Mark 15
15
Pilatni sakangw Jisu
(Mothi 27:1-26; Luk 23:1-25; Johon 18:28; 19:16)
1Chontai ojarok phurung phurung okara chakararok, kerongnal phwrangsa rok tei hakra baichukni jotho borogrokbai baksa komrai khalaikha. Obwni jerw bok Jisunw khagwi tilangwi Romio sakwlpha Pilatni dayw abwi rwkha. 2Ephuo Pilat Jisunw swngkha, "Nwng tama Jihudini bugra?"
Jisu joba rwkha, "Nwngse sakha."
3Chontai ojarok Jisuni mwngwi kabangma khatta rwkha. 4Obwbai Pilat Jisunw arwbw swngkha, "Nwng tama mwngsabw joba rwya?" Naidi bok nini mwngwi bwswk khatta rwdok!
5Matwr Jisu mwngsabw saliya. Obwbai Pilat amok chakha.
6Yokma terni jorao borogrok je khekianw nai Pilat o khekianw yakarwi rwgo. 7O jorao Barabba hinwi kaisa alongw chupjajak tongw. Pwitalni molw bw pwitalua rokbai baksa tongwi borog buthaljak. 8Borogrok Pilatni dayw phaywi saphaika, "Nwng jwnwm jebwtwijar khalai obwtwijar khalaidi." 9Pilat boknw sakha, "Nokh tama nai, ang ta nokhni bagwi Jihudini bugranw yakarwi rwni?" 10Chontai ojarok Jisunw hechra khaywi bini yagw rwkha hinwi Pilat siyw. 11Matwr chontai ojarok borogroknw Jisuni bodle Barabbanw bidi hinwi yosagwi rwkha.
12Pilat arwbw swngkha, "Hingklai, nokh jenw Jihudini bugra hin Bwnw lagwi ang tama khlaitai?"
13Borogrok chirigwi salaikha, "Bwnw kruso rwdi."
14Pilat sakha, "Tamani, Bw tama khatta khalaijak?"
Matwr borogrok arwse kharang gara khalaywi chirigwi salaini nangkha, "Bwnw kruso rwdi."
15Ephuo Pilat borog rokni khachang khalaini bagwi Barabbanw bokni dayw yakarwi rwkha tei Jisunw lathamsak buni bagwi tholmwng rwkha arw kruso rwdi hinwi abwi rwkha.
Birindiarok Jisunw theta thwngkha
(Mothi 27:27-31; Johon 19:2,3)
16Birindia rok Jisunw tilangwi sakwlpha Pilatni nogw hablaikha. Odayw bok jotho birindia roknw thumkha. 17Jerw bok Bwnw phenokti palini gadu kangsa chumrwkha, tei busuni motok rabwi Bini bokhorogw kanrwkha. 18Obwni jerw bok Jisunw sani nangkha, "Jihudi bugrani ayuk lokthwk."
19Bok Jisuni bokhorogw raidang bai bukhrobni nangkha, tei Bini basagw khuktwi salkha arw yesu mokromwi Bwnw khulumnaini kosol khalaywi phunokha. 20Bwnw theta thwngwi paikhai o phenokti palini gadunw khengwi Bini sakni rinw chumrwkha tei kruso rwni bagwi tilangwi thangkha.
Krusni sakago subrai Jisu
(Mothi 27:32-44; Luk 23:26-43; Johon 19:17-27)
21O jorao Kurini aulini Simon hinwi borog kaisa jobin khalainai jilatwi phaywi o lamtwi thandok. Bw ongkha aleksandor bai Ruphni bopha. Birindia rok bwnw Jisuni krusnw balrwkha. 22Bok Jisunw Golgatha hinwi jegao tilangkha. O Golgathani gatha ongkha "Kopa charani jega." 23Jerw bok Jisunw gwndwrw hinwi bithi kwrwngsa daljak uamtwi bwtwi nwngni bagwi rwkha. Matwr Jisu obwnw nwngliya. 24Obwni jerw bok Bwnw kruso rwkha. Birindia rok Jisuni ri chum baglaywi swrw bwbwno manthai kalai obwnw naini bagwi pat thwnglaikha.
