Ma-thi-ơ 26
26
Baak rngiêl, baak chhưt u rêh kươi Brah Jê-sus ri
(26:1 – 28:20)
Pơrgênh jmlôm bơl yau thwaai ri
(Mak 14:1,2; Lu-ka 22:1,2; Jang 11:45-53)
1Di kươi lah pal baak nei luôih, Brah Jê-sus mor n'hai bơl jơrnơ laah: 2“Bơl 'bei gưt nha baar nar dơq laa tơt nar ryơơng Chloong Rlach, u Koon Bnih a kươi dol ndơơp jah dol pơng đênh lơ chhư rglaang.”
3Plah nei, bơl yau thwaai ndap ttơơm u bơl raanh ttơơm knông phung raih pơrgum kươi tu nhi yau thwaai ttơơm chôôl laa Kai-phe 4jah pôl pơrgênh jmlôm ap baah nhôp u lưm Brah Jê-sus. 5Đươm bei nei, bu mor: “Khơơm a lơh knông nar ryơơng, daq bu root wưu wao knông phung raih.”
Brah Jê-sus kươt lơơm pring tu Bê-tha-ni
(Mak 13:3-9; Jang 12:1-8)
6Tơt Brah Jê-sus a nhi Si-môn, di mbu bnih dưn tu poh dêq Bê-tha-ni, 7geh di mbu dơur liêu di kwah bluk dơơm pring chhơm thlay prak lôh dơơh u Pang ja nei khut a lơ bôôk Pang plah knông Pang gôq tu bliêng sa.#Lu 7:37-38. 8Bơl jơrnơ sau bei nei hao nuih u mor laah: “A hay mhaach bei nei? 9Đươm awap tech pring au pơih kươt ơk prak, ơn jah jraih bnih l'ơơi.” 10Dôh Brah Jê-sus gưt ntil au mơ lah n'hai bơl jơrnơ: “A hay bơl 'bei lơh rngiêl bnih dơur nei? Bnih au ja lơh di kaar klanh aan Hei. 11Đươm bơl 'bei geh yoot bnih l'ơơi a rlum nơơm, dôh 'bưn geh khal êch kot geh Hei laang. 12Tơt khut pring lơ chhak jan Hei, mei dơur nei ja riêp aan kaar rôôp tơơp Hei. 13A ngan, Hei lah bơl 'bei, leq rlum play teh, paich ktôk êch Baak Sroong Klanh au kươt chhuôr nei kaar bnih dơur au ja lơh a kươi kươt krơơ ryơơng tơt bu.”
Ju-đa ndun Brah
(Mak 14:10,11; Lu-ka 22:3-6)
14Plah nei, geh di mbu bnih knông jmơt baar jơrnơ, chôôl chhak laa Ju-đa Ich-ka-ri-ôt, lôh mơp bơl yau thwaai ndap ttơơm 15u mor laah: “Bơl 'bei a kươi kah aan hei pal êch mơq hei ndơơp Bnih aan bơl 'bei?” Bu kah aan bah nei pei jơt plơơp prak. 16A plah nei, Ju-đa wơng phrui jah ndun Pang.
Riêp rap ryơơng Sa Griêng Jrah
(Mak 14:12-21; Lu-ka 22:7-13,21-23; Jang 13:21-30)
17Bei au, lap nar muôi ryơơng Nom 'Bưn Kenh, bơl jơrnơ lôh u Brah Jê-sus u mor laah: “Yau êch sa ryơơng Chloong Rlach a êch jah bơl hei riêp?” 18Pang ơh: “Phrui mưt u poh, lôh u di mbu mor n'hai bnih nei laah: ‘Yau maanh: Bêl Hei dơơh lôh, Hei u bơl jơrnơ a kươi joq ryơơng Chloong Rlach tu nhi 'bei ri.’” 19Bơl jơrnơ lơh dip bei baak Brah Jê-sus ja pn'ak baah riêp ryơơng Chloong Rlach.
