Ma-thi-ơ 27
27
1Tơt aang, leq sêch bơl yau thwaai ndap ttơơm u bơl raanh ttơơm phung raih ri pơrgênh jmlôm ta wal kươi Brah Jê-sus jah lưm Pang. 2Bu kơt Pang, ja nei han jưn ndơơp aan yau tông Phi-lat.
Baak chhưt Ju-đa ri
(Kênh Kaar 1:18,19)
3Tơt Ju-đa, bah ndun Pang, sau Brah Jê-sus dol pơrkat nei rngơq kươi, kan pei jơt slưng prak plơq kươi aan bơl yau thwaai ndap ttơơm u bơl raanh ttơơm,#Kênh 1:18-19. 4baah mor laah: “Hei ja geh dôih đươm ndơơp mhaam 'bưn dôih!” Dôh bu ơh: “Kaar nei geh ta dơơh ơơn tơt bơl hei? Nei laa kaar 'bei ri.” 5Ju-đa jang prak teq u nhi r'bưn, hơơi plơq sot, han yôông kôw. 6Dôh bơl yau thwaai ndap ttơơm sach pal slưng prak u lah: “'Bưn kươt dơih prak au knông prak piyơ teq pôl nhi r'bưn laa 'bưn ta dip, đươm laa prak mhaam ri.” 7Bei nei, bu pơrgênh ta n'hai nhôq kaih nei jah pook pưng srei yau rak mon glaq ri jah rôôp tơơp raih daak agaih. 8Đươm rơ kheet nei baah pưng srei nei kươt chôôl laa Pưng Srei Mhaam aan tơt nar au. 9Bei nei, baak grnưt noor Jê-rê-mi ri mor kươt dip plak: “Bu pơih pei jơt slưng kaih, nei laa prak koon sau I-sra-ên ri ja waat aan Pang, 10u nhôq kaih nei jah pook pưng srei rak mon glaq ri, bei Brah ja tơmbơh aan hei.”#27:10 Baak krơơ kươi a au 'bưn geh leq sêch Jê-rê-mi ri, dôh lah di pơrgum pal rnđêch knông Sa 11:12,13; Jêr 32:6-15; 18:2-10 u 19:1-13. Awap đươm troop ơk huôih tơt Jê-rê-mi mơ kươt pơrgap n'hai Jê-rê-mi.
Brah Jê-sus di mat Phi-lat
(Mak 15:2-5; Lu-ka 23:3-5; Jang 18:33-38)
11Plah nei, Brah Jê-sus ta yoong di mat yau tông; yau tông ôp: “'Bei geh dip laa snđach raih Jo-thai 'bưn?” Brah Jê-sus ơh: “Nơơm 'bei ja lah bei nei.” 12Dôh tơt bơl yau thwaai ndap ttơơm u bơl raanh ttơơm pnđing Pang, Pang 'bưn ơh. 13Phi-lat ôp Pang: “'Bei 'bưn ttang laang gưt pal ntil bu lơh ndraanh jah wal 'bei?” 14Dôh Brah Jê-sus 'bưn ơh di baak ơơn jah lơh yau tông êêng aang đat.
15Tênh rnđơơih, tơt jơl nar ryơơng, yau tông krôih di mbu bnih gôq khaam tênh rnđêch raih. 16Plah nei, bu nha prap di mbu bnih gôq khaam lư bôôk chôôl chhak laa [Jê-sus] Ba-ra-ba. 17Bei nei, tơt bu pơrgum kươi, nei Phi-lat ôp: “Bơl 'bei êch hei krôih aan 'bơơn, [Jê-sus] Ba-ra-ba#27:17 [Jê-sus] Ba-ra-ba: Knông m'baak plơơp 'bian ti laa Ba-ra-ba. paich Jê-sus chôôl laa Krist?” 18Đươm bu gưt, đươm chưt skiêr mơ bơl bu ja ndơơp Pang. 19Gaaih nei, plah knông bu gôq pơrkat, sai ur bu aan bnih lôh ơh laah: “Dan khơơm pưt tơt bnih sêch song nei, đươm nơơm bnih baah mang bnau#27:19 S'bt: nar au, nar bnih Jo-thai ptơơm pơơk bôôk a 6 bêl mau nar noor. hei dol n'hông knông mbơơi.” 20Dôh bơl yau thwaai ndap ttơơm u bơl raanh ttơơm nôôl phung raih dan krôih Ba-ra-ba u lưm Brah Jê-sus. 21Yau tông kươi ôp: “Knông baar du au bơl 'bei êch hei krôih 'bơơn?” Bu ơh: “Ba-ra-ba.” 22Phi-lat ôp: “Bei nei hei phrui pơrkat bei êch n'hai Jê-sus chôôl laa Krist?” Bu pôl wưt ơh: “Pơng đênh lơ tơơm chhư rglaang!” 23Yau tông ôp: “Bnih au ja lơh ntil ap ơơn?” Dôh bu kươi troh ttih huôih: “Pơng đênh lơ tơơm chhư rglaang!”
