Ma-thi-ơ 22
22
Pn'geh ruk teq u kliêr
(Lu-ka 14:15-24)
1Brah Jê-sus nhôq pn'geh ruk lah n'hai bu: 2“Nggoor trôôk bei mbu yau snđach tôw bơ kaar kliêr aan koon nơơm. 3Snđach maanh dêch han tơmbơh bơl bnih kươt siêr han joq sa kliêr, dôh bu 'bưn lôh. 4Snđach kươi maanh bơl dêch nday u pn'ak laah: ‘Phrui mor n'hai bơl bnih kươt siêr: Tôw, griêng sa ja riêp luôih, pi gôw u pai lmong ja lơh pai luôih hơơi, jôm ntil ja leq. Phrui lôh joq sa kliêr.’ 5Dôh bu 'bưn agleng ơơn tơt baak siêr, bu lơơi du: bnih han sot pưng srei, bnih han tech brôw, 6nha bơl bnih nday nei nhôp bơl dêch snđach ri, gôq rêh kn'hih tưih, ja nei lưm chhưt. 7Snđach hao nuih, maanh bơl lênh lưm luôch bơl lưm bnih nei u chhu poh bu ri. 8Kơi nei, snđach lah n'hai bơl dêch: ‘Sa griêng kliêr ja riêp srap, dôh bơl bnih kươt siêr 'bưn geh 'bơơn klanh dip jah joq. 9Bei nei, phrui han sot pal troong rôông, mơ mơp 'bơơn đôôi, phrui siêr lôh joq sa griêng kliêr.’ 10Bơl dêch han jôm pal blet troong, pơrgum leq sêch bơl bnih êch bu amơp, 'bưn chưrleek klanh, ap. Bei nei, lwing sa griêng bêêng leq bnach. 11Dôh tơt snđach lap mơq bnach joq sa griêng, sau mbu bnih 'bưn dook khôw ao sa griêng kliêr 12nei mor n'hai bnih nei laah: ‘Au gnasaal, lơh troong êch gnasaal 'bưn dook khôw ao sa griêng kliêr baah leet mưt au kươt?’ Bnih nei rngơt 'bưn ơh. 13Snđach tơmbơh aan bơl dêch: ‘Phrui kơt jơng ti bu lơơi u jang teq ktôk jơ ngôw mak gaaih, ktôk a kươi geh nhim ngliêng u kap chhêk.’#Mat 8:12; 25:30; Lu 13:28. 14Đươm ơk bnih kươt khuôl, dôh ndêq bnih kươt sach.”
Baak kaar ndơơp wal suai aan Sê-sa
(Mak 12:13-17; Lu-ka 20:20-26)
15Bei au bơl bnih Pha-ri-si han sot, pơrgênh jmlôm jah wak dak Brah Jê-sus klung baak mor. 16Bu maanh bơl jơrnơ nơơm u bơl bnih tênh thap Hê-rôt lôh ơh n'hai Brah Jê-sus laah: “Ơi Yau, bơl hei gưt Yau laa bnih soong klanh u kne troong han Brah Ưn ri troong angan anguôn, 'bưn chhonh 'bơơn, đươm Yau 'bưn mơq mak gaaih bu nday ri. 17Bei nei, dan Yau aan bơl hei gưt baak grơninh: Kaar ndơơp wal suai aan Sê-sa#22:17 Sê-sa: Au lah chhak lư snđach teh daak Rô-ma ri. geh dip ch'bap paich 'bưn?” 18Dôh Brah Jê-sus gưt gơrninh ap bu ri mơ ơh laah: “Ơi bơl pưl baar taap, a hay bơl 'bei tuul Hei? 19Phrui aan Hei mơq di slưng prak ndơơp wal suai.” Bu liêu aan Pang di đơ-ni-ê. 20Pang ôp: “Gui u chhak au 'bơơn ri?” 21Bu ơh: “Sê-sa ri.” Pang lah: “Bei nei phrui plơq aan Sê-sa ntil ơơn Sê-sa ri, u phrui plơq aan Brah Ưn ntil ơơn Brah Ưn ri.” 22Tơt ttang baak nei, bu êêng aang u teq Pang baah du.
