Tènꞌèl Mèn Rasul 1
1
Tuhan Yèsus naꞌor mèn hèhoh Eh mudèh-deh ma Ruway Kudus èn Yèrusalèm
1Yãng Tiòpilus,#Luk 1:1-4.
Èn kelòj bukuk yék rik mulak, yék hòj itulis kenèmbek hal rik Yèsus hòj nateꞌèl bok nabetènglèkh, nòm mulak 2sampéy ma arik Allah natayod Rik Nak ma sorga. Èn tèk-tik Yèsus tok naꞌèj-òj ma sorga, Ruway Kudus nakuwase ma Rik Nak, dak Yèsus naꞌor ma mèn rasul penili Eh ilok rik umnak muteꞌèl. 3Untok empad puloh arik nòm kerek naderite bok nakebes, Yèsus napèrnéh rik Eh ma rasul-rasul nak, dak nòm ibuk tande napèrnéh tèꞌlalah ma umnak Rik Nak kemën-kemën nagos. Umnak umnéh ma Rik Nak, dak Rik Nak nachal ma umnak tentang Kerajaꞌan Allah. 4Bil samak umnak, Yèsus naꞌor ma umnak, “Agok lah perak Yèrusalèm, deh lah nègꞌog rik Apak Yék hòj napèrhod. Belekh lah, Yék hòj iꞌoglèkh ma nyob nèng-nèng:#Luk 24:49. 5Yohanès nabaptis ma sènꞌòy nòm òng, tapik tok lamad wèl Allah nambaptis nyob nòm Ruway Kudus.”#Mat 3:11; Mrk 1:8; Luk 3:16; Yoh 1:33.
Yèsus naꞌòj ma sorga
6Bil mèn rasul nak umbekumpol samak Yèsus, umnak umtanyak ma Rik Nak, “Tuhan, mok ke puꞌdoh hamtèrlos kerajaꞌan kaum Israꞌèl, gerèk jènman anin tòp?”#1:6 Bil jènman Yèsus nak, mok kaum mòy (sènꞌòy Roma) rik beperintah ma tèk Israꞌèl. Sènꞌòy Israꞌèl umjèk ma kerajaꞌan Roma nak, dak umchèn muperintah ma kaum rik umnak, gerèk umteꞌèl jènman anin tòp.
7Yèsus nasaꞌod, “Had Apak hék nabekuwase nampili mase ròb is bil namtèrlos kerajaꞌan nak. Nyob tok perlu nyomlèkh lah. 8Tapik nyob akal nyob terime kuwase bil Ruway Kudus nalãj ma nyob. Dak nyob akal nyob oglèkh gah tentang Yék ma sènꞌòy èn Yèrusalèm bok èn kenèmbek negerik Yudéya, ròb Samariya, bok sampéy ma lok-lok tèk èn kenèmbek bumi.” #Mat 28:19; Mrk 16:15; Luk 24:47,48. 9Hòj sòj Yèsus nachèl-chal, Allah natayod ma Rik Nak naꞌòj ma sorga. Dak mèn rasul umnèh-néh ma Rik Nak, sampéy sagub nakub ma Rik Nak nòm nèngdakh umnak. #Mrk 16:19; Luk 24:50,51.
10Dak èn tik umnak umbelay ma langid, tok-tok kelit nar bèhbeh rik benèglòg bègyug wèted èn chening umnak. 11Dak nar melaykat nak wèchal, “Sènꞌòy Galiliya, ilok inyob tik nyob tèd-ted èn anuh bok nyob nèh-néh ma langid? Yèsus nak Allah hòj natayod nòm nyob naꞌòj ma sorga. Tapik èn lok bilok akal nyob néh Rik Nak nalãj wèl nòm sorga gerèk chare chachod rik nyob néh Rik Nak nawèk atèk.”
