Luke 9
9
Ozighi Mbed Lughu-iba Ɔdɔŋ
(Mattiu 10:5-15)
1Use gi Jisɔs okuh mbed izighi lughu-iba obɨno ufine gi, ɔnɔŋ ɔnɔ emu ulu ma ugra idibine evid-evid ima ndiɔk spirit izuŋɔ enwi ku ile inɔŋ igɔk ima omu elɔŋɔ.
2Onyi ɔzuŋɔ ima mbed ɔdɔŋ egekwrɔ Ugra Abazi elagha ekɔg ima omu elɔŋɔ.
3Jisɔs ɔdɔghɔ emu, “Egubei kpɔ sugi ku izaŋ evu-ou, eguzaŋa ma etu-izaŋ, ononu ekpe, ŋkilie. Eguga ɔkuk ma ukpughɔ use-ou.
4Onogu eluk uduŋ omu onwi sugi adra evu ebak kpa ku uvɔk onu su ikienwi tutu evu enyɔŋ ku uduŋ onu.
5Kini enwi uduŋ onu nume edra evu, ewɔŋɔ ku uduŋ onu. Onu kini evu ewuɔŋɔ, eluei ntite ukpe evu su nteseh abaŋa emu ku Abazi ma kpe-ikpe ɔnɔ emu, ibɔgɔku emu egibare ogid.”
6Ene emu mbed elagha nonu elɔuk ovid-evid ima uduŋ, ezuan edɨghe etu enɔ enwi elagha egɔk ima omu elɔŋɔ.
Herɔd Ɔluŋɔ Idigid Jisɔs
(Mattiu 14:1-12; Mark 6:14-29)
7Ini omu Herɔd, agri-igra ikpeghe Galilee egei abaŋa ovid kpɔ su Jisɔs ene, onyi evag su ɔmɔsɔ ene-ou; ndizuk emu edɔghɔ ku Jisɔs onu Jɔhn Ɔluɔk-onwi-mmɔŋ omu ɔsɔ ɔnyɔŋ ɔdi obod.
8Ndizuk enwi edɔghɔ, “Jisɔs onu prɔved Ilajah omu ɔsɔwuɔ ɔwuɔ ile”. Onuŋ enwi edɔghɔ ku onyi onu prɔved omu agakpa ku ɔnjɔŋ odighi ini omu ɔsɔ ɔnyɔŋ ɔdi uwem.
9Herɔd ozughu ku ile izighi ogu, “Ekime idinu Jɔhn, sia gu omi ŋgu ŋwɔu ima-ukiɔ mi ekpɨghe ubughu onu Jɔhn. Ene, nuŋu-onwi sonomu ŋgei awak-iwak nyɔ-nyɔ kpɔ mbaŋa onyi omu?” Ku ntak onu, onyi ɔluŋɔ idigid Jisɔs.
Jisɔs Ɔnɔ Tazin Enwi Itiŋ Ŋkilie
(Mattiu 14:13-21; Mark 6:30-44; Jɔhn 6:1-15)
10Ima apɔsul onu Jisɔs ɔgɔzuŋɔ ɔdɔŋ onu esɔ enyɔŋ ku izaŋ emu edi. Emu edɔghɔ Jisɔs ovid kpɔ su emu egene. Onu onyi ebei emu azaŋa aga gu ufɨne omu egre Bethsaida, omu emu ekime idibino ufine gi ovid emu.
11Onu kini otu enwi evag ebaŋa kpughu Jisɔs ma mbed izighi ega, emu egɔŋ ega non. Ku ini emu ezim, Jisɔs ɔbɔghɔ emu ma uni-ogid ɔnɔŋ ekpiek abaŋa ugra Abazi alagha ɔgɔk ima omu egelɔŋɔ.
