Luke 10
10
Jisɔs Ɔzuŋɔ Enwi Ete-Lughu Ɔdɔŋ
1Ku ima kpɔ omu ama egefei, Ɔfɔŋ Jisɔs emek enwi ete-lughu onuŋ, ɔnɔŋ ɔdɔghɔ emu ezaŋa enwi iba-iba Egeluk ovid-evid uduŋ ma ima ubi omu onyi egene mbeŋile idiga.
2Kpaŋa onyi ɔdɔŋ emu, onyi ɔdɔghɔ emu ogu, “Awak-iwak enwi ebeŋile idinim mi ku akpanikwɔ, onu enwi eewak omu enazu ezughu edighe etu omu enɔ emu. Emu elazu okpɨno ukɔ mkpogro omu obi idɔk, onu ima idɔk eewak omu anasu edibɔu emu. Ku ntak onu, ebɔŋ agam enɔ Abazi omu onu agrigra idɔk yak onyi ɔzuŋɔ ima eneuto ɔdɔŋ ku idɔk izighi.
3Ega edi, onu ekpaŋ utɔŋ, ŋzuŋɔ evu ndɔŋ su oyo-ɔrɔŋ ku otu ima ndiɔk enwi omu elazu aba-ukɔ omu ebeŋile idiluɔŋ evu.
4Egubei ekpe-ɔkuk, nonu ekpe-use, nonu onuŋ ikpe-uku, egunɔŋ ula ubiad ini idikɔ enwi ku ɔkpɔ-dighi.
5Uvɔk sugi omu evu eluk, ezaŋa-onji ediɔŋ uvɔk onu ogu, ‘Yak Abazi ɔnɔ ovid ima omu edɔŋɔ ku uvɔk ɔmu emem.’
6Onogu onwi omu eme emem abak nonu, ɔdiŋidiɔŋ emem evu ma ɔzughɔ ma onyi. Onu onogu onyi numenu onwi omu eme emem, onyi edibɔghɔ ɔdiŋidiɔŋ emem evu.
7Edio ma ima uvɔk onu, elie elagha enwɔŋ su ononu ogu emu enɔ evu, ku eneuto odo kpɔ oyo-uto osi ku su onyi ene. Eguzaŋa ku uvɔk enwi ugɔŋ.
8Ini sugi omu evu eluk uduŋ omu ima uduŋ onu edra odidi evu, elie su emu enim evu ku onji nonu.
9Egɔk enwi omu elɔŋɔ ku uduŋ-ɔn, elagha edɔghɔ emu, ‘Ini ugra Abazi okpɨne evu.’
10Onu ini sugi omu evu eluk uduŋ omu enwi uduŋ onu nume edra odidi evu, ewuɔ eluk eke-odighi omu enwi ekime idigei evu enɔŋ edɔghɔ emu ogu,
11Enyin igeŋ ntite izɔŋ uduŋ evu omu agadina enyin ku ikpeuku ibɨno ku izɔŋ ididɔd evu utɔŋ ku Abazi ma kpeikpe ɔnɔ evu. Kpa ma kon, iluŋɔ evu evag som ogu: ku Ugra Abazi okpɨne evu ile.”
12Jisɔs aganji ɔdɔghɔ, “Omi ndɔghɔ evu ku use omu Abazi odikpe-ikpe inɔ ovid enwi, onyi ma anwɨna onji mbɔm ma enwi uduŋ Sodom oke enwi uduŋ onu.”
Izai Omu Onji Uduŋ Omu Numeluŋɔ Ŋkibare Ogid
(Mattiu 11:20-24)
13Onu ma ɔdiɔk ma enwi uduŋ Korazin ma Bethsaida! Sia onogu mmu nne ku uduŋ ima Gentile omu onu Tyre ma Sidon ima utɨbe-kpɔ omu nne ku uduŋ evu, enwi emu emegɨbare ogid ŋwara-ŋwara tɔŋɔ ku ɔnjiɔŋ-ɔdighi ini. Emu emedɔŋɔ ntagha use etei ku ntɔŋ ede ewuɔ mvughɔ udiɔk-kpɔ emu.
14Onu ku use ubire-ikpeh, Abazi ma anwɨna onji mbɔm ma enwi uduŋ Tyre ma Sidon oke enwi uduŋ Korazin ma Bethsaida.
15Umunu evu, enwi uduŋ Capernaum, omu egre ku edagha evu egezɨm heaven, Abazi ma ɔzɔu evu ku izɔŋ tutu ku hell.
