Johon 8
8
1Matwr Jisu Joipal Hapongw thangkha.
Sinalchutta khlainai birokmani nalchir
2Jerwni salw phurung aisiri siri Jisu arwbo noktharw thangkhalai jotho borog Bini dayw phailaikha. Aiphuo Jisu achugwi boknw phwrwngni nangkha. 3-4Kerong nal phwrwngnai rok tei phorisirok birokma kaisanw twbwgwi o jotho borog rokni sakangw bacharwgwi Jisunw sakha, "Elim, i birokma sinalchutta khalaiphini rumjakha. 5Kerong nalw Mosi chwnw imwtwijar birokroknw holong kokgwi buthalwi pairwdi hinwi tholjak. Matwr Nwng tama hin?"
6Bok Jisunw bajaywi naini bagwise o koknw sakha, bok Bwnw dosa rwni bagwi jate kwrwngsaswk suta naitubwi mannaitwi. Ephuo Jisu kongwi yesibai hagw suini nangkha. 7Matwr bok jephuo o koknw palapala Bwnw swngni nangkha ephuo Jisu bachagwi boknw sakha, "Nokhni bisingw jebw oaisabw sumsok khalaijiya bwse sakang bwnw holong kokdi." 8Bw arwbo kongwi hagw suini rumkha.
9I koknw khanagwi jothobo kaisa kaisa khalaywi thanglaini rumkha, okararokse sakang thanglaikha. Odayw keber Jisu saichongse tongsio arw o birokma bini sakangw bachajak. 10Ephuo Jisu bachagwi o birokmanw sakha, "Bok bwrwlai? Kaisabw tama nwnw dosa rwgwi nalchir khalaijiya?
11O birokma joba rwgwi sakha, "Ohoy elim, kaisabw khalaijiya."
Eiphuo Jisu sakha, "Angbw khalaigalak. Thangsidi, tabokni jimin arw sumsok takhalaidi."
Subrai Jisuse i hayungni pohor
12Jerw Jisu arwbw borog rokbai kok sakha, "Angse i hayungni pohor. Kaisaswk Ani ukhum ukhum himkhalai bw arw oaisabw andarw himgalak. Matwr langmani pohor mannw."
13Obwbai Phorisirok sakha, "Nini yakumu daijwya, tamni hinba nwng sakni kothoyw sak yakumu rwdok."
14Jisu joba rwgwi sakha, "Ang sakni kothoyw sak sathai rwphwng Ani yakumu daijw, tamni hinba Ang bwdaini phaikha tei bwrw thangdok obwnw Ang siyo. Matwr Ang bwdaini phaikha tei bwrw thangdok obwnw nokh siya. 15Borog jekhalaywi nalchir khalai nokhbw obwtwijar khalaywi tongw, matwr Ang kaisanibw nalchir khalaiya. 16Matwr Ang nalchir khalaiphwng Ani nalchir daijw, tamni hinba Ang saisongya. Ang Aphabai baksa tongw, jebw anw hokha. 17Nokhni kerongw suijak tongw, kainwiswk baksa yakumu rwgw hingkhalai obo daijw. 18Ang Ani sakni phaising yakumu rwgo, tei Je Anw hokha o Aphabw Ani phaising yakumu rwgo"
19Phorisirok Bwnw sakha, "Nini Apha bwdayo?"
Jisu joba rwgwi saba, "Nokh Anw siniya tei Ani Aphanwbo siniya. Jwtini Anw sinitilai Ani Aphanwbw sinikhamw."
20Nokthar kholagw phwrwngphini Jisu ruai rwnai bokso koreyw bachagwi i kokroknw sakha. Matwr aiphuobw bini jora sokphaiyokho thani kaisabw Bwnw chubliya.
Sakni thwinai kothoyw Subrai Jisu
21Jisu arwbw Phorisi roknw sakha, "Ang thangdok. Nokh Anw naitubnw, matwr nokh nokhni sumsokni nakarma maya karwise thwinai. Ang jedayo thangdok nokh orw phaimangalak."
22Aiphuo Jihudi ojarok sakha, "Bw tama Bini sakni yakbai Bw thwywi thanai? Tamni hinba bwlai sadok, 'Ang jedayw thangdok nokh orw phaimangalak.'"
23Jisu boknw sakha, "Ang sakani phaiyw tei nokh tolani phaiyw. Nokh i hayungni matwr Ang i hayungniya. 24Ang nokhnw sajak, nokh nokhni sumsokni nakarma maya karwise thwinai. Jwtini nokh Angse Bw hinwi paitokya khalai, hai nokh khamkham obwtwijar khalaywi thwinai."
