Ma-thi-ơ 23
23
Brah Jê-sus têh gmhaar bơl yau gưt jhai u bơl bnih Pha-ri-si
(Mak 12:38,39; Lu-ka 11:43-46; 20:45-46)
1Plah nei, Brah Jê-sus lah n'hai phung raih u bơl jơrnơ laah: 2“Bơl yau gưt jhai u bơl Pha-ri-si kot gôq lơ grei Môi-se ri. 3Bei nei, phrui lơh tênh u prap ntil ơơn bu maanh bơl 'bei; dôh khơơm kơơt ntil ơơn bu lơh, đươm bu dơơn mor baah 'bưn geh lơh. 4Bu kơt u dap ntil jjơk jơl [rngiêl aanh]#23:4 [rngiêl aanh]: Knông m'baak plơơp 'bian ti 'bưn geh pal sêr au. lơ pilik bu nday, nha nơơm bu nei 'bưn pưt koon dong. 5Bu lơh kaar ơơn kot khom jah aan bu nday sau. Bei nei, bu lơh pal bliêng wan taq mbơl, klơơi rjai ao#23:5 rjai ao: Pal rjai ao au tơrsau baak aan êêng jah Brah Ưn. aan nhjoong;#Mat 6:1. 6bu êch gôq ktôk peh lư knông waal sa u pal grei peh thlay đat knông pal nhi pơrgum; 7bu êch kươt chah klung đôôn pơsaar u chôôl laa yau! 8Dôh bơl 'bei khơơm teq bnih êch khuôl bơn laa yau; đươm bơl 'bei dơơn geh mbu Yau, nha jôm bnih kot laa oh bi. 9Kot khơơm khuôl paich bnih êch a swich teh au laa bươp; đươm bơl 'bei dơơn geh di mbu Bươp, laa Yaang a lơ trôôk. 10Kot khơơm teq bnih êch khuôl bơn lah nnơơm; đươm bơl 'bei dơơn geh di mbu Nnơơm, laa Yaang Krist. 11'Bơơn laa bnih ttih huôih leq klung bơl 'bei a kươi lơh dêch bơl 'bei.#Mat 20:26-27; Mak 9:35; 10:43-44; Lu 22:26. 12Mơ 'bơơn lơơk chhak nơơm prêh êêng a kươi dol krich, nha bnih êch krich jưr êêng nơơm a kươi kươt lơơk prêh.#Lu 14:11; 18:14.
13Gmaak chhak aan bơl 'bei, bơl yau gưt jhai u bnih Pha-ri-si, laa bơl pưl baar taap! Đươm bơl 'bei tang lpôông nggoor trôôk di mat bu nday; bơl 'bei 'bưn geh mưt hơơi baah leet pơrkhaang bơl 'bơơn êch mưt dơơh. 14[Gmaak chhak aan bơl 'bei, bơl yau gưt jhai u bnih Pha-ri-si, lah bah pưl baar taap! Đươm bơl 'bei lơh rơi chôôl baak r'bon dan aan nhjoong, baah luônh nhi dơur pndrau; đươm nei; bơl 'bei a kươi dol phaat jjơk huôih.]#23:14 Knông m'baak plơơp 'bian ti 'bưn geh ndroong 14. 15Gmaak chhak aan bơl 'bei, bơl yau gưt jhai u bnih Pha-ri-si, laa bơl pưl baar taap! Đươm bơl 'bei han jôm daak rmưt u teh kơh jah liêu kươt di mbu bnih mưt baak jơ; dôh tơt bnih nei mưt baak jơ hôm, bơl 'bei lơh aan bnih nei but koon gưndrung ôinh ri huôih bơl 'bei nha.
16Gmaak chhak aan bơl 'bei, bơl liêu troong tiah klông, bơl 'bei maanh laah: ‘Mơq bnih êch chong nhi r'bưn baah daai nei 'bưn kaang ơơn; dôh mơq chong maih nhi r'bưn ri baah daai nei dol ayơơt.’ 17Ơi bơl kơrlung kơrlong tiah klông tôw! Maih paich nhi r'bưn lơh aan maih mơ jrah, pi êch peh thlay huôih? 18Bơl 'bei maanh laah: ‘Mơq bnih êch chong bliêng r'bưn baah daai nei 'bưn kaang ơơn, dôh mơq chong griêng lơ bliêng r'bưn baah daai nei dol ayơơt.’ 19Ơi bơl tiah klông! Griêng paich bliêng r'bưn lơh aan griêng mơ jrah, pi êch peh thlay huôih? 20Bei nei, bnih êch chong bliêng r'bưn baah daai nei laa chong bliêng r'bưn leq griêng lơ nei baah daai; 21bnih êch chong nhi r'bưn baah daai nei laa chong nhi r'bưn leq Yaang gôq tu ktôk nei baah daai; 22nha bnih êch chong trôôk baah daai, nei laa chong gơrnôq Brah Ưn ri leq Yaang gôq lơ gơrnôq nei baah daai.
