Ma-thi-ơ 20
20
Bnih bơ kaar knông mir nho
1“Nggoor trôôk bei mbu nnơơm mir nho tôw, aang ôi han sot buôn bnih bơ kaar knông mir nho nơơm ri. 2Di kươi ja mor chhuôr n'hai bơl bnih bơ kaar jôm nar kah di đơ-ni-ê, yau nnơơm maanh bu han mưt mir nho. 3Tơmlai sưn bêl ôi,#20:3 S'bt: bêl ttal pei, awap laa bêl klap pei. yau nnơơm sot agaih, sau bơl bnih nday 'bưn lơh ơơn plah ta yoong knông pơsaar 4nei maanh bu laah: ‘Bơl 'bei phrui han mưt mir nho hei jah lơh kaar, hei a kươi kah prak dip aan bơl 'bei.’ Bu han drơh. 5Tơmlai jmơt baar bêl nar tam,#20:5 S'bt: bêl ttal prau, awap laa bêl klap prau. u pei bêl mau,#20:5 S'bt: bêl ttal sưn, awap laa bêl klap sưn. yau nnơơm sot agaih dơơh, u kot lơh bei ơơm. 6Tơmlai pram bêl mau,#20:6 S'bt: bêl ttal jmơt muôi, awap laa bêl klap jmơt muôi. yau nnơơm han sot u sau bơl bnih nday nha ta yoong nei lah n'hai bu laah: ‘A hay bơl 'bei ta yoong rơi a au leq nar bei nei?’ 7Bu ơh: ‘Đươm 'bưn geh 'bơơn buôn bơl hei laang.’ Yau nnơơm lah n'hai bu: ‘Bơl 'bei kot phrui han mưt mir nho hei ri.’
8Tơt mang jơ ngôw, nnơơm mir nho lah n'hai bnih kan krai laah: ‘Phrui khuôl bơl bnih bơ kaar lôh u đau jah kah prak lơh kaar aan bu, ptơơm a bnih ptut tơt bnih daak bôôk.’ 9Bơl bnih kươt buôn a pram bêl mau lôh, jôm bnih kươt kah di đơ-ni-ê. 10Tơt bơl bnih a daak bôôk lôh, bu kơn ơơn a kươt geh ơk huôih; dôh bu kot pơih kươt di đơ-ni-ê. 11Plah pơih prak lơh kaar, bu mor lok liêh n'hai yau nnơơm. 12Bu lah: ‘Bơl bnih ptut au dơơn lơh kươt di bêl, dôh nnơơm kot kah prak drơơl n'hai bơl hei laa bơl bnih phrui lơh kaar bool jjơk u phreng tanh nar leq di nar.’ 13Dôh nnơơm mir ơh n'hai di mbu knông bơl bu nei: ‘Gnasaal ơi, hei 'bưn gôq dơq bn'ap n'hai gnasaal laang! 'Bưn geh gnasaal ja mor chhuôr n'hai hei laah kah di đơ-ni-ê laang? 14Phrui kan pơih prak lơh kaar gnasaal ri, ja nei han ơơi; hei êch kah aan bnih ptut au bei ja kah aan gnasaal ei. 15'Bưn dip lah hei 'bưn kươt ch'bap rnhôq ntil ơơn hei geh jah lơh tênh rnđêch hei laang? Paich laa gnasaal sau hei trah baah skiêr hei?’#20:15 Asn: geh lah mat gnasaal ri skiêr đươm hei laa bnih klanh? 16Bei nei, bnih ptut a kươi but a bôôk, nha bnih a bôôk a kươi but ptut.”#Mat 19:30; Mak 10:31; Lu 13:30.
