Prerit 25
25
Sakwlphani Phistoni sakangw Polni nalchir
1Phisto Jihudiya amchoyo phainai saltam jerw bw Kwisoriya auli daini Jirusalemo thangka. 2Odayw chontai ojarok tei Jihudi ojamarok bini dayw phaywi Polni baithe bokni nali saphaika. 3Bok Phistonw baithak khalaywi kabokkha bw boknw khakhamwi Polnw Jirusalemw ringkhonaitwi. Tamni himba bok lamagw huijagwi Polnw buthalni bagwi rainal khalailaijak. 4Matwr Phisto sakha, "Pol Kwisoriyagw chupjagwi tongjak tei angbw dogwi Kwisoriyagw thangnw. 5Nokhni bisingw kainwi kaitham oja angbai baksa phaithwk tei jwtini Polni mwngsa khatta tongw, hai bok omonw anw phunokthwk." 6Phisto Jirusalemw bokbai baksa sal chi twtwi tongha tei jerw Kwisoriyagw philwi thangka. Jerwni salw bw nalchir baichukgw achugwi Polnw bini sakangw twbwdi hinwi tholka. 7Jirusalemni phainai Jihudirok, Pol orw phaihalai bwnw kitingwi bachagwi bini baithe jatejar khatta rwni nangkha, matwr omorokni majra bok sakrokbw rwmaniya. 8Aiphuo Pol bini sakni phaiching chubagwi i kok sakha, "Ang Jihudirokni ikim eba nokthar eba Rom Habugrani baithe mwngsa khatta khalaijiya." 9Phisto Jihudiroknw khachang rwni bagwi Polnw sakha, "Nwng ta nayw Jirusalemw thangwi orw ani sakangw i kothoy rokni nalchir ongthwk?" 10Pol sakha, "Ang tabok Habugra Kwisorni nalchir baichugw bachagwi tongjak, irwse ani nalchir ongthai kalaiyw. Ang Jihudirokni baithe mwngsa khatta khalaijiya, i koknw nwng gam khalaywi siyw. 11Ang jwtini mathwinai jati mwngsachwk khatta khalaywi tongw hingkhlai ang thwini goseo. Matwr i Jihudirok ani baithe je khatta rwdok obw jwtini kwbwiya khalai bokni yagw anw kaisabw tisagwi rwmagalak. Ang Habugrani dayw kabokdok. 12Aiphuo Phisto bini komrai rwnai rokbai komrai khalaywi Polnw sakha, "Nwng Kwisorni dayw apil khalaijak, nwnw Kwisorni dayw honw!"
Phisto arw bugra Agrip
13Omwni saltam salbrwi jerw bugra Agrip tei Borniki Phistonw hamchang rwni bagwi Kwisoriyagw phaika. 14Bok orw kabangma sal hodok aithani Polni kothoyw Phisto bugranw sakha, "Philiks kaisa borognw irw alongw chubwi kalangwi thangjak. 15Ang jephuni Jirusalemo tongjak, o jorago Jihudirokni chontai ojarok tei Jihudi okara chakararok i borogni baithe kabang nali rwjak tei khatta ganang hinwi bwnw thwimwng senji rwni bagwi anw kabokjak.
16"Ang boknw sakha, 'Jephini kaisa borogni baithe arw kaisa mwngsachwk nali rw, hai bw jebw nali rwkha o borogni sakangw saknw khatta kwrwi hinwi majra rwni jur manya sak bwnw senji rwnai kok Romiyo rokni ikimw kwrwi.' 17O Jihudirok angbai baksa phaihalai ang lerya karwi bini jerwni salw nalchir khalaini hinwi achukkha tei ang o borogsanw ani sakangw twbwdi hinwi tholkha. 18Je borogrok bwnw khatta rwlaidok bok jephini kok sani bagwi bachalaikha aiphini ang jetinjar khalaywi oansokjak obwtwijar kono khatta bok rwliya, 19matwr bokni raidani kothoyw arw Jisu mwngwi kaisa borog jebw thwijak matwr Jebwnw Pol kathang hinwi piri o kothoyw kisa tokra tokri ongkha. 20I kothoyni komari tama khalaywi mannw obwnw bujiywi manya ongwi ang bwnw swngkha, 'Nwng tama Jirusalemo thangni muchuo arw odayw thangwi nini i kothoyw anw nalchir khalairwni nayw?' 21Matwr bw jephuo anw kabokkha bw Habugrani rai khanani nayw aiphuo Habugrani dayw hoyasak bwnw mwrwgwi tondi hinwi tholjak."
22Aiphuo Agrip Phistonw sakha,"Ang sakse i borogsani kok khanani muchugw."
Phisto sakha, "Khanap khananw."
Agripni sakangw Pol
23Jerwni salw Bugra Agrip tei Borniki birinpha ojarokbai tei aulini borog ojaroknw lagwi jolma jolsabai baichugw hablaikha. Phistoni thomwngbai Polnw odayw twbwgwi phaikha. 24Aiphuo Phisto sakha, "Bugra Agrip tei arw jebwrok irw thaibuk tong, nokh i borogsanw nungdok. Jotho Jihudirok Jirusalemw tei Kwisoriyagw ani dayw nalis rwphaijak arw chirigwi sajak je i borogsa arw thangwi tongthaiya. 25Matwr ang nungkha, thwinaini senji mannaini kosol mwngsa khatta bw khalaijia. Matwr jephini bw sakse Habugrani dayw apil khalaikha angbw bwnw Habugrani dayw honi hinwi thi khalaikha. 26Matwr ang Habugrani dayw suini bagwi mwngsa khatta naitubwi mandokya thani nokhni jothoni sakangw, baithak khalaywi bugra Agripni dayw bwnw twbwgwi phaikha, nokhbai kok salaywi bini kothoyw mwngsaswk suimanaitwi. 27Twmwi hinba ang simani maping chupjajak borognw nalchir baichugw honai aguo Habugranw bini khataroknw sirwthai kalaiyw."
ទើបបានជ្រើសរើសហើយ៖
Prerit 25: TPE
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©️2025 Bible Students Fellowship of Bangladesh