24Bei nei, tơt Phi-lat sau nơơm 'bưn lơh ơơn kươt, kươi ring jah awap ksot wưu wao, mơ pơih daak n'hai rao ti di mat phung raih, ja nei mor: “Hei 'bưn dôih ơơn teq u mhaam bnih au; nei laa kaar bơl 'bei ri.” 25Leq phung raih kot ơh: “Dan mhaam bu ri khut lơ bơl hei u koon sau bơl hei!” 26Bei nei Phi-lat krôih Ba-ra-ba aan bu, u pơm sơmboong Brah Jê-sus, hơơi ndơơp Pang jah pơng đênh teq u chhư rglaang.
27Kơi nei, bơl lênh yau tông ri liêu Brah Jê-sus mưt nhi yau tông u ta pơrgum leq phung lênh rlum Pang. 28Bơl nei doh ao Pang u ja nei kơnđok aan Pang mlơm ao pơrhei, 29taanh mlơm môôk look u ndau lơ bôôk Pang, hơơi dơih tơơm taoruôi knông ti mak ma Pang. Bơl nei kơltut di mat Pang, đam điêl laah: “Ơi snđach raih Jo-thai!” 30Bơl nei chhoh brech lơ Pang, pơih tơơm taoruôi pơm teq u bôôk Pang. 31Di kươi ja pơchanh Pang, bơl nei doh teq ao, dook ao Pang ri, ja nei jưn han jah pơng đênh teq u chhư rglaang.
Brah Jê-sus dol pơng đênh
(Mak 15:21-32; Lu-ka 23:26-43; Jang 19:17-27)
32Plah han sot, bơl nei mơp di bnih Si-ren chôôl chhak laa Si-môn, u nhôp bnih au tung chhư rglaang Brah Jê-sus ri. 33Tơt di ktôk chôôl laa Gô-gô-tha, geh rơih laa Bnơm Tting Bôôk, 34bơl nei aan Pang ôn bih wat n'hai klơơm mat tang; dôh tơt ja liêp, nei Pang 'bưn ôn. 35Di kươi ja pơng đênh Pang teq chhư rglaang, bơl nei pool ta cheq khôw ao Pang ri. 36Hươi bơl nei gôq tu nei jah kray Pang. 37Mak lơ bôôk Pang teq di plơơp kơđaar 'bian dôih laah: “AU LAA JÊ-SUS, SNĐACH RAIH JO-THAI.” 38Plah nei, geh baar du ttung pôl dol pơng đênh n'hai Pang: di mbu a mak ma, di mbu mak giêu. 39Bơl han rloot nei kot đam điêl, ngich ngưr bôôk 40u mor: “'Bei lah bnih awap rươih nhi r'bưn ja nei sun kươi knông pei nar, phrui đoh êêng nơơm ơơi! Mơq ay laa Koon Brah Ưn, phrui jưr rlach chhư rglaang ơơi!”#Mat 26:61; Ja 2:19. 41Bơl yau thwaai ndap ttơơm, bơl yau gưt jhai u bơl raanh ttơơm kot đam điêl Pang laah: 42“Bu ja đoh bnih nday baah 'bưn geh đoh êêng kươt chhak nơơm. Bu laa snđach I-sra-ên! Bei au phrui teq bu jưr rlach chhư rglaang au ơơi nei bơl bơn a kươi jơ kơndaal. 43Bu chkhôm jơ Brah Ưn. Mơq Pang srlanh bu nei bei au phrui teq Pang đoh bu; đươm bu mor: ‘Hei laa Koon Brah Ưn.’” 44Baar du ttung pôl dol pơng đênh n'hai Pang kot raak pơchanh Pang bei nei.
