ရှင်လုကာ 17
17
ခန်း (၁၇)
ကိုယ်တော်ယေရှုဟ အပြစ်၊ ယုံကြည်မှု န တာဝန်ကြောဝိုသန်ကြားပေးခြင်း
1အဲနော့ ကိုယ်တော်ယေရှုဟ သူ့ရဲ့ဗြိတော်ဒွေဝို “လူဒွေဟ ဘုရားရှင်ဝို နာခံမှုမှေ့ဘဲအော် ခြားလူဒွေဝို ဖျားယော်သွီးဆော်မှာဟ သေးချာဘဲ့ဖြစ်ရယ်။ အယ်ဘေမဲ့ လူဒွေဝို ပြစ်ကျူးလွန်အော် စေ့ဇပ်လှုံ့ဆော်ဝို သူဒွေဟလဲ ဆင်းရဲဒုက္ခဂီးန ကြုံတွီ့ရလိမယ်ဖြစ်ရယ်။ 2သူများဝို ပြစ်ဒုဇရိုက် ကျူးလွန်စေမဲ့စား ကိုယ့်လည်ဘန်းဝိုကိုယ် ကြိုးဂွမ်းစွပ် ကလော့တုံးဆွဲပီး ပမ်လယ်ထဲဝို ခူခလလိုက်ဇာဟ ပိုကောမယ်။ 3အဲဂျော့ နန်းနို့လဲ ဒိထားဂေ့ပါ။
ဂယ်ရိ ယုံကြည်သူချင်းချင်း ပြစ်ခုခုလုပ်ခီ သူ့ဝိုဆုံးမဂေ့ပါ။ သူနော်ဒရရယ်ဆိုဝါ သူ့ဝို ခွမ့်လွှတ်ဂေ့ပါ။ 4သူဟ နန့်ဝို နေ့ဒဲမှာ ခုနှေ့ခါပြစ်မှားပေမဲ့ သူပြစ်မှားဝိုခီတိုင်း လာပီး ပလန်တောဘန်ရယ်ဆိုဝါ သူ့ဝို ခွမ့်လွှတ်လိုက်ပါ” ဆိုပီး ဗြိဒွေဝို ပြောပြရယ်။
ယုံကြည်ခြင်း
5အဲခါ သာဝကဒွေဟ ကိုယ်တော်ဝို “ကျနော်ဒို့ရဲ့ ယုံကြည်ခြင်းစိဝို တိုးပွားစေတော်မူပါ” ဆိုပီး ရှော့တံလေရယ်။
6ကိုယ်တော်ဟလဲ “ဂယ်ရိ နန့်ရဲ့ယုံကြည်ခြင်းဟ မုညင်းဇေ့လော့ရှေ့ရယ်ဆိုဝါ အယ်မိုပိုးစာပမ်ဝို မလစ်ပါ ကျွတ်ထွက်ပီး ပမ်လယ်မှာ ပေါ့ပါစေ ဆိုပီး ပြောရယ်ဆိုဝါ အဲမိုတိုင်း ဖြစ်လိမယ်။”
7ကိုယ်တော်ယေရှုဟ ဆစ်ပီး “နန့်စေခံဟ လယ်ထွန်ရာဟဖြစ်စေ၊ သိုးထီးရာဟဖြစ်စေ ပလန်ရော့လာဝိုခါမှာ ‘လာ၊ ဘွဲမှာ ခါဒဲ ဝမ်ပီးစားလိုက်’ ဆိုပီး ပြောမှာလော။ 8အဲမိုစား နန်ဟ ‘ငါ့တွက် ညစ်ဇာ ပြင်ဆင်ရားပါ၊ ပီးရယ်ဆိုဝါ ငါစားသော့နေခီမှာ သပ်သပ်ရပ်ရပ် ဝတ်ဆင်ရားပါ၊ ငါစားရိပီးရားခီမှ နန်စားသော့ပါ’ ဆိုပီး ပြောလိမယ်ဖြစ်ရယ်။ 9နန်စေခိုင်းဝိုလုပ်ဝို လုပ်ဆော်ပေးဝို သခင်ရဲ့စေခံဝို နန်ကျေးဇူးတံစရာကြော ဟဲမျိုးနည်းနမှ မှေ့ရ။ 10အဲမိုမျိုးဘဲ့ နန်းနို့ဝို ခိုင်းရားဝိုလုပ်ဒွေဝို နန်းနို့လုပ်ဆော်ပီးဝိုခါမှာ ‘ကျနော်ဒို့ဟ သာမန်စေပါးဒွေဘဲ့ ဖြစ်ပီး လုပ်သင့်လုပ်ထိုက်ဇာဝို လုပ်ခဲ့ဇာဖြစ်ပါရယ်’ ဆိုပီး ပြောဂေ့ပါ” ဆိုပီး မိတော်မူလေရယ်။
