Enzimäine Moisein kirju 26
26
Isakku da Revekka Geraras
1Muah tuli nälgy, kui oli enne, Avraaman aigua. Isakku lähti Gerarah, filistiläzien suarin Avimelehan luo. 2Ižändy jiäviihes Isakale da sanoi: «Älä mene Jegiptah, a elä sit muas, kuduan Minä sinule ozutan. 3Liiku sie, a Minä olen sinunke da hyvitän sinuu. Minä täytän sanan, kuduan annoin sinun tuatale Avraamale, annan kai nämä muat sinule da sinun jälgeläzile. 4Minä annan sinule muga äijän jälgelästy, ga hyö ollah gu taivahan tiähtet, i annan heile kaiken tämän muan. Hyvitys, kuduan suajah sinun jälgeläzet, rodieu hyvityksenny kaikile muailman rahvahile, 5sikse gu Avraam kuuli Minun iänen da noudi kaikes Minun nevvoloi, Minun käskylöi, Minun zakonoi.» 6Muga Isakku jäi elämäh Gerarah.
7Sen kohtan eläjät kyzyttih Revekkas, hänen akas, häi vastai: «Häi on minun sizär.» Häi ei ruohtinuh sanuo, gu Revekka on hänen akku, häi varai gu miehet tapetah händy sendäh, gu Revekka oli ylen čoma. 8Konzu hyö jo hätken sie elettih, filistiläzien suari Avimeleh kačahtih ikkunah da nägi, kui Isakku sebäili omua akkua Revekkua. 9Häi kučui Isakan da sanoi hänele: «Häihäi on sinun akku! Mikse sinä sanoit, buito häi on sinun sizär?» Isakku vastai: «Minä varain, gu minuu tapetah hänen täh.» 10«Midä sinä luajiit meile? A ku kentahto meigäläzis muannus sinun akanke? Mittuine riähky olis meijän piäl sinun täh!» – sanoi Avimeleh. 11Sit Avimeleh sanoi omale rahvahale: «Jogahine, ken koskou tädä miesty libo hänen akkua, roih tapettu.»
12Isakku kylvi pelduo sit muas i yhtenny vuvven sai sadakerdazen ozru-uudizen. Muga hyvitti händy Ižändy. 13I rodih suurekse se ristikanzu, hänele suitui eluo enämbi da enämbi i rodih häi ylen bohattu. 14Nygöi hänel oli äijy lammastu da kozua, lehmiä, äijy kyndömuadu. Filistiläzet ruvettih kadehtimah händy. 15Hyö salvattih da täytettih mual kai kaivot, kuduat jo hänen tuatan Avraaman aigua kaivettih Avraaman käskyläzet, 16i sit Avimeleh sanoi Isakale: «Mene iäre meis, sinä rodiittos äijiä vägevembäkse meidy.»
17Isakku lähti siepäi da pystytti omat stuanut Geraran jogimuah da rubei elämäh sie. 18Sie häi uvvessah kaivatti net kaivot, kuduat oli luajittu Avraaman, hänen tuatan, aigua, i kuduat filistiläzet salvattih Avraaman, hänen tuatan, kuoltuu. Häi nimitti net kaivot niil samazil nimil, kudualoil nimitti net hänen tuatto Avraam.
19Isakan orjat kaivettih Geraran jogimuas i löyttih sie viennouzemu. 20No Geraran paimoit ruvettih kiistämäh Isakan paimoloinke da sanottih: «Vezi on meijän!» Häi andoi kaivole nimen Esek (kiistu), sikse gu sie oli kiistu. 21Konzu Isakku meni toizeh kohtah, kaivettih toine kaivo. Sitgi oli kiistu, i häi andoi sille nimen Sitna (riidu). 22Häi lähti siepäi i kaivoi vie yhten kaivon, kuduas jo ei olluh kiistua, i pani sille nimen Rehovof (vällys). Isakku sanoi: «Nygöi Ižändy andoi meile äijän välliä, i meidy rodieu äijy mual.»
Jumalan uskalmo
23Sit Isakku meni Virsavieh. 24Sinä yön jiäviihes hänele Ižändy da sanoi: «Minä olen Avraaman, sinun tuatan Jumal. Älä varua, Minä olen sinunke. Minä hyvitän sinuu, Minä annan sinule äijän jälgelästy. Minä luajin sen [sinun tuatan] Avraaman, Minun orjan, täh.» 25Isakku luadii sinne altarin da moliihes Ižändäle. Häi luadii sinne stuanut, a hänen orjat kaivettih kaivo [Geraran jogimuah].
Sobu Avimelehanke
26Juuri sih aigah Isakan luo tuli Geraraspäi Avimeleh oman nevvonandajan Ahuzafanke da torapiälikön Fiholanke. 27«Mikse työ tulitto tänne?» kyzyi Isakku, «Työhäi etto suvainnuh minuu, ajoitto iäre!» 28«Myö näimmö, Ižändy on sinunke», sanottih hyö, «sikse tahtommo, gu meijän välil olis sanal lujendettu sobu. 29Anna sana, gu et luaji meile pahua. Emmohäi ni myö sinule luadinuh nimidä pahua, vai hyviä, annoimmo sinule lähtie rauhas, a nygöi sinunke on Ižändän hyvitys!» 30Isakku luadii heile stolan, i hyö syödih da juodih. 31Huondeksel hyö annettih sana toine toizele. Sit Isakku prostiihes heijänke, i net lähtiettih. Hyö erottih hyväs sovus.
32Juuri sinny päivänny käskyläzet, kuduat kaivettih kaivuo, tuodih Isakale viesti, gu hyö löyttih vezisuoni. 33Isakku andoi kaivole nimen Šiva (annettu sana). Siepäi tuli linnan nimi Beeršiva [Virsavii], se nimi on tänäpäigi.
Isuavan akat
34Konzu Isuavale oli nellikymmen vuottu, häi otti akakse Jegudifan, hettalazen Beerin tyttären, da Vasemafan, hettalazen Elonan tyttären. 35Hyö tuodih Isakale da Revekkale äijän pahua mieldy.
ទើបបានជ្រើសរើសហើយ៖
Enzimäine Moisein kirju 26: LIVVI
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
(c) Biblienkiännändyinstituuttu, Helsinki 2003