Genèse 34
34
1Nè Dina, bi̱‐ouiko kè Léa, n’è kouo dè Jacob hi, ho zane guènè joko o bi̱‐ouiko o sènè nou hi. 2Nè Sichem, bi̱‐oui‐ouili kè Hamor, prince sènè nou hi, jok’a. N’a b’a, a o̱ do a, k’a nang’a. 3Sèl’a mono tè Dina, bi̱‐ouiko da Jacob hi; a koa bi̱‐ouiko k‐è hi ouinè, k’a to nè dé oui̱ne do a. 4Nè Sichem to hè Hamor, sème k’è, ègui̱: Mè ha bi̱‐ouiko k‐è nè ko ho‐m’. 5Nè Jacob zili oui̱ne d‐a n’a nanga nè Dina, bi̱‐ouiko da k‐a hi; ko bi̱‐oui‐ouili da k‐a o mono sènè fo o mè do daïli da k‐a o, nè Jacob pama oui̱ne d‐è zème iyaaa ouo̱ pi̱li o sè. 6Nè Hamor, sème kè Sichem, tèno di ka tè Jacob nè guènè to oui̱ne do a. 7Ko bi̱‐oui‐ouili kè Jacob o pi̱li sènè fo o mè, ko ouo̱ zili da oui̱ne mo hi; nè ba di̱ngguè hou‐sèlè danga zan ouo̱‐o, nèdaka nè Sichem déè ba di̱ngguè namo dè Israël, oui̱ne o̱ dè bi̱‐ouiko kè Jacob, nè oui dè mo dè go hi. 8Nè Hamor to oui̱ne ho‐ouo̱‐o hègo, ègui̱: Sèlè Sichem, bi̱‐oui‐ouili ko‐m’, o̱ di tè bi̱‐ouiko k’ènè‐o iè; mi koa ènè h’a o h’a nè ko. 9Ènè nèno o dè’lè; ènè ha o bi̱‐ouiko k’ènè‐o hè’lè, n’ènè ba o bi̱‐ouiko bè’lè o. 10N’ènè dè li̱ dè’lè o, kè nou déè k’ènè‐o; n’ènè o̱ o sèn’a, n’ènè dè mo pa k’ènè‐o. 11Nè Sichem to hè sème do jo‐oui kè Dina o, ègui̱: O̱nemo ènè joko‐m’ dé li’nè‐o ouinè, no mi ha mo n’ènè tè bi̱ ho‐m’ o hi. 12Ènè bi̱ ngangga boli ko dè matabissi ouinè o ho‐m’, no mi ha mo no n’ènè tè bi̱ o ho mi hi; n’ènè koda oui̱ne bi̱‐ouiko k‐è nè ko ho‐m’. 13Ndo bi̱‐oui‐ouili da Jacob o pikifi oui̱ne nè mo‐yobo Sichem dè Hamor, sème ko‐a hi, nèdaka nè Sichem nanga Dina, yan‐boko ouo̱‐o hi. 14Ndo ouo̱ pikifiè o h’a, ègui̱: Nè mo pome nd’alè oui dè déa go, oui̱ne ha yan‐boko’lè hè oui‐ouili pome nè tè gono ndara‐tè‐mourou t’è nè hi; kè déè mo fôyô kè’lè. 15Alè tè dè mo hèmo n’ènè koa nè o higo go, h’ènè o̱ o hè èlè go sè, ho ba doko oui‐ouili o bo̱’nè‐o hi gono ndara‐tè‐mourou lo‐o sè. 16Sè k’alè ha bi̱‐ouiko kè’lè o h’ènè‐o, sè k’alè kara k’ènè‐o o bo nè kè’lè o; sè k’alè o̱ d’ènè‐o, nd’alè to a‐jou‐ma dè nouli̱ pome‐iè. 17K’ènè ko zili oui̱ne kè’lè o oui̱ne gono ndara‐tè‐mourou’nè‐o nè, h’alè ba bi̱‐ouiko kè’lè, alè chi nè. 18Nè oui̱ne d‐è da ouo̱‐o hi ha dèssa hè Hamor dè Sichem, bi̱‐oui‐ouili k’è hi. 19Nè boulou‐bi̱ b‐è hi tè tili t’è oui̱ne dè mo hi nè, nèdaka n’a koa bi̱‐ouiko kè Jacob. Ndo