Luk 14
14
Jiso chʉ́ʼ wokəyɔʼ ndəŋ Chîlɔʼkə
1Chîlɔʼbɛʼkə, ndʉʉ ndə Jiso gɛ̀ mu njaa-wokwɛʼtəŋ-bʉə-Falasi ndə məyú fɔbə, bə tʉ́ʼ shʉ̀tə ndəŋ ɔŋ kə́ kíi ɔ. 2Kə nyíɛ, wobɛʼ kə́ tə́nə bəshʉ ɔ nə ŋkoʼtəbə mbʉə-ɔ. 3Ndʉʉmɛ, Jiso bíʼtə tʉ bʉə dàhə nuʼ-Mushi ghɔŋbə bʉə-Falasi mbɔ, “Nuʼ mɛ̀ʼtə mbɔ b̈ə chʉ́ʼ wo ndəŋ Chîlɔʼkə mɛ?” 4Bɔŋ təmə bɔ̂ŋ bə̀ŋhə fɛ, ɔ lʉ̀ ɔ, chʉ́ʼ ɔ, téʼ tʉ ɔŋ ɔ gɛ̀ nə wi. 5Ndʉʉmɛ, ɔ bíʼtə mbɔ, “Bɛ nda mu bii ndə kaʼ vaa-ɛ byuunɔ mbʉʉ-i gwù mu byʉʉ ndəŋ Chîlɔʼkə, ɔ mɛ̀ʼtə ɔŋ chɔ təmə kóʼhə fɛ?” 6Təmə bɔ̂ŋ kie ŋgiekə ndə mə bə̀ŋhə fɛ.
Jiso dàhə ntɛ ndə bʉə kie ndə məlʉ̀ ŋwɔŋ-yʉə sê
7Ndʉʉ ndə Jiso nyíɛ ndə bəbɛʼbʉə ŋkɔʼnə kə́ gwè kəyəŋ-lɔŋ, kə́ séʼ bə yəŋkwɛʼtəŋbə ndə mədùʼ ndəŋ ghɔ, ɔ mɔ̀ʼ chəŋkə tʉ bɔŋ mbɔ, 8“Kaʼ wo kɔ̀ʼnə a kəyəŋ lɔŋ-ɔŋ, kə a mə gɛ̀ dùʼ ndəŋ yəŋkwɛʼtəŋkə fɛ. Ndʉʉbɛʼ ɔ kɔ̀ʼnə ibɛʼ-yə wo ndə ɔ chàa a. 9Ndʉʉ ndə ɔ bu gwè nɔ, mbʉ wo ndə ɔ kɔ̀ʼnə bii bu gwè ghɔ̀ŋ tʉ a mbɔ, ‘Kɔ́ yəŋkə-a tʉ wo-ɔ̄,’ tʉkə-a bu vyíi ndə a bu gɛ̀ dùʼ ndəŋ yəŋ-tîetîe-kə.
10 “Bɔŋ bɛ le kaʼ bə kɔ̀ʼnə a, gɛ̀ dùʼ ndəŋ yəŋ-tîetîe-kə mbɔ yi gwè wo ndə ɔ kɔ̀ʼnə aŋ gwè, ghɔ̀ŋ tʉ a mbɔ, ‘Tieŋkɔŋ-ɔŋ, gwè dùʼ kəyəŋkwɛʼtəŋ.’ Ndʉʉghɔfii, a bu kie məgʉ́ə bəshʉ bʉə ndə bii bɔŋ dùʼ mɔʼɔ. 11Bʉʼka mbɔ wotəmiyɔŋ ndə ɔ kóʼhə ŋwɔŋ-ɛŋ ghɔʼ bu nyíɛ ŋwɔŋ-ɛŋ sê, bɔŋ wotəmiyɔŋ ndə ɔ shúʼhə ŋwɔŋ-ɛŋ sê, bə bu kóʼhə ɔŋ ghɔʼ.”