25Obobai ojamarok Jisunw swngkha, "Nwng swrw?"
Jisu boknw saba, "Jebwnw Pwilani jimin Ang nokhnw sagwi phaidok. 26Nokhni kothoyw Ani kabangma satai tongw tei kabangma nalchir khalaithai tongo, matwr Anw Je hokha Bw daijw arw Ang Bini dayw jebwroknw khanajak obwnw i hayungw sadok." 27Jisu boknw Bini Aphani kothoyw sadok matwr bok bujilailiya. 28Obwni bagwi Jisu boknw saba, "Jephuo nokh borogni sajlanw sakao tisanw ephuo bujilainw ang obwse. Arw imwnwbw bijiyoi mannw je ang sakni daini mwngsabw khalaiya, matwr Apha anw jebwnw phwrwngjak Ang o kokroknwse sao. 29Tei jebw Anw hokha Bw Angbai baksa tongw. Bw Anw saichong yakarwi rwjiya, tamni hinba je samung Bwnw khachang rw obwtwi jar samwngse Ang jwnwm biti tangw." 30Jisu i kokroknw saphuo kabangma borogrok Bwnw paitoklaikha.
Abrahamni basarok eba Saitanni basarok
31Jisunw je Jihudirok paitokha boknw Bw sakha, "Nokh jwtini Ani phwrwngmao thik khalaywi tongw hingkhai daijwse nokh Ani sagri, 32arw nokh daijwnw sinw, tei o daijwse nokhnw yokrwnw."
33Bok Jisunw joba rwgwi sakha, "Chwng Abrahamni bosong, chwng oaisabw kaisani paijak seleng ongyakho?" Nwng tama khalaywi samankha, nokhnw yokrwnw?"
34Jisu boknw joba rwgwi sakha, "Ang nokhnw daijw sadok, jebwrok sumsokbai tong bok jothobw sumsokni paijak seleng. 35Paijak Seleng molbrumni bagwi nukhungni adong ongwi tongmaya, matwr sajla bw nukhungo molbrum tongw. 36Aithani, jwtini Sajla nokhnw yokrwgw hingkhalai daijwse nokh yoknw. 37Ang sio nokh Abrahamni bosongni borog, matwr hekphwng nokh anw buthalwi pairwni bagwi chaitogwi naidok, tamni hinba Ani kok nokhni khao jega manya. 38Ang ani Aphani dayw jebwnw nungjak o kothoyw nokhnw sagw tei nokh nokhni naphani dayw jebwnw khanakha obwnw khalaiyo."
39Obobai bok Jisunw joba rwgwi saba, "Abrahamse chini apha."
Jisu boknw saba, "Nokh Abrahamni basa hintilai bini kosol kam khalaikhamw.
40Ang Kaitorni daini je daijwnw sijak omonwse nokhnw sadok, tei hekphwng nokh anw buthalni naidok, matwr Abraham obwtwijar khalaijiya. 41Nokhni napha jebwnw khalai nokhbw obonw khalaidok."
Bok Jisunw saba, "Chwnglai mwngdang basaya. Chini apha kaisachokse tongw, bw ongkhadwi Kaitor." 42Jisu boknw saba, "Daijwse Kaitor nokhni apha hintilai nokh anw hamjakhamw, tamni hinba ang idayw Kaitorni daini phaijak. Ang sakni daini phaijiya, matwr Kaitorse anw hokha. 43Nokh tani ani koknw bujiya? Tamani hinba nokh ani koknw soi manya. 44Soitanse nokhni apha tei nokhbo bini basa, oboni bagwi nokh bini muchukmanw sohkpura khalaini naiyw. Soitan pwilani jimin buthalnaisa arw bw oaisabw kwbwibai tongya, twmwi hinba bini bisingw kwbwi kwrwi. Bw jephuo misa kok sa ephuo sakni akwl dainise sao, tamni hinba bw mwisasanai tei jotho misa kok bini dainise achayo. 45Matwr ang daijw koknwse sao, tei oboni bagwi nokh anw paitokya. 46Nokhni bisingw swrw Anw sumsok ganang hinwi majra rwman? Ang jwtini kwbwi kok sao hingkhalai nokh tamani Anw paitokya? 47Jebwrok Kaitorni borog, bok Kaitorni kok khanao. Nokh Kaitorni kok khanaya twmwi himba nokh Bini borogya."