နာဂီးရောဂါသည် ဆယ်ယော့ဝို ကိုယ်တော်ယေရှုကုသပေးခြင်း
11အဲနော့ ကိုယ်တော်ယေရှုဟ ဂျေရုဆလင်ဗြို့ဝို ခရီးသွားခီမှာ ရှမာရိပြည်န ဂါလိလဲပြည်ကြားရှေ့ နယ်ဇပ်ဂျားဝို ဖြတ်သန်းသွားလေရယ်။ 12ကိုယ်တော်ဟ ဝါထဲ ဝမ်ခါနီးမှာ နူနာစွဲနေဝို လူဆယ်ယော့#17.12 နူနာစွဲနေဝို လူဆယ်ယော့ သူ့နို့ဟ ပယ်ခံဖြစ်ရယ်။ မောရှေပညတ်ကျမ်းအရ သူ့နို့ဟ လူဒွေန ဝီးဝီးနေရပီး ထိရိမရရ။ဟ ကိုယ်တော့်ဆီဝိုလာပီး ဆီးကြိုဂေ့လေရယ်။ သူ့နို့ဟ ကိုယ်တော်ယေရှု န ခပ်ဝီးဝီးမှာ ရပ်နေဂေ့လေရယ်။ 13“ကိုယ်တော်ယေရှု၊ အရှင် ကျနော်ဒို့ဝို နားတော်မူပါ” ဆိုပီး ကလယ်လော်ဝိုသံန အော်ဟစ်ဂေ့လေရယ်။ 14ကိုယ်တော်ယေရှုဟ လှမ်းကေ့ပီး “ပုရောဟိတ်ဒွေဆီမှာ နန်းနို့ ခန္ဓာကိုယ်ဝို သွားပြလိုက်ပါ” ဆိုပီး မိတော်မူခဲ့ပီး သူ့နို့သွားနေခီမှာဘဲ့ သူ့နို့ရဲ့ နူနာရောဂါဟ ပျော့ကမ်းသွားလေရယ်။
15သူ့နို့ထဲဟ ယော့ဟ နာရောဂါပျော့ကမ်းရားဇာဝို သိန ကိုယ်တော်ယေရှုဆီဝို ပလန်လှည့်လာပီး ကလယ်လော်ဝိုသံန ဘုရားရှင်ဝို ဂုဏ်တံပီး ကျေးဇူးတော်ဝို ချီးမွမ်းလေရယ်။ 16အဲနော့ သူဟ ကိုယ်တော်ယေရှုရှေ့ ခေရင်းမှာ ဒူးထော့ဦးညွှတ်ပီး ကိုယ်တော်ဝို ကျေးဇူးတံဂါးပြောလေရယ်၊ သူဟ ရှမာရိလူမျိုးတစ်ယော့ဖြစ်လေရယ်။
17ကိုယ်တော်ယေရှုဟ “လူဆယ်ယော့လုံး ရောဂါပျော့ကမ်းသွားဇာ မုဝလော၊ ကျန်ကိုးယော့ဟ ဟယ်မှာနူး” ဆိုပီး မေးမြန်းတော်မူလေရယ်။ 18“ဘုရားရှင်ဝို ချီးမွမ်းဝို့ ပလန်လာဇာဟ အယ်မိုလူမျိုးခြားရှမာရိဟနေလွှဲပီး ခြားလူမှေ့ဟလော” ဆိုပီး မေးတော်မူပီး 19အဲမို ရှမာရိပြည်သားဝို “ထပီးသွားပါလော့၊ သင်ဟ ငါ့ဝို ယုံကြည်ရိတွက်ဂျော့ သင့်ရဲ့ နာရောဂါ ပျော့ကမ်းသွားပါပီ” ဆိုပီး မိတော်မူလေရယ်။
ဘုရားရှင်ရဲ့သာသနာတော် ကြွလာတော်မူခြင်း