Rkhech teq u baak rêh kươi
(Mak 12:18-27; Lu-ka 20:27-40)
23Pôl nar nei, bơl bnih Sa-đu-sê, laa phung bnih aan laah 'bưn geh baak rêh kươi, lôh n'hai Pang u ôp:#22:23 bơl bnih Sa-đu-sê... n'hai Pang u ôp: Knông m'baak plơơp 'bian ti laa bơl bnih Sa-đu-sê, laa phung bnih aan lah 'bưn geh baak rêh kươi, lôh u Pang n'hai ôp.#Kênh 23:8. 24“Ơi Yau, Môi-se geh mor: ‘Mơq di mbu chhưt dôh 'bưn geh koon nei bnih oh klau phrui pơih sai ur pndrau bi ri jah geh koon tơrbuôt mbaang aan bi bơn.’ 25Bei au, knông bơl hei geh poh ndu oh bi; bi 'boong pơih sai ur, ja nei chhưt, dôh nh'ơơm geh koon mơ teq sai ur lơơi aan oh. 26Bnih ttal baar, ttal pei, aan tơt ttal poh kot bei nei. 27Ptut, bnih dơur kot chhưt. 28Bei nei, tơt rêh kươi, bnih dơur nei a kươi laa sai ur 'bơơn ri klung poh du? Đươm leq sêch kot ja pơih mei nei.” 29Brah Jê-sus ơh: “Bơl 'bei a sup hơơi, đươm bơl 'bei 'bưn gưt Sm'bưt Brah, kot 'bưn gưt dang kmheng Brah Ưn ri. 30Đươm tơt rêh kươi, bu nday a kươi 'bưn geh kliêr sai ur kot 'bưn pơih sai klau hôm, dôh bei lênh brah lơ trôôk nei. 31Nha teq u baak rêh kươi bnih chhưt ri, bơl 'bei nh'ơơm chôôl baak Brah Ưn lah: 32‘Hei laa Brah Ưn Ap-ra-ham ri, Brah Ưn I-sak ri, Brah Ưn Ja-kôp ri’ 'bưn laang? Pang 'bưn geh laa Brah Ưn bơl chhưt ri, dôh laa Brah Ưn bơl bnih rêh ri.” 33Tơt phung raih ttang baak au, bu êêng aang đat teq u baak kne Pang ri.
Baak ch'bap peh thlay đat
(Mak 12:28-34; Lu-ka 10:25-28)
34Tơt ttang mor Brah Jê-sus ja lơh aan phung Sa-đu-sê phrui rngơt wiêm nei bơl bnih Pha-ri-si pơrgum kươi. 35Mbu yau rpach knông phung bu ôp trach baak jah tuul Pang: 36“Ơi Yau, knông ch'bap, baak ch'bap êch peh thlay huôih?” 37Brah Jê-sus ơh: “‘'Bei phrui leq chưt, leq wêêng yaang, leq chưt gơrninh baah chuh srlanh Brah laa Brah Ưn 'bei.’ 38Nei laa baak ch'bap daak bôôk u peh thlay huôih leq. 39Nha baak ch'bap ntil baar kot bei nei đêêl: ‘'Bei phrui srlanh bnih a gêêng bei srlanh chhak nơơm.’ 40Leq sêch ch'bap u baak grnưt noor kot pơchhing teq u baar ntil au.”#Lu 10:25-28.
Yaang Krist n'hai snđach Đa-wit
(Mak 12:35-37; Lu-ka 20:41-44)
41Knông plah bơl bnih Pha-ri-si ta pơrgum kươi, nei Brah Jê-sus ôp bu laah: 42“Bơl 'bei gênh bei êch teq u Yaang Krist? Pang laa Koon 'bơơn?” Bu ơh: “Koon snđach Đa-wit.” 43Pang ôp: “Bei nei, lơh bei êch snđach Đa-wit plah kươt Brah Wêêng trôih leet khuôl Pang laa Brah u mor laah:
44‘Brah lah n'hai Brah hei:
Phrui gôq mak ma Hei,
Aan tơt jơl Hei dơih bơl kmang 'Bei a teh jơng 'Bei’?
45Mơq snđach Đa-wit khuôl Pang laa ‘Brah’ nei lơh bei êch Pang laa koon snđach nei kươt?” 46'Bưn geh 'bơơn awap ơh kươt di baak, u kot a nar nei, 'bưn geh 'bơơn baanh ôp Pang ntil ơơn hôm.
ទើបបានជ្រើសរើសហើយ៖
Ma-thi-ơ 22: SBL2024
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024 Bible Society Vietnam. All rights reserved.
