Prerit 17
17
Thisolonikiyw Pol bai Sil
1Pol arw Sil Amphipoli arw Apolloniya auli bisingtwi khalaywi Thisoloniki aulio thangka tei o aulio Jihudirokni kwrwngsa thum nok tongw. 2Pol jwnwmni kosol o thum nogw thangka tei omoni jerw oaitham lengkhonai salw borogrok bai baksa kathar elembakni kok salailaikha. 3Bw borogroknw bijirwkha tei majra khalaika je, Mosihoni satokma buginai tei thwinai daini thangwi kasanai nangchuk ongjak. Bw sakha, "Je Jisuni kok ang nokhni dayw pirdok o Jisu ongkha Mosiho." 4I kok khanagwi kainwi kaitham Jihudirok paitogwi Pol arw Silbai daljaphaikha. O Jihudirokbai baksa kabangma Kaitor lobai Grik tei baithak baithak birokbw paitokkha. 5Matwr kothe Jihudirok risi kagwi hatini kabangma chaya borogroknw twbwgwi aulio hurumuru khalairwkha. Jerw bok Pol arw Silnw rutubwi Jasonni nugw khalwi phaika, boknw phatarni borog meche meche dayw twbwni bagwi, 6matwr boknw rutubwi manlainiya. Aiphuo bok Jason tei kainwi kaitham paitoai takhukroknw swpreywi tilangwi aulini nalchirai rokni dayw tilangkha tei chirigwi sakha, "I borogrok jotho jegao bedisa khalaywi berekdok tabok bok irwbw sukpaiha, 7arw Jason bini sakni nogw boknw phaiham rwkha. O jotho borogrok habugra Koisorni tholmani kebenkasu khalayw. Bok sagwi berekdok Jisu hinwi arw kaisa bugra tongw." 8I kokrok sagwi o Jihudirok nalchirai tei borogrokni kha onamao khibikha. 9Matwr bok Jason tei kotherok jabinni rang rwkhlai boknw yakarwi hoka.
Biroyagw Pol bai Sil
10Hor ongkhlai paitoai takhukrok Pol tei Silnw Biroyagw hoka. Odayw suiywi bok Jihudirokni thum nogw thangka. 11Thisolonikini Jihudirokni naikhlai Biroya aulini Jihudirokni bakha khalangkhula. Bok srangwi Kaitorni kok khanagw arw Pol jebw sajak omo kwbwi dwi omo naini bagwi bok jwnwm biti elembagw rutublayw. 12Obwni bagwi kabang Jihudi Jisunw paitoklaikha, omwni badebw kabang Grik birok arw chalarokbw paitoklaijak. 13Thisolonikiyoni Jihudirok jephuni khanaka Pol Biroyagw Kaitorni kok pirdok aiphuo bok orwbw thangka tei kothomani baithe phemolokha arw hurumuru khalaikha. 14Paitoai takhukrok loge loge Polnw twijlang koreo hoka, matwr Sil bai Timothi Biroyagw turukkha. 15Je borogrok Polnw lagwi thangjak bok Polnw Ethens aulio twbwkha. Omo paikhlai Pol bokni khuo Sil bai Timothinw sagwi hoka jeswk phari dodogwi bini dayw thangdi hinwi.