45A lwah nar tam tơt pei bêl mau,#27:45 S'bt: A bêl ttal prau tơt bêl ttal sưn, awap laa bêl klap prau tơt bêl klap sưn. jơ ngôw rlum rleh jôm teh. 46Tơmlai pei bêl mau, Brah Jê-sus khuôl ttih: “Ê-li, Ê-li, lam-ma-sa-bach-ta-ni?” rơih laa: “Brah Ưn hei ri! Brah Ưn hei ri! A hay Ay lơơi teq hei?” 47Ttang bei nei, m'baak bnih ta yoong dơơh mor: “Bnih au khuôl Ê-li.” 48Di mbu bnih klung bơl bu tuôt drơh han pơih di ndêq kao blaang tơyuk bêêng daak sraat, jah teq lơ bôôk tơơm taoruôi u ndơơp aan Pang ôn. 49Dôh pal bơl nday kươi maanh: “Phrui kơp, mơq Ê-li geh lôh doh jraih bu 'bưn.”#27:49 doh jraih bu 'bưn: Knông m'baak plơơp 'bian ti laa đoh kwaai bu 'bưn. Ja nei ba nday pơih taak tap teq u rpaih Pang nei daak n'hai mhaam sot hoor. 50Brah Jê-sus khuôl ttih nha, hơơi kơsot wêêng yaang.
51U tôw, knat m'ang mak klung nhi r'bưn dol yah baar bôh a trôôk tơt teh, steh luônh lơgơh, tmau ttih a chah sot; 52pal kmôôch kchhaach kot pơơk pơrlơơt leq, ơk kmôôch bnih chhưt bơl jrah ri ja leq n'hơm kươt rêh kươi 53u sot rlach kmôôch. Di kươi Brah Jê-sus rêh kươi, bơl jrah nei han mưt poh jrah u tơrsau aan ơk bnih. 54Tơt kan bôôk raanh n'hai bơl lênh kray Brah Jê-sus, sau steh luônh lơgơh pôl ntil ơơn ja lôh sot nei bơm yoh hơt mrơt u lah: “A ngan, Bnih au laa Koon Brah Ưn.” 55Tu nei geh ơk dơur ta yoong mơq a ngngai. Bu laa bơl bnih ja tênh Brah Jê-sus a kwaal Ga-li-lê, jah lơh kaar Pang. 56Knông nak au geh Ma-ri Ma-đơ-len, Ma-ri mei Ja-kơ u Jô-sep, pôl n'hai mei baar koon klau Sê-bê-đê ri.
Baak rôôp tơơp Brah Jê-sus
(Mak 15:42-47; Lu-ka 23:50-56; Jang 19:38-42)
57Tơt mau jơ ngôw, geh di mbu bnih khunh a poh A-ri-ma-thê, chôôl chhak laa Jô-sep, kot lah jơrnơ Brah Jê-sus ri, 58lôh u Phi-lat n'hai dan pơih kmôôch Brah Jê-sus. Phi-lat maanh ndơơp aan bu pơih. 59Jô-sep pơih kơmôich u nhop dơng knat look jrah, 60hơơi dơih knông ktôk kmôôch mhei nơơm bu na ri baah bu ja aan 'boh tmau. Bu pơrlam di tmau ttih kơl bach lpôông kmôôch, ja nei du siq. 61Ma-ri Ma-đơ-len u Ma-ri nday geh mat tu nei, gôq rdang teq u kmôôch.
62Nar a ôi tơt, nei laa kươi nar Riêp, bơl yau thwaai ndap ttơơm u bơl bnih Pha-ri-si pơrgum kươi di mat Phi-lat, 63u lah: “Ơi kan ttih, bơl hei gênh bah lhiat 'boor au plah nha rêh geh mor: ‘pei nar a kươi Hei rêh kươi.’#Mat 16:21; 17:23; 20:19; Mak 8:31; 10:33-34; Lu 9:22; 18:31-33. 64Bei nei, dan kan ttih sot maanh lênh kray kmôôch aan tơt nar pei, daq bơl jơrnơ bu ri lôh ttung pơih kơmôich, hơơi mor n'hai jôm bnih laah ‘Pang ja a ktôk chhưt rêh kươi,’ u baak lhiat 'boor kươi nha jrươk huôih baak lhiat 'boor noor.” 65Phi-lat lah n'hai bu: “Bơl 'bei geh lênh kray, phrui han kray njrang kmôôch nhjrang tênh rnđêch bơl 'bei.” 66Bei nei bu han klbach teq kmôôch Pang u maanh lênh kray.
ទើបបានជ្រើសរើសហើយ៖
Ma-thi-ơ 27: SBL2024
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024 Bible Society Vietnam. All rights reserved.
