Genèse 35
35
1Nè Nzapa to oui̱ne hè Jacob, ègui̱: Mè kilingo̱ne, mè danga di Béthel mè, mè o̱ di sèn’a mè; mè tosso bambossi hè Nzapa nè pa mè po‐ouichi no mè you nè jo‐oui ko‐mè Ésaü hi. 2Nè Jacob to oui̱ne ho ouili ko toa k’è o, do ba doko ino‐o do a hi, ègui̱: Ènè kara gui̱li̱ nzapa nè bo̱bo̱’nè‐o hi dida, ènè jolo tè’nè‐o, ènè para toulou k’ènè‐o. 3Alè kilingo̱ne, alè chi di Béthel mè; ho‐m’ tosso bambossi sèn’a hi hè Nzapa, nè sènè do‐m’ nè po‐ouichi nè na ouichi pa no‐m’, no‐m’ yara nè hi. 4Ndo ouo̱ kara ba doko gui̱li̱ nzapa ko‐ouo̱‐o dè mo‐pi‐zèlè ouo̱‐o nè oli, ouo̱ ha hè Jacob. Nè Jacob kara mo no‐o, you nè houssou gounou ba di̱ngguè ti, nè hèdè nè Sichem hi. 5Kè ola hi, ndo ouo̱ chi o. Nè kili Nzapa gbè ouo̱‐o ouinè houlou pa sènè ba doko sarli̱ no‐o nè hèdè nè ka to ouo̱‐o hi, nè ma pome tè kodaka oui̱ne nèno pata bi̱‐oui‐ouili kè Jacob nè. 6Nè Jacob, do ouino‐o d’è hi, nèno ma di Luz, nè nè Béthel, sènè nou Canaan hi mè. 7N’a tosso bambossi sèn’a hi pome, n’a é yini oloyar’a hi nè El‐Béthel; nèdaka nè nè oloyar’a hi nomo nè Nzapa pa n’a, n’a you nè nè jo‐oui ko‐a hi. 8Nè Débora, nè nè ouiko‐dara Rebecca hi, k’a fiè; ndo ouo̱ goun’a dido̱ Béthel, nè gounou ba di̱ngguè ti ndo ouo̱ iè yin’a nè ba ti hélikoa o hi.
9Nè Nzapa pa Jacob da, n’a jiki nè té a Paddan‐Aram mè hi, a é démo jou a. 10Nè Nzapa to oui̱ne h’a, ègui̱: Yini mè nè Jacob; so ouo̱ tè sa mbé yini mè da nè Jacob go, yini mè nè Israël. N’a é mbé yin’a nè Israël. 11Nè Nzapa to oui̱ne h’a da, ègui̱: Mi nè Nzapa ngaïli‐nè‐oli. Mè ko bi̱me, mè dèlè; mè tè ko dèlè nouli̱ o ouinè, no mè ho mè tè ko o oui‐dè‐ouane o bo. 12Mi tè ha nou no‐m’ ha hè Abraham dè Isaac hi ho mè, mi ha nou hi bo ho bala‐pata bi̱ no‐mè o. 13Kè Nzapa nè jou a dingo̱ne oloyar’a n’a to nè oui̱ne d‐è do a hi. 14Nè Jacob tosso mo‐ba‐tè‐da oloyar’a nè Nzapa toa nè oui̱ne do a hi, mo‐ba‐tè‐da hi nè ta, n’a bara li, a a jou a, n’a a no̱ jou a. 15Nè Jacob é yini yar’a nè Nzapa toa nè oui̱ne do a sènè hi nè Béthel. 16Ndo ouo̱ doungou Béthel hi guènè chi, kè o̱yèlè dè Éphrata nè, nè zan Rachel chi guènè him’a oui̱ne ko bi̱me. 17Nè zan gata té a sènè ko bi̱me hi; nè ouiko‐ba‐koulo hi to oui̱ne h’a, ègui̱: Mè ya dè kili nè, nèdaka no mè kouo nè bi̱‐oui‐ouili da! 18Nè té a ara nèdaka n’a hèdè dè fia sa hi, n’a é yini bi̱ b‐è hi nè Ben‐Oni; nè sème ko‐a bo é yin’a nè Benjamin. 19Nè Rachel fi, ndo ouo̱ goun’a nè liouara Éphrata, nè nè Bethléhem hi. 20Nè Jacob tosso mo‐ba‐tè‐da jito fi’a: nè nè mo‐ba‐tè‐da sènè jito‐fio Rachel, nomo nè mono hi iyaaa kè bô nè sossoè. 21Nè Israël raka guènè nèno; k’a raka Migdal‐Éder hi, n’a yara toa‐tente. 22Kè Israël hè o̱nou sènè nou hi, nè Ruben o̱ dè Bilha, boyouali kè sème k’è hi. Nè Israël zili oui̱ne d‐a.
Bi̱‐oui‐ouili kè Jacob o nè oli boua‐pome‐nè‐joua‐litou. 23Bi̱‐oui‐ouili kè Léa: nè Ruben, nè nè ka‐bi̱me kè Jacob hi, dè Siméon, dè Lévi, dè Juda, dè Issacar, dè Zabulon. Nè Bi̱‐oui‐ouili bè Rachel: 24nè Joseph dé Benjamin. 25Nè bi̱‐oui‐ouili bè Bilha, ouiko‐tome kè Rachel hi: nè Dan dè Nephthali. 26Nè bi̱‐oui‐ouili bè Zilpa, ouiko‐tome kè Léa hi: nè Gad dè Aser. Ouo̱‐o nè oli nè bi̱‐oui‐ouili kè Jacob, n’è kouo Paddan‐Aram hi. 27Nè Jacob pi̱li, ma da sème k’è Isaac, sènè nou Mamré, sarli̱ Kirjath‐Arba, nè nè Hébron, nè Abraham dè Isaac oa sènè siti hi. 28Kè pè Isaac pèlè pome nè boua‐pakana. 29Nè olo mo n’a bèlè nè sa nè hi, kè dan’a hè ho zane, n’a fi, ndo ouo̱ b’a di pata ouili ko‐a o mè, nè Ésaü dè Jacob, bi̱‐oui‐ouili ko‐a hi, goun’a.
ទើបបានជ្រើសរើសហើយ៖
Genèse 35: GBANU
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Published by the British and Foreign Bible Society 1932-1939