20Tơt mang, Pang gôq sa n'hai jmơt baar [jơrnơ].#26:20 [jơrnơ]: Knông m'baak plơơp 'bian ti 'bưn geh pal sêr au. 21Tơt plah sa, Pang lah: “A ngan, Hei maanh bơl 'bei, di mbu knông bơl 'bei a kươi ndun Hei.” 22Bơl jơrnơ chhong rlmơng đat u drơh dreet ôp: “Ơi Brah, geh dip koon 'ei bơơh?” 23Pang ơh: “Bnih êch chlok koon ti teq giaam au n'hai Hei, a kươi laa bnih ndun Hei. 24Koon Bnih han bei ntil ja 'bian teq u Pang; dôh ji rngiêl aan bah ndun Koon Bnih! N'hop n'hal bah nei khơơm đôh laa nei huôih!” 25Ju-đa, bah ndun kơrlap ôp Pang: “Ơi Yau, geh dip hei 'ei bơơh?” Pang ơh: “Nơơm 'bei ja lah bei nei.”
26Tơt plah sôông, Brah Jê-sus pơih nom, or gun, u pak nom ndơơp aan bơl jơrnơ, ja nei lah: “Phrui pơih, sa ơơi! Au laa chhak jan Hei.” 27Pang kươi pơih tgaan, or gun, ja nei ndơơp aan bơl jơrnơ u lah: “Leq sêch bơl 'bei, phrui ôn ơơi! 28Đươm au laa mhaam Hei, mhaam baak pơrnơn ri ja chai aan ơk bnih kươt krôih dôih. 29Hei maanh bơl 'bei, Hei a kươi 'bưn ôn daak nho au hôm, aan tơt nar Hei a kươi pôl n'hai bơl 'bei ôn daak nho mhei knông nggoor Bươp Hei ri.”
Baak pơrjat aan Phi-e-rơ
(Mak 14:27-31; Lu-ka 22:31-34; Jang 13:36-38)
30Di kươi tapơt sm'bưt tư wơơl, Brah Jê-sus u bơl jơrnơ sot han, hao bnơm Ô-liu. 31Plah nei, Pang mor n'hai bu laah: “Mang au leq sêch bơl 'bei a kươi a kơq đươm u Hei, bei geh 'bian laah:
‘Hei a kươi pơm bnih gwaal,
U bưr knông phung a kươi a brơh.’
32Dôh di kươi Hei rêh kươi, Hei a kươi han tơt Ga-li-lê noor bơl 'bei.”#Mat 28:16. 33Phi-e-rơ ơh: “Paich leq sêch kot a kơq đươm u Yau nha, hei a kươi 'bưn khal êch baah a kơq.” 34Brah Jê-sus ơh laah: “Ngan, Hei maanh 'bei: Đươm mang au, di mat iêr ndrau, 'bei dmôw hei pei wưt.” 35Phi-e-rơ ơh: “Paich geh chhưt n'hai Yau, hei a kươi 'bưn dmôw Yau laang.” Leq sêch bơl jơrnơ kot mor bei nei.