12Jiso kíahə ŋwɔŋ-ɛŋ tʉ wo ndə ɔ kɔ̀ʼnə ɔŋ, ghɔ̀ŋ tʉ ɔŋ mbɔ, “Kaʼ a kə́ tíi bʉə ndə fɔyubə ndʉʉsɛŋkə byuunɔ ndʉʉnəchî, kə a mə tíi bətieŋkɔŋ-ba fɛ byuunɔ bəliŋ-ba byuunɔ bʉə-kəlɔŋ-bii fɛ byuunɔ bʉə-kətoʼ-ba ndə bɔ̂ŋ kie kyʉə fɛ, təmə bɔ̂ŋ bu leʼ kɔ̀ʼnə aŋ ghɔ ndə məlɔ̀ʼ ŋkwo-a. 13Kaʼ bɔŋ bɛ le a kie nchəŋtə, ä kɔ̀ʼnə bʉə-kəbyuu, bəlɛŋ, bəŋkwɛʼfʉəŋ, bəfʉ̀əŋtəshʉ, 14nə yɔŋ-yə, Nyii bu bìʼ a bʉʼka mbɔ bɔ̂ŋ kie fɔkə ndə məlɔ̀ʼ a chɔ fɛ. A bu yi kie lɔʼɔbə-a hə kəghɔ-Nyii ndʉʉ ndə bʉə-Nyii ndə bɔ̂ŋ bɛ ndyʉndyʉ bu bʉ̀nə kóʼ.”
Chəŋ-nchəŋtəkwɛʼtəŋ-kə
(Matia 22:1-10)
15Ndʉʉ ndə mbyu wobɛʼ ndə ghɔŋ bɔŋ dùʼ ndəŋ tebele mɔʼɔ kə yʉ́ yɔ̄ŋ-yə, ɔ ghɔ̀ŋ tʉ Jiso mbɔ, “Tʉʉjyu nɔ bɛ yi-wo-yə ndə ɔ kwó bele ntoʼ-Nyii.”
16Jiso ghɔ̀ŋ tʉ ɔŋ mbɔ, “Wobɛʼ nɔ nə kie nchəŋtəkwɛʼtəŋ, kɔ̀ʼnə bʉə buŋmbi. 17Ndʉʉ mbʉ nchəŋtə kʉ̂ʉ kʉ̀ʼnə, ɔ tə́ŋ vaafɔ̀ʼ-ɛ ndə məgɛ̀ gìe tʉ bʉə ndə bə kə kɔ̀ʼnə bɔŋ mbɔ, ‘B̈ii gwè, bə nɔʼ shʉ̀tə nubə liʼ.’ 18Bɔŋ bɔ̂ŋ bənchəŋ chʉ́ʉhə məmɔ̀ʼ nubə sê. Fəŋ ghɔ̀ŋ mbɔ, ‘Mɔ nɔʼ nyúɔ tɔ̂kə, mɔ nɔ kie ndə məgɛ̀ lɛ́nə. Mɔ nɔ tʉʼ fʉ̀ʉtə a mbɔ ä mɛ̀ʼtə mɔ gɛ̀.’ 19Ibɛʼyə ghɔ̀ŋ mbɔ, ‘Mɔ nɔʼ nyúɔ bie-bəmbʉʉ-hə itaa, mɔ kie ndə məgɛ̀ lɛ́nə bɔŋ, mɔ nɔ tʉʼ fʉ̀ʉtə a mbɔ ä mɛ̀ʼtə mɔ gɛ̀ lɛ́nə bɔŋ.’ 20Ibɛʼyə ghɔ̀ŋ mbɔ, ‘Mɔ nɔ bíe chìi lɔŋ-ɔŋ chìi, mɔ mə gwè fɛ.’