23Gmaak chhak aan bơl 'bei, yau gưt jhai u bnih Pha-ri-si, laa bơl pưl baar taap! Đươm bơl 'bei piyơ di bôh jmơt klôih, krui rgơm u chhei m'om, dôh leet a wich pal baak kaar ttih đing huôih ch'bap laa soong klanh, chưt gmaak, u chưt jơrnơ. Bơl 'bei phrui lơh pal ntil au, dôh kot 'bưn kươt a wich pal ntil tôw. 24Ơi bơl liêu troong tiah klông, bơl 'bei sraang pi ruôi ja nei luônh pi seh joong kôw!
25Gmaak chhak aan bơl 'bei, bơl yau gưt jhai u bnih Pha-ri-si, laa bơl pưl baar taap! Đươm bơl 'bei rao jrơh mak gaaih giaam tgaan, dôh mak klung nei bơm bêêng baak m'oh n'haan u rtơp rtaap. 26Ơi bnih Pha-ri-si tiah klông! Noor leq, rao mak klung giaam tgaan, jah mak gaaih kot kươt jrah.
27Gmaak chhak aan bơl 'bei, bơl yau gưt jhai u bnih Pha-ri-si, laa bơl pưl baar taap! Đươm bơl 'bei bei pal kmôôch blaal book, mak gaaih bei lah klanh room, dôh mak klung nei bêêng tting bnih chhưt u jôm ntil jrơơk jrơơm.#Kênh 23:3. 28Bơl 'bei kot bei nei đêêl, mak gaaih lơh sot bei sêch song di mat bu nday, dôh mak klung nei bêêng baak đơơk đaak u pưl baar taap.
29Gmaak chhak aan bơl 'bei, yau gưt jhai u bnih Pha-ri-si, laa bơl pưl baar taap! Đươm bơl 'bei sun kmôôch bơl grnưt noor ri, lơh ei klanh kmôôch bơl bnih sêch song, 30u mor: ‘Mơq gôq pôl klap n'hai bơl yau yi, bơl hei jap 'bưn ta joq n'hai bu knông kaar lơh chai mhaam bơl grnưt noor.’ 31Bei nei, bơl 'bei ja lơh ndraanh êêng bơn laah nơơm laa koon sau bơl lơh lưm bơl grnưt noor. 32Bei nei, phrui khut aan bêêng pi weh dôih 'baap yau yi bơl 'bei ri ơơi! 33Ơi til bêh, mbaang bêh khih tôw, lơh bei êch bơl 'bei rôih rlach baak phaat klung gưndrung ôinh kươt?#Mat 3:7; 12:34; Lu 3:7.
34Bei nei, Hei maanh bơl grnưt noor, bơl bnih jhai blau, bơl yau gưt jhai lôh u bơl 'bei nei bơl 'bei a kươi lưm u pơng đênh bơl bnih au lơ chhư rglaang, pơm sơmboong bơl bnih nday knông nhi pơrgum u nhôp kơt bu a poh au tơt poh tôw, 35jah aan mhaam leq sêch bơl bnih sêch song ri ja hoor chai a swich teh kot khut lơ bơl 'bei, a mhaam 'bưn dôih A-bên ri aan tơt mhaam Sa-cha-ri koon klau Ba-ra-chi, bnih baah bơl 'bei ja lưm a lwah Ktôk Jrah u bliêng r'bưn. 36A ngan, Hei maanh bơl 'bei, leq sêch pal ntil nei a kươi lôh tơt aan klap au.”
Baak khwaich srlanh aan Jê-ru-sa-lem
37“Ơi Jê-ru-sa-lem, Jê-ru-sa-lem! 'Bei lưm bơl grnưt noor u jang tmau bơl bnih kươt maanh lôh u 'bei! Gưt pal wưt Hei êch pơrgum koon sau 'bei bei iêr mei kruk koon nơơm, m'ang a teh pnar dôh bơl 'bei 'bưn êch! 38Au, nhi bơl 'bei a kươi but rhông rhaang! 39Đươm Hei maanh bơl 'bei, bơl 'bei a kươi 'bưn sau Hei hôm, aan tơt khal êch bơl 'bei mor: ‘Tư wơơl Yaang tơmoh chhak Brah baah lôh!’”
ទើបបានជ្រើសរើសហើយ៖
Ma-thi-ơ 23: SBL2024
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024 Bible Society Vietnam. All rights reserved.