25Phurungni dam chukuo bok Jisunw krus rwkha. 26Jisuni bokhorok sakagw khatta poklai bwkhlak kwrwngsa thabwi rwjak. Orw suijak tongw, "Jihudi rokni bugra." 27Bok dagait kainwinwbo Jisubai baksa kruso rwkha, kaisanw Bini yagra aita tei kaisanw yaksi aita rwkha. 28Obwbai kathar elembakni kok kwplwng ongkha: "Bwnw sumsok ganang rokbai baksa thikikha."
29O lamtwi thangnairok bok bokhorok nalwi Jisunw theta thwngwi sakha, "Oi, Nwngyadwi nokthar sapaywi arwbw salthamni bisingw tangthai. 30Tabok krusni akhogwi saknw yokrw!"
31Chontai ojarok tei kerongnal phwrangsa rokbw Jisunw theta thwngni bachungw boknibai bok salaikha, "Bw borogroknw yokrwgw matwr saknw yokrw maya. 32Mosiho Israyelrokni bugra, tabok krusni akhogwi phaithwk, obonw nungwi chwng paitokmannaitwi."
Jisubai baksa krus rwjaknairok bokbw Bwnw theta thwngkha.
Subrai Jisuni thwinai
(Mothi 27:45-56; Luk 23:44-49; Johon 19:28-30)
33Jerw diphwr dam chinwini jimin dam tham jora jotho hauar andar ongwi tongkha. 34Tei sarini dam tham phini Jisu chirikkhogwi sakha, "Eloi, eloi, lama soboktani," omoni gatha ongkha, "Ani Kaitor, Ani Kaitor Nwng Anw tani yakarwi thangkha?"
35Okoknw khanagwi koreo bachagwi tongjakrokni daini kainwi kaitham sakha, "Khanadi, khanadi Bw Eliyonw ringkhodok."
36Ephuo borog kaisa khalwi thangwi kwrwngsa sponj tejao chwmwi latha kongsagw khagwi Jisunw nwngni rwkha tei sakha, "Tongradi, naigana Eliyo Bwnw akhorwgwi laphaiyw dwi."
37Obwni jerw Jisu kharang gara khaywi chirigwi singli hokha. 38Ephuo noktharni riktwn sakani jimin tola bagnwi ongwi kichikkha. 39Jisuni krusni sakangw bachagwi tongnai rasa sengkrakni oja Jisunw ai khalawi thwimani nungwi sakha, "Daijwse Bw ongkha Kaitorni Sajla."
40Kainwi kaitham birokrok kachalw tongwi oboroknw naywi tonglaidok. Bokni bisingw Mogdolini Moriyom, Jakob kainwini bisingni kotoi Jakob bai Josepni boma Moriyom tei Salomi tongw. 41Jephuo Jisu Galilo tong ephuo i birokrok Jisubai baksa jotho jegao thangw tei Bwnw mwngw. Tei arw kabang birokrok jebwrok Jisubai baksa Jirusalemw phaijak bokbw oro tongw.
Subrai Jisuni mangkhor rwkha
(Mothi 27:57-61; Luk 23:50-56; Johon 19:38-42)
42O sal ongkha jugalnaini sal kok ongkha lengkhonai salni aguni sal. Jephuo sal thangkha, 43aiphuo Arimathiyani Josep sagwn khlaywi Pilatni dayw thangwi Jisuni mangnw naikha. Bw ongkha hakra baichukni kaisa borom ganang adong, bwbo Kaitorni auarni bagwi nasingwi tongdok. 44Jisunw iswk dodogwi thwikha khanagwi Pilat amok chakha. Jai jaini Jisu thwika dwi, Pilat o rasa sengkrakni ojanw ringkhogwi obwnw swngkha. 45Jephuo rasa sengkrakni ojani daini khanakha jai jaini Jisu thwijak hinwi, ephuo Pilat Bini mangnw Josepnw rwkha. 46Josep kabangma moroknai ri kangsa paywi twbwkha tei Jisuni mangnw tikhalaywi o ribai rabkha, tei hapong tanwi banainai bugrungni kosol mangkhor khorsao o mangnw tonkha. Jerw bw mangkhorni bukhok gara holong kwrwngsabai phwngkha. 47Jisuni mangnw bwrw tonkha obw Mogdolini Moriyom bai Josepni boma nungkha.
ទើបបានជ្រើសរើសហើយ៖
Mark 15: TPE
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©️2025 Bible Students Fellowship of Bangladesh