Ethens aulio Pol
16Pol Ethens aulio Sil arw Timothiyonw naisingwi tongjak, aiphuo o aulio jotho jegao kodur matai taini mukti nungwi bini kha karabwi kakha. 17Aithani bw thum nogw thangwi Jihudirok tei Kaitor lobai Grikrokbai kok salailaini rumkha arw jebwrok hatio phai bw bokbaibw sal biti kok salaini nangkha. 18Kaitham kaibrwi Ipikuriyo tei Istoyikiyo nungsik#17:18 nungsik Nungsik ongkha bok jebwrok langmani sema lagwi uansogw tei kok sagw. Imwnw Banglabai hinw Darsonik. Polbai tokra tokri khalaini nangkha. Bokni bisingni kaisa kainwi sakha, "I galua borogsa ta sani naidok?" Arw kaisa kainwi sakha, "Chwng bakha kaha bw buihani matai tainw lagwi kok sadok." Bok i koknw sakha twmwi himba Pol Jisuni kothoy tei kwthwi daini kathang ongwi kasanaini kothoyw pirdok. 19Aiphuo o nungsikrok Polnw Areyopagni malaichuk sakangw tilangkha. Odayw bok Polnw swngkha, "Nwng je katal phwrwngmanw rwdok omo tama, omwnw tama chwng simanwdwi? 20Twmwi himba nwng je kokrok sadok omw chini khunjuo otaijyo khanadok. Obwni bagwi i kokrokni sema ta omonw chwng sini naiyw." 21Bok i kok sakha twmwi himba Ethensni jotho borogrok tei o aulio tongnai buihani borogrok jwnwm katal katal kothoy lagwi kok sagwi tei khanagwi jora hogw. 22Aiphuo Pol Areyopagni malaichugw bachagwi sakha, "Ethens aulini borogrok, khanadi. Ang nungdok, nokh jotho kothoyw raidao khabomw. 23Twmwi himba ang berephini nokhni lobnai manwirok jephuo nungkha aiphuni imwtwijar kwrwngsa chakala ang nungkha orw suijak tongw, 'Siniya mataini bachungw.' Nokh siniya bade jenw loblaidok omoni kothoyw ang nokhni dayw pirdok. 24"Kaitor, Jebw i hayung tei odayw jebw jebw tong omorok jotho takjak, Bwse chukhani tei hayungni Subrai. Bw yagw taknai noktharw tongya. 25Bini borogni daini mwngsa nangya, obwni solai Bw sakse jothonw langma, hangala arw jotho nangnai manwi rwgw 26Bw kaisa borogni daini jotho dophani borogroknw takkha bok hayungni jotho jegao tongnaitwi. Bok baiphuni bwrw tongnw omonwbw Bw thi khlaywi tonjak. 27Jebwni bagwi Kaitor i samungnw tangkha omo ongkha Bw naikha borogrok Bwnw rutubnw, tei Bwnw naitubnaini bisintwi naitubwi mannw. Matwr Bw chini kaisanibw kachalwya, 28'Twmwi himba Bini pharanbaise chwng langma hogw, thangw himw tei kathang ongwi tongw.' Nokhni kaitham kaibrwi koluarokbw sajak, 'Chwngbw Bini basa.' 29Chwng Kaitorni basa hinwi chwng Kaitornw borogni yakni tangkwrwng tei pharanbai taknai rangchak, ruphai eba holongni mukti hinwi bakha kathaiya. 30Aguni borogrok i kwbwinw siya hinwi Kaitor bokni sumsok nungwibw nungya khalaywi tongjak. Matwr tabok Bw jotho jegani borogroknw kha phirokdi hinwi tholma rwdok. 31Twmwi himba Bw imwtwijar kwrwngsa sal thi khalaijak je salw Bw Bini chongjak borogni bisingtwi nirai khalaywi hayungni nalchir khalainai. Bw o borognw kwthwi daini kathang khalaywi tisagwi jotho borogni dayw imwni majra rwjak." 32Kwthwini kathang ongwi kasanai kok khanagwi borogrokni bisingni kaisa kainwi bukhok koiha, matwr arwrok sakha, "I kothoyw nini kok chwng arw khananw. 33Aiphuo Pol o malaichuk yakarwi thangka. 34Bokni bisingni kaitham kaibrwi borog paitokha tei Polnw rwkkha. O paituairokni bisingw Diyonusiyo hinwi kaisa tongw bw ongkha Areyopagni kaisa adong, Damaris hinwi kaisa birok tei bokbai baksa arw kaitham kaibrwi tongw.
ទើបបានជ្រើសរើសហើយ៖
Prerit 17: TPE
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©️2025 Bible Students Fellowship of Bangladesh