Brah Jê-sus r'bon dan knông mir Gêt-sê-ma-nê
(Mak 14:32-42; Lu-ka 22:39-46)
36Kơi nei, Brah Jê-sus n'hai bơl jơrnơ han tơt di ktôk chôôl laa Gêt-sê-ma-nê. Pang maanh bu: “Phrui gôq tu au, plah knông Hei han r'bon dan a mak tôw.” 37Ja nei Pang liêu Phi-e-rơ u baar du koon klau Sê-bê-đê han pôl. Pang ptơơm chhong rmlơng u rhơq rpơq. 38Pang lah n'hai bu: “Wêêng yaang Hei chhong rmlơng aan tơt chhưt, bơl 'bei phrui gôq a au u kah rngeh n'hai Hei.” 39Han ngngai huôih di ndêq, Pang nkôp mat u teh r'bon dan: “Bươp ơi! Mơq awap kươt, dan aan tgaan au lơơi rlach koon! Paich bei nei, dôh 'bưn tênh rnđêch koon, baah tênh rnđêch Bươp.” 40Pang plơq kươi u bơl jơrnơ u sau bu nha bêch, nei mor n'hai Phi-e-rơ laah: “Bơl 'bei 'bưn kah n'hai Hei kươt di bêl laang? 41Phrui kah rngeh u r'bon dan jah bơl 'bei rôih rlach teq u baak lêch lung. Chưt nuih nei êch đat, dôh pêêk pai nei lhok lhơơi.” 42Pang kươi han wưt baar u r'bon dan laah: “Bươp ơi! Mơq tgaan au 'bưn geh prap kươt baah koon phrui ôn, nei dan rnđêch Bươp kươt but.” 43Ja nei Pang plơq kươi, sau bơl jơrnơ nha bêch, đươm pi mat bu ja ttrư ir. 44Bei nei, Pang lơơi bu, han r'bon dan wưt pei, u r'bon dan bei baak noor đêêl. 45Ja nei Pang lôh u bơl jơrnơ u mor teq u bu laah: “Bơl 'bei nha bêch n'hai rlu rlơk kươt nggan? Tôw, bêl ja lôh, Koon Bnih êch dơơh dol ndun ndơơp teq u ti bơl geh dôih. 46Phrui ta yoong, bơl bơn han. Tôw, bah ndun Hei ja lôh.”
Brah Jê-sus dol nhôp
(Mak 14:43-50; Lu-ka 22:47-53; Jang 18:3-12)
47Plah knông Brah Jê-sus nha mor, nei Ju-đa, di mbu knông jmơt baar jơrnơ lôh u di phung ơk kan pêh u tong jra đươm bơl yau thwaai ndap ttơơm u bơl raanh ttơơm phung raih ri maanh lôh. 48Bei au, bah ndun Pang ja aan bơl nei chmlih chmleek: “Mơq hei phêp 'bơơn, nei laa nơơm bnih nei; phrui nhôp kươi.” 49Ju-đa drơh lôh dơơh Brah Jê-sus u mor laah laah: “Chah Yau!” Hươi phêp Pang. 50Dôh Brah Jê-sus lah n'hai bu laah: “Au gnasaal, gnasaal waat êch lơh ơơn nei khang lơh ơơi!” Ja nei bơl nei lôh, u nhôp liêu Brah Jê-sus. 51U au, di mbu knông bơl bnih gôq n'hai Brah Jê-sus dơih ti lơ pêh ja nei hôt, pơm u sreh tech tôr dêch yau thwaai ttơơm ri. 52Brah Jê-sus mor n'hai bnih nei laah: “Phrui prap pêh teq smoop! Đươm 'bơơn kan pêh nei a kươi dol chhưt đươm pêh. 53'Bei kơn ơơn laah Hei 'bưn geh dan kươt Bươp Hei,u Pang a kươi kơndaal maanh di phung lôh aan Hei huôih jmơt baar lênh brah jah jraih Hei laang? 54Mơq bei nei lơh bei êch dip plak baak Sm'bưt Brah ja mor laah, kaar au phrui lôh tơt bei nei?” 55Kơndaal plah nei, Brah Jê-sus mor n'hai phung ơk laah: “A hay bơl 'bei liêu pêh u tong jra lôh nhôp Hei bei nhôp mbu bnih ttung bei nei? Rêêng nar Hei gôq kne knông nhi r'bưn, dôh bơl 'bei khah 'bưn nhôp Hei.#Lu 19:47; 21:37. 56Dôh jôm ntil au lôh tơt jah baak bơl grnưt noor klung Sm'bưt Brah kươt dip plak.” Plah nei, leq sêch bơl jơrnơ kot teq Pang tuôt kup.
Brah Jê-sus di mat Phung kliêu jưm mlưm
(Mak 14:53-65; Lu-ka 22:54,55,63-71; Jang 18:14,19-24)
57Bơl ja nhôp Brah Jê-sus liêu Pang lôh u nhi Yau thwaai ttơơm Kai-phe, ktôk bơl yau gưt jhai u bơl raanh ttơơm plah ta pơrgum. 58Phi-e-rơ han tênh Pang ngngai rngai, tơt tal lơwaang nhi bơl Yau thwaai ttơơm ri u mưt a klung gôq n'hai bơl kray nhi jah mơq ptut sot bei êch.
