Johon 11
11
Lasarni thwima
1Lasar hinwi Bwithoniya kamini kaisa borog haya kalaijak. O kamio Moriyom bai bini bukhuk Marthabw tongo. 2I Moriyom ongkha o Moriyom je Subraini yathwyo thok mutum lukhalayoi sakni khanaibai Bini yathwi huturubwi rwjak. Je Lasarni hanya ongjak bw ongkha i Moriyomni takhuk. 3Aithani bini bukhukrok Jisuni dayw kotho rwgwi hokha, "Nwng jebwnw hamjak bw hanya kalaijak." 4I kok khanagwi Jisu sakha, "I hanya bini thwinaini bagwi ongjiya, matwr Kaitorni chwngsachani bagwise ongkha, imwni bisingtwi Kaitorni Sajlani chwngsacha saplang jaknaitwi. 5Jisu Martha, bini bukhuk arw Lasarnw hamjakgw. 6Matwr hekphwng Lasarni hanyani kok khanagwibo Jisu jerw tongdok odayw arw salnwi tongkha. 7Omo phaikhlai Jisu Bini sagrirokno hinka, "Himdi, chwng Jihudiyao philwi thanganw." 8Bini sagrirok saha, "Gusai, miya ukhilise odaio Jihudirok Nwnw holong kokni naijak. Nwng arwbw oro thani muchuo?" 9Imwni jobagw Jisu sakha, "Salw dam chinwi pohor tongo. Jwtini kaisachwk salni pohorw himw hai bw tukjagwi kalaiya, twmwi hinba bw hayungni pohor nungo. 10Matwr jebw horni andarw lama him bw tukjagw twmwi himba bini bisingw arw pohor tongya. 11I koknw sagwi paihalai Bw sakha, "Chini aphak Lasar thuoi paikha. Ang thangwi Bwnw sumchagwi tisanw." 12Sagrirok hinka, "Gusai, bw thuo halai bw gam ongno." 13Jisu Lasarni thwinai koknw se samani matwr bok bakha kakha Bw ai thunai koknwse sagw. 14Jisu aiphuo prai prai khaywi boknw sakha, "Lasar thwijak, 15arw Ang tongthokjakha nokhni bagwi twmwi himba jephuo Lasar thwywi thanjak aiphuo Ang odayw kwrwi jate nokh paitoknaitwi, himdi taboklai chwng bini dayw thanganw." 16Thoma jeni arw kwrwngsa bumung aphil, bw arw tongnai sagrirokno hinka, "Himdi chwngbw Bwbai baksa thangana, tei Bwbai baksa thwimannaitwi." 17Oro suywi Jisu siywi mankha salbrwini aguo Lasarno phubjak. 18Jirusalem daini Bwithoniya mail kainwibw chalya, 19arw kabangma Jihudirok Martha bai Moriyomnw bokni takhuk thwimani bagwi sotopma rwni phailaijak. 20Jephini Martha khanakha, Jisu phaidok, bw thangwi Bwbai malaiha, matwr Moriyom nuo achugwi tongha, 21Martha hinha, "Subrai Nwng idayw tongtilai ani takhuk thwiyamu. 22Matwr Ang siyw Nwng tabokbw Kaitorni dayw jebw binw Bw Nwnw omonw rwnw." 23Jisu Bwnw sakha, "Nini takhuk thangwi bachanw." 24Martha sakha, "Ang siyw bw paithakni salw arw thangwi bachanw." 25Jisu Marthanw sakha, "Angse teisakthang tei Angse langma. Ani sakao kaisaswkni paitokma tongo hingkhai bw thwiphwng thangwi tongnw, 26arw je kathang borog Anw paitok halai bw aro thwigalak. I kok ta nwng patituo?" 27Bw sakha, "Owk Subrai Ang paitogw swngsarw Jeni phaitai kok Nwng ongkha o Mosiho, Kaitorni Sajla. 28I koknw sagwi Martha bini bukhuk Moriyomnw ringni thangkha, tei thangwi saha, "Gusai phaiha, Bw nwnw ringkhodok." 29I kokno khanagwi Moriyom dogwi Bini dayw thangkha. 30Jisu aiphuobw kamio suiyaho, Martha jedaio Bwbai malaijak Bw aiphubw oro tongkho. 31Jephini Jihudirok jebwrok Moriyomnw sotoblaidok bok bwnw hairogwi nokni akhogoi thamani nungkha, aiphuo bok bini ulo ulo thangka. Bok bakha kaha Bw mangkhorw karapni thangdok. 32Jisu jedayw tong jephuo Moriyom odayw thangwi Bwnw nungkha aiphuo Bini yathwiyw kalaywi sakha, "Subrai, Nwng idaiyw tongtilai ani takhuk thwiyamu." 33Jisu jephini Moriyomnw tei bwbai baksa phainai Jihudi roknw karapmani nungkha, aiphini Bw duguchak ongwi kakha tei Bini kha khaula ongwi kakha. 34Bw swngkha, "Nokh bwnw bwrw tonjak?" Bok saha, "Subrai, Nwng phaidi naiphaidi." 35Jisu karabha. 36Jihudirok hinlaiha, "Bah Bw Lasarnw bwswk hamjak." 37Matwr bokni bisingni kaisa kainwi salaikha, "Jisulai kanani mokol phiyokjak, halai Bw ta Lasarnw thangrwgwi tonmayamu?"
