Mark 2
2
Jisu boyasanw hamrwkha
(Mothi 9:1-8; Luk 5:17-26)
1Salnwi saltham tongwi Jisu arwbw Kophornahumw thangkha. Bw nugw tongw hinwi borogrok khanakha. 2Ephugw orw iswkjora borog thumjalaikha, nuksingwlai chakniya, duaphang sakangwbo tongnai jega kwrwikha. Jisu borogrokni dayw Kaitorni koknw pirni nangkha. 3O joragw borog kaibwrwi boya kaisanw balwi Jisuni dayw twbwni naikha. 4Matwr beser manlainiya ongwi bok bwnw Jisuni dayw tilangmaniya. Obwni bagwi bok Jisu jerw tong akre bini sakani nukhungni tali chelasa nwlkha. Arai khalaywi boyanw thuyambai akor o bisingtwi Jisuni sakangw tikhalaywi rwkha. 5Jisu bokni paitokmanw nungwi o boyanw hinkha, "Basa, nini sumsok nakarjakha."
6Orw kainwi kaitham kerong phwrwngnai achugwi tonglaijak. Bok bakha bakhabai oansoklaikha, 7"O borogsa kaitornw chaya se sabile. Bw tamani imwtwijar kok sadok? Sumsoknw kaisabw nakar manya, keber Kaitorse nakar manw."
8Jisu Bini bakhabai bokni oansokmanw siywi boknw sakha, "Tamani bagwi nokh o kokroknw oansoklaidok? 9"I boyanw bwbwnw sani kalaisalai, 'Nini sumsok nakarjakha,' dwi na, 'Bachadi, nini thuyam lagwi himwi beredi?' 10Matwr nokh jate simannatwi je i hayungw sumsok nakarnai bagurai keber Borogni Sajlanise tongw "Imwnw sagwi bw o boyanw sakha, 11"Ang nwnw sadok, bachadi, nini thuyam tisagwi nogw thangdi."
12Ephugw o borogsa bachagwi bini thuyamnw tisakha arw churokni sakangtwi phatarw akhogwi thangkha. Bok churok amok chalaikha tei Kaitornw lobwi sakha, "Imwtwijar chwng oaisabw nungjiyakho!"
Subrai Jisu Lebinw ringkhokha
(Mothi 9:9-13; Luk 5:27-32)
13Jerw Jisu arwbw Galil twithu koreo thangkhalai kodur borog Bini dayw phaikha, orw Bw boknw phwrwngni nangkha. 14Thangtwi thangtwi Bw Alpheyoni basala Lebinw ol kholnai nogw achugwi tongmani nungkha. Jisu bwnw hinba, "Phaidi, Ani udungw phaidi." Ephugw Lebi bachagwi Bwbai baksa thangkha.
15Ulo Jisu Lebini nogw chani achukkha. Ephugw Jisu bai Bini sagrirokni logeo bangmaya ol kholuarok tei chaya borogrokbw#2:15 chaya borogrokbw Jihudirokni chamungni Ikim paleniya tei Bejihudirokbai mililaithani boknw thumnok daini akhorwgwi hojak. chani achukkha, tamani hinba alok borog Jisuni udungw tongw. 16O borogroknw nungwi Phorisi budulni kerongnal phwrangsarok Jisuni sagriroknw hinba, "Bw ol kholuarok bai sumsok ganangrokni logeyw tamani cha?
17Jisu i koknw khanagwi o kerongnal phwrangsa roknw saba, "Gamrokni bagwi daktwr nangya, matwr hamyarokni bagwise nangw. Ang raidia roknw ringni phaijiya, sumsok ganang roknwse ringni phayw."
Jisuni sagrirok tani okbar tongya
(Mothi 9:14-17; Luk 5:33-39)
18O jorao baptismo rwnai Johonni sagrirok bai phorisirok okbar tonglaidok. Obwnw nungwi borog kainwi kaitham Jisuni dayw phaywi saba, "Johonni sagrirok bai Phorisirok okbar tonglaiyw, matwr Nini sagrirok tamani okbar tongya?"
19Jisu boknw sakha, "Chamwrwi logeyw tongwi chamwrwini logeni borogrok tama okbar tongmanw? Jeswk sal chamwrwi logeyw tong iswksal jora bok okbar tongmaya. 20Matwr i jo phainw jephuo chamwrwinw bokni orwni tilangwi thangnai. O salwse bok okbar tongnai.
21"Kaisabw ri katal bechala kubai kachamw tali thabni bagwi yakwlya, tamani hinba obonw khalaikhalai o kacham ri arwse kichiknw. 22Katal uamtwi bwtwinw kaisabw kacham mwikurni thoilao tonya, tonhalai o katal bwtwi bai thoila kichigwi bwtwi bai thoila kwrwngnwibw piyagw.#2:22 Katal uamtwi bwtwi ges ujirwmani bagwi kacham thoila pekhogwi thangw. Katal oamtwi bwtwinw katal thoilao se matonnw."
Jisu arw lengkhonai sal
23Oaisa lengkhonai salw Jisu bai Bini sagrirok thaimari harwm bisintwi himwi thanglaidok. Thangphini Bini sagrirok thaimaritang mochogwi chani nangkha. 24Obwni bagwi Phorisirok Jisunw swnglaikha, "Kerong nalni maping lengkhonai salw jebw khalaitaiya bok tani obwnw khalaidok? 25Bw boknw saba, "Dayud bai bini aphakrok chamwng biyalw kalaywi ukhrijagwi ta khalaijak nokh tama obwnw porijia? 26Bwlai Obiyathor hakra chontai tongphini Kaitorni nogw habwi je oannw chontaini bader arw kaisabw machaya, obwnw bwbw chajak tei bini aphak roknwbw charwjak." 27Jisu boknw arwbw sakha, "Lengkhonai sal borogni bagwise banaijak, borognw lengkhonai salni bagwi banaimaniya. 28Aithani Borogni Sajla lengkhonai salnibw nophang."
ទើបបានជ្រើសរើសហើយ៖
Mark 2: TPE
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©️2025 Bible Students Fellowship of Bangladesh