16Onyi ɔdɔghɔ mbed izighi, “Onwi omu ɔbɔghɔ edighe-etuh evu ɔbɔghɔ Mi, onyi omu ogɨn evu ogɨn Mi, onyi omu ogɨn mi okɨn Eti omi omu ɔgɔdɔŋ mi”.
Enwi Ete-lughu Enyɔŋ Edi Ma Idra
17Ku ima ini amagefei, enwi ete-lughu enyɔŋ edi ma idra ku izaŋ emu ezughu su otɨbe ɔnɔ emu ku izaŋ-uto-n enɔ Jisɔs egu, “Ɔfɔŋ, kpa ma ima ndiɔk spirit ezɔu ubughu enɔ enyin ku ulu ma uko enyiŋ ovu omu ide iwɔu emu izuŋɔ enwi ku ile.”
18Onu Jisɔs ɔdɔghɔ emu, “Ku ini onu ima ndiɔk spirit egei usi enɔ evu, ɔmi ŋgu-ŋgid Satan sughu osi ku heaven ku ŋke-ubɔk, ɔdughɔ su emineŋ-mineŋ.
19Ekpaŋ-utɔŋ enɔ mi, nnɔ evu ulu ididighi ɔnjiɔŋɔ ma ikpeyen, ma ulu idike ovid-evid ulu ima ezughe enyin Satan ku ukpe. Ndɔghɔ evu ku ŋkie-kie sugi ku odighi sugi edinɔ evu unan.
20Kpa ma ku onu, egudra ku omu ima ndiɔk spirit ezɔu ubughu enɔ evu, onu eniŋenji edra sia Abazi owid enyiŋ evu ku ŋwid izighi ku heaven.”
Jisɔs Adra Ku Spirit Ma Eti Izighi
(Mattiu 11:25-27)
21Ku ukem ini onu, Jisɔs egei uniogid omu osi Elile Spirit ɔnɔŋ ɔbɔŋ agam ogu, “Ou Etiemi, ovu onu Ɔfɔŋ ovid-kpɔ ku ɔnyɔŋ ma ku izɔŋ. Ŋkɔ vi ku omu ovu ogolib ima aka-ŋwid ma ima avag-kpɔ akpanikwɔ omu, onɔŋ ayaa emu ɔnɔ ima omu elazu nzek eyo-ntighitek. Ihn Eti, mvak ku onni vi ogid idine onyi ku odighi zomu”.
22Ene Jisɔs ɔdɔghɔ enwi ete-lughu onu ogu, “Eti omi ayak ovid-evid kpɔ odio ku ugra omi. Onwi sugi enɨŋenji evag su omi Oyo nnu ku efei ayak Eti-ou, onwi sugi ŋko enɨŋenji evag su Eti onu ku efei ayak omi Oyo-u, ma ima omu Oyo emek idiyaa Eti inɔ”.
23Jisɔs eliek ose mbed izighi ɔnɔŋ ɔdɔghɔ emu saŋa-saŋa ogu, “Abazi ɔdiɔŋ ovid evu omu egid ŋkpɔ su omi nne.
24Onu nzughu akpanikwɔ nnɔ evu ku awak-iwak ima prɔved ma ima ahta esi ogu egeluŋɔ idigid su evu egid omu ilagha igei su evu egei omu, onu egegɔd egid elagha egei”.
Ukeh Edɨghe Onwi Samaria
(Mattiu 22:34-40; Mark 12:28-34)
25Use gi, onwi ekpiek-ibed onu Mozes ki alagha ala ididɨme Jisɔs ma mbid ogu, “Ekpiek-kpɔ, nzi ku ndine Abazi ede ɔnɔ mi nzi-nzi uwem?”
26Jisɔs ɔbrɔ onyi, ogu, “Nzi ku ewid ku ibed onu Mozes ebaŋa onu? Ovu su agɨbare emu dighi?”
27Ekpiek-ibed ɔbrɔ Jisɔs ogu, “Ibed ɔdɔghɔ, ‘Ovu meh Ɔfɔŋ Abazi ovu ku ovid ogid ovu, ma ovid ukpɔŋ ovu, ma ovid ukime ovu, ma ovid ogugre ovu; lagha meh mbɔghɔ-uduŋ ovu sughu ovu eme ile ovu.’”
28Jisɔs ɔdɔghɔ onyi ogu, “Ovu ɔnɔ nnen-nnen ibrɔ. Onogu ovu egei usi alagha ene ima ibed onu, Abazi ma ɔnɔ vi nzinzi uwem,”
29Onu onwi omu ɔluŋɔ idiwuɔ ile sughu imu ivak-kpɔ, onyi obid Jisɔs, “Niŋionwi eniŋenji onu mbɔghɔ-uduŋ omi, ku odighi ibed?”