12Ku ini ozim mbresi, mbed lughu-iba onu ezaŋa ekpine Jisɔs edinime ma Onyi ogu, “Ɔfɔŋ, mbɔk dɔghɔ otu enwi enyɔŋɔ, man emu ega ku ngan-ŋguk uduŋ ma ukɔ egeluŋɔ su elie ma ubi nna; ku ufɨne omu idɔŋɔ omu onu mkpakaŋa-izɔŋ.”
13Onu Jisɔs ɔdɔghɔ emu ogu, “Evu enɔ emu ŋkilie!” Emu ebrɔ, “Enyin su idine dighi ine-m? Inji nyiyoŋ uyo itɨŋ ma nyiyoŋ ɔfifɔ ayak iba. Ku efei ayak-an, enyin innji ŋkilie idinɔ ovid-evid enwi omu, akpatre idikagha igili.”
14Emu ezughu omu sia mkpɔ su tazin enwi nnini itiŋ egedɔŋɔ ku otu enwi-en. Jisɔs ɔdɔghɔ mbed izighi ene emu etei-etei aba-lughu ku utei, aba-lughu ku utei.
15Onu mbed enɔŋ ene sughu Jisɔs ɔgɔdɔghɔ, ovid enwi enɔŋ etei ku utei ku utei.
16Jisɔs ebei uyo itɨŋ ma ayak iba onu, ebei onji ose heaven, Onyi ɔkɔ Abazi ɔnɔŋ okpok uyo ma ayak onu mkpok-mkpok, ɔtɔŋɔ ayak ɔnɔ mbed izighi edegei enɔ otu enwi.
17Jisɔs ene ŋkilie onu ɔtɔd ku nyɔ-nyɔ odighi, ovid enwi elie sughu emu eluŋɔ, mbed esɔ etaŋ nyɔghɔ nzughɔ ŋkilie omu ɔyɔghɔ igad lughu-iba.
Peter Ene Evag Ku Jisɔs Onu Krais
(Mattiu 16:13-20; Mark 8:27-30)
18Use ki Jisɔs etei ɔbɔŋ agam onyi unɔgi, mbed izighi kpɔd-kpɔd egebak ekpine onyi. Ku ini onyi ɔbɔŋ agam egre, onyi obid emu, “Nzi ku enwi edɔghɔ ami nnu?”
19Mbed izighi ebrɔ, “Ndizuk enwi edɔghɔ ku ovu onu Jɔhn Ɔluɔk-onwi-mmɔŋ, omu ɔsɔdi obod, ndizuk enɔŋ edɔghɔ ku ovu onu prɔved Ilajah omu ɔsɔ ɔdi izɔŋ, ndizuk ima ogu edɔghɔ ku ovu onu ki ku otu ima prɔved omu egekpa odighi sok-sok omu ɔsɔ abak ku uwem ulagam.”
20Jisɔs obid mbed izighi, “Onu evu ku ilevu su egɔŋ edɔghɔ omi nnu oniŋi?” Peter ɔbrɔ onyi, “Ovu onu Krais omu osi Abazi.”
Jisɔs Ozughu Abaŋa Mkpa Ma Ezed-ized Izighi
(Mattiu 16:20-23; Mark 8:30-33)
21Jisɔs eneŋere ɔdɔd emu utɔŋ ogu, “Eguzughu unɔ onwi sugi-ou,”
22Ene onyi ebei ozughu ɔnɔ emu “Ku anazu omi Oyo Onwi mbɔghɔ uven ku awak-iwak itu-itu kpɔ. Ima ikpɨno enwi Jew ma ima ifɔŋ ikɔuw ma ima ekpiek-ibed ma ekɨn idiyime mi su Krais. Emu ma ewu mi, onu ku ɔyɨghɔ use ite, Abazi ma ene mi nzed ku mkpa.”
Su Odio ku Idigɔŋ Jisɔs
(Mattiu 16:24-27; Mark 8:34-38)
23Ene Jisɔs ɔdɔghɔ ovid enwi ogu, “Onwi sugi omu ɔluŋɔ idigɔŋ mi idinu mbed omi, anazu ŋkpɔ akpa-onyi, onyi makɨn su onyi ɔluŋɔ, ɔnɔŋ ebei krɔs izighi ku mbeŋ-ile idibɔghɔ uven ku-use ku-use ma ami, tutu ozim ku mkpa. Non ku onyi odikɨme idigɔŋ mi idinu mbed omi.
