Prerit 23
23
1Pol hakra baichukni borogni aita naikhogwi sakha, "Ani takhukrok, ang tabokbw kwkrwk khabokbai Kaitorni aita ani tangbai paledok." 2I koknw khanagwi hakra chontai Ononiyo, Polni kore kara jebwrok bachagwi tongjak boknw bini makhangw thapara rwdi hinwi tholkha. 3Aiphuo Pol Ononiyonw sakha, "Phatra, Kaitor nwnwbw bunai. Kerongni kosol ani nalchir khalaini bagwi nwng odayw achukjak, matwr anw budi hinwi tholwi nwng saklai kerongnal sapaikha." 4Jebwrok Polni koriyw bachagwi tongjak bok bwnw sakha, "Nwng Kaitorni hakra chontainw lachima phunokdok!" 5Aiphuo Pol sakha, "Takhokrok, ang bijiywi manjiya je, bw hakra chontai. Ang jwtini sitilai halai o koknw sayamw, twmwi hinba Kathar elembagw suijak tongw, 'Nokh dophani ojani baithe kok chaya tasadi.'" 6O hakra baichukni dagi kaisa Sodduki tei arw dagi kaisa Phorisi, i koknw siywi Pol hakra baichukni bisingw chirigwi sakha, "Takhukrok, ang kaisa Phorisi, tei Phorisini basa. Ani nalchir ongdok twmwi hinba ang khadungw tei paitogw je kwthwirok arwbw kathang ongwi bachanai." 7Bini i kokbai Phorisi tei Sodduki rokni bisingw kwija ongni chengkha. Obwbai hakra baichukni borogrok bagjagwi paikha. 8Twmwi hinba Soddukirok kwthwirok arw kathang ongnw hinwi paitokya, obwni bader bok suarirok tongw tei phala tongw hinwibw paitokya, matwr Phorisirok oboroknw paitogw. 9Aiphuo kabangma hurumuru ongkha tei Phorisi dagini kaisa kainwi raida phwrangsa bachagwi rak tokra tokri chengkha. Bok sakha, "Chwng i borogsani mwngsa khatta nungdokya. Jaijaini kaisaswk phala eba kaisaswk suari bwbai kok sajakna." 10O kwija athamara ongwi kasakha je, o birinpha kirikha bok Polnw gwda gwda khaywi pairwnwna. Bw sengkrakroknw tholkha bok thangwi borogrokni yapha daini Polnw yokrwgwi twbwgwi sengkrak nok dayw tilangnaitwi. 11Jerwni salni horw Subrai Jisu Polni koriyw phaywi bachagwi sakha, "Kharakdi, Jirusalemw nwng jekhalaywi Ani kothoyw yakumu rwjak obwtwi jar khalaywi Rom dayw nwng yakumu marwnai."