20တစ်နေ့ ဘုရားရှင်သာသနာတော် ရော့ရှေ့လာမယ့်ခီဝို ဖာရိရှဲချို့ဟ ကိုယ်တော်ယေရှုဝို မေးမြန်းခဲ့ရယ်၊ ကိုယ်တော်ယေရှုဟ သူ့နို့ဝို “ဘုရားရှင်သာသနာတော်ဟ နန်းနို့ရဲ့မျစ်စိန ဗြင်နိုင်ဘဲဝို လမ်းဟနေ လာနေပီဖြစ်ရယ်” ဆိုပီး မိတော်မူလေရယ်။ 21“ဘုရားရှင်သာသနာတော်ဟ နန်းနို့မျစ်စိန ဗြင်နိုင်ဘဲဝို လမ်းဟနေ လာနေပီဖြစ်ရိတွက်ဂျော့ ‘ကေ့ပါ အဲနေရာမှာ ဟိုနေရာမှာ’ ဆိုပီး ဟဲသူဟမှ ပြောနိုင်လိမယ်မုဝ။ ကေ့ဂေ့ပါ၊ ဘုရားရှင်သာသနာတော်ဟ နန်းနို့ထဲမှာ ရှေ့နေပီဖြစ်ရယ်။” ဆိုပီး မိတော်မူလေရယ်။
22အဲနော့ ကိုယ်တော်ဟ ဗြိတော်ဒို့ဝို ပြောရယ်၊ “ငါ လူ့သားတော် အုပ်ချုပ်မဲ့နေ့ဝို နန်းနို့ဗြင်ချင်ဒဲ့ခီ ရော့လာမှာဖြစ်ရယ်။ အယ်ဘေမဲ့ အဲမိုနေ့ဝို နန်းနို့ဗြင်ရမှာမုဝ” ဆိုပီး မိတော်မူလေရယ်။ 23လူဒွေဟ နန်းနို့ဝို “အဲမှာရှေ့ရယ် ဟိုမှာရှေ့ရယ်” ဆိုပီးပြောရင် သူ့နို့နော့ဝိုလိုက်ရားပါန ။ 24ကောကံတစ်ဖက်ဟနေ ခြားတစ်ဖက်ဆီ လျှပ်စီးလက်ခီမှာ ထွက်ပေါ်လာဝို လမ်းရော်မျိုးဘဲ့ ငါလူ့သားတော်ဟ သူ့ရဲ့နေရစ်မှာ ရှေ့စေလိမယ်။ 25အယ်ဘေမဲ့ အဲမျိုးမဖြစ်ခံမှာ ရင်ဆုံး လူ့သားတော်ဟ ဝေဒနာဒွေဝို ခံစားရမယ်၊ အဲလူမျိုးဆစ် ငြင်းပယ်ဇာဝိုလည်း ခံရလိမယ်ဖြစ်ရယ်။
26နောဧလက်ထပ်#17.26 နောဧလက်ထပ် ရေကီးပီး သူ့နို့ဗြို့ဖျစ်ဆီးခံရဝိုခါမှာ ဘုရားရှင်ဟ နောဧ န သူ့မိသားဇုဝို ကယ်ခဲ့ရယ်။မှာ ဖြစ်ပျစ်ခဲ့ဝို ရေကီးဇာန မကြုံခံဒူးဟ လူဒွေပြုမူနေထိုင်ရားဝိုမျိုး ငါ လူ့သားတော် ပလန်ကြွလာဝို့ခီ မတိုင်ခံမှာလဲ လူဒွေဟ စဒူးဟတိုင်း ပြုမူနေထိုင်ဂေ့လိမယ်ဖြစ်ရယ်။ 27အဲမိုခီဒူးဟ လူဒွေဟ သူ့နို့လုပ်နေဂျတိုင်း စားလိုက်၊ သော့လိုက်၊ လက်ထပ်ထီးမြားလိုက် နေထိုင်ခဲ့ဂေ့ရယ်။ နောဧဟ သူဆော့ရားဝို သန်းဖောထဲဝို ဝမ်ဝိုနေ့မတိုင်ခံထိ သူ့နို့ဟ အဲမိုတိုင်းဘဲ့ ဆစ်ပီး နေနေဂေ့ရယ်၊ အဲနော့ ရုတ်တရစ် ရေကီးလာရိ သူ့နို့ဂူလုံး ရေမလုပ်ပီး သေဂေ့လေရယ်။
28အဲမိုမျိုးဘဲ့ လောတ#17.28 လောတ ဘုရားရှင်ဟ သောဒုံ န ဂေါမောရဗြို့ဝို ဖျစ်ဆီးဝိုခါမှာ လောတ န သူ့မိသားဇုဝို ကယ်တံခဲ့လေရယ်။လက်ထက်မှာမျိုးဘဲ့ သောဒုံဗြို့ဟ လူဒွေဟ စားသော့လိုက်၊ ဈေးဝယ်လိုက်၊ ရောခလလိုက်၊ စိုက်ပျိုးလိုက်၊ အီဆော့လိုက် လုပ်နေဂေ့ရယ်။ 29အယ်ဘေမဲ့ လောတဟ သောဒုံဗြို့ဟထွက်ဝိုနေ့မှာ လော်ကျွမ်းနေဝိုမီးဟ ကောကံဟနေကလပီး သူ့နို့ဂူလုံးဝို ဖျစ်ဆီးပစ်မယ်ဖြစ်ရယ်။
