok nyob keyòkh puꞌdoh.
34Sebab Rajak Daud tok naꞌèj-òj ma sorga, tapik Daud irik chèl-chal, #En 110:1.
‘TUHAN Allah nachal ma Tuhan yék:
Gel lah èn tempad paléng hormad ènlẽng tep Yék,
35sampéy Yék imkèrlah ma sènꞌòy rik ummès-mus ma Hãk,
dak imsèrngẽny ma umnak idol èn tèk jukh Hãh.’
36Sebab nak, nyob kenèmbek sènꞌòy Israꞌèl che patod eh nak kemën-kemën nyomlèkh: yab nyob kèrbes Yèsus èn palok salib, Allah hòj najadik Eh Tuhan bok Mèsias!”
37Bil sènꞌòy jajéh nak umkeyòkh ma nèlchal Pètrus, umgahmak umsisal ma kelòj hup um. Jadik umtanyak ma Pètrus bok ròb rasul rik gèhnih, “Kéy-kéy, ilok rik kandék kimteꞌèl?”
38Pètrus nasaꞌod ma umnak, “Tiyab-tiyab sènꞌòy èn nyob haros lah perak ma dose nyob dak los wèl ma Allah! Pas nak kandék kibaptis ma nyob èn kelòj kenëh Yèsus Kristus. Dak Allah akal naꞌampon dose nyob, dak Allah naꞌog Ruway Kudus ma nyob. 39Sebab Allah napèrhod namteꞌèl kenèmbek nak untok nyob ròb waris nyob, bok untok sènꞌòy rik umgèl-gel èn tempad jèꞌrok keꞌjèk. Perènhod doh untok kenèmbek sènꞌòy rik Tuhan, Allah èk, hòj napili mulãj ma Rik Nak.”
40Kerek nak Pètrus nachèl-chal ibuk wèl ma umnak. Nanak naberèngleng bok nasèdred ma umnak, “Semany lah ma Allah namtèrgos ma nyob, supaye Allah tok nabehukom ma nyob gerèk sènꞌòy jèdhad jaman doh.”
41Mok sènꞌòy umkeyòkh ma tenènglèkh Pètrus nak bok umterime. Dak mèn rasul umbaptis ma umnak. Bil is nak, lènbéh sènꞌòy rik umpechaye nak nabetabeh kirak-kirak tigak ribuk sènꞌòy.
Chare nèsgos sènꞌòy rik pechaye ma Tuhan Yèsus
42Kenèmbek sènꞌòy rik pechaye nak umtekon umbelajar nòm tenènglèkh mèn rasul. Umnak umgos gerèk néy kewarge, dak lèjgéj umbekumpol untok mugèy-géy bok mupèꞌtak. 43Bil nak mèn rasul umteꞌèl ibuk tènꞌèl kuwase ròb tande nòm kuwase Allah, dak kenèmbek sènꞌòy umgahmak umbèlꞌih bok umhormad ma Allah. 44Kenèmbek sènꞌòy rik umpechaye lèjgéj umbekumpol, dak kenèmbek ilok rik mok èn umnak, umsa-sér kaban rik um. #Tèn 4:32-35. 45Umnak umjuwal harte rik mok èn umnak, dak umsa-sér duid nak ma chok-chok èn umnak rik naperlu. 46Tiyab-tiyab arik umnak umbekumpol èn Dékh Tuhan. Dak umnak umkòw kaban rik um untok mugèy-géy èn dékh rik umnak, dak nòm hup mènhãr umsa-sér nèygéy um bok umbeꞌadés. 47Umnak selaluk umbeꞌèhmah ma Allah. Dak kenèmbek sènꞌòy gèhnih èn anak umchèn ma hèhoh Yèsus nak. Tiyab-tiyab arik Tuhan natèrgos sènꞌòy, supaye lènbéh sènꞌòy rik umpechaye nak nabetabeh ibuk.
ទើបបានជ្រើសរើសហើយ៖
Tènꞌèl Mèn Rasul 2: KKT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.