Jisu bai Abraham
48Ephuo Jihudirok Jisunw saba, "Chwng ta thi kok sajiya, nwng kaisa Somoriyo tei nwnw chaya phalabai rumjak?"
49Joba rwgwi Jisu saba, "Anw chaya phala rumjiya. Ang Ani Aphanwse borom rwgw, matwr nokhlai Anw borom rwya. 50Ang ani sakni bagwi borom naitubya, matwr kaisa tongw Jebw obonw naitubw tei Bwse nalchirai. 51Ang nokhnw daijw sadok, kaisaswk Ani koknw khanagw hingkhalai bw oaisabw thwigalak."
52Jihudirok bwnw saba, "Taboklai chwng daijw bujikha Nwnw chaya phala rumjajak. Abraham bai Diyarirok thwywi thangjak, tei nwng sadok, 'Kaisaswk ani koknw khanagw hingkhalai bw oaisabw thwigalak. 53Nwng tama Apha Abrahamni naywibo gara? Bwlai thwijak tei Diyarirokbo thwijak. Nwng saknw tama bakha ka?"
54Jisu joba rwgwi saba, "Ang jwtini saknibai sak baikhenejagw hingkhai ani baikhenenai mwngsabwya. Ani apha Jebwnw nokh nokhni Kaitor hin Bwse Anw lobjarwgw. 55Nokh oaisabw Bwnw siyakho, matwr Ang Bwnw siyw. Ang Bwnw siya hinwi sao hingkhai Angbo nokhni kosol misaiya ongnw. Matwr Ang Bwnw sio tei Bini koknw paleo. 56Nokhni apha Abraham ani phaijanai sal naini bagwise tongthokjajak. Bw obonw nungkha tei tongthojakha."
57Ephuo jihudirok Jisunw saba, "Nini cha tabokbw bachi ongyakho, arw Nwng tama Abrahamnw nungjak?"
58Jisu boknw saba, "Daijw Ang nokhnw i koknw sadok Abrahamni achainai aguni jimin Ang tongw."
59Ephuo bok Jisunw kokni bagwi holong tisagwi lakha matwr Jisu huijagwi nokthar kholani akhogwi thangkha.
ទើបបានជ្រើសរើសហើយ៖
Johon 8: TPE
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©️2025 Bible Students Fellowship of Bangladesh
Johon 8
8
1Matwr Jisu Joipal Hapongw thangkha.
Sinalchutta khlainai birokmani nalchir
2Jerwni salw phurung aisiri siri Jisu arwbo noktharw thangkhalai jotho borog Bini dayw phailaikha. Aiphuo Jisu achugwi boknw phwrwngni nangkha. 3-4Kerong nal phwrwngnai rok tei phorisirok birokma kaisanw twbwgwi o jotho borog rokni sakangw bacharwgwi Jisunw sakha, "Elim, i birokma sinalchutta khalaiphini rumjakha. 5Kerong nalw Mosi chwnw imwtwijar birokroknw holong kokgwi buthalwi pairwdi hinwi tholjak. Matwr Nwng tama hin?"
6Bok Jisunw bajaywi naini bagwise o koknw sakha, bok Bwnw dosa rwni bagwi jate kwrwngsaswk suta naitubwi mannaitwi. Ephuo Jisu kongwi yesibai hagw suini nangkha. 7Matwr bok jephuo o koknw palapala Bwnw swngni nangkha ephuo Jisu bachagwi boknw sakha, "Nokhni bisingw jebw oaisabw sumsok khalaijiya bwse sakang bwnw holong kokdi." 8Bw arwbo kongwi hagw suini rumkha.
9I koknw khanagwi jothobo kaisa kaisa khalaywi thanglaini rumkha, okararokse sakang thanglaikha. Odayw keber Jisu saichongse tongsio arw o birokma bini sakangw bachajak. 10Ephuo Jisu bachagwi o birokmanw sakha, "Bok bwrwlai? Kaisabw tama nwnw dosa rwgwi nalchir khalaijiya?
11O birokma joba rwgwi sakha, "Ohoy elim, kaisabw khalaijiya."
Eiphuo Jisu sakha, "Angbw khalaigalak. Thangsidi, tabokni jimin arw sumsok takhalaidi."
Subrai Jisuse i hayungni pohor
12Jerw Jisu arwbw borog rokbai kok sakha, "Angse i hayungni pohor. Kaisaswk Ani ukhum ukhum himkhalai bw arw oaisabw andarw himgalak. Matwr langmani pohor mannw."
