Johon 19
19
Jisunw kruso rwdi hinwi tholkha
1Aiphuo Pilat Jisunw lathamsakbai budi hinwi tholkha. 2Sengkrakrok busu laidukbai motok kwrwngsa banaywi Jisuni bokhorogo kanrwgwi rwkha, arw jerw bwnw kochua palini gadu chumrwkha. 3Bok Bini koriyw thangwi sakha, "Jihudirokni bugrani ayuk kalok ongthwk!" Imwnw sagwi sengkrakrok Bwnw thapara rwkha.
4Pilat arwbw phatarw phaywi sapaikha, "Naidi, ang Bwnw kariywi nokhni orw twbwgwi phaidok Nokh bijimanaitwi ang Bini mwngsa khatase mandokya." 5Jisu o busuni motok tei kochua palini gadu chumjakbai phataro akhogoi phaikha. Aiphuo Pilat borogroknw sakha, "Naidi, imwse o Borog."
6Jisunw nungnai loge loge chontai ojarok tei nokthar sotaingrok chirigwi salaikha, "Kruso rwdi, Bwnw kruso rwdi."
Pilat boknw sakha, "Bwnw nokhse tilangwi kruso rwdi, twmwi hinba ang Bini mwngsa khatta nungdokya.
7Jihudi ojarok Pilatnw sakha, "Chini kwrwngsa kerongnal tongo, o kerongnalni maping Bini thwitai kalayw, twmwi himba Bw saknw Kaitorni Sajla hinwi sajak.
8Pilat jephuo i koknw khanakha ephuo bw arw kirikha. 9Bw arwbw nokyungw thangwi Jisunw swngkha, "Nwng bwrwni phaikha?" Matwr Jisu bwnw mwngsa joba rwliya.
10Aiphuo Pilat Jisunw swngkha, "Nwng tama angbai kok saya? Nwng tama siya, Nwnw yakarwi rwni eba kruso rwni phranba ani tongw?"
11Jisu joba rwkha, "Kaitor nwnw juaima rwya khalai Ani sakao nini mwngsa juaimase tongyamw. Aithani je Anw nini yagw abwi rwkha bw arw hakra sumsokni khatta ganang.
12I kokni bagwi Pilat Jisunw yakarwi rwni chaitokni nangkha, matwr Jihudi ojarok chirigwi salaikha, "Nwng jwtini i borogsanw yakarwi rwgw hingklai nwng habugra Kwisorni aphakya. Jebw saknw bugra hinwi yachag bw lai habugra Kwisorni kena."
13I koknw khanagwi Pilat Jisunw phatarw twbwgwi phaikha arw "Holongni Jega" mwngni kwrwngsa jegao nalchir baichugo achokkha. Ibbriyo kokbai obwnw hinw Gabbatha. 14O sal ongkha yokma ter jugalnai sal. Aiphuo diphwr ongdok.
Pilat Jihudi ojaroknw sakha, "Naidi, nokhni bugra."
15Obwbai bok chiriklaywi sakha, "Bwnw irwni nwldi! Bwnw kruso rwdi!"
Pilat boknw hinkha, "Ang ta nokhni bugranw kruso rwni?"
Chontai ojarok joba rwgwi sakha, "Habugra Kwisorni bade chini arw kaisabw bugra kwrwi." 16Aiphuo Pilat Jisunw kruso rwni bagwi bokni yagw abwi rwkha.
Subrai Jisu Kruso thwikha
(Mothi 27:32-44; Mark 15:21-32; Luk 23:26-39)
Aiphuo sengkrakrok Jisunw tilangwi thangkha. 17Jisu sakni krus sak balwi "Bokhorokni chara" mwngwi kwrwngsa jegao tilangwi thangkha.(Jihudi rok imwnw bokni kokbai "Golgotha" hinw.) 18Odayo bok Jisunw kruso rwkha, Bwbai baksa arw kainwi borognw Bini yaksi phaising yagara phaising arw Jisunw bokni kacharw kruso rwkha.
19Pilat kruso Jisuni bukhorok sakao tokta chelasagw sidom kwrwngsa suywi joloybai bugwi rwkha. Odayw suijak tongw, "Nasorotni Jisu, Jihudirokni Bugra." 20Aiphuo bw jebw suikha kabangma Jihudi obwnw cherwi nailaikha, twmwi hinba Jisunw jedayw kruso rwkha o jegaba ongkha aulini koreyw. Obw Ibriyo, Letin tei Grik kokbai suijak. 21Aiphuo Jihudirokni chontai ojarok Pilatnw sakha, "'Jihudi rokni bugra,' i koknw ta suidi, bini solai suidi, i borogsa sajak, 'Ang Jihudirokni bugra.'"
22Pilat sakha, "Ang jebw suikha obw suikha."
