Mark 14
14
Jisuni kobolma
(Mothi 26:1-5; Luk 22:1-2; Johon 11:45-52; 12:1-8)
1Aiphuo Yokma Ter bai chotha kwrwijar auan terni arw keber salnwi tongw. Chontai ojarok tei kerongnal phwrangsa rok bising bising Jisunw rumwi buthalnai hal naitublaywi tonglaikha. 2Matwr bok salaikha, "Chwng Bwnw terni joragw rumya, tamni hinba borog rokni bisingw hurumuru ongmanw."
3Aiphuo Jisu Bwithoniyao Simonni nogo tongw, aguo jeni kuriya ongjak. Jisu chamwng chagwi tongphuo birokma kaisa holong kuphulni gulugw dajak thasa moroknai thok mutum twbwgwi phaikha. Bw o gulukni bumuthunw phiyogwi thoknw Jisuni bukhorogw lugwi rwkha. 4Matwr oro tongnai rokni bisingni kaisa kainwi jolejagwi ai hinwi salai laikha, "O thoknw tamani arai khlaywi phiyagwi pairokha? 5O thoknw phalkhalai lai dinar rathamnibo kabang mankhamw, tei obwnw bigra roknw rwmankha mw!" Ai hinwi bok o birokmanw kullaini nangkha.
6Matwr aiphuo Jisu sakha, "Takul laisidi, nokh tamani bwnw dugu rwdok? Bwlai ani bagwi samung gamse khalaijak. 7Tamani hinba bigrarok nokhni dayw jwnwmni tongw, nokh jephuo muchuk aiphuo boknw chubamannw, matwr Anw nokh jwnwmni bagwi mangalak. 8Bw jebwnw phari obwnw khlaikha. Bw Anw mangkhoro thani jugalrwni bagwi sakang sakang Ani basagw thok mutum lugwi rwkha. 9Ang nokhnw kwbwi kwbwi sadok, hayungni jedayo Kaitorni kothoma pirjaknw, odayw i birokmani kok bakha karwni bagwi bini i samungni kokbw sajaknai."
Jihuda Jisunw rumrwni gosikha
10Jerw kai chi nwi sagrini bisingni Iskoriyot Jihuda hinwi kaisa Jisunw rumwi rwni bagwi chontai oja rokni dayw thangkha. 11Chontai ojarok Jihudani kok khanagwi tongthokjakha tei bwnw rang rwni hinwi kok rwkha. Eiphuo Jihuda Jisunw rumrwni bagwi hamdal rutubni nangkha.
Jisu Bini sagrirokbai paithak yokma ter khlaikha
(Mothi 26:17-25; Luk 22:7-14,21-23; Johon 13:21-30)
12Chotha kwrwijar auan terni pwilani salw Yokma Terni bagwi mera basa masa dali marwgw. Obwni bagwi Jisuni sagrirok Jisunw swngkha, "Nini bagwi Yokma Terni pana bwdaiyw jugalrwni muchu chwnw sadi?"
13Aiphuo Jisu Bini sagri kainwinw arai hinwi sagwi hokha, "Nokh aulio habwidi, odayw nokh kaisa chalanw golabai twi lagwi thangmani nungnw. Nokh bini ukhum ukhum thangdi. 14Bw jerw hapnw nokh o nogo thangdi tei O nokni nophangsanw sadi, 'Elim swngo, jedayw Bw Bini sagrirok bai baksa yokma terni pana khalainw o khadal bwrw?' 15Aiphuo bw nokhnw chithijak sakani thik khalaywi jugaljak khadal gara khorsa phunoknai. Odayw chini bagwi terni pana jugaldi."
16Aiphuo sagrirok aulio thanglaikha, tei Jisu jekhalayoi sajak bok thi obwtwijar khalayoi jotho nungoikha, jerw bok Yokma Terni pana jugal laikha. 17Saripang aita Jisu tei Bini o chinwi sagrirok oro thangkha. 18Bok jephuo achugwi chalaidok aiphuo Jisu sakha, "Ang nokhnw kwbwi sadok, nokhni bisingni kaisa Anw rumrwgwi rwnai, tei bw tabok Angbai baksa achugwi chadok."
19Sagrirok kha hamya onglaywi kaisa kaisa khlaywi salaini nangkha, "Bwlai angya bile no?"
20Jisu boknw sakha, "Bw i kai chinwi bisingni kaisa, jebw Angbai baksa kotara dayw chamwng chwmdok. 21Kathar Elembagw borogni Sajlanw lagwi jekhalaywi suijak tong Bw arai khalaiywi thwinai, matwr bwswkse kopal chaya o borogsa, jebw borogni sajlanw rumwi rwjak! Bw achaiya tilaise bini bagwi gam ongkhamu."
22Bok chalaywi tongphini, Jisu auan lagwi Kaitornw hambai rwkha tei obonw bechek bechek khlayoi sagrirokni yago rwgwi sakha, "Imwnw ladi, imw Ani basak."