ba doko ouili o nè oli jok’a li lo‐o diouinè gana ko ma koliè o ko toa kè sème ko‐a o hi. 20Nè Hamor dè Sichem, bi̱‐oui‐ouili k’è hi, ho o di nou mama‐ki̱ne di̱, ouo̱ to oui̱ne o hègo ho ouili sarli̱ hi, ègui: 21Alè joko ouino‐o ou‐è ko‐ouo̱ dièouinè; ko ouo̱ o̱ nè nou sènè nou h‐è, ko ouo̱ dè nè tome; pèssè nou ouiè do ouo̱‐o. Nd’alè kara bi̱ ndo ouo̱‐o nè ko, nd’alè ha bi̱‐ouiko bè’lè ho ouo̱‐o. 22So ouino‐o ou‐è koa oui̱ne dè li̱ dè’lè o, oui̱ne dè nouli̱ pome‐iè, nè ouara to ba doko oui‐ouili bo̱’lè o nè oli gono ndara‐tè‐mourou lo‐o, hèmo ndo ouo̱ gono nè ndara‐tè‐mourou tè bo‐ouo̱‐o nè to ouo̱‐o higo. 23O ba doko nda da ouo̱‐o, do démo ko‐ouo̱‐o, do daïli ko‐ouo̱‐o nè oli, bènè mo kè’lè go ndi? Alè koda oui̱ne ko‐ouo‐o̱ pome‐iè, ho ouo̱ mono dè’lè o. 24Ndo ba doko ino‐o nè téèno di nou mama‐ki̱ne nè hi nè oli, zili oui̱ne nou Hamor dè Sichem, bi̱‐oui‐ouili k’è hi; ndo ba doko oui‐ouili o nè oli gono ndara‐tè‐mourou lo‐o, ndo ba doko ino‐o nè téèno bè yolo nou mama‐ki̱ne o hi. 25Nè zè tara, ndo ouo̱ himi nè o ouinè hi, nè bi̱‐oui‐ouili kè Jacob o litou, nè Siméon dè Lévi, nè nè yan Dina hi, ndo ouo̱ kara ba‐pa to ouo̱‐o, ouo̱ a nou o nou mama‐ki̱ne, ndo ouaïli li̱ o li̱nggui, ègui̱: Olo piè o no̱ ouo̱ hi, ndo ouo̱ gbè ba doko o oui‐ouili o nè oli. 26Ndo ouo̱ gbè Hamor, dè bi̱‐oui‐ouili k’è Sichem bo, nè ba‐pa; ndo ouo̱ mbo Dina ko toa da Sichem, ouo̱ ho nè. 27Ndo bi̱‐oui‐ouili da Jacob o nèngo̱ne, lô jou fio o hi, mboulou sarli̱ hi, nèdaka ndo ouo̱ nanga yan‐boko ouo̱‐o. 28Ndo ouo̱ kara badoua da ouo̱‐o, do nda o, do tolofou o, ndo ba doko ino‐o nè sarli̱ dè sènè fo hi nè oli; 29ndo ouo̱ kara ndo ba doko mo‐dèmè da ouo̱‐o hi, do bi̱me o, do ko o, do ba doko mo ko toa ndo ouo̱ pa o hi nè oli. 30Nè Jacob to oui̱ne hè Siméon dè Lévi, ègui̱: Ènè nanga‐m’ o sa, nèda’nè‐o nomo ndo ouino‐o nè o̱ sènè nou h‐è, nè ndo Cananéen o, do Phérésien o, joko no‐m’ li lo‐o dinè hi. O doko ouili bo‐m’ o guèda‐iè; ouo̱ to o di‐jou‐ma oui̱ne dèmo do‐m’ o, ko ouo̱ tè gbè‐m’ do ouili ko toa ko‐m’ o nè oli. 31Ndo ouo̱ pikifiè o, ègui̱: Sè é ho ouo̱ noukoulou nè yan‐boko’lè hèmo n’a o̱ nè hè ouiko‐nè‐yama higo ndi?
ទើបបានជ្រើសរើសហើយ៖
Genèse 34: GBANU
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Published by the British and Foreign Bible Society 1932-1939