13Obwbai Phorisirok sakha, "Nini yakumu daijwya, tamni hinba nwng sakni kothoyw sak yakumu rwdok."
14Jisu joba rwgwi sakha, "Ang sakni kothoyw sak sathai rwphwng Ani yakumu daijw, tamni hinba Ang bwdaini phaikha tei bwrw thangdok obwnw Ang siyo. Matwr Ang bwdaini phaikha tei bwrw thangdok obwnw nokh siya. 15Borog jekhalaywi nalchir khalai nokhbw obwtwijar khalaywi tongw, matwr Ang kaisanibw nalchir khalaiya. 16Matwr Ang nalchir khalaiphwng Ani nalchir daijw, tamni hinba Ang saisongya. Ang Aphabai baksa tongw, jebw anw hokha. 17Nokhni kerongw suijak tongw, kainwiswk baksa yakumu rwgw hingkhalai obo daijw. 18Ang Ani sakni phaising yakumu rwgo, tei Je Anw hokha o Aphabw Ani phaising yakumu rwgo"
19Phorisirok Bwnw sakha, "Nini Apha bwdayo?"
Jisu joba rwgwi saba, "Nokh Anw siniya tei Ani Aphanwbo siniya. Jwtini Anw sinitilai Ani Aphanwbw sinikhamw."
20Nokthar kholagw phwrwngphini Jisu ruai rwnai bokso koreyw bachagwi i kokroknw sakha. Matwr aiphuobw bini jora sokphaiyokho thani kaisabw Bwnw chubliya.
Sakni thwinai kothoyw Subrai Jisu
21Jisu arwbw Phorisi roknw sakha, "Ang thangdok. Nokh Anw naitubnw, matwr nokh nokhni sumsokni nakarma maya karwise thwinai. Ang jedayo thangdok nokh orw phaimangalak."
22Aiphuo Jihudi ojarok sakha, "Bw tama Bini sakni yakbai Bw thwywi thanai? Tamni hinba bwlai sadok, 'Ang jedayw thangdok nokh orw phaimangalak.'"
23Jisu boknw sakha, "Ang sakani phaiyw tei nokh tolani phaiyw. Nokh i hayungni matwr Ang i hayungniya. 24Ang nokhnw sajak, nokh nokhni sumsokni nakarma maya karwise thwinai. Jwtini nokh Angse Bw hinwi paitokya khalai, hai nokh khamkham obwtwijar khalaywi thwinai."
25Obobai ojamarok Jisunw swngkha, "Nwng swrw?"
Jisu boknw saba, "Jebwnw Pwilani jimin Ang nokhnw sagwi phaidok. 26Nokhni kothoyw Ani kabangma satai tongw tei kabangma nalchir khalaithai tongo, matwr Anw Je hokha Bw daijw arw Ang Bini dayw jebwroknw khanajak obwnw i hayungw sadok." 27Jisu boknw Bini Aphani kothoyw sadok matwr bok bujilailiya. 28Obwni bagwi Jisu boknw saba, "Jephuo nokh borogni sajlanw sakao tisanw ephuo bujilainw ang obwse. Arw imwnwbw bijiyoi mannw je ang sakni daini mwngsabw khalaiya, matwr Apha anw jebwnw phwrwngjak Ang o kokroknwse sao. 29Tei jebw Anw hokha Bw Angbai baksa tongw. Bw Anw saichong yakarwi rwjiya, tamni hinba je samung Bwnw khachang rw obwtwi jar samwngse Ang jwnwm biti tangw." 30Jisu i kokroknw saphuo kabangma borogrok Bwnw paitoklaikha.
Abrahamni basarok eba Saitanni basarok
31Jisunw je Jihudirok paitokha boknw Bw sakha, "Nokh jwtini Ani phwrwngmao thik khalaywi tongw hingkhai daijwse nokh Ani sagri, 32arw nokh daijwnw sinw, tei o daijwse nokhnw yokrwnw."
33Bok Jisunw joba rwgwi sakha, "Chwng Abrahamni bosong, chwng oaisabw kaisani paijak seleng ongyakho?" Nwng tama khalaywi samankha, nokhnw yokrwnw?"
34Jisu boknw joba rwgwi sakha, "Ang nokhnw daijw sadok, jebwrok sumsokbai tong bok jothobw sumsokni paijak seleng. 35Paijak Seleng molbrumni bagwi nukhungni adong ongwi tongmaya, matwr sajla bw nukhungo molbrum tongw. 36Aithani, jwtini Sajla nokhnw yokrwgw hingkhalai daijwse nokh yoknw. 37Ang sio nokh Abrahamni bosongni borog, matwr hekphwng nokh anw buthalwi pairwni bagwi chaitogwi naidok, tamni hinba Ani kok nokhni khao jega manya. 38Ang ani Aphani dayw jebwnw nungjak o kothoyw nokhnw sagw tei nokh nokhni naphani dayw jebwnw khanakha obwnw khalaiyo."