24Sia onogu onwi evu sugi ɔluŋɔ idinyiaŋa ukpɔŋ izighi ku oduobod omu, ma atɨba nzi-nzi uwem.
25Nzi uduh ku onwi odinji, onogu onyi onji ovid unji oduobod-em, onu ku utid uwem izighi, onyi atɨba nzi-nzi uwem ma Abazi?
26Onogu evu enji ekpeŋ ku idigɔŋ mi ma ukpiekpɔ mi, omi Oyo Onwi, ma nji ekpeŋ mbaŋa evu kini ndisɔ ndi izɔŋ ku uyima ufɔŋ ɔmi ma ku ufɔŋ onu Eti omi, ma ogonu ima elile enjel omu edizaŋa ma ami ididi.
27Omi nzughu akpanikwɔ nnɔ evu ku ndizuk evu omu ebɨno ku ubi emu mvin-em ma ede onji egid Ugra Abazi kpaŋa ekpa.”
Ukpughɔ-udid Onu Jisɔs Ku Ɔnyɔŋ Obod
(Mattiu 16:28-17:9; Mark 9:2-10)
28Ku kpɔ su use itɨŋ-ate ama egefei tɔŋɔ Jisɔs egekpiek kpɔ omu egre, Jisɔs ebei Peter, Jemz ma Jɔhn adian ile ede oniŋi aga ubɔŋ agam ku ɔnyɔŋ obod.
29Sughu Jisɔs ɔbɔŋ agam, onji izighi ɔkpughɔ, use izighi eleh alagha ezem su efie ikpe-ɔnyɔŋ.
30Ini gi ini gi, enwi iba ewuɔŋɔ ebino Jisɔs ku onji ela ezughu nsiŋi ma onyi, Emu egenu prɔved Mozes ma Ilajah, omu egebak ku eki.
31Emu ŋko egezug egɔŋ ela ezim-izem ezim-izem ku ntak ufɔŋ Abazi enɔŋ ezughu nsiŋi ma Jisɔs ebaŋa mkpa izighi omu odi ma sughu onyi odine kpɔ omu ɔwuɔzu sughu agazaŋa ma uduak Abazi ku uduŋ Jeruzelem.
32Su omu ezughu omu, Peter ma mbed iba ogu egekpa ma ileh, onu kini emu edizɔ, emu egid unyima ufɔŋ kile onu Jisɔs ma kile enwi iba omu egela ma Onyi.
33Kini omu Mozes ma Ilajah egeluŋɔ idilagha iyak Jisɔs, Peter ɔdɔghɔ Jisɔs ogu, “Ɔfɔŋ, ɔfɔ enyin idibak momu; mituak etɨn iteh, ki onji vi, ki onji Mozes, ki ɔnɔŋ onji Ilajah.” Peter ogozughu sonu sia gu onyi egevag su onyi ogozughu-on su ɔgɔwuɔ.
34Sughu Peter ozug aga nsiŋi ku inue, ntɔŋ-ɔnyɔŋ otu-ɔvuk emu; ubɨghe ɔyɔghɔ ima mbed ile idigid sughu ntɔŋ-ɔnyɔŋ ɔvuk emu.
35Ene Abazi ozughu nsiŋi ku ɔvɔghɔ ntɔŋ-ɔnyɔŋ ogu, “Omu onu emime Oyomi omu mmek, ekpaŋ-utɔŋ egei usi enɔ Onyi!”
36Kini omu Abazi ozughu nsiŋi egre, mbed egid Jisɔs onyi-unɔgi. Emu ekap inue ebaŋa ovid-evid su ogotibe ku ɔnyɔŋ obod-on, egenɔŋ ezughu enɔ onwi sugi ku ata ɔbuk-ibuk ini.
