Johon 17
17
Sagrirokni bagwi Jisuni surimung
1Jisu o kokrok sagwi paywi chukha aita naisagwi sakha, "Apha, jora suphaikha, Nini Sajlanw chwngchuk khalaidi, Nini Sajlabw Nwnw chwngchuk khalainaitwi. 2Nwng Nini Sajlanw jotho borogni sakao bagri rwjak, Nwng jebwroknw Bwnw rwjak boknw Bw paiphlaiya langma rwmanaitwi. 3Tei imwse ongkha o paiphlaiya langma, je bok kaisachuchui kwbwi Kaitornw tei Nwng Jenw hoka O Jisu Khristonw siyw. 4Nwng Anw Je samungnw khalaini rwjak, obwnw pairwgwi Ang i hayungw Nwnw chwngchuk khalaijak. 5Tei tabok, o Apha, swngsar taknai aguo Nwngbai baksa Ani je chwngsacha tong o chwngsachabai Nini thaibugw Anw chwngchuk khalaidi.
6Swngsarni bisingni Nwng Anw je borogrokno rwha, Ang bokni dayw Nwng swrw o kothoyw saplangjak. Jabiyw bok Ninise tei Nwngse boknw Anw rwkha, arw bok Nini koktangni kosol himjak. 7Tabok bok siywi mankha, Nwng Anw jebw rwjak, omorok jotho Nini daini, 8twmwi himba Nwng Anw jebw phwrwngjak obwroknw Ang boknw rwjak, tei bokbw omoroknw yachagwi lajak. Bok kwbwinwbw sijak je Ang Nini dainise phaimani, arw paitokjak je Nwngse Anw hogw. 9Ang jothoni bagwi suridokya, matwr Nwng Anw jebwroknw rwjak bokni bagwise suridok, twmwi himba bok Ninise. 10Jebwrok Ani omorok jotho Nini tei jebwrok Nini omorokbw jotho Ani, arw Ang bokni bisingtwi chwngsacha manjak. 11Ang arw swngsarw tongalak, matwr bok i swngsarw tongnai, Ang Nini dayw phaidok. Kathar Apha, Nwng Anw je bwmwng rwjak, o bwmwngni pharanbai Nwng boknw rwkkhiya khalaidi. Chwng jetinjar baksa, obwtwijar bokbw baksa ongwi tongmanai twi. 12Ang bokbai baksa jeswk sal tongha oswk sal Nwng Anw je bwmwng rwjak o bumungni pharanbai Ang boknw rwkkhiya khalaywi phaijak. Keber jebwni yakchwm ongthai kok tong bini bader bokni bisingni arw kaisabw kamagwi thanjiya, kathar elembakni kok sohknaitwi. 13Matwr tabok Ang Nini dayw phaidok, swngsarw tongtwi tongtwi Ang imwroknw sadok, bok Ani tongthokmanw srai khlaywi mannaitwi. 14Ang boknw Nini phwrwngma roknw sajak. Matwr swngsar boknw naisliyw, twmwi himba bok i swngsarniya, jetinjar Angbw i swngsarniya. 15Ang boknw swngsar daini tilangdi hinwi Nwnw kabokdokya, matwr boknw o Sotanni daini rwkkhiya khailaidi hinwise kabokdok. 16Bok i swngsarniya jetinjar Angbw i swngsarniya. 17"Kwbwini bisingtwi Nini bagwi Nwng boknw juda khalaywi tondi, tei Nini koktangse kwbwi. 18Nwng jekhalaywi Anw swngsarw hojak, obwtwijar boknw Angbw swngsarw hoka. 19Tei bokni bagwi Ang saknw juda khalaywi tonjak, bokbw Nwnw mwnni bagwi kwbwi khalaywi juta ongmanaitwi.
20Tei Ang keber bokni bagwi suridok obwya, matwr bokni kok khanagwi jebwrok Ani sakao paitokma tonnw bokni bagwibw suridok. 21Bok jotho baksa ongnaitwi, Apha, jekhalaywi Nwng Ani dayw tong tei Angbw Nini dayw tongw. Bokbw Chini bisingw tongnaitwi jate Swngsar paitoknaitwi Nwngse Anw hogw. 22Tei Nwng Anw je chwngsacha rwjak, obwnw Ang boknw rwjak, Chwng jetinjar baksa, bokbw obwtwijar baksa ongmanaitwi. 23Ang bokni bisingw tei Nwng Ani bisingw, bok srai khlaywi baksa ongmanaitwi halai swngsar sinaitwi Nwngse Anw hogw, tei Nwng jekhalaywi boknw hamjajak arai khalaywi Anwbw hamjajak. 24"Apha, jebwroknw Nwng Anw rwjak, Ang naiyw Ang jedayw tong bokbw odayw tongmanaitwi. Tei swngsar chengnai aguo Nwng Anw hamjajak hinwi je chwngsacha rwjak o chwngsachanw bok nungnaitwi. 25Raidia Apha, swngsar Nwnw siya, matwr Ang Nwnw siyw, tei i sagri rokbw siywi mankha Nwngse Anw hogw. 26Nwng Swrw obwnw Ang boknw sajak, arw Ang ulobw boknw sagwi thangnai, halai Ani bagwi Nini je hamjakma tong, o hamjakma bokni bisingwbw tongnai, arw Angbw bokni bisingw tongnai.
ទើបបានជ្រើសរើសហើយ៖
Johon 17: TPE
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©️2025 Bible Students Fellowship of Bangladesh