23Jisunw kruso rwgwi paywi sengkrakrok Bini sakni ri lagwi bakbwrwi khalaikha, tei bok jwnwsa bagsa khalaywi lakha. Jerw bok Jisuni bisingni ri nwbw khugwi lakha. O rigw mwngsa subjak kwrwi, obw sakani jimin tola jora jwto taknai. 24Aithani bok bokni bisingw salaikha, "Imwnw sichikya. Obwni naikhlai chwng pat thwngwi nainw i rinw swrw mannai."
Imw ongmani ongkha kathar elembakni i kok sohknaitwi,
"Bok bokni bisingo Ani richum baglayoi lalaikha arw Ani rini bagwi bok pat thwngkha."
Arw obwroknw sengkrak rok khalaikha.
25Jisuni krusni koriyw Boma tei Bini Bomani bukhuk, Klopani bihik Moriyom tei Mogdolini Moriyom bachagwi tongjak. 26Jisu jephini nungkha boma arw je sagrinw jothoni solai hamjak bwnw koreo bachagwi tongmani nungkha, aiphuo Bw hinkha, "Ama, u naidi, nasala." 27Obwni jerw o sagrinw sakha, "U naidi nama." Aiphuni jimin o sagri Jisuni bomanw bini nuo tilangwi thangka.
28Jephini Jisu sikha, jotho paikha, aiphuo Bw kathar elembakni i kok jate sohknaitwi sakha, "Ang twi kangkha."
29O jegao kwrwngsa twk dayw kwkhwrwi uamtwi bwtwi kwplwng tongw. Aiphuo bok spons kwrwngsa lagwi o uamtwi bwtwio chwmkha arw latha buchugw khagwi Jisuni bukhok koreyw kuchuk khalaywi rumkha. 30Jisu o kwkhwrwi uamtwi bwtwinw nwngwi paywi sakha, "Jotho paikha." Jerw Bw bokhorok bomwi Bini pholanw yakarkha.
31O salba ongkha yokma ter jugalnaini sal. Jerwni salba ongkha kwrwngsa baithak lengkhonai sal aithani, Jihudi ojarok naikha o salw krus sikago basakrok tongyatwi. Aithani bok Pilatni dayw thangwi kabokkha kruso tongnai borogrokni yathwi sapaywi rwnaitwi arw mangwda roknw krus daini karinaitwi. 32Aiphuo sengkrak rok phaywi Jisubai baksa krus rwjanai kainwini bisingni kaisani yathwi sapaywi rwkha tei jerw arw kaisani yathwi sapaywi rwkha. 33Matwr jephuo Jisuni dayw phaikha tei nungkha Jisu thwywi paijak aiphuni bok Bini yathwi sapainiya. 34Matwr sengkrak kaisa Jisuni panjara bekerengni tolagw bollom bai yokha tei loge loge twi bai thwi akhogwi phaikha. 35Jebw sakni mokolbai imoroknw nungkha bw yakumu rwgwi sajak, arw bini o yakumu jaise. Bw siyw bw jebw sajak obw kwbwi arw bw yakumu rwkha nokhbw obwnw paitokmannatwi.
36Imwrok ongkha kathar elembakni o kokrok soknaitwi, "Bini bekreng kongsabw baigalak." 37Tei elembakni arw kwrwngsa jegao suijak tongw, "Bok jenw yokha Bini aitase bokw naikhogwi nainai."
Subrai Jisuni mangkhor
(Mothi 27:56-61; Mark 15:42-47; Luk 23:50-56)
38Imwrokni jerw Arimathiya kamini Josep Pilatni dayw Jisuni mangwda bini phaika. Bw ongkha Jisuni kaisa nachorai sagri, twmwi hinba bw Jihudi ojaroknw kiriyw. Jerw jephuo Pilat ongmiti rwkha aiphuo bw Jisuni mang gwda tilangwi thangkha. 39Nikodim ongkha bw, aguo je oaisa horo Jisuni dayw phaijak, bw Josepbai baksa thangjak. Nikodim thok mutum bai mutumnaijar balai dalwi ser thamchi tham twtwi twbwgwi phaikha. 40Jerw bok Jisuni mang gwdanw Jihudi sudamni maping jekhalaywi mangkhorw phub omorokni maping mutum manwi rokbai mang gwdanw ri bechalabai dulkha.
41Jisunw jedayw kruso rwjak o jegani koreyw kwrwngsa bophang bwlwng tongw o bwlwngw katal mang khor khorsa tongw. Odayw tabokbw kaisani mang gwda tonjia. 42Twmwi himba o sal ongkha Jihudirokni ter jugalnai sal, tei o mangkhorbw koreyw tongo aithani bok Bwnw o mangkhoro tonkha.
ទើបបានជ្រើសរើសហើយ៖
Johon 19: TPE
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©️2025 Bible Students Fellowship of Bangladesh