Jisɔs Ɔgɔk Uyo-etɔ Onwi-Eni
(Mattiu 17:14-21; Mark 9:14-29)
37Ogonu ku ndaŋ ŋgih, Jisɔs ma mbed izighi ite etɨghe ku obod esi edi, awak-iwak otu enwi edizɨbo ma Onyi.
38Inigi-inigi, onwi gi ku otu enwi-en ɔkpɔk okuh Jisɔs ogu, “Ekpiek-kpɔ, ŋkpe vi ubɔk, mbɔk ne kpɔ baŋa idinwam ŋkugre oyo omi nɔ mi.
39Ndiɔk spirit etei adak ɔtughɔre onyi, ku ulu-ulu onu onyi ɔkpɔk ukpeguŋ, ɔtɔŋɔ idituak otuitu tutu ɔzuŋɔ ofughu ku inue. Ndiɔk spirit eganji etughɔre onyi eti-eti-em, ewura eza onyi eyak-ou, alagha ɔvɔŋ onyi ile.
40Ŋkpeh ndizuk mbed ovu ubɔk ŋgu emu ebɨne ndiɔk spirit onu ezighi, onu emu egekime idine-ou.”
41Jisɔs ɔbrɔ, “Ou, emɨna unana mbuɔd-ile ku Abazi ma ima ene-udiɔk! Nzug mbak ma evu ku utɔ adaŋa ini-em nlagha njɔ unana mbuɔdile evu, onu kpa-kon evu inji mbuɔdile ku omi-ou!” Onyi nɔdɔghɔ onwi-en, “Bei oyo ovu di mom.”
42Sughu oyonu azaŋa ma eti odi obine Jisɔs, ndiɔk spirit onu ozighi onyi ɔtɔ ku izɔŋ ɔnɔŋ atuak onyi otuitu. Onu Jisɔs ɔwɔu ndiɔk spirit onu ogu aza onyi ayak. Onyi ɔgɔk oyo onu, ɔnɔŋ ɔdɔghɔ eti izighi, “Seh oyovu mu.”
43Ku ntak omu, ovid enwi egebak ku mkpa-ile idigid okpɨno uluh Abazi. Sughu ovid enwi ebak ku mkpa-ile ebaŋa utɨbe-kpɔ onu Jisɔs ene, onyi ɔdɔghɔ mbed izighi,
44“Ana evu eniŋenji ekpaŋ-utɔŋ elagha etuei su nzughu: Edibuk-ɔbuk-ou mmɔgu editeghe mi Oyo Onwi idio ku ubɔk ima ndiɔk enwi.”
45Onu mbed izighi egevag su nsiŋi omu ala ɔnɔ-ou, mkpɔmu ogolibi emu, ku ntak onu ene ubighe ɔgɔmuɔ emu idibid Jisɔs su nsiŋi omu ɔwuɔ.
Niŋi Ozonu Ŋkpo-ŋkeh
(Mattiu 18:1-5; Mark 9:33-37)
46Ku onyienu ama egefei, mbed onu Jisɔs etɔŋɔ idinji ununi ibaŋa onwi omu anasu onu okpe-kpe ku nlagha ku otu emu.
47Onu Jisɔs avak su agaganji ku ogid emu, onyi ɔmuɔ uyo-etɔ onwi-eni ki ɔwɔu ku ŋgaŋ izighi,
48Onyi ɔdɔghɔ mbed izighi ogu, “Onwi sugi omu adra uyo-etɔ somu ku enyiŋ omi, onyi adra mi. Ŋko onwi sugi omu adra mi, onyi adra Abazi omu ɔdɔŋ mi. Sia onwi omu ɔzughɔre ile ke ku otu evu, onyi onu ŋkpo-ŋke ku onji Abazi.”