59Plah nei, bơl yau thwaai ndap ttơơm u sơp leq bơl phung kliêu Jưm mlưm kot wơng ndraanh lhiat ta wal kươi Brah Jê-sus jah lưm Pang. 60Dôh bu 'bưn wơng kươt ơơn leq, paich geh ơk bơl ta yoong sot lơh ndraanh lhiat. Ptut, geh baar du chwaat u gaaih 61pnđing laah: “Bnih au ja mor: ‘Hei rươih kươt nhi r'bưn Brah Ưn ri, ja nei Hei kơldơk kươi knông pei nar.’”#Ja 2:19. 62Yau thwaai ttơơm ta yoong u lah: “'Bei 'bưn ơh baak ơơn teq u pal pnđing pa bơl bnih au ri laang?” 63Dôh Brah Jê-sus nha ơt rngơt. Yau thwaai ttơơm kươi lah n'hai Pang laah: “Hei rơ maanh 'bei chong Brah Ưn rêh yoot baah daai u mor aan bơl bơn gưt, 'bei geh laa Yaang Krist, Koon Brah Ưn 'bưn?” 64Brah Jê-sus ơh: “Nơơm 'bei ja lah bei nei. Dôh Hei lah n'hai bơl 'bei,
Kơi au bơl 'bei a kươi sau Koon Bnih
Gôq mak ma Yaang dang kmheng
U gôq lơ duq trôôk pa lôh.”
65Plah nei, yau thwaai ttơơm yah ao nơơm u mor: “Bu ja mor đam. A hay bơl bơn nha chkhôm ndraanh lơh ơơn nha? Bơl 'bei ja ttang baak đam bu ri. Bơl 'bei gênh bei êch?” 66Bu ơh: “Bu dip jah chhưt!” 67Hươi bơl nei chhoh brech lơ mat Pang, pơm Pang. M'baak bơl nday taap Pang, 68u lah: “Ơi Yaang Krist, phrui mor grnưt noor aan bơl bơn ơơi! 'Bơơn laa bnih ja pơm 'bei bei nei?”
Phi-e-rơ dmôw Brah
(Mak 14:66-72; Lu-ka 22:56-62; Jang 18:15-18,25-27)
69Plah nei, Phi-e-rơ nha gôq a gaaih tal lơwaang. Mbu dêch ur lôh dơơh u mor: “Ay kot laa bnih gôq n'hai Jê-sus, bnih Ga-li-lê.” 70Dôh Phi-e-rơ dmôw kơndaal di mat jôm bnih laah: “Hei 'bưn gưt ay mor ơơn.” 71Tơt sot pưndai lpôông, mbu dêch ur nday sau Phi-e-rơ nei mor n'hai bơl bnih ta yoong dơơh nei laah: “Bu au gôq n'hai Jê-sus bnih Na-sa-ret.” 72Dôh Phi-e-rơ kươi dmôw u daai laah: “Hei 'bưn geh gưt yau bu nei.” 73Di rbôông kươi, bơl bnih ta yoong dơơh nei lah n'hai Phi-e-rơ laah: “Jap ngan 'bei kot laa mbu bnih knông bơl bu, đươm baak mor ay ri ja pnđing 'bei.” 74Dôh Phi-e-rơ pơđaai sa baah daai laah: “Hei 'bưn gưt bnih nei.” Kơndaal tu nei, iêr ndrau.
75Phi-e-rơ gênh kươi baak Brah Jê-sus ja mor: “Di mat iêr ndrau, 'bei a kươi dmôw Hei pei wưt.” Ja nei bu han sot u gaaih nhim ngliêng ji kôr.
ទើបបានជ្រើសរើសហើយ៖
Ma-thi-ơ 26: SBL2024
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024 Bible Society Vietnam. All rights reserved.