Polnw buthalni bagwi kokchap
12Jerwni salw phurung aita Jihudirok kwrwngsa kokchap khalaikha tei Polnw buthalyasak jora mwngsa chagalak tei nwngalak hinwi samai khalaikha. 13Brwichini kabang borog i kokchap khalaikha. 14Bok chontai ojarokni tei okara chakara rokni dayw thangwi sakha, "Polnw buthalyasak jora chwng mwngsabw chagalak tei nwngalak hinwi karak baiko khalaijak. 15Tabok nokh tei hakra baichukni borogrok baksa khalaywi i Polni khattani kothoyw gam khalaywi naini bagwi dosa rwgwi Polnw nokhni sakangw twbwni bagwi birinphani dayw kotho hodi. Pol irw phainai aguo chwng bwnw buthalni bagwi jugalwi tonglaikha." 16Matwr Polni bukhukni basala i kokchapni koknw khanagwi sengkrak nokgw thangkha tei Polnw o kothonw sakha. 17Pol aiphuo rasa sengkrakni oja kaisanw koriyw ringkhogwi sakha, "Nwng i chakwlwinw birinphani dayw tilangwi thangdi, twmwi hinba imwni mwngsaswk satai tongw." 18Aiphuo o rasa sengkrakni oja chakwlwinw tilangwi ojabirinphani dayw thangwi sakha, "Chubjajak Pol anw ringkhogwi hogwi i chakwlwinw nini dayw tilangdi hinwi sakha, twmwi hinba nini dayw imwni mwngsaswk satai tongw." 19Aiphuo o birinpha o chakwlwini yak rumwi pangkaisa tilangwi sakha, anw nwng ta sani nai?" 20O chakwlwi sakha, "Jihudirok thi khalaijak, Polni kothoyw arw gam khaywi kotho lani alangka dosa rwgwi khanap bwnw hakra baichukni sakangw tilangwi thani bagwi nwnw kaboknw. 21Nwng bokbai kok baksa ongthaiya, twmwi hinba brwichinibw kabang borog Polnw buthalni bagwi hujagwi naisingwi tongjak. Polnw buthalyasak jora o borogrok mwngsa chagalak tei nwngalak hinwi samai khalaijak. Bok jugalwi tongjak tabok keber nwng gosenainw naisingwi tongdok." 22O birinpha o chakwlwinw hamalai rwphini jorao imwnw tholkha, "Nwng anw jebw sajak obwnw kaisanwbw tasadi."
Polnw sakwlpha Philiksni dayw hokha
23Jerw birinpha bini rasa sengkrak ojarokni bisingni kainwinw ringkhogwi sakha, "Ranwi ujua sengkrak, snichi korai chalanai tei ranwi jathi gnang sengkraknw tini chuku joragw Kwisoriyao thangni jugaldi. 24Arw Polni bagwibw korairoknw jugalwi tondi jate bwnw kwchang khalaywi sakwlpha Philiksni dayw tilangmanatwi." 25O birinpha i koktun suikha:
26Ang, Klodiyo Lusiyo, kotor sakwlpha Philiksni dayw i koktun suidok. Ani hamchang yachakdi. 27Jihudirok i borogsanw rumwi buthalni naijak, matwr ang ani sengkrakroknw tilangwi thangwi bwnw yokrwgwi twbwkha, twmwi hinba ang sikha je bw kaisa Romni kamikai. 28Jerw ang sini naikha tani borogrok bwnw khatta khalaikha. Obwni bagwi bokni hakra baichuk dayw ang bwnw tilangwi thangkha. 29Ang sikha je, bokni raidani kerongnalni kothoy lagwi bok bwnw khatta gnang khalaikha, matwr thwini eba alongw thangnai kosol imwtwi jar khatta bini kwrwi. 30Jephuo ang sikha borogrok i borogsani baithe kokchap khalaidok loge loge ang bwnw nini dayw hokha. Jebwrok bwnw khatta khalaidok boknwbw ang tholmung rwkha bok bini khatani kothoyw nini dayw sanaitwi.
31Aiphuo sengkrakrok o birinphani tholmungni maping Polnw hor aita bokbai baksa Antipattri auli jora tilangwi thangkha. 32Jerwni salw bok korai bengnai sengkrakrokni logeyo Polnw hogwi sengkrak nokgw philwi thangkha. 33Korai bengnai sengkrakrok Kwisoriyao suywi koktunnw tei Polnw sakwlphani yagw abwi rwkha. 34Sakwlpha koktunnw poriywi Polnw bw jegani borog hinwi swngkha. Pol Kilikiya amchoini borog hinwi siywi manwi 35bw sakha, "Nwnw jebwrok khatta rwkha bok irw kasoknai jerw ang nini khattani kothoy khananw tei nalchir khalainw." Jerw bw bugra Herodni alongw Polnw chubwi mwrwgwi tongdi hinwi sakha.
ទើបបានជ្រើសរើសហើយ៖
Prerit 23: TPE
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©️2025 Bible Students Fellowship of Bangladesh