Jisɔs Ezughe Ɔnɔ Ubaghare
(Mark 9:38-41)
49Jɔhn ɔdɔghɔ Jisɔs, “Ɔfɔŋ, enyin igigid onwi sughu ede enyiŋ ovu obɨne ndiɔk spirit ɔzuŋɔ enwi ku ile, onu enyin itɨme idikpan onyi sia omu onyi nume-zaŋa ku otu enyin.”
50Onu Jisɔs ɔdɔghɔ onyi, “Kukpan onyi-ou, ku onwi sugi omu nume-enwana ma evu, ala ma evu.”
Enwi Uduŋ Samaria Ekɨn Jisɔs
51Ku ini ama ogokpɨne omu anasu Abazi ɔsɔ ebei Jisɔs ɔnyɔŋ heaven, Onyi eniŋede onim ogid izighi ose idiga uduŋ Jeruzelem,
52Onyi ɔdɔŋ ima nzuŋ-uto efei onyi onji ega. Emu eluk uduŋ ki ku Samaria, ede onu su emu etɨm ubi su Jisɔs ma ima-ogu edibak ɔgɔesi onu.
53Onu ima Samaria egedra Onyi, sia ku emu edivak ku Jisɔs aga idituak ubughu inɔ Abazi ku Jeruzelem.
54Onu kini mbed izighi Jemz ma Jɔhn edivak kpɔm, emu ebid Jisɔs, “Ɔfɔŋ, ovu ɔluŋɔ enyin ikuh egaŋ etighe ku heaven odita enwi-em kpa sughu Ilajah egene?”
55Onu Jisɔs eliek ala ezughe ɔnɔ emu.
56Onyi nu ɔdɔghɔ emu, “Oyo-Onwi egedi idibiad uwem enwi-ou, onu idinyiaŋa emu.” Ndien emu ega onuŋ uduŋ.
Su Akpa Onwi Ku Idigɔŋ Jisɔs Su Mbed
(Mattiu 8:18-22)
57Sughu Jisɔs ma mbed izighi ezaŋa ku odighi ega Jeruzelem, onwi gi odidɔghɔ Onyi, “Ɔfɔŋ, ami ma nnu mbed ovu nlagha ŋgɔŋ vi kpughu ononu omu ovu aga.”
58Jisɔs ɔdɔghɔ onyi, “Ima aba-ukɔ enji uduŋ ku izɔŋ, ima unuŋɔ omu eya ku ɔnyɔŋ enɔŋ enji evɔk, onu omi Oyo Onwi onji uvɔk omu ndinde ndiak ubughu-ou.”
59Onu Jisɔs ɔdɔghɔ onuŋ onwi ogu, “Kɔŋ mi, dinu mbed omi.” Onu onyi ɔdɔghɔ Jisɔs ogu, “Ɔfɔŋ, ma ŋgɔŋ vi, onu yak nzaŋa-onji ŋga nluɔk eti omi kaŋa.”
60Onu Jisɔs ɔbrɔ onyi ogu, “Yak ima akpamkpa eluɔk ima akpamkpa. Onu munu ovu, ka kwrɔ nɔ ovid enwi baŋa Ugra Abazi.”
61Onu onuŋ onwi ŋgo ɔdɔghɔ Onyi ogu, “Ɔfɔŋ, ɔmi nluŋɔ idinu mbed ovu, onu yak nzaŋa-onji ŋga ŋkɔ ima uvɔk, yak ŋga ndi.”
62Onu Jisɔs ɔdɔghɔ onyi ogu, “Onugu onwi sugi omu ɔtɔŋɔ utɔ-ukɔ, onu onyi ɔzuk aganji idise adai, uto izighi odinu utuk-utak, omu ɔwuɔ ku onwi sugi omu onu mbed omi onu onyi ɔluŋɔ idisɔ ika ibine akan uwem izighi, edigɔd idine uto ku Uduŋ Ufɔŋ Abazi-ou.”
ទើបបានជ្រើសរើសហើយ៖
Luke 9: ORX
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Oro Bible by Beyond Translation is licensed under Creative Commons Attribution-ShareAlike 4.0 License.