Brah Jê-sus tơmbơh noor wưt pei teq u baak chhưt n'hai baak rêh kươi Pang ri
(Mak 10:32-34; Lu-ka 18:31-34)
17Plah han hao knông poh Jê-ru-sa-lem, Brah Jê-sus liêu êêng jmơt baar [jơrnơ],#20:17 [jơrnơ]: Knông m'baak plơơp 'bian ti 'bưn geh pal sêr au. u lah n'hai bu laah: 18“Au, bơl bơn han hao poh Jê-ru-sa-lem, u Koon Bnih a kươi dol jưn teq ti bơl yau thwaai ndap ttơơm u bơl yau gưt jhai. Bu a kươi pơrkat lưm chhưt Pang, 19ja nei ndơơp Pang aan raih agaih jah bơl bu đam điêl, pơm sơmboong, u pơng đênh lơ chhư rglaang. Dôh tơt pei nar, Pang a kươi rêh kươi.”
Baak dơrnan yau Sê-bê-đê ri
20Plah nei, geh mei bơl koon klau Sê-bê-đê ri n'hai baar koon klau nơơm han tơt Brah Jê-sus, kơltut u teh dan Pang di kaar. 21Pang ôp: “'Bei êch dan ntil ơơn?” Bu ơh: “Dan aan baar koon klau hei ri kươt, di mbu gôq mak ma, di mbu gôq mak giêu Brah, knông nggoor Ay ri.” 22Brah Jê-sus ơh: “Bơl 'bei 'bưn gưt ntil bơl 'bei dan. Bơl 'bei ôn kươt tgaan Hei êch dơơh ôn đêêl?” Bu ơh: “Ơ, kươt đêêl.” 23Pang lah n'hai bu: “Bơl 'bei a kươi ôn tgaan Hei ri; paang kaar gôq mak ma paich mak giêu Hei, nei Hei 'bưn aan kươt. Ktôk nei ơn aan bơl bnih baah Bươp Hei ja riêp ơơm.”
24Ttang bei nei, jmơt jơrnơ tôw hao nuih đat baar du oh bi au. 25Dôh Brah Jê-sus khuôl bu lôh u buôi laah: “Bơl 'bei gưt bơl kan ch'bap raih agaih ri kan bôôk raih bal, nha bơl kan ttih prêh huôih nei pơih ch'bap jah kan bôôk.#Lu 22:25-26. 26Dôh a klung bơl 'bei nei 'bưn geh bei nei; mat baah kươi, 'bơơn êch lơh ttih knông bơl 'bei, nei phrui lơh dêch;#Mat 23:11; Mak 9:35; Lu 22:26. 27lwah bơl 'bei, 'bơơn êch ta yoong a bôôk nei phrui lơh dêch aan bơl 'bei. 28Leq dơng Koon Bnih ja lôh, 'bưn geh jah kươt bu nday jraih kaar, dôh jah jraih kaar bu nday u piyơ sm'boh rêh nơơm lơh griêng kwaai aan ơk bnih.”
Brah Jê-sus tơmbah baar du bnih tiah a Jê-ri-kô
(Mak 10:46-52; Lu-ka 18:35-43)
29Tơt Brah Jê-sus u bơl jơrnơ du rlach poh Jê-ri-kô, geh di phung bnih ơk đat han tênh Pang. 30Tôw, geh baar du tiah gôq gêêng troong, ttang mor Brah Jê-sus han rloot nei khuôl: “Ơi Koon snđach Đa-wit, dan gmaak bơl hei!” 31Phung raih sngaanh bu, maanh rngơt ơơi; dôh bu kươi khuôl ttih huôih: “Brah ơi, Koon snđach Đa-wit, dan gmaak bơl hei!” 32Brah Jê-sus srung, khuôl bu lôh u mor laah: “Bơl 'bei êch Hei lơh ơơn aan bơl 'bei?” 33Bu ơh: “Brah ơi, dan aan pi mat bơl hei kươt a pơơk!” 34Brah Jê-sus gmaak, mơ buut teq u pi mat bu. Kơndaal bu kươt aang pi mat ja nei han tênh Pang.
ទើបបានជ្រើសរើសហើយ៖
Ma-thi-ơ 20: SBL2024
គំនូសចំណាំ
ចែករំលែក
ចម្លង

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024 Bible Society Vietnam. All rights reserved.