30ငါလူ့သားတော်ဟ မျှော်လင့်ရားဘဲန ရုတ်တရစ် နော့တခါ ပလန်ကြွလာခါမှာ အဲမျိုး ဖြစ်ပျစ်လိမယ်ဖြစ်ရယ်။ 31အဲမိုဖြစ်ပျစ်ဝိုခီမှာ အီခေါ်မိုးပေါ်မှာ ရှေ့နေဝိုလူဟ အီထဲဟ ပစ္စည်းဥစ္စာဒွေဝို ယူဝို့တွက် ဆင်းလာန၊ လယ်ထဲဝိုရော့နေဝိုသူဟလည်း ပစ္စည်းဒွေယူဝို့ အီမပလန်န။ 32လောတရဲ့ဇနီး#17.32 လောတရဲ့ဇနီး လောတလက်ထပ်ဒူးဟ လောတရဲ့ဇနီး န သူ့မီးဟ သောဒုံဗြို့ဟနေ ထွက်ပလေးဝိုခါမှာ၊ လောတရဲ့ဇနီးဟ သောဒုံဗြို့ဝို လှည့်ကေ့လိုက်ရိတွက်ဂျော့ ချင့်ချင်းသေပြီး ဆားခဲ ဖြစ်ဝိုပလောဝါးရယ်။ ဟဲရာဖြစ်ရားနူးဆိုဇာဝို ဒိရဂေ့ပါ။ 33မိမိသက်ဝို ကယ်တံဝို့တွက် ကြိုးစားအားထုသူဟာ သက်ဆုံးရှုံးဂေ့ရလိမယ် ဖြစ်ပီး၊ သက်ဆုံးရှုံးဂေ့ရဝိုသူဒွေဟ ကယ်တံဇာခံဂေ့ရလိမယ်ဖြစ်ရယ်။ 34ငါပြောပြမယ်၊ ညစ်တညစ်မှာ လူနှေ့ယော့ဟ အိယာခုဒဲမှာ အိနေဂေ့ပီး ယော့ဝို ခေါ်ရားပီး ယော့ဟလဲ ကျန်ရစ်ရလိမယ်။ 35အဲမိုမှာ ကော့နှံဘားကလိ မျိုးမီးနှေ့ယော့ရှေ့ပီး ယော့ဝို ခေါ်ရားပီး ယော့ဝိုလောဝါ ထားရစ်လိမယ်။ 36လယ်ဂွမ်းပလန်မှာ လူနှေ့ယော့ရှေ့ပီး ယော့ဝို ခေါ်ဆော်ရားပီး ယော့ဟ ချန်ထားဇာခံရလိမယ်ဖြစ်ရယ်#17.36 လယ်ဂွမ်းပလန်မှာ လူနှေ့ယော့ရှေ့ပီး ယော့ဝို ခေါ်ဆော်ရားပီး ယော့ဟ ချန်ထားဇာခံရလိမယ်ဖြစ်ရယ် အယ်မိုစာပိုဒ်ဟ ချို့စောပိုင်းလက်ရေးမူကျမ်းဒွေမှာ ပါရ။။
37အဲန ဗြိတော်ဒွေဟ ကိုယ်တော်ဝို “အဲမျိုးဇာဒွေဟ ဟဲမျိုးရှေ့ဝိုရပ်မှာ အဲမျိုးဖြစ်ဝို့နူး” ဆိုပီး မေးရှော့ဂေ့လိုက်ခီမှာ ကိုယ်တော်ဟ သူ့နို့ဝို “သေဂေါ်ရှေ့ဝိုနေရာမှာ လဒဒွေ စုဝေးဂေ့လိမယ်” ဆိုပီး မိတော်မူလေရယ်။
ទើបបានជ្រើសរើសហើយ៖
ရှင်လုကာ 17: TVN
គំនូសចំណាំ
ចែករំលែក
ចម្លង

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Dawei (ထားဝယ်) Bible by Beyond Translation is licensed under Creative Commons Attribution-ShareAlike 4.0 License.