23Jerw Bw piyang lagwi Kaitornw hambai rwkha tei sagriroknw rwkha. Bok jotho o piyangni nwnglaikha. 24Ephuo Jisu boknw sakha, "Kaitorni akhani bagwi imw Ani thwi, jeba kabangma borogni bagwi lugwi rwjanw. 25Ang nokhnw kwbwi sadok, Kaitorni auarw katal khlaywi uamtwi bwtwi nwngya sak jora Ang arw oaisabw o uamtwi bwtwinw nwngalak."
26Obwni jerw bok rachamwng tangsa rachabwi Joipal Hapongw thangkha.
Pitor Jisunw narang khalainw hinwi Jisu sakha
(Mothi 26:31-35; Luk 22:31-34; Johon 13:36-38)
27Jisu boknw sakha, "Anw nokh jothw yakarwi thangnai, Twmwi hinba kathar elembagw suijak tongw, 'Ang mera mwrwknaisanw buthalnai, obwni bagwi merarok ijang uijang ongwi saljak lainai.' 28Matwr Ang kwthwini kwthang ongwi bachanai jerw, nokhni solai sakang sakang Galilw thangnai."
29Ephuo Pitor sakha, "Jotho Nwnw yakarwi thangpa phwng ang thangalak."
30Jisu bwnw sakha, "Ang nwnw kwbwi sadok, tini aichugo tokla oainwi kichikyakho suni nwng Anw oaitham siniya hinwi gosenw."
31Matwr Pitor arw mar rwgwi sakha, "Nini bagwi thwijaknai kalaiphwng ang oaisabw sagalak ang Nwnw siniya hinwi." Tei arw sagrirokbw obwtwijar khalaywi salaikha.
Getsimani bilagw Jisu
(Mothi 26:36-46; Luk 22:39-46)
32Obwni jerw Jisubai Bini sagrirok Getsimani hinwi jega kwrwngsagw thangkha. Orw Jisu sagriroknw sakha, "Ang jeswk jora suri san iswk jora nokh irw achugwi tongdi." 33Jerw Bw Pitor, Jakob tei Johonnw logeo tilangoi kisa kachalw thangkha, tei o joragw Bw khao kabangma tentrokma tei tekto manni nangkha. 34Jisu boknw sakha, "Ani bakhani dugu iswk jora kabang ongdok je Ang bakha kadok ang thwywise thanw. Nokh idayw tongdi tei sichagwi tongdi."
35Jerw Bw kisa kachalw thangwi hagw yesu mokromwi pharikhalai i tektoni jonw Bini daini kachalw tilangthwk hinwi suri sanni nangkha. 36Bw sakha, "Apha, Baba, Nini dayw phariya mwngsabw kwrwi. Ani daini i tektoni piyangnw kachalw hodi. Hekphwng Ani muchokmwng twiya Nini muchokmwng twi ongthwk."
37Obwni jerw Bw bokni dayw philwi phaywi nungkha bok thugwi pailaikha. Bw Pitornw swngkha, "Simon, nwng tama thudok? Gwndisabw sichagwi tongmanliya? 38Sichagwi tongdi tei surimwng sandi nokh bajemao kalaiyatwi. Phalani muchumwng tongw matwr basak kebel."
39Jerw Jisu thangwi arwbo oaisa hek o surimwngnw sankha. 40Obwni jerw Jisu philwi phaywi arwbw sagri roknw thujak nungphaikha, twmwi hinba bokni mokol mwktwrwibai baili baili ongwi thanjak. Sagrirok Jisunw tama joba rwni bijiyoi manliya. 41Jerw Jisu thamrem palagw philwi phaywi boknw sakha, "Nokh tabokbw thudok? Tabokbw lengkholaidok? Ongkha kodur ongkha, jora sokphaikha. Naidi, Borogni sajlanw tabok sumsok ganang rokhni dayo rumrwgwi rwdok. 42Bachadi, himdi chwng thanw. Anw bokni dayo rumrwgwi rwnaisa bw sokphaikha."
Sumsok ganang rokni yago Jisu
(Mothi 26:47-56; Luk 22:47-53; Johon 18:2-12)
43Jisu kok sagwi tongphuo Jihuda odayo phaikha. Jihudabw o chinwi sagrini bisingni kaisa. Bwbai baksa kodur borogrok seng tei raidang lagwi phaikha. Chontai ojarok, kerongnal phwrangsa rok tei okara chakararok boknw hokomani.
44Jisunw rumwi rwnaisa bw sakang sakang o borogroknw sagwi tonjak, "Ang jenw mutum suno, Bw ongkha O Borog. Nokh Bwnw rumoi tilangdi." 45Obwni bagwi Jihuda phainai loge loge Jisuni dayw thangwi, "Elim!" hinwi Jisunw mutum rwkha. 46Aiphuo o borogrok Jisunw rumkha. 47Tei Jisuni koreo bachagwi tongnairokni daini kaisa bini sengsa karikha tei hakra chontaini gaburnw tanwi bini khunjur kwrwngsa rakha.
