Prerit 22
22
1Pol sakha, takhukrok tei Apharok tabok ang ani sakni phaising kok sanw, khanadi." 2Borogrok bwnw Ibriyo kokbai kok samani khanagwi phwrwk onglaikha.
Aiphuo Pol sakha, 3"Ang kaisa Jihudi. Ang Kilikiyani Tarso aulio achayw, matwr ang i auliose gara ongw. Gomoliyelni yathwi koriyw achugwise ang kabangma bisi jora chini hodaipiri rokni rwnai kerongnal thum khalaywi swrwngjak tei bw ongkhadwi ani phwrwngsai. Kaitornw khabomnai kothoyw tini nokh jekhalaywi srang phunokha ang sakbw arai khlaywi srangjak. 4Jisuni lamagw jebwrok him ang boknw satokma rwgwi kaisa kainwinw buthalwi pairwjak arw chala tei birok roknw rumwi alongw chubw. 5I kok je kwbwi, obwni sathai hakra chontai tei okra chakrarokni baichukni jotho. Obw tama ang bokni daini Damesko aulini Jihudi raidani ojamaroknw rwni bagwi koktung lajak arw obwtwijar borognw chubwi Jirusalemw twbwgwi senji rwni bagwi odayw thangdok. 6"Aiphuo diphwr ongni ongkha. Ang Dameskoni kori kara phainaini jerw atakkiya anw kitingwi chukhani kwrwngsa kwchwng por kalaikha. 7Ang hagw kalaikha arw khanakha kaisaswk anw sadok, 'Sol, Sol, tani nwng Anw satokma rwdok?' 8Ang swngkha, 'Subrai nwng swrw?'" Bw sakha, 'Ang Nasarotni Jisu, Jenw nwng satokma rwdok.' 9Jebwrok angbai baksa tong bokbw o pornw nungkha, matwr Jebw angbai kok sadok Bini koknw bok bijiniya. 10Aiphuo ang sakha, 'Subrai, ang ta khalaijanai?' Subrai sakha, 'Bachadi, Dameskogw thandi. Nini bagwi jebw thi khlaywi tonjak obw odayw nwnw sanw.'
11"Ani logenirok yak rumwi anw Dameskogw tilangwi thangkha, twmwi hinba o kwchwng porbai ang kana ongwi paikha. 12Jerw Ononiyo mwngni kaisa borog ani dayw phaikha. Bw Mosini kerongnal khabombai paleyw, arw odaini jotho Jihudirok bwnw rak borom khalaiyw. 13Bw ani koreyw phaywi bachagwi sakha, 'Takhuk Sol, nini nungnai pharan philwi phaithwk.' Tei aiphuose ang bwnw nungkha. 14Aiphuo Ononiyo sakha, 'Chini hodaipirini Kaitor nwnw saywi lajak jate nwng Bini muchungma sinaitwi, tei o Raidiasanw, kok ongkha Jisu Khristonw nungnaitwi arw Bini bukhokni kok khana mannaitwi. 15Nwng Bini sathai ongnai arw jebwnw nungjak tei khanajak jotho borogni dayw obwnw sadi. 16Tabok bachadi, tei lerya karwi baptismo ladi arw Jisuni mwngwi ringkhogwi nini sumsok sugwi pairwdi.'
17"Ang Jirusalemw philwi phaywi jephuo noktharw suri sandok aiphuo ang Kaitorni daini nung kwrwngsa nungkha. 18Ang nungkha Subrai angbai kok sadok. Bw anw sakha, 'Dodogwi khalai, tabok Jirusalem yakarwi thangdi, twmwi hinba Ani kothoyw nini yakumu rwnai idaini borogrok yachagwi lagalak.' 19Ang sakha, 'Subrai, i borogrok siyw, jebwrok Nwnw paitoklai boknw bugwi tugwi alongw chubni bagwi ang kwrwngsa thum nok daini kothe thum nugw thangw. 20Jephuo Nini sathai Stiphannw buthaldok aiphuo ang odayw bachagwi sathai rwjak, tei jebwrok bwnw buthaldok bokni ri chumnw mwrwkjak.' 21Aiphuo Subrai sakha, 'Nwng thangdi ang nwnw kachalw Bejihudi rokni dayw honai.'"
22Borogrok taising jora bini kok khanagwi tongjak, matwr jephuo Bejihudirokni kok sakha aiphuo borog rok kharang gara khlaywi chirigwi sani nangkha, "Bwnw buthalwi pairwdi, bw thangwi tongni chukya!" 23Bok jephini arai khlaywi chiriklaidok arw bokni basakni gadunw mithingwi nobarw hadurui tisadok. 24Aiphuo o birinpha sengkrak nokgw Polnw tilangwi thandi hinwi tholkha. Tani borogrok Polni baithe arai khlaywi chirikdok obwnw sini bagwi bw sengkraknw tholkha bwnw lathamsak bai bugwi kok swngdi hinwi. 25Polnw jephuo lathamsak bai buni bagwi khaka, aiphuo rasa sengkrakni oja bini koreyw bachagwi tongjak tei Pol bwnw sakha, "Jebwnw khatta ganang hinwi tabokbw thi khalaijiya imwtwijar kaisa Romiyonw lathamsak bai bunai ta nokhni bagwi ikimni maping samung ongdok?" 26I koknw khanagwi o rasa sengkrakni oja bini sakani gara birinphani dayw thangwi sakha, "Nwng siyw nwng ta khalaini thangdok? I borogsalai kaisa Romni kamikai." 27Aiphuo o birinpha Polni dayw phaywi sakha, "Anw sale nwng, nwng ta Romni kamikai?" Pol sakha, "Wk." 28O birinpha sakha, "Kodur rang pwisa rwgwi Romni kamikai ongnai bagri ang paikha." Pol sakha, "Matwr ang Romni kamikai ongwise achaijak." 29Jebwrok bwnw bini khattanw lagwi swngmwng swngni bagwi jugaljak bok i koknw khanagwi ukhum pang unslogwi thangkha. Jephugw biji mangkha je Pol kaisa Romni kamikai birinpha kirikha, arw bw bwnw khagwi tonkha.
Pol Jihudi ojarokbai kok sakha
30Jerwni salw Jihudirok tani Polni sakao khatta rwkha Romio birinpha obwnw sini naikha. Aithani bw Jihudirokni chontai ojaroknw tei hakra baichukni jotho borog roknw baksa khlaywi thum jalaidi hinwi tholkha. Jerw bw Polnw twbwgwi bokni sakangw bacharwkha.
ទើបបានជ្រើសរើសហើយ៖
Prerit 22: TPE
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©️2025 Bible Students Fellowship of Bangladesh