30Jisɔs ɔbrɔ onyi ma mbuk omu ogu, “Onji inigi omu onwi egene-izaŋ ku uduŋ Jeruzelem aga uduŋ Jericho. Ku ekedighi, ima inɔ egemuɔ onyi efai fabfab su onyi agaka elagha evɔŋɔ onyi use. Emu enmgbmay onyi enɔŋ ebiak elagha eyak onyi ku una ŋkpa.
31Ene, ɔkɔuw ima Jew gi omu ozug azaŋa odi idika Jericho ku eke-odighi onu. Onyi ogid onwien ma nnan ku ile sughu ana nonu, onu onyi azaŋa ŋgaŋ gi ekedighi ogu efei.
32Ku ukem odighi onu ŋgo, eneuto tempul, omu osi ɔkɔ Levite, odizɨm ufine onu, ɔnɔŋ ogid onwi onu sughu ana nonu, onyi azaŋa ku ŋgaŋ gi ekedighi ogu efei
33Ku akpatre, onwi Samaria gi omu ogozuk aka izaŋ, odizim kpughu onwi omu agana onu. Onu kini onyi ogid onyi ma nnan onu ku ile, onyi efei onyi isɨghe.
34Onyi azaŋa okpɨne onwi-en, ɔtɔghɔ ara ma mmi ɔdɔŋ ku nnan onu alagha ɔkwɔg (ede awra akpa), ede use ufuɔ-udu, ɔfuɔ onyi nnan onu. Ebei onyi odu ku ɔnyɔŋ anaŋ ubei-onwi izighi, ebei onyi aganim ku ubi uzɨbɔ, ozuk aganji ose kpɔ abaŋa onyi ovid ɔgɔesi onu.
35Ku ndaŋ ŋgi, kini omu onyi odinyɔŋ, onyi ozighi ɔkɔuk uto use iba ɔnɔ onwi omu ose kpɔ abaŋa ubi uzɨbɔ onu alagha ɔdɔghɔ onyi ogu, ‘Mbɔk seh kpɔ baŋa onwi omu nɔ mi. Su ononu ogu ovu odisɔ ibiad ike omu, kini nsɔ ndi, ami ma ŋkpei vi.’”
36Ene Jisɔs obid ekpiek ibed onu ogu, “Ku ogugre ovu, onuŋ ku otu enwi ite omu ku ovu ogre onu ata mbɔghɔ-uduŋ ɔnɔ onwi omu ɔgɔluk ubɔk ima inɔ omu?”
37Ekpiek ibed ɔbrɔ, “Onyi onu egefei onyi isɨghe osu sede anwam onyi onu.” Jisɔs ɔdɔghɔ onyi ogu, “Ka, nɔŋ ne kpa ukem onu ŋgo ma enwi.”
Jisɔs Agase Mary Ma Martha
38Jisɔs ma mbed izighi eganji ku izaŋ uka Jeruzelem emu. Ku ini omu emu ezɨm ɔvɔghɔ uduŋ gi; enwa gi omu egre Martha okuh emu edi okie ku uvɔk izighi.
39Martha ogonji eteghetek oyo-eke enwa omu egre Mary, omu egetei Jisɔs ku izɔŋ-izɔŋ uku ede akpaŋ utɔŋ ɔnɔ ukpiek-kpɔ Izighi.
40Onu Martha omu ogotɨm ile ma awak-iwak kpɔ ŋkilie onyi unɔgi aga-abine Jisɔs aga ɔdɔghɔ onyi ogu, “Ɔfɔŋ, ovu ugid ku oyo-eke omi ayak evid uto ɔnɔ mi nne ami unɔgi? Mbɔk, dɔghɔ onyi odinwam mi-e.”
41Onu Ɔfɔŋ Jisɔs ɔbrɔ onyi emem-emem ogu, “Martha, Martha, ovu afina ile alagha ayak awak-iwak kpɔ otɨmere vi.
42Onu onji kpɔ gi omu onu ata okpe kpɔ. Mary emek okpe kpɔ onu, omu onwi sugi numedibei ibɔghɔ onyi.”
ទើបបានជ្រើសរើសហើយ៖
Luke 10: ORX
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Oro Bible by Beyond Translation is licensed under Creative Commons Attribution-ShareAlike 4.0 License.