48Jisu o borog roknw sakha, "Ang tama dagait de, je nokh Anw sengsa tei raidangrok twbwgwi rumni phaikha? 49Ang salbiti sal nokhbai baksa tongjak, noktharni kholagw phwrwngjak, eiphuolai nokh Anw rumjiya. Matwr Elembakni kokbw kwplwng ma ongnaito."
50Eiphuo sagrirok jotho Jisunw yakarwi khalwi thangkha. 51Odayw Chakli kaisa tongw jebw Jisuni ukhum ukhum thandok bw gadu kangsani bader arw mwngsa ri chum kanjiya. Borogrok jephuo bwnw rumni chaitokha, 52bok keber bini gadunw mangkha tei bw langta khalwi thangkha.
Hakra baichukni sakangw Jisu
(Mothi 26:57-68; Luk 22:54,55,63-71; Johon 18:19-24)
53O borogrok Jisunw hakra chontaini nogw tilangwi thangkha. Odayw jotho chontai ojarok, okara chakararok tei kerongnal phwrangsa rok thumjaklaikha. 54Pitor kachal khayoi Jisuni ukhumo thangtwi thangtwi hakra chontaini kholao thangwi habwikha. Bw odayo birindia rokbai baksa hot tongni nangkha.
55Chontai ojarok tei jotho hakra baichuk Jisunw thwinai senji rwni bagwi Bini beaita yakumu rutublaikha matwr manliya. 56Jisuni beaita kodur borog rok misa sathai rwkha matwr bokni yakumu mililiya. 57Jerw kainwi kaitham bachagwi Jisuni beaita misa yakumu rwgwi sakha, 58"Chwng Bwnw samani khanajak, 'Borog banainai i noktharnw Ang sapaywi pairwnai tei saltam ni salo kwrwngsa kathar nok banainai jeba borogrokni banainaiya.'" 59Matwr hekphwng bokni kok mililiya.
60Aiphuo hakra chontai jothoni sakango bachagwi Jisunw swngkha, "Nwng tama mwngsa kokbw joba rwya? Nini beaita i borogrok imo tama yakumu rwdok?" 61Matwr Jisu mwngsa sayakarwi phwrwk khayoi tongkha.
Hakra chontai Bwnw arwbw swngkha, "Nwng tama chwngsanai Kaitorni Sajla Mosiho de?"
62Jisu sakha, "Angse. Tei nokh jothoni solai phankrak Kaitorni yagara phaising Borogni sajlanw achugwi tongmani nungnai tei nokhani chumuibai baksa phaimani nungnai."
63Obwbai hakra chontai Bini ri sichigoi sakha, "Tamani arw sathairok nangthai? 64Nokhlai Khanakha, Bini bukhokbai Bw Kaitornw lachi phunokha. Nokh tama bakha ka?"
Bok jotho salaikha, Jisu khatta ganang, Bw thwitai kalayw. 65Eiphuo kainwi kaitham Bini basagw khukti salkha tei Bini bomakhang khapwngoi Bwnw gusih rwgwi sakha, "Kokmai khalai!" Jerw birindia rok Bwnw tilangoi thangwi thappara rwni nangkha.
Pitor Jisunw narang khalaikha
(Mothi 26:69-75; Luk 22:56-62; Johon 18:15-18,25-27)
66Pitor tolao, kholao tongphini hakra chontaini gaburjwkma kaisa odayo phaikha. 67Bw Pitornw hor tongmani nungkha tei gam khayoi nayoi sakha, "Nwngbw o Nasorotni Jisubai baksa tongjak bile."
68Matwr Pitor narang khalaywi sakha, "Nwng tama sadok ang obwnw sibw siya, bubo bujiya." Obonw sagoi Pitor phatarni doar koreo thangkha. Eiphuo loge loge tokla masa kichikha. 69Gaburjwkma Pitornw odayo nungwi odayo bachagwi tongjakroknw arwbw sakha, "I borogsa bokni bisingni kaisa."
70Pitor arwbw narang khalaikha. Koreo bachagwi tongnairokbw rangsa tongoi Pitornw sakha, "Nwngbw bokni bisingni i kaisa, twmwi hinba nwnglai Galilni borog."
71Aiphuo Pitor swmai tangwi sakha ang kwbwi sadok, "Nokh Jeni mwngoi sadok ang Bwnw siniya." Ang misa sagw hingkhai Kaitorni satok ani sakago kalaithok. 72Aiphuo loge loge tokla palaknwi kichigsakha. Pitor eiphuo bwnw Jisu sanai kok, "Tokla palaknwi kichigyakho suni nwng anw oaitham narang khalainw," obwnw bakha kakha. Obwnw oansogwi bw khabayoi karapni nangkha.
ទើបបានជ្រើសរើសហើយ៖
Mark 14: TPE
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©️2025 Bible Students Fellowship of Bangladesh