39Obobai bok Jisunw joba rwgwi saba, "Abrahamse chini apha."
Jisu boknw saba, "Nokh Abrahamni basa hintilai bini kosol kam khalaikhamw.
40Ang Kaitorni daini je daijwnw sijak omonwse nokhnw sadok, tei hekphwng nokh anw buthalni naidok, matwr Abraham obwtwijar khalaijiya. 41Nokhni napha jebwnw khalai nokhbw obonw khalaidok."
Bok Jisunw saba, "Chwnglai mwngdang basaya. Chini apha kaisachokse tongw, bw ongkhadwi Kaitor." 42Jisu boknw saba, "Daijwse Kaitor nokhni apha hintilai nokh anw hamjakhamw, tamni hinba ang idayw Kaitorni daini phaijak. Ang sakni daini phaijiya, matwr Kaitorse anw hokha. 43Nokh tani ani koknw bujiya? Tamani hinba nokh ani koknw soi manya. 44Soitanse nokhni apha tei nokhbo bini basa, oboni bagwi nokh bini muchukmanw sohkpura khalaini naiyw. Soitan pwilani jimin buthalnaisa arw bw oaisabw kwbwibai tongya, twmwi hinba bini bisingw kwbwi kwrwi. Bw jephuo misa kok sa ephuo sakni akwl dainise sao, tamni hinba bw mwisasanai tei jotho misa kok bini dainise achayo. 45Matwr ang daijw koknwse sao, tei oboni bagwi nokh anw paitokya. 46Nokhni bisingw swrw Anw sumsok ganang hinwi majra rwman? Ang jwtini kwbwi kok sao hingkhalai nokh tamani Anw paitokya? 47Jebwrok Kaitorni borog, bok Kaitorni kok khanao. Nokh Kaitorni kok khanaya twmwi himba nokh Bini borogya."
Jisu bai Abraham
48Ephuo Jihudirok Jisunw saba, "Chwng ta thi kok sajiya, nwng kaisa Somoriyo tei nwnw chaya phalabai rumjak?"
49Joba rwgwi Jisu saba, "Anw chaya phala rumjiya. Ang Ani Aphanwse borom rwgw, matwr nokhlai Anw borom rwya. 50Ang ani sakni bagwi borom naitubya, matwr kaisa tongw Jebw obonw naitubw tei Bwse nalchirai. 51Ang nokhnw daijw sadok, kaisaswk Ani koknw khanagw hingkhalai bw oaisabw thwigalak."
52Jihudirok bwnw saba, "Taboklai chwng daijw bujikha Nwnw chaya phala rumjajak. Abraham bai Diyarirok thwywi thangjak, tei nwng sadok, 'Kaisaswk ani koknw khanagw hingkhalai bw oaisabw thwigalak. 53Nwng tama Apha Abrahamni naywibo gara? Bwlai thwijak tei Diyarirokbo thwijak. Nwng saknw tama bakha ka?"
54Jisu joba rwgwi saba, "Ang jwtini saknibai sak baikhenejagw hingkhai ani baikhenenai mwngsabwya. Ani apha Jebwnw nokh nokhni Kaitor hin Bwse Anw lobjarwgw. 55Nokh oaisabw Bwnw siyakho, matwr Ang Bwnw siyw. Ang Bwnw siya hinwi sao hingkhai Angbo nokhni kosol misaiya ongnw. Matwr Ang Bwnw sio tei Bini koknw paleo. 56Nokhni apha Abraham ani phaijanai sal naini bagwise tongthokjajak. Bw obonw nungkha tei tongthojakha."
57Ephuo jihudirok Jisunw saba, "Nini cha tabokbw bachi ongyakho, arw Nwng tama Abrahamnw nungjak?"
58Jisu boknw saba, "Daijw Ang nokhnw i koknw sadok Abrahamni achainai aguni jimin Ang tongw."
59Ephuo bok Jisunw kokni bagwi holong tisagwi lakha matwr Jisu huijagwi nokthar kholani akhogwi thangkha.
ទើបបានជ្រើសរើសហើយ៖
:
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©️2025 Bible Students Fellowship of Bangladesh