Jisu Lasarnw langma rwkha
38Obwni bagwi Jisu arwbw kabang duguchak ongkha tei Bw khaula ongwi mangkhor koriyw thangkha. Omo kwrwngsa bugrung o bugrungni bukhok holong thaisabai phwngjak. 39Jisu saha, "Holongnw kwnwrwgwi tilangdi." Lasarni bukhuk Martha saha, "Subrai, tabok obw menamnw, twmwi hinba bw thwimani salbrwi kakha." 40Jisu saha, "Ang ta nwnw sajiya Nwng paitokhalai Kaitorni chwngsacha nungno?" 41Aiphuo bok holongnw kwnwgwi hokha. Jisu nokha aita naikhogwi Kaitornw saha, "Apha Nwng Ani kabokmanw khanaka aithani Nwnw hambai rwgw. 42Ang siyw, Nwng jwnwm Ani surimungno khanao matwr tabok Ang i koknw sadok idayw jebwrok bachagwi tongjak bok paitoknaitwi Nwngse Anw hogw." 43Omo paihalai Jisu kharang gara khaiywi ringkhoha, "Lasar, akhogwi phaidi!" 44Kwthwi Lasar o mangkhor daini akhogwi phaiha. Bini yathwi, yak kalok ri bechalabai rabjak arw makhangbw ri bechalabai khajak. Jisu sakha, "Bini ri bechala roknw khengwi rwdi tei bwnw thani rwdi."
Phorisi rokni kokchap
45Moriyomni dayw je Jihudirok phaijak bokni bisingni akkhuni borogrok, Jisuni i samung kotornw nungwi paitoklaiha. 46Matwr bokni daini kaisakainwi Phorisirokni dayw thangwi Jisuni i amok samungni koknw saithangkha. 47Aiphuo chontai ojarok arw Phorisirok hakra baichukni borogroknw baksa khalaywi ringkha. Bok kaisabai kaisa swnglaikha chwng tabok ta khalaitai? Bwlai kabangma amok samung tangdok. 48Jwtini chwng Bwnw arai khalaywi tongni rwgo, halai borogrok jotho Bwnw paitoklaino. Aiphuo Romiyorok phayoi chini nokthar arw chini dopharokno pairwnw." 49Matwr Kayapha hinwi bokni bisingni kaisa o bisini bagwi chongjak hakra chontaisa saha, "Nokh mwngsabw siya. 50Tei Nokh imwnwbw bijiya gam khalaywi naiya chini dophani jotho borog nachra ongmani solai kaisa borog thwimani gam." 51I kokno Kayapha je sakni daini sakha obwya, matwr o bisini bw hakra chontai ongjak. Aithani bw i baiskangni koknw sakha je Jihudi dophani bagwi Jisu thwini thangdok, 52arw keber Jihudi dophani bagwiya, matwr Kaitorni basa jebwrok sabrajagwi tongjak boknw thumwi baksa khalaini bagwibw. 53aithani o salni jora bok Jisunw buthalni bagwi kokchap khalaini nanglaikha. 54Aithani Jisu Jihudiya amchoini borogrokni dayw nungjanai jar khalaywi arw himniya thangniya, arw Bw o jega yakarwi panthar jila koreni Iphroyim thangwi paikha. Odayw Bw Bini sagrirokno lagwi tongkha. 55Jihudirokni yokma ter korio supaihalai jotho hani kabangma borog yokma terni aguo sudamni maping sakroknw kathar khalaini bagwi Jirusalemw thangkha. 56O borogrok Jisunw naitublaiha arw noktharw thangwi bok kaisabai kaisanw swnglailaiha, "I terw Bw ta phaitai? Nokh ta bakha ka? 57Chontai ojarok tei Phorisirok Jisunw rumannaitwi aithani bok i tholmanw rwjak je, Jisu bwrw tong omonw jwtini kaisaswk sio hingkhlai bw khamkham o kothonw boknw rwnaitwi.
ទើបបានជ្រើសរើសហើយ៖
Johon 11: TPE
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©️2025 Bible Students Fellowship of Bangladesh