21 “Ndʉʉmɛ, mbʉ vaafɔ̀ʼ bʉ̀nə gwè fʉ̀ʼtə nubə-ɔ̄ŋ tʉ tiefɔʼ-ɛ. Tʉʉ mbʉ tiefɔʼ-ɛ byʉ́ʼ, ɔ ghɔ̀ŋ tʉ ɔŋ mbɔ, ‘Fyú gɛ̀ nəndʉʉnəndʉʉ ndəŋ fia-tyúunə-tə ghɔŋbə vâatəfia mu kəyəŋkwɛʼtəŋ, gɛ̀ gwè nə bʉə-mbʉʼ, bəlɛŋ, bəfʉ̀əŋtəshʉ leʼnə bəŋkwɛʼfʉəŋ.’ 22Mbʉ vaafɔ̀ʼ ghɔ̀ŋ mbɔ, ‘Tiefɔʼ-ɔ, nukə ndə a kàhə bə nɔʼ kə chìi, yəŋbə bɔŋ kə́ bíe.’ 23Mbʉ tiefɔ̀ʼ ghɔ̀ŋ tʉ vaafɔ̀ʼ-ɛ mbɔ, ‘Fyú gɛ̀ mu fia-tyúunəkwɛʼtəŋ-tə ghɔŋbə lɔ̂ŋ-lɔʼɔ-tə, gɛ̀ kwɛ̀ŋhə bʉə bɔ̂ŋ gwè ŋíi mu njaa-ɔ lə́ŋ. 24M̈ɔ shyíi bii mbɔ mbyu wo mu fəŋ-bʉə-tə ndə mɔ kə kɔ̀ʼnə kʉʉ leʼ yúotə fɔbə-ɔŋ fɛ.’ ”
Lɔʼɔbə ndə məgɛ̀ hə bɔ̌ŋ Jiso
(Matia 10:37-38)
25Buŋmbi nuɔ-bʉə-tə kə́ gɛ̀ hə bɔ̌ŋ Jiso, ɔ kíahə ŋwɔŋ-ɛŋ ghɔ̀ŋ tʉ bɔŋ mbɔ, 26“Kaʼ wotəmiyɔŋ kə́ gwè hə bɔ̌ŋ mɔ, təmə bàa tie-e, bàa ŋkwê-i, bàa vi-i, bàa vâa-bi, bàa bəliŋ-bi tə buŋ kɔmə yi-yə ŋwɔŋ ghɔ fɛ, ɔ mə kʉ̀ʼnə ndə məbɛ vaafɔ̀ʼ-ɔ fɛ. 27Wotəmiyɔŋ ndə ɔ gòʼ təmə bɛ̀ʼ tyʉntɔɔnəkə-i, gwè hə bɔ̌ŋ mɔ fɛ, kʉ̀ʼnə ndə məbɛ vaafɔ̀ʼ-ɔ fɛ.
28 “Bɛ nda mu bii ndə ɔ kʉ̀ʉ ndə məbɔ́ŋ ŋkwê njaa təmə fəŋ dùʼ sê kwɔ̀ʼtə ntyʉʉ bəfɔ ndə i bu gɛ̀ chɔ, nyíɛ mbɔ ɔ kie fɔkə ndə məlìʼ mbʉ fɔʼɔ chɔ mɛ? 29Byuunɔ, təmə ndʉʉ ndə ɔ bu yiesê-e liʼ, mùutə ndə məmìʼtə mbʉ fɔʼɔ kəŋkaa nɔ, bʉə bənchəŋ ndə bɔ̂ŋ nyíɛ bu kə́ dʉ̀ʉhə ɔŋ, 30kə́ ghɔ̀ŋ mbɔ, ‘Wo-ɔ̄ chʉ́ʉhə məbɔ́ŋ njaa mùutə ndə məmìʼtə kəŋkaa.’
31 “Byuunɔ, bɛ yɔ̂ŋ-yə fɔŋ ndə ɔ tʉʼ gɛ̀ ŋíi ibɛʼ-yə fɔŋ nə chɔ̂ bu gòʼ təmə dùʼ sê bínə mbɔ kaʼ ɔ lʉ̀ ŋkɔŋ-bʉə-hə wuŋ kə́ gɛ̀ nə yɔ̄ŋ-yə tʉ wo ndə ɔ kie ŋkɔŋ-bʉə-hə wuŋ bûu, ɔ̈ yú mɛ? 32Kaʼ bɔŋ byuunɔ, ɔ chóʼ bʉə, tə́ŋ tʉ ibɛʼ-yə ɔ kə bíe dɔdɔ, bɔ̂ŋ fʉ̀ʉtə ɔŋ mbɔ ɔ̈ ghʉ́əhə fyii-i. 33Ndʉʉmɛ, wo mu bii ndə ɔ kʉ̀ʉ ndə məbɛ vaafɔ̀ʼ-ɔ nɔ kie ndə məyɔ̀ʼ ghɔkə-i ndə fɔbə inchəŋ ndə ɔ kie.
Chʉəʼ ndə i nɔʼ bɛ́ məsʉ́ʼnə-i
(Matia 5:13; Mak 9:50)
34 “Chʉəʼ nɔ bʉ̀ʉ, bɔŋ kaʼ məsʉ́ʼnə-i mì, bə chìi təka i bu bʉ̀nə kə́ sʉ́ʼnə? 35I leʼ kie nubɛʼkə ndə məchìi mu kəchɔʼ fɛ, byuunɔ ndə məbɛ ŋkwoŋkwo fɛ. Bə mɛ̀ʼ. Wotəmiyɔŋ ndə ɔ kie tyunəkə ndə məyʉ́, ɔ̈ yʉ́.”
ទើបបានជ្រើសរើសហើយ៖
Luk 14: bvm
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.