Mèn hèhoh Yèsus umpili chok rik namgantik Yudas
12Dak mèn rasul nak umlos ma kote Yèrusalèm nòm Pok Sayton. Jènrok nèbchib um nak kirak-kirak néy kilomiter.#1:12 néy kilomiter Tèks asli: “jènrok rik sènꞌòy Yahudi boléh chib bil Is Tenarak.” Èn adad sènꞌòy Yahudi, tok boléh muchèb-chib jerok bil Is Tenarak, sebab Allah hòj naꞌor umnak mubetarak. Umnak had boléh chèb-chib ma tempad rik tilok, kirak-kirak néy kilomiter nak. 13Hòj umbeleh ma Yèrusalèm, umnak umwèk ma dékh umnak umgel, dak umꞌòj ma tingkad balikh. Rasul-rasul nak Pètrus, Yohanès, Yakobus, Andréas, Pilipus, Tòmas, Bartoloméus, Matius, Yakobus kuwòt Alpius, Simon sènꞌòy Zèlot, ròb Yudas kuwòt Yakobus. #Mat 10:2-4; Mrk 3:16-19; Luk 6:14-16. 14Nòm néy hup umnak kenèmbek lèjgéj umbekumpol dak umbepèꞌtak. Dak mèn bèꞌbok, ròb Maria amèk Yèsus, ròb pek-pek Yèsus mok samak umnak keꞌjèk.
15Bil mase nak, mok néy arik kirak-kirak seratos dua puloh kéy-kéy rik bepechaye ma Yèsus umbekumpol. Dak Pètrus nated untok namchèl-chal ma umnak: 16“Kéy-kéy! Ilok rik natulis èn kelòj Kitab haros nabelakuk. Nèng-nèng tòp Rajak Daud hòj naramal nòm kuwase Ruway Kudus tentang Yudas, rik betilèk nòng ma sènꞌòy rik umrèn-ròt ma Yèsus. 17Tapik Yudas nak néy sènꞌòy nòm èk, sebab rik nak pon Yèsus napili supaye namkèrjak samak èk.”
18(Hatòp Yudas hòj naterime duid sebab nateꞌèl hal laꞌes nak, dak nòm duid nak nabelik tèk. Èn tèk nak, Yudas nakerèsbes rik ma rik eh, dak nakelek nakebes. Dak éj eh nacha-chèg, dak éj cheng eh nahuwòl. #Mat 27:3-8. 19Kenèmbek sènꞌòy rik umgèl-gel èn Yèrusalèm umkeyòkh ma rik nabelakuk nak. Unak lah sebab eh èn kuy rik um, umnak umtèrjal kenëh tèk nak “Akèldama,” rik bemaksod “Tèk Lènlòt.”)
20Pètrus nachal wèl, “Dak hal nak nabelakuk sebab èn kelòj kitab Enèhmah mok natulis:
‘Perak lah tempad eh nak namjadik sengẽk,
dak agok lah néy sènꞌòy pon namgel èn tempad nak.’
Dak mok natulis keꞌjèk:
‘Perak lah sènꞌòy mòy
namkod tugas eh nak.’ #En 69:26; En 109:8.
21-22Sebab nak lah èk haros èmpili néy sènꞌòy untok namgantik Yudas. Sènꞌòy nak haros lah èpili nòm sènꞌòy rik hèh-hoh samak èk bil mase Tuhan Yèsus tik mok samak èk, nòm mase Yohanès nabebaptis ma sènꞌòy sampéy lah mase Allah natayod Yèsus nòm èk naꞌòj ma sorga. Haros lah èpili sènꞌòy rik hòj nanéh Tuhan Yèsus nalos nawòg wèl nòm kènbes Eh, supaye sènꞌòy nak namkèrjak samak èk dak namꞌèg-oglèkh gah tentang Yèsus nak ma sènꞌòy mòy.” #Mat 3:16; Mrk 1:9; Luk 3:21; Mrk 16:19; Luk 24:51.
23Jadik umnak umbechadang nar sènꞌòy: Yusop, rik umkòw Barsabas (mok keꞌjèk umkòw rik nak Yustus), ròb Matias. 24-25Dak umnak umbepèꞌtak, “Yah Tuhan, Yudas hòj naperak tugas eh, dak nanak hòj nakebes dak nawèk ma tempad rik ngam untok rik nak. Hãk halèkh ma kenèmbek hup sènꞌòy. Jadik, pèrnéh lah ma kandék: èn nar sènꞌòy doh, chok rik Hãk hapili untok namgantik Yudas namjadik rasul.” 26Nòm kerek nak umnak umbeba-bes undi, dak umdapad kenëh Matias. Jadik, Matias najadik rasul samak sebelas rasul gèhnih.
ទើបបានជ្រើសរើសហើយ៖
Tènꞌèl Mèn Rasul 